A Zeova nifẽ, sẽn kẽ-b kãadmã segd n pidsa bũmb ning b sẽn pʋlem taab b kãadmã daarã. A ratame tɩ b zĩnd ne taab b yõor tɛka. (Mat. 19:5, 6) Wẽnnaam nin-buiidã sʋka, neb wʋsg sẽn kẽ kãadem kõta mak-sõngo. La kãadem sẽn zems zãng kae ye. Zu-loees mi n beeme. Neb wʋsg tagsdame tɩ b sã n wa tar zu-loees b kãadmã pʋgẽ, tɩɩmã yaa b sẽn na n welg taaba, pa rẽ bɩ b kao b kãadmã. La d pa segd n tagsd wa bãmb ye. Bõe la kiris-neb nins sẽn kẽ kãadmã tõe n maane, tɩ b kãadmã yɩ sõma?

Ad sagls a nu:

1. Zãag-y y meng ne bũmb nins sẽn tõe n wa kɩt tɩ y kãadmã sãame. Wala makre, y pa segd n maan wa y rooda ned a to sẽn pa y sɩd wall y pagã, pa rẽ bɩ n get reem bɩ filim sẽn wilgd yoob yɛl ye.—Mat. 5:28; 2 Pɩy. 2:14.

2. Modg-y n paas-y yãmb ne Wẽnnaam zoodã pãnga, la y maneg n dat ne y sũur fãa tɩ y kãadmã ta a yam. —Yɩɩn. 97:10.

3. Ket-y n yeelgd-y nin-paalgã, la y maand bũmb kẽer sẽn wõnd yaa yel-bõonese, n yaool n na n kɩt tɩ y sɩdã wall y pagã sũur yɩ noogo.—Kol. 3:8-10, 12-14.

4. Ket-y n gomd-y ne taab ne waoogre, la y sõsd sõss sẽn na n paas yãmb zoodã pãnga.—Kol. 4:6.

5. Bɩ ned kam fãa ket n kõt a to wã a rẽnd lagengã wɛɛngẽ ne yamleoogo.—1 Kor. 7:3, 4; 10:24.

Kiris-neb nins sẽn kẽ kãadmã sã n wilgd tɩ b nanda b kãadmã, b waoogda a Zeova, soab ning sẽn lugl kãadmã.

GES-Y VIDEO WÃ: “D NANG PÃNG NE ZOEES×D TŨ ZOEESà NOYÃ.” RẼ POOR BƖ Y LEOK SOGSGÃ:

• Baa y kãadmã sã n sɩnga noog-noogo, zu-loe-bʋs n tõe n wa beẽ?

• Biiblã sagl-bʋs n tõe n sõng neb nins sẽn kẽ kãadem, n yaool n getẽ tɩ yaa wa b pa le nong taabã?

• No-bʋs la a Zeova lugl kãadmã wɛɛngẽ?

• Pag ne a sɩd sã n dat tɩ b kãadmã yɩ sõma, bõe la b ned kam fãa tog n maane?