Zoob sebre 24:1-25
24 “Bõe yĩng tɩ Sẽn-tõe-a-fãa wã pa yãk bʋ-kaoor daare?+
Bõe yĩng tɩ neb nins sẽn mi-a wã pa yãt raar-n-kãnga?
2 Nebã sersda tods bãna.+Bãmb zuuda neb rũm-bãooneg n kẽngd b rũms wãbneg zĩigẽ.
3 Bãmb reegda kɩɩbs* bõens n sooge,la b reegd pʋg-kõor loalg n gãneg n yaool n peng-a bũmbu.+
4 Bãmb modgda naong rãmb tɩ b bʋdg n bas sore.Sẽn pa tar-b sõangd tẽng zugã segd n solga bãmb yĩnga.+
5 Naong rãmbã namsd n baooda rɩɩb wa we-bõens+ sẽn be we-raoogẽ.B baooda rɩɩb we-rasempʋɩɩgẽ wã n na n kõ b kamba.
6 Bãmb segd n kẽeba ned a to pʋʋgẽ,la b yiis viyn biis nin-wẽng viyn pʋʋgẽ.
7 Bãmb gãee bɛɛl yʋngo, n pa tar fuug ye.+Bãmb pa tar fu-gobs waoodã yĩng ye.
8 Sa-koom sodgda tãng zug n pãbd bãmba,tɩ b soonded pĩisẽ, soondg zĩig sẽn kae yĩnga.
9 Bãmb fãsgda kɩɩb* a ma bĩisrẽ,+la b reegd naong rãmb fut n gãneg n yaool n peng-b bũmbu,+
10 n kɩtdẽ tɩ b kẽnd bɛɛl n pa tar fuugu,la b tʋkd ka-gĩn ne pʋ-vɩʋʋgo.
11 Bãmb tʋmda tʋʋm-toog kunkub sigdsẽ, kugã lals sʋk wĩntoogã pʋgẽ.*B tabda viyn biis vẽ wẽkr bogdẽ, tɩ ko-yũud yaool n tar-ba.+
12 Sẽn gãe-b n dat n ki wã tara wõosg tẽngã pʋgẽ.Sẽn pogl-b wʋsgã kelemdame n kot sõngre,+la Wẽnnaam pa get tɩ yaa bũmb sẽn pa segd ye.*
13 Neb n be n kɩɩsd vẽenem.+Bãmb pa bãngd a soayã,la bãmb pa tũud a so-bugsã ye.
14 Nin-kʋʋd yikda yibeoog pĩnda,n kʋʋd neb nins sẽn pa tar sõangda, la naong rãmba,+tɩ zĩig sã n sobg bɩ a zuuda.
15 Rao sẽn yaa yoaad* gũuda zĩ-sobdo,+n yetẽ yaa: ‘Ned kõn yã maam ye!’+
La a luta a nenga.
16 Lik sasa, bãmb kaooda rot n kẽedẽ.Wĩntoogo, bãmb pagda b mens rot pʋsẽ.
Vẽenem yaa bõn-sãang ne-ba.+
17 Bãmb nifẽ, yibeoog ne lik bida yaa a ye.Bãmb minima bũmb nins sẽn kẽesd rabeem lik bida pʋgẽ wã.
18 La koom peegda bãmb n loogd tao-tao.
B na n kãaba bãmb soolmã wẽnga.+
B pa na n lebg n wa b viyn pʋtẽ wã ye.
19 Wala ware, la wa tʋʋlg sẽn loogd ne sa-lamd sẽn boogdã,Yaoogã* me venda neb nins sẽn maan yel-wẽnã.+
20 A ma wã na n yĩma a yelle. Zũnzũy n na n dɩ-a sõma.
B pa na n le tẽeg a yell ye.+
B na n kaoo neb nins sẽn pa tɩrsã wa tɩɩga.
21 Yẽ wẽgda pʋg-kiri,la a namsd pʋg-kõore.
22 Wẽnnaam na n talla a pãngã n menes pãens rãmbã.Baa b sẽn tõe n yikã, b pa mi b na n vɩɩmdame bɩ b pa na n vɩɩmd ye.
23 Wẽnnaam basame tɩ b pɛlg lebg kãn-kãe, tɩ b zĩ bãane,+la a nif geta b sẽn maandã fãa.+
24 B paamda zẽkr wakat bilfu, tɩ rẽ poor bɩ b pa le be ye.+
B sikd-b lame+ n tigs-b wa neb a taabã.B kẽebda bãmb wa ka-zutu.
25 Masã, ãnd n tõe n wilg tɩ mam yaa zirẽ-be-neda,wall a kɩɩs m goamã?”
Vẽnegr toor-toore
^ Ebre, “kamb sẽn pa tar ba-rãmb.”
^ Ebre, “biig sẽn pa tar ba.”
^ Pa rẽ bɩ, “Bãmb wẽkda kaam kugã lals sʋka.”
^ Pa rẽ bɩ, “Wẽnnaam pa ningd ned baa a ye taal t’a maana wẽng ye.”
^ Ebre gom-bilã tõe n bilgda rao sẽn yood ne ned paga.
^ Ges-y gom-biis võor bilgrã zĩigẽ.
