A Sãmwɛll kell n maana sɩd ne a Zeova a vɩɩmã tõre. A sẽn wa n yaa yãaga, a pa sak n na n lebg wa a Eli kom-dibli a Ofni ne a Fineyaas sẽn da tʋmd tʋʋm-beedã ye. (1 Sãm. 2:22-26) A Sãmwɛll ra ket n bɩtame, la a Zeova ra bee ne-a. (1 Sãm. 3:19) A sẽn wa n kʋʋlã, a ra ket n maanda sɩd ne a Zeova, baa ne a kom-dibli wã sẽn da pa le maand sɩd ne a Zeova wã. —1 Sãm. 8:1-5.

A Sãmwɛll mak-sõngã wilgda tõnd bõe? Yãmb sã n yaa bi-bɩɩga, bas-y y yam t’a Zeova mii zu-loees nins y sẽn maood ne wã, la rẽ sẽn namsd yãmb to-to wã. A tõe n sõnga yãmb tɩ y paam raoodo. (Eza. 41:10, 13) Yãmb sã n yaa roagda, n tar biig sẽn pa le tũud a Zeova, y sẽn mi t’a Sãmwɛll ra pa tõe n modg a kom-dibli wã sẽn da yaa kãsembã tɩ b kell n maan sɩd ne a Zeova n tũud a noyã, yaa bũmb sẽn tõe n bels-yã. A basa yellã a Zeova nugẽ, n kell n tall a burkĩndã, la a maan bũmb nins sẽn tat a Zeova sẽn yaa d saasẽ Ba wã yam. Tõe tɩ y mak-sõngã na n sõnga y biigã, t’a le sɩng a Zeova tũubu.

GES-Y VIDEO WÃ: D RƖK YAM B KIBARÃ PƲGẼ: A SÃMWƐLLE. RẼ POOR BƖ Y LEOK SOGSGÃ:

• A Sãmwɛll sẽn wa n yaa yãagã, wãn to la a wilg t’a tara raoodo?

• Wãn to la a Dani wilg t’a tara raoodo?

• A Sãmwɛll sẽn wa n kʋʋlã, wãn to la a kõ mak-sõngo?

• Wãn to la a Dani roagdbã kõ mak-sõngo?