Hal sẽn kaoose, tẽns toɛy-toɛy pʋsẽ, nanambsã mi n sõnga a Zeova nin-buiidã. (Ɛsd. 6:1-12; Ɛst. 8:10-13) Hal baa tõnd wakatã menga, d mi n yãa “tẽngã” sẽn vol “kʋɩlgã” sẽn makd namsgã a Sʋɩtãan bɩ “wag-bedrã” sẽn wat ne Wẽnnaam nin-buiidã zugã. “Tẽngã” makda sigls kẽer sẽn pa tolg n yaa dem-demã. (Vẽn. 12:16) A Zeova sẽn yaa Wẽnnaam sẽn yaa ‘fãagdã’ tõe n kɩtame tɩ nanambsã fãag tõnd sasa ninga.—Yɩɩn. 68:21; Yel. 21:1.

La b sã n kẽes yãmb bãens roog y tũudmã yĩng yẽ? A Zeova geta yãmb yelle. Ra tol-y n maan-y sãmb-sãmb ne rẽ ye. (Sɩng. 39:21-23; Yɩɩn. 105:17-20) Bas-y y yam t’a na n keo-y-la y tẽebã yĩnga, la tɩ y sẽn maand sɩd ne-a wã kengda y tẽed-n-taasã sẽn be dũniyã gill zugã raoodo.—Fili. 1:12-14; Vẽn. 2:10.

GES-Y VIDEO WÃ: KOORE SAAM-BIIS B SẼN YIIS BÃENS ROOGO, TƖ RẼ POOR BƖ Y LEOK SOGSGÃ:

• Bõe yĩng tɩ b kẽes Kooredisiid saam-biis tusa bãens roog na maan yʋʋm wʋsgo?

• Bõe ne bõe la bʋ-kaoodbã sull ra yeel-yã, tɩ pak sor tɩ b yiis saam-biis kẽere?

• Bõe la d tõe n maan n sõng d tẽed-n-taas nins b sẽn kẽes bãens roog b tũudmã yĩnga?

• Bõe la d segd n maand ne lohorem ning d sẽn nan tar masã wã?

• A Zeova nin-buiidã sã n paam bʋʋm bʋʋd zĩigẽ, ãnda la d segd n pẽg rẽ yĩnga?