Zoob sebre 29:1-25
29 A Zoob leb n gomame n yeele:
2 “M nongẽ-la kiis nins sẽn loogã sẽn da na n ketẽ,wakat ning Wẽnnaam sẽn da gũud maamã,
3 wakat ning yẽ sẽn da kɩt t’a fɩtlã vẽenem yãgd mam zugu,tɩ mam da kẽnd lik pʋgẽ ne a vẽenemã.+
4 Wakat kãnga, mam da yaa rao sẽn tar pãnga,n da tar zood sõma ne Wẽnnaam.+
5 Sẽn-tõe-a-fãa wã ra ket n bee ne-ma,tɩ mam kambã* ra karg n gũbg-ma.
6 Mam da waasda m nao bĩis-kaam pʋgẽ,tɩ pĩisã ra kiigd kaam wa kʋɩls n kõt maam.+
7 Mam sẽn da wa n kẽnd tẽngã rignoor+n tɩ zĩ zãma wã zĩigẽ wã,+
8 kom-bɩɩsã sã n da yã maam, b lakdame.*Baa nin-kẽembã ra yikdame n yas yĩngri.+
9 Nanambsã ra sĩndedame,n dɩk b nus n pĩ b noore.
10 Nin-kãsemsã ra basda goam.B zɩlmã ra tabendeda b ragsendagsã.
11 Ned ning fãa sẽn da kelg maam ra gomda mam yell neere,tɩ sẽn da yãt-b maamã ra kõt kaset n sõngd maam.
12 Bala mam da fãagda naong soab sẽn kelemd n kot sõngre,+ne kɩɩba,* la ned ning fãa sẽn da pa tar sõangda.+
13 Sẽn da kolg-a kũum ra ningda maam barka.+La mam da noogda pʋg-kõor sũuri.+
14 Mam da yera tɩrlem wa m fuugu.Mam tɩrlmã ra yaa wa kasaabo,* la wa zu-vindga.
15 Mam da lebga nin zoang yĩnga,la nao põor yĩnga.
16 Mam da lebga naong soab ba.+Mam da sõngda sãambã tɩ b paam tɩ b kao b bʋʋd tɩrga.+
17 Mam da wãada nin-wẽng yɛya,+n fãsg a sẽn yõk a soabã a yẽnẽ wã.
18 Mam da yetame yaa: ‘Mam na n kii m yirã,+la mam rayã na n yɩɩ wʋsg wa bĩisri.
19 Mam yẽgã na n tẽeg n taa koomẽ,la meenem na n zĩnda m wilã zut yʋngã tõre.
20 Mam ziirã palemda wakat fãa,tɩ tãpã sẽn be m nugẽ wã na n ket n tãoodẽ.’
21 Nebã ra maagda b meng n kelgd maam,n sĩnd n gũudẽ n na n wʋm mam saglsã.+
22 Mam sã n da gom n sa, b ra pa le tar bũmb n na n paas ye.Mam goamã ra nooma b tʋbã.
23 B ra gũuda maam wa saagã.B ra yãgd n na n kelga mam goamã, wa ned sẽn gũud yaoolem saag ne yãgbo.*+
24 Mam sã n da yõgemd m noor ne-ba, b ra pa tẽed ye.Mam nengã vẽenem ra kengda b pelse.
25 Mam da wilgd-b-la sor wa b taoor soaba,n da vɩ wa rĩm sẽn be a tãb-biis sʋka,+la wa ned sẽn belsd sũ-sãang rãmba.+
Vẽnegr toor-toore
^ Bɩ, “tʋm-tʋmdbã.”
^ Ebre, “b solgda b mense.”
^ Ebre, “biig sẽn pa tar ba.”
^ Bɩ, “kobr sẽn yaa bãg-vɩɩdo.”
^ Ebre, “B ra yaaga b noorã yaleng wa yaoolem saagã yĩnga.”