Sẽn na yɩl n ta Wẽnnaam yam, Biibl karen-biisã segd n bɩɩsa tẽeb sẽn tar pãnga. (Ebre. 11:6) D tõe n tũnuga ne Vɩɩmd-y wakat sẽn kõn sa! sebrã n sõng-b tɩ b tõog n maan woto. Seb-kãngã d sẽn tar n zãmsd nebã Biiblã pʋgẽ, b ninga vɛrse-rãmb sẽn tar yõodo, b bilga yɛlã tɩ yaa vẽenega, b soka sogsg sẽn yaa sõma la sẽn kɩtd tɩ ned tagse, b ninga video-rãmb sẽn kengd raoodo, la imaaz-rãmb sẽn yaa neeba. D sã n sõng karen-biisã tɩ b bɩɩs zʋg-sõma nins kiris-ned sẽn segd n bɩɩsã, la b paam zood ne Wẽnnaam, d meta ne meeb teed bugum sẽn pa tõe n dɩ.—1 Kor. 3:12-15.

Neb kẽer tagsdame tɩ yaa toog tɩ b tõog n lebg Wẽnnaam zoa, bala b pa tõe n yãnd-a ye. Dẽnd d segd n sõng-b lame tɩ b bãng a Zeova la b kɩs-a sɩda.

GES-Y VIDEO WÃ: D TALL “VƖƖMD-Y WAKAT SẼN KÕN SA!” SEBRÃ N SÕNG NEBÃ TƖ B TẼ A ZEOVA. RẼ POOR BƖ Y LEOK SOGSGÃ:

• Bõe n wilgd tɩ saam-bi-poakã segla a meng sõma Biiblã zãmsgã yĩnga?

• Wãn to la a sok sogsg a taab sẽn yaa sõma n na n sõng karen-biigã t’a togs a tagsg Ezayi 41:10, 13 wã sẽn yetã wɛɛngẽ?

• Wãn to la video wã la Biiblã vɛrse-rãmb naf karen-biigã?

Neb wʋsg pa wʋmd a Zeezi maoongã võore, wall b pa get rẽ wa kũun Wẽnnaam mengã sẽn kõ b yĩng ye. (Gal. 2:20) Rẽ n so tɩ d segd n sõng-b tɩ b tẽ a Zeezi maoongã.

GES-Y VIDEO WÃ: D TALL “VƖƖMD-Y WAKAT SẼN KÕN SA!” SEBRÃ N SÕNG NEBÃ TƖ B TẼ A ZEEZI. RẼ POOR BƖ Y LEOK SOGSGÃ:

• Bõe n wilgd tɩ saam-biigã segla a meng sõma Biiblã zãmsgã yĩnga?

• Wãn to la a toeem bũmb ning sẽn be “Bũmb a taaba” zĩigẽ, n na n sõng karen-biigã?

• Bõe yĩng tɩ pʋʋsgã yaa tɩlɛ ne karen-biigã?