Yʋʋmd 2018 wã tɛka, periodik-rãmbã b sẽn yiisd zãma wã yĩnga pʋsẽ, b pa le wɛgsd gom-zut toor-toor ye. Periodik fãa wɛgsda gom-zug a yembr bala. Periodik-rãmbã naaga tõnd koe-moonegã tʋʋm-teedã. Dẽnd d tõe n tall-b lame n moon koɛɛgã. D tõeeme me n ning bãmb b wãn d korgã pʋgẽ, d sã n wa na n tog sore, bɩ n kẽng n tɩ ra teedo. B pa yiisd periodik-rãmbã sẽn na yɩl tɩ d tall-b n zãms ned Biiblã ye. La b tõe n sõnga ned t’a tʋlg n bãng a Zeova n paase.

Y sã n paam n sɩng sõsg ne neda, karm-y Biiblã vɛrse, la y wilg-a sõsg sẽn be periodikã pʋgẽ sẽn na n yɩ-a noogo. Wala makre, a soabã sã n tara kamba, bɩ a sã n bẽeda depresɩyõ wã, y tõe n yeel-a lame yaa: “Sẽn pa kaoose, m karma sõsg sẽn be ka tɩ yɩ maam noogo. M tõe n wilg-y lame bɩ?” Yãmb sã n tagsdame t’a soabã rat n bãng n paasame, y tõe n kõ-a-la periodikã mengã, wall y tool-a periodikã ne y tablɛtã bɩ y portaablã maasem, baa yaa pipi la woto yãmb sẽn sõsd ne a soabã. Yaa sɩd tɩ pa kõ nebã sɛbã n pak tõnd n tɩ yɩɩd ye. La periodik-rãmbã tõe n sõnga tõnd tɩ d tõog n bãng neb nins sẽn na n sak n tũ bũmb nins b sẽn zãmsdã.—Tʋʋ. 13:48.