Zoob sebre 22:1-30
22 Teman rao a Elifaaz+ leokame n yeel yaa:
2 “Ninsaal tõe n tall yõod Wẽnnaam nifẽ?
Ned sẽn tar yam tõe n nafa Wẽnnaam sɩda?+
3 Fo sã n yaa nin-tɩrga, Sẽn-tõe-a-fãa wã toor beeme la?Fo burkĩndã nafd-a-la zĩ-bʋgo?+
4 A na sɩbg foola a bʋ ne foo, f wẽn-zoeerã yĩng sɩda?
5 Pa fo wẽnemã sẽn waoogã,la f kongrã sẽn pa satã yĩng sɩda?+
6 Bala fo ra reegda f ba-biisã bũmb tɩ b yaool n pa tar f sãamde,la f yeesd neb fut n basd-b bɛɛla.+
7 Fo ra pa kõt ko-yũud sẽn tar a soab koom,la f ra pa kõt kom sẽn tar a soab rɩɩb me ye.+
8 Tẽngã yaa pãng soabã n so,+la ned ning b sẽn maan lohormã n vɩ a pʋgẽ.
9 Fo basa pʋg-kõap tɩ b loog nug-zaala,la f nams kɩɩbse.*
10 Yaa rẽ yĩng la bẽds* sẽn gũbg foo,+tɩ pelen-yɩk lingd-fã.
11 Yaa rẽ n so tɩ yaa lik hal tɩ f nif pa tõe n yã,tɩ koom limd-fã.
12 Wẽnnaam pa be saasã zĩ-zãntsẽ sɩda?
Ges ãdsã fãa sẽn beẽ wã zãrem sẽn yaa to-to wã.
13 La fo sokame yaa: ‘Wẽnnaam mii bõe?
A tõe n yãa lik bida pʋgẽ n kao bʋʋd sɩda?
14 Sawatã luda a nini,t’a sã n kẽnd saasã zĩ-zãntsẽ wã bɩ a pa neẽ ye.’
15 Rẽ yĩnga, fo na n tũu pĩnd wẽndẽ sorãnin-wẽnsã sẽn tũ wã,
16 neb nins yõor b sẽn kʋʋg tɩ b wakat pa ta,la sa-kãseng koom sẽn kãag b rãmb yẽbgr n loogã?+
17 Bãmb da yeta Wẽnnaam yaa: ‘Bas-y tõnd sɩɩ!’
La b sokdẽ yaa: ‘Sẽn-tõe-a-fãa wã tõe n maana tõnd bõe?’
18 Wẽnnaam n yaool n yaa Soab ning sẽn pids bãmb yiyã ne bõn-sõma wã.
(Tags-wẽns a woto zãr ne maam.)
19 Nin-tɩrg na n yãa rẽ n kɩdme,la sẽn pa tar-a taalã na n yaala bãmb n yeel yaa:
20 ‘B sãama tõnd bɛɛbã,la bugum n na n dɩ b bũmb nins fãa sẽn ketã.’
21 Bao n bãng Wẽnnaam tɩ f na paam bãane.Dẽ, fo na n paama bõn-sõma.
22 Sak tõogã sẽn yit a noorẽ wã,la f tall a goamã f sũurẽ.+
23 Fo sã n lebg n wa Sẽn-tõe-a-fãa wã nengẽ, fo na n le lebga sõma wa pĩndã.+Fo sã n yiis yel-kɛgã fãa fo fu-roogẽ wã,
24 fo sã n lob f sãnemã* tomẽ,la f lob f Ofɩɩr sãnemã+ pĩisã londẽ,
25 Sẽn-tõe-a-fãa wã na n lebga fo sãnem.*La yẽ na n yɩɩ fo wanzuri sẽn yaa sõma n yɩɩda.
26 Woto, fo na n kɩdma Sẽn-tõe-a-fãa wã yĩnga,la f na n zẽka f neng n tees Wẽnnaam.
27 Fo na n yõka yẽ sɛɛga, la a na n kelga foo,la fo na n pidsa f pʋlemsã.
28 Fo sẽn na n yãk yam n maan bũmb ning fãa na n yãka nenga,la vẽenem na n yãga fo sorã zugu.
29 Fo sã n gom ne wilg-m-menga, a na n sika foo,la a na n fãaga sik-m-mens rãmbã.
30 Yẽ na n fãaga ka-taal dãmbã.Woto wã, fo nusã sã n yaa yɩlma, hakɩɩka, a na n fãaga foo.”
Vẽnegr toor-toore
^ Ebre, “kamb sẽn pa tar ba-rãmba.”
^ Ebre, “liuul bẽds.”
^ Bɩ, “sãnem-gilã.”
^ Bɩ, “sãnem-gila.”
