D WILG TƖ D YAA KIRIS-NEB HAKƖƖKA
Bõe la d tõe n maan n sõng sabab-wẽng poore?
Rũndã-rũndã, sabab-wẽnsã sõorã tara paasg bala. Sabab-wẽng sã n maane, sẽn na yɩl n sõng nebã, b segd n sigla yɛlã fãa sõma, la b ges tɩ bũmb fãa tũ taab sõma. Rẽ n so tɩ Siglgã taoor lʋɩtb Sull nebã ges tɩ b lugl biru sẽn get nebã sõngr yell sabab-wẽng sasa filiyall fãa pʋgẽ.
Biru-kãng nebã sã n bãng tɩ sabab-wẽng n maan zĩig ninga, tao-tao bala, b na n boola zĩ-kãng tigingã kãsem-dãmbã, sẽn na yɩl n bãng koe-moondbã sẽn dat sõngr ninga. Sabab-wẽngã sã n sãama bũmb wʋsgo, hal tɩ koe-moondbã pa tar tõog n tõe n maneg b toore, filiyallã na n yãka saam-biis tɩ b lʋɩ taoor tɩ nebã paam sõngre. Saam-bi-kãens tõe n data neb sẽn na n sak n tʋm ne yamleoogo, bɩ n dat tɩ b kõ kũun takɩ, pa rẽ bɩ n da rɩbd la bũmb a taab n pʋɩ d tẽed-n-taas nins sẽn be be wã.
B sẽn maand woto wã, nafa wã yaa wʋsgo. Sõngdame tɩ nebã modgrã ra yɩ zaalem, tɩ zũnd-zãnd kaẽ, tɩ b tõe n kẽgs ligdi, la b da ra teed sẽn pa tɩlɛ ye. D tẽed-n-taag fãa sã n yaool n dat n maan a sẽn date, pa yɩt woto ye.
Filiyallã sẽn yãk saam-biis ninsã tõe n ges n yãka nebã sõngrã tʋʋmd sẽn baood ligd ningã, la neb nins sẽn na n sak n tʋm ne yamleoogã sõore. Sẽn paase, b tõe n kosa sabab-wẽngã sẽn maan zĩig ningã taoor-dãmb sõngre, bala b mi n sõnga tõnd tɩ d paam n tool d sõngrã teed tao-tao. Dẽnd sã n pa b kõo yãmb sore, ned pa segd n kos a tẽed-n-taasã tɩ b kõ ligdi, tɩ b tool rɩbd la bũmb a taaba, pa rẽ bɩ n tog sor n kẽng sabab-wẽngã zĩigẽ ye.
Sabab-wẽng sã n maane, d rat n sõngame. (Ebre. 13:16) D nonga d tẽed-n-taasã! Bõe la d tõe n maane? Sẽn yɩɩd fãa, d tõe n pʋʋsa sabab-wẽngã sẽn paam-b rãmbã, la sẽn get-b nebã sõngrã yellã yĩnga. Sẽn paase, d tõe n toola kũuni, tʋʋmdã d sẽn tʋmd dũniyã gill zugã yĩnga. Ne Siglgã taoor lʋɩtb Sull neb sõngre, filiyall-dãmbã mii b sẽn na n tall kũunã n tʋm tɩ zems to-to. Tõnd mengã sã n dat n kẽesa d toogo, d tõe n gʋlsa Demande d’admission comme volontaire au développement des constructions locales (DC-50) n kɩse, n wilg tɩ d rat n sõngame.
GES-Y VIDEO WÃ: SA-KÃSENG SẼN NI N SÃAM TEED WƲSG BERZƖLL SOOLMẼ WÃ. RẼ POOR BƖ Y LEOK SOKRÃ:
A Zeova Kaset rãmbã sẽn maan bũmb nins n sõng b tẽed-n-taasã sa-kãsengã sẽn ni Berzɩll soolmẽ wã yʋʋmd 2020 wã, bõe n noom yãmba?
