Zoob sebre 21:1-34
21 A Zoob leokame n yeel yaa:
2 “Bɩ y kelg m sẽn na n yeelã neere,tɩ rẽ yɩ belsg yãmb sẽn na n kõ maam.
3 Bas-y-m tɩ m gome.M sã n gom n sa, rẽ poore y tõe n yaal-m lame.+
4 Mam yẽgemda ne ninsaal la?
Sã n da yaa rẽ, m na tall sũ-mare?
5 Ges-y maam tɩ y pɛleng yɩke.Pĩ-y y noor ne y nusi.
6 Mam sã n tagsd rẽ yelle, namsd-m lame,tɩ m yĩngã fãa rigda.
7 Bõe yĩng tɩ nin-wẽnsã vɩ n kaoosdẽ,+n kʋʋndẽ, la b paamd paoongo?*+
8 Bãmb kambã bee b sɛɛgẽ wakat fãa,la b paamd n yãtã b yagense.
9 Bãmb yiyã zĩi bãane, rabeem pa tar-ba,+la Wẽnnaam pa sɩbgd bãmb ne a rasaarã ye.
10 Bãmb lolsã tara fɩɩgre.B nag-yãansã rogdame n pa fabd ye.
11 B kom-dibli wã yaa wa rũm-bõoneg sẽn zoet yɩnga,tɩ b kambã yɩgd n tĩimsdẽ.
12 Bãmb yɩɩnda ne bembeng* la pɛndga,tɩ wɩɩg peebdẽ tɩ b kɩdemdẽ.+
13 Bãmb maanda sũ-noog b vɩɩmã tõre,hal n wa sig Yaoogẽ* wã ne bãane.
14 La bãmb yeta Wẽnnaam yaa: ‘Bas-y tõnd sɩɩ!
Tõnd pa rat n bãng yãmb soayã ye.+
15 Ãnda la Sẽn-tõe-a-fãa wã tɩ tõnd na n tũ-a?+
Tõnd sã n bãng-a, bõe la tõnd na n paame?’+
16 La mam miime tɩ b pa tõe tɩ bũmb pa maan b paoongã ye.+
Mam pa tol n tagsd* wa nin-wẽnsã ye.+
17 Naoor a wãn la nin-wẽnsã fɩtl ki-yã?+
Naoor a wãn la yel-beed paam nin-wẽnsã?
Naoor a wãn la Wẽnnaam sũur puug ne bãmb t’a sãam-ba?
18 Nin-wẽnsã zoe n lebga wa moog b sẽn wʋr sobg taoore,la wa wudg sob-kẽeng sẽn dɩk n loogdẽ sɩda?
19 Wẽnnaam na n bĩnga ned sɩbgr a kambã yĩnga.
La bɩ Wẽnnaam dol-a t’a bãng rẽ.+
20 Bɩ a mengã nif yã a sãoongo,la bɩ a yɩ a soab ning sẽn na n yũ Sẽn-tõe-a-fãa wã sũ-puugrã.+
21 Bala yẽ kiisã sõor sã n kʋʋge,+bũmb ning sẽn na n yõd n paam a yirã rãmb a loogr poorã pak-a lame sɩda?
22 Ninsaal tõe n zãmsa Wẽnnaam bũmb la?+Pa yẽ n kaood baa nin-kãsemsã bʋʋd sɩda?+
23 Nina kiidame n da ket n tar keelem,+a sẽn wat n pa tar yelle, tɩ bũmb pa namsd-a,+
24 t’a gɛyã pid ne kaam,t’a kõabã tar pãnga.*
25 Nina me kiida ne sũ-sãams wʋsgo,n pa tol n paam bõn-sõng n lemb ye.
26 Bãmb fãa na n naaga taab n gãand tomẽ,+tɩ zũnzũy rɩ b yiibã fãa.+
27 Ade! Mam mii yãmb sẽn tagsd bũmb ningã,la y sẽn magd to-to n dat n maan maam wẽngã.+
28 Bala yãmb yetame yaa: ‘Nin-kãsengã yir bɛɛ?La fu-roog ning pʋgẽ nin-wẽngã sẽn da be wã bɛɛ?’+
29 Yãmb pa sok so-toagdbã la?
Yãmb pa maagd y yĩng n bao n wʋm b sẽn yetã* võore,
30 n bãng tɩ nin-wẽng põsda yel-beed daare,la tɩ b fãagd-a-la sũ-puugr daar la?
31 Ãnd soab n na n yals a taoor n yeel-a t’a manesmã pa sõma,la ãnd n na n dol yẽnda a tʋʋmde?
32 B sã n tall-a n loog yaadẽ,b na n zĩniga gũud a yaoogẽ wã.
33 A sẽn gãe tãnd ning pʋgẽ wã na n yɩɩ bʋgsg a yĩnga.+Ãdem-biisã fãa pʋgda yẽ+wa sẽn yɩ to-to ne neb ka tɛkã sẽn deng yẽ wã.
34 Woto wã, bõe tɩ y belsd maam ne belsg sẽn ka yõodo?+
Yãmb goamã fãa yaa belgr bala!”
Vẽnegr toor-toore
^ Bɩ “pãnga.”
^ Yaa bũmb sẽn wõnd gãngaoogo, tɩ b zãad ne nug n pãbda.
^ Ges-y gom-biis võor bilgrã zĩigẽ.
^ Bɩ, “magd.”
^ Ebre, “t’a kõabã sɩɩlem yaa maasre.”
^ Ebre, “b bãnã.”
