A YÕODÃ: Sẽn na yɩl n paam fãagre, ninsaalbã segd n pʋʋsa ne a Zeova yʋʋrã. (Rom. 10:13, 14) La pa neb nins fãa sẽn sakd n sɩng Biibl zãmsgã n dat n tũ a Zeova noyã ye. D sẽn pa rat n sãam d sẽkã koe-moonegã sasa wã, d sõngda sẽn sɩd rat-b n toeem n ta a Zeova yamã bala. D sã n zãmsd ned Biiblã tɩ wa kaoosdẽ t’a pa rat n modg n toeeme, sẽn são yaa d sẽn na n bas-a, la d sõng neb nins a Zeova sẽn takd n wat a nengẽ, la a siglgã pʋgẽ wã. (Zã 6:44) La a soabã sã n wa wilg t’a “tara yam ning sẽn zems ne vɩɩm sẽn ka sɛtã,” d le sɩngd-a-la Biiblã zãmsg ne sũ-noogo.—Tʋʋ. 13:48, MN.

SẼN SEGD N YƖ TO-TO:

• Pẽg-y karen-biigã a sẽn dat n paam bãngr hakɩɩkã yĩnga.—1 Tɩm. 2:4.

• Wilg-y-yã-a tɩ tara yõod t’a tũ a sẽn zãmsdã.—Luk 6:46-49.

• Maag-y y yĩng n sõs a Zeezi ka-fẽrgdã yel-bũndã zug ne-a, la y kos-a t’a tags n ges bũmb ning sẽn kɩt t’a pa tũud a sẽn zãmsdã.—Mat. 13:18-23.

• Maag-y y yĩng n wilg-a y sẽn na n bas a zãmsgã võore.

• Wilg-y-yã-a tɩ y na n mi n wat n kaagd-a lame, la t’a sã n wa sɩng bũmb ning a sẽn bãngã tũubu, y tõe n le sɩnga zãmsgã.

GES-Y VIDEO WÃ, TƖ RẼ POOR BƖ Y LEOK SOGSGÃ:

• Bõe la yãmb wʋm b sõsgã pʋgẽ tɩ wilgdẽ tɩ karen-biigã pa tũud a sẽn zãmsdã?

• Wãn to la koe-moondã sõng-a t’a bãng t’a segd n toeemame?

• Bõe la koe-moondã yeel karen-biigã tɩ wilgdẽ t’a sã n wa rata, a tõe n le sɩng-a-la Biiblã zãmsgo?