Zoob sebre 27:1-23
27 A Zoob leb n gomame n yeele:
2 “M wẽen ne Wẽnnaam sẽn vɩ wã, soab ning sẽn mong maam bʋʋmã,+m wẽen ne Sẽn-tõe-a-fãa wã sẽn vɩ wã, soab ning sẽn kɩt tɩ sũ-toog tar maamã,+
3 tɩ mam sã n ket n vʋʋsd ne yõore,tɩ Wẽnnaam vʋʋsmã ket m yõ-bogdẽ wã,+
4 mam no-bɩmsã kõn tol n gom gomd sẽn yaa kɛgre,la m zɩlemdã kõn yag ziri ye!
5 Mam kõn saag n yeel tɩ yãmb yaa tɩrs ye!
Hal n tãag m kũum, mam kõn bas m burkĩndã ye!+
6 Mam na n kell n gãda m tɩrlmã, m kõn tol n bas-a ye.+Mam sã n ket n vɩ, m sũurã pa na n ning-m taal ye.
7 Bɩ mam bɛ lebg wa nin-wẽnga,tɩ sẽn namsd-b maamã yɩ wa neb nins sẽn pa tɩrsã.
8 Wẽnnaam sã n wa sãam wẽn-zɩta,* yẽ sã n wa yãk a yõorã,+bõe saagr la a tara?
9 Toog sã n wa paam-a,Wẽnnaam na n wʋma yẽ kɛleng bɩ?+
10 Bɩ a na n maana sũ-noog Sẽn-tõe-a-fãa wã yĩnga?
A na n yõka Wẽnnaam sɛɛg wakat fãa bɩ?
11 Mam na n wilga yãmb bũmb Wẽnnaam pãngã wɛɛngẽ.*Mam pa na n solg yãmb baa fʋɩ Sẽn-tõe-a-fãa wã zug ye.
12 Ade! Yãmb fãa sã n paama vẽnegre,bõe tɩ y goamã yaa gom-vɩɩdo?
13 Ad Wẽnnaam sẽn na n dol nin-wẽng bũmb ninga.+Yaa pʋɩɩr ning nin-toaag sẽn na n deeg Sẽn-tõe-a-fãa wã nengẽ:
14 A kambã sã n lebg wʋsgo, sʋʋg n na n kʋ-ba,+la rɩɩb na n paooga a yagensã.
15 A sẽn na n ki n bas b rãmbã, bã-toaag n na n kʋ-ba,la b pʋg-kõapã kõn yãb b yĩng ye.
16 Baa a sã n kãag wanzuri n sam wa tom,la a sam fu-neeb wa yagdo,
17 baa a sã n tigs-ba,nin-tɩrg n na n yeelg-ba,+la sẽn pa tar-b taalã n na n pʋɩ taab a wanzuri wã.
18 A sẽn met roog ningã yaa faoog wa mogd* roogo,la wa sẽok+ gũud sẽn ti.
19 Yẽ na n kẽe gãag n yaa arzɛk soaba, la a pa na n tigs bũmb ye.A sã n wa puk a ninã, baa fʋɩ pa na n le ketẽ ye.
20 Pelen-yɩk n buiid-a wa sa-kẽeng koom.Sob-kẽeng n fãsgd-a n loogd ne yʋngo.+
21 Yaang sobg n na n peeg-a n looge, t’a meneme.A na n pɩɩsa yẽ a zĩigẽ wã t’a meneme.+
22 A na n fuga yẽ zugẽ n pa zoe a nimbãanega,+t’a maand a sẽn tõe fãa n na n zoe sobgã pãngã.+
23 Sobgã na n wẽe nug-poak n la-a,la a pa a zĩigẽ wã n fɩɩl+ n yaal-a.*
Vẽnegr toor-toore
^ Bɩ, “sɩdã kɩɩsda.”
^ Pa rẽ bɩ, “Mam na n tũnuga ne Wẽnnaam nugã n zãms yãmba.”
^ Ebre wã gom-bilã bilgda bõn-yɩgdg sẽn dɩt futu.
^ Pa rẽ bɩ, “Bãmb na n wẽe nug-pogs n la-a, la b pa b zĩigẽ wã n fɩɩl n yaal-a.”
