Nonglem yaa wa loɛtg sẽn loet zak rãmb ne taaba. Nonglem sã n pa be zak pʋgẽ, na n yɩɩ toog ne zakã rãmb tɩ b zems taaba, la b naag taab n tʋm ne yam a yembre. Bõe la pʋg-sɩdbã, pagbã la roagdbã tõe n maane, n wilg tɩ b nonga taab b zagsã pʋsẽ?

Rao sẽn nong a pag na n gesame t’a paamd bũmb nins sẽn yaa tɩlɛ ne-a wã, la a kelgd a tagsgo. (Efɛ. 5:28, 29) A na n gesame t’a zakã rãmb paamd rɩɩb la teed a taab sẽn yaa tɩlɛ, la a sõng-b tɩ b kell n tall zood sõma ne a Zeova. Wala makre, a na n gesame tɩ b maand zak pʋgẽ Biibl zãmsgã n pa vaandẽ ye. (1 Tɩm. 5:8) Pag sẽn nong a sɩd na n sulgd n sakd-a lame, la a ‘waoogd-a ne a sũur fãa.’ (Efɛ. 5:22, 33; 1 Pɩy. 3:1-6) Pagã ne a sɩdã segd n sakd n kõta taab sugri. (Efɛ. 4:32) Roagdb sẽn nong b kamb segd n wilgdame tɩ biig fãa yell pak-b lame, la b sõng-b tɩ b wa nong a Zeova. (Tõo. 6:6, 7; Efɛ. 6:4) Zu-loe-bʋs la kambã paamd lekollẽ wã? Wãn to la b maanda, b taabã sã n wa pẽdgd-b n dat tɩ b maan wẽnga? Zakã rãmb sã n nong taab sõma, ned fãa yam na n gãee bãane.

GES-Y VIDEO WÃ: D KELL N WILG NONGLEM HAKƖƖKA, ZAKÃ PƲGẼ. RẼ POOR BƖ Y LEOK SOGSGÃ:

• Wãn to la rao sẽn nong a pag get a yelle, la a wilgd t’a nand-a lame?

• Wãn to la pag sẽn nong a sɩd wilgd t’a waoogd-a-la ne a sũur fãa?

• Wãn to la roagdb sẽn nong b kamb zãmsd-b Wẽnnaam Gomdã?