Yʋʋmd 2019 wã tɛka, d na n paamda sẽk wʋsg n segend Kiristã kũumã tẽegre. A Zeezi kũumã tẽegr sã n seg ra-zaan-daare, Kiris-nebã vɩɩm la b tʋʋma tigsgã pa na n zĩnd semen-kãng ye. La a sã n seg sibr wall hato, zãma taoor sõsgã la Gũusg Gasgã zãmsg pa na n zĩnd ye. Yãmb na n modgame tɩ sẽk ning y sẽn na n paamã naf-y bɩ? Pĩnd wẽndẽ wã, b ra segd n segla bũmb toor-toor Zu-soabã zaabr dɩɩbã yĩnga. Ket n yaa woto rũndã-rũndã. (Luk 22:7-13; km 3/15 1) La ned kam fãa segd n segla a meng a sũurã pʋgẽ. Wãn to la d tõe n maan dẽ?

• Bʋgs-y tẽegrã kẽngr yõodã sẽn ta zĩig ningã zugu.—1 Kor. 11:23-26.

• Pʋʋs-y-yã a Zeova n kos-a t’a sõng-y tɩ y fees y meng n ges yãmb ne yẽ zoodã pãng sẽn yaa to-to.—1 Kor. 11:27-29; 2 Kor. 13:5.

• Karm-y siglgã sɛb nins sẽn wilgd a Zeezi kũumã tẽegr yõodã, la y bʋgse.—Zã 3:16; 15:13.

Koe-moondb kẽer karemda vɛrse nins sẽn be D vaees Gʋlsg Sõamyã daar fãa sebrã pʋgẽ tẽegrã yĩngã, la b bʋgse. Sãnda karemda vɛrse nins sẽn be zĩ-gũbr ning sẽn be tẽngrã pʋgẽ wã. Kẽer me lebsd n karma Gũusg Gasgã sõss sẽn gomd tẽegrã yelle, la bũmb nins a Zeova ne a Zeezi sẽn maan n wilg tɩ b nonga tõndã yelle. Y sẽn yãk bũmb ning fãa n na n zãmse, d sẽn dat yaa rẽ kɩt tɩ yãmb ne a Zeova la Zeezi zoodã pãng paase.