Bõe yĩng tɩ d segd n segl d mense? D tõe n wa rata tɩbsg tao-to, tõe n wa yɩɩ tɩlɛ me tɩ b gãneg tõnd logto-yiri. Nand tɩ yell a woto paam-do, d segd n maana d sẽn tõe fãa masã meng n segl d mense, sẽn na yɩl n wa tõog n paam tɩbsg sẽn yaa sõma. D sã n maan woto, d wilgdame tɩ d nanda vɩɩmã, la tɩ d tũuda noor ning a Zeova sẽn kõ zɩɩmã wɛɛngẽ wã.—Tʋʋ. 15:28, 29.

Bõe la d tõe n maan n segl d mense?

• Maag-y y yĩng n pʋʋse, la y gʋls y kart (DPA) wã. a Koe-moondb nins sẽn deeg lisgã tõe n paama kart (DPA) wã saam-biig ning sẽn get sɛbã yellã nengẽ, la Document d’identité médical (ic) b kom-kɩdsã yĩng me

• Y sã n tʋtame, kos-y kãsem-dãmbã tɩ b kõ-y Pagb nins sẽn tʋtã yĩnga (S-401) seb-vaoogo. B sẽn yeel bũmb ning seb-vaoogã zugã na n sõng-y lame tɩ y bãng n yãk yam tɩbsgã wɛɛngẽ, y sã n wa segd zu-loees y sẽn tʋtã sasa, la rogmã sasa me

• Y sã n data tɩbsgo, tɩ tõe n wa ne zu-loees zɩɩmã wɛɛngẽ, pa rẽ bɩ b segd n gãnega yãmb logtor-yiri, reng-y n togs-y kãsem-dãmba, la y togs logtor-yirã neb t’a Zeova Kaset soab n na n wa kaag-yã

Bõe la kãsem-dãmbã tõe n maan n sõnge? B tõe n sõnga yãmb tɩ y gʋls y kart (DPA) wã. La kãsem-dãmbã pa na n yãk yam n kõ yãmb tɩbsgã wɛɛngẽ, pa rẽ bɩ n togs b tasg yɛl nins sẽn yaa sũur-kaset yellã wɛɛngẽ ye. (Rom. 14:12; Gal. 6:5) Y sã n togs y tigingã kãsem-dãmbã tɩ y rata tɩbsgo, la tɩ tõe n waa ne zu-loees zɩɩmã wɛɛngẽ, b na n boola (CLH) rãmb tao-tao yãmb yĩnga.

Bõe la (CLH) rãmb tõe n maan n sõnge? Saam-biis nins sẽn tʋmd (CLH) pʋgẽ wã paama zãmsgo, sẽn na yɩl n sõng logtoɛɛmba la bʋ-kaoodb tɩ b wʋm tõnd sẽn pa sakd tɩ b ning tõnd zɩɩmã võore. B tõe n goma ne logtoɛɛmbã tɩbsg buud a taab sẽn pa baood tɩ b ning zɩɩm yelle. Sã n yaa tɩlɛ, b na n bao logtor a to sẽn na n sak n tũ y raabã.

GES-Y VIDEO WÃ: D MAANDA WÃN N YÃK YAM ZƖƖMÃ TALL N TƖBSÃ WƐƐNGẼ TƖ ZEMSE? RẼ POOR BƖ Y LEOK SOGSGÃ:

• Bõe la yãmb bãng video wã pʋgẽ, tɩ tõe n sõng yãmb tɩ y segl y mense, y sã n wa rat tɩbsg tao-tao, tɩ tõe n wa ne zu-loees zɩɩmã wɛɛngẽ?

  Y leoorã