D sẽn be “yaoolem wakatã” baasgẽ wã, d miime tɩ yɛlã na n maneg n kengdame. (2 Tɩm. 3:1; Mat. 24:8) Sabab-wẽng wakate, a Zeova nin-buiidã wae n paamda sagls la noy sẽn kell n zemse, b yõyã koglg yĩnga. Yaa d sã n pĩnd n segl d meng masã mengã, la d wat n tõog n põs sabab-wẽng sasa. Rẽ baoodame tɩ d ges d tẽebã yelle, la d segl bũmb toore-toore.—Luk 16:10.

• Ges-y y tẽebã yelle: Modg-y tɩ Biiblã karengã la a zãmsgã yɩ y daar fãa minungu. Bao-y n bãng-y y sẽn tõe n moon koɛɛgã to-to ne manesem buud toor-toore. Baa sã n wa mik tɩ yãmb pa be ne y tigingã neb a taabã bɩ y ra yɛɛs ye. (Eza. 30:15) Bãng-y tɩ baa fʋɩ pa tõe n welg yãmb ne a Zeova la a Zeezi ye.—od 176 s. 15-17

• Segl-y bũmb toor-toore: Segl-y bũmb toor-toor n ning korg pʋgẽ n bĩngi. Rẽ sẽn yãk a toogo, bao-y rɩɩbo, koom, tɩto, la bũmb a taab n bĩngi, tɩ sã n wa lebg tɩlɛ tɩ y pa zakẽ n kaoos bilf bɩ sõng-yã.—Yel. 22:3; g17.5 4, 6.

GES-Y VIDEO WÃ: YÃMB SEGL N SAA SABAB-WẼNG YĨNG BƖ? RẼ POOR BƖ Y LEOK SOGSGÃ:

• Wãn to la d tõe n ges d tẽebã yelle, n segl d meng sabab-wẽng yĩnga?

• Bõe yĩng tɩ yaa tɩlɛ tɩ d . . .

  • modg tɩ kãsem-dãmbã paamd d kibar wakat fãa?

  • reng n segl bũmb toor-toor n ning korg pʋgẽ n bĩngi?

  • bao n bãng sabab-wẽns nins buud sẽn tõe n paam-dã, la d sẽn tog n maan yell fãa pʋgẽ?

• Sabab-wẽng sã n paam neba, bũmb a tãab la d tõe n maan n sõng-ba. Yaa bõe ne bõe?

SOK F MENGA: ‘Koronavirisã bã-longdgã sẽn sɩngã tɛka, yam-bʋg la m dɩk-yã, reng n segl f meng sabab-wẽng yĩngã wɛɛngẽ?’