D sẽn yaa neb sẽn pa zems zãngã yĩnga, d segd n modga wakat fãa sẽn na yɩl n tõogd d tʋlsmã. D sã n maand d sũurã sẽn dat fãa, d tõe n wa konga a Zeova barkã. Wala makre, kẽer nonga rɩɩbã, futã la rotã n yɩɩd Wẽnnaam. Sãnda sẽn pidsd b tʋlsmã pag ne rao lagengã wɛɛngẽ to-to wã kɩɩsda Wẽnnaam noyã. (Rom. 1:26, 27) Sẽn paase, neb a taab basdame tɩ b taabã tusd-b tɩ b maand sẽn yaa wẽnga, b sẽn dat tɩ nin-kãens nong-b la b sak-bã yĩnga.—Yik. 23:2.

Bõe la d tõe n maan tɩ sõng-d tɩ d tõogd d tʋlsmã? D segd n modgda wa d sẽn tõe fãa n maand sẽn tat a Zeova yam. (Mat. 4:4) Sẽn paase, d segd n kosa a Zeova t’a sõng-d tɩ d tõogd d tʋlsmã. Bõe yĩnga? Bala a mii sẽn yaa sõma ne tõnd n tɩ yɩɩda, la a mi a sẽn na n pids tõnd tʋlsem nins sẽn yaa sõma wã to-to.—Yɩɩn. 145:16.

GES-Y VIDEO WÃ: RA BAS TƖ SƖGAARÃ SÃAM F VƖƖMÃ YE. RẼ POOR BƖ Y LEOK SOGSGÃ:

• Bõe yĩng tɩ neb kẽer yũud sɩgaare?

• Sɩgaarã yũub tõe n maana foom bõe?

• Bõe yĩng tɩ sɩgaarã yũub yaa wẽnga, baa sɩgarɛt elɛktronikã?—2 Kor. 7:1

• Bõe la f tõe n maan n da wa sak n yũ sɩgaare, wall n bas sɩgaar yũubu?