Sɩpaolg kiuugã pʋgẽ, tõnd ned kam fãa na n maana modgr meng-menga n moon koe-noogã n wilg nebã tɩ dũni-paalg n wat ka la bilfu. (Yɩɩn. 37:10, 11; Vẽn. 21:3-5) Sigl-y y sẽkã, sẽn na yɩl n tõog n kẽes y toog sõma, koe-no-kãngã d sẽn na n moon dũniyã gill zugã pʋgẽ. Y sã n gʋls n kos n na n lebg sõngr so-pakd sɩpaolg kiuugã pʋgẽ, y tõe n yãka yam n moon lɛɛr 30 bɩ 50.

Segl-y y menga, sẽn na yɩl n tõog n karem vɛrse sẽn gomd dũni-paalgã yell n wilg neb wʋsgo, wa y sẽn tõe tɛka. Y sã n wa rat n yãk Biiblã vɛrse y sẽn na n karme, bɩ y yãk vɛrse goam sẽn na n kẽ y koe-moonegã zĩigẽ nebã sũyã. Pipi sõsgã sasa, ned sã n wilg t’a rat n bãng n paasame, bɩ y kõ-a yʋʋmd 2021 Gũusg Gasgã b sẽn yiis nebã fãa yĩnga, N° a 2 soabã. Rẽ poor bɩ y lebg n tɩ kaag a soabã tao-tao, la y modg n sɩng Biibl zãmsg ne-a, Vɩɩmd-y wakat sẽn kõn sa! borsiirã pʋgẽ. D sã n kẽesd d toog sõma n moond ‘sũ-noog koɛɛgã’, sɩd kõta sũ-noogo.—Eza. 52:7.

GES-Y YƖƖLL SẼN NAAG NE VIDEO WÃ: LE MONDE NOUVEAU. RẼ POOR BƖ Y LEOK SOGSGÃ:

• Bõe la bi-pugl-kɩdgã mamsd a yamẽ, beoog-daarã wɛɛngẽ?

• Bõe ne bõe la yãmb dat n wa paam dũni-paalgã pʋgẽ?

• D sã bʋgsd bũmb nins d sẽn saagd n na n paamã zugu, wãn to la tõe n sõng tõnd tɩ d segl d menga, n tõog n kẽes d toog sõma koe-noogã d sẽn na n moon dũniyã gill zug sɩpaolg kiuugã pʋgẽ wã?—Luk 6:45.