Kom-bɩɩse, wãn to la y tõe n segl y mens n wa reeg lisgu?
“Mam Wẽnnaam, mam dat n maana yãmb daabo.”—YƖƖN. 40:9.
YƖƖLA: 51, 58
1, 2. a) Bõe yĩng tɩ lisgã pa reem bũmbu? b) Ned sẽn dat n deeg lisg segd n deng n kɩsa sɩd ne bõe, la bõe yĩnga?
FO YAA bi-bɩɩg n magd n na n wa reeg lisg bɩ? Sã n yaa rẽ, bãng tɩ bũmb ka be ninsaal sẽn tõe n maan tɩ yɩ zu-zẽkr n ta a sẽn na n deeg lisg ye. Sõsg ning sẽn loogã wilgame tɩ lisgã pa reem bũmb ye. Ned sã n deeg lisgu, a wilga neb a taabã t’a rɩka a meng n kõ a Zeova. Rat n yeel t’a pʋlma a Zeova t’a na n maana a raabã wakat fãa, la tɩ yaa a raabã maaneg n pak-a n yɩɩd bũmb fãa. Rẽnd yaa f sẽn wat n tõe n yãk f toorẽ yam, f sẽn wat n dat n deeg lisg ne f sũur fãa, la f sẽn wat n wʋm rɩk f meng n kõ a Zeova wã sẽn dat n yɛɛlg bal la f segd n deeg lisgu.
2 La tõe tɩ f tagsdame tɩ f nan pa segl n sa n tõe n deeg lisg ye. Wall f rat n deega lisgu, tɩ f roagdbã tagsdẽ tɩ f nan pa segl n sa ye. Tõe tɩ b tagsdame tɩ zĩis kẽer wɛɛngẽ, f segd n modgame n paase, n tõog n wilg tɩ f sɩd rat n yɩɩ Kiris karen-biiga. Sã n yaa woto, bõe la f segd n maane? Ra koms raood ye. Kell n modg tɩ f tẽebã bɩtẽ, sẽn na yɩl tɩ ra kaoos tɩ f yaool n tõog n deeg lisg ye. Bũmb a tãab la f tõe n maan tɩ sõng-fo: 1) Modg n kɩs sɩd ne bũmb nins f sẽn tẽedã, 2) kɩt tɩ f tʋm-tʋmdɩ wã yɩ sõma, la 3) wilg tɩ f sũur nooma ne bũmb nins a Zeova sẽn maanã.
BŨMB NINS F SẼN TẼEDÃ
3, 4. Yam-bʋg la kom-bɩɩsã tõe n dɩk a Tɩmote kibarã pʋgẽ?
3 Sok f meng woto: Bõe yĩng tɩ mam tẽed tɩ Wẽnnaam beeme? Bõe n kɩt tɩ m kɩs sɩd tɩ Biiblã yaa Wẽnnaam Gomde? Bõe n kɩt tɩ m kɩs sɩd tɩ m sã n tũud Wẽnnaam noyã n são m sẽn dɩkd dũniyã rãmb togs-n-taare? Sogs-kãensã pa sẽn na n kɩt tɩ f maan sãmb-sãmb ne f sẽn tẽed bũmb ninsã ye. Yaa sẽn na yɩl tɩ f tũ tʋm-tʋmd a Poll saglgã, n bao n ‘bãng Wẽnnaam daabã’ sõma. (Rom. 12:2) Bõe yĩng tɩ f segd n maan woto?
4 A Tɩmote kibarã leokda sok-kãngã. Hal a yãadmẽ, a ma wã ne a yaab-poakã zãms-a-la Gʋlsg Sõamyã t’a ra mi Wẽnnaam daabã. Baasgo, a Poll sagla a Tɩmote t’a ‘kell n sak bũmb nins a sẽn da zãms la a bãng tɩ yaa sɩdã.’ (2 Tɩm. 3:14, 15, Wẽnnaam Sebre, 1983) Sebr a yembr yeelame tɩ gɛrkã gom-bil ning b sẽn lebg tɩ “bãng tɩ yaa sɩdã” rat n yeelame tɩ “kɩs sɩda, la bas f yam tɩ gomd yaa sɩda.” Rẽnd a Tɩmote ra kɩsa sɩd tɩ bũmb nins a sẽn bãngã yaa sɩda. Pa a ma wã ne a yaab-poakã sẽn yeel-a rẽ wã yĩng ye. A maka bũmb nins b sẽn zãms-a wã, la a bʋgs rẽ zug sõma, tɩ kɩt t’a bas a yam tɩ yaa sɩda. Wẽnnaam Sebr ning sẽn yi yʋʋmd 1983 pʋgẽ, 1 Tesalonik-rãmb 5:21 yeela woto: “Bɩ y mak bũmb fãa. La sẽn yaa neere, bɩ y gãd kãn-kãe.”
5, 6. Bõe yĩng tɩ f segd n minim n makd bũmb nins f sẽn tẽedã tɩ f ket n paoodẽ?
5 La fo yẽ? Tõe tɩ f mii Biiblã sẽn yetã hal sẽn kaoose. Sã n yaa woto, bɩ f bʋgs fo sẽn tẽed bũmb ninsã zugu, n bao n bãng f sẽn tẽed rẽ wã võore. F sã n maan woto, na n kɩtame tɩ f maneg n kɩs sɩd ne f sẽn tẽedã, tɩ f taabã, dũniyã neb tagsa wã, la baa fo mengã raab ra wa tõog n kɩt tɩ f kɩɩs Wẽnnaam n maan sẽn pa segd ye.
6 F sã n minim n makd bũmb nins f sẽn tẽedã tɩ f ket n paoodẽ, ned sã n wa sok-f sokre, f na n tõog n leokame. Wala makre, f to tõe n wa sok-f-la woto: ‘Bõe n kɩt tɩ f kɩs sɩd tɩ Wẽnnaam beeme? Wẽnnaam sã n yaa nonglem, bõe yĩng t’a bas tɩ wẽnemã beẽ? Wẽnnaam tõe n bee woto bal n pa tall sɩngr sɩda?’ F sã n segl f menga, sogs-kãensã buud pa na n kɩt tɩ f maan sãmb-sãmb ne f sẽn tẽedã ye. Pʋd n na n kɩtame tɩ f maneg n zãms Biiblã sõma.
7-9. Wãn to la “ Qu’enseigne réellement la Bible ? ” sõssã tõe n sõng-f tɩ f maneg n kɩs sɩd ne f sẽn tẽedã?
7 F sã n zãmsd Biiblã sõma, tõe n sõng-f lame tɩ f leok sogsgo, n yiis sãmbs f sũurẽ wã, la kɩt tɩ f maneg n kɩs sɩd ne f sẽn tẽedã. (Tʋʋ. 17:11) D tara sɛb wʋsg sẽn tõe n sõng-f zĩ-kãng wɛɛngẽ. Neb wʋsg zãmsa Cinq questions à se poser sur l’origine de la vie sebrã, la Y a-t-il un Créateur qui se soucie de vous ? sebrã tɩ sõng-ba. Sẽn paase, sõss n be jw.org tɩ b gom-zugã yaa: “ Qu’enseigne réellement la Bible ? ” Kom-bɩɩs wʋsg zãmsa sõs-kãens tɩ naf-ba. Sõs-kãens bee zĩig ning b sẽn gʋls tɩ LA BIBLE ET VOUS wã. Sõsg fãa pʋgẽ, b yãkda gom-zug n wilg Biiblã sẽn yet rẽ wɛɛngẽ. Sõssã sẽn maan to-to wã yaa sẽn na n sõng-f tɩ f kɩs sɩd ne Biiblã sẽn yetã.
8 Fo sẽn sɩng n zãmsd Biiblã yĩnga, f tõe n leoka sogsg nins sẽn be sõssã pʋgẽ wã nana-nana. La bõe n kɩt tɩ f kɩs sɩd ne f sẽn leokd to-to wã? Sõsg fãa pʋgẽ, b ningda vɛrse-rãmba, n yeel tɩ f bʋgs b zug n gʋls f tagsg sẽn yaa a soab ne vɛrse-rãmbã sẽn yetã. Rẽ tõe n sõng-f lame tɩ f bãng f sẽn tõe n bilg ned f sẽn tẽed bũmb ninsã to-to. F sã n tõe n paam sõs-kãense, yɩta sõma tɩ f tũnug ne-b n zãms Biiblã tɩ sõng-f tɩ f kɩs sɩd ne bũmb nins f sẽn tẽedã.
9 F sã n modgd sẽn na yɩl n kɩs sɩd ne f sẽn tẽedã, f segenda f meng n na n wa reeg lisgu. Saam-bi-poak a ye sẽn yaa bi-bɩɩg yeela woto: “Nand tɩ m yãk yam n deeg lisgu, m maaga m yĩng n zãms Biiblã, n bãng tɩ tõnd tũudmã la tũudum hakɩɩkã. Beoog sẽn vẽeg fãa, m yãta bũmb sẽn kɩtd tɩ m maneg n kɩs sɩd ne rẽ.”
F TƲƲM-TƲMDƖ WÃ
10. Bõe yĩng tɩ ned sẽn deeg lisg segd n wilg a tẽebã ne a tʋʋm-tʋmdɩ?
10 Biiblã yeela woto: “Tẽeb sã n ka naag ne tʋʋma, a mengã yaa kɩɩnga.” (Zak 2:17) Fo sã n kɩsa sɩd ne bũmb nins f sẽn tẽedã, f segd n wilga rẽ ne f tʋm-tʋmdɩ wã. F segd n modgame tɩ f yel-manesmã yɩ sõma.—Karm-y 2 Pɩyɛɛr 3:11.
11. Tall yel-manesem sẽn yaa sõma wã rat n yeelame tɩ bõe?
11 F sã n dat tɩ f yel-manesmã yɩ sõma, f segd n yɩɩ yɩlemd Wẽnnaam nifẽ. Fo modgda zĩ-kãng wɛɛngẽ bɩ? Tags f manesmã sẽn yɩ to-to kiis a yoobã sẽn nan loogã. Bõe la f maan n wilg tɩ f tẽebã bɩɩme, tɩ f ‘mi sõma ne wẽng n bake’? (Ebre. 5:14) Tõe tɩ f paama makre, wall yaa f taabã n pẽdg-f n dat tɩ f maan wẽnga. A buud sã n paama foo, f tõog n kell n saka a Zeova bɩ? Tags fo sẽn zãad f meng to-to lekollẽ wã me yelle. Kɩtame tɩ nebã pẽgd a Zeova Kaset rãmbã bɩ? Fo sakda a Zeova ne f sũur fãa bɩ, bɩ f sẽn pa rat tɩ b yaal-fã yĩng kɩtame tɩ f maand wa f karen-bi-taasã? (1 Pɩy. 4:3, 4) Yaa sɩd tɩ ned pa be n zems zãng ye. Baa ned sẽn sɩng n tũud a Zeova hal sẽn kaoos tõe n wa yɛɛsdame, n pa rat n gom a sẽn tẽed bũmb ninsã yell ye. La ned sã n dɩk a meng n kõ a Zeova n deeg lisgu, a sũur segd n yɩɩ noog ne a sẽn paam n yaa a Kaset soabã. A segd n wilgda rẽ ne a yel-manesmã.
12. Tʋʋm-bʋs la f tõe n tʋm tɩ f “Wẽnnaamã tũub yɩ sõama,” la f tagsg segd n yɩɩ wãn ne tʋʋm-kãense?
12 La tʋʋm-bʋs la f tõe n tʋm tɩ f “Wẽnnaamã tũub yɩ sõama”? Yaa tigingã tʋʋma, wala makre, tigissã kẽnd la koɛɛgã moonego. La bũmb a taab me la f tõe n maan tɩ pa nebã fãa n ne rẽ ye. Yaa pʋʋsgã la Biiblã zãmsgo. Ned sẽn dɩk a meng n kõ a Zeova pa get tɩ bõn-kãensã maaneg yaa toog ye. A yaa wa rĩm a Davɩɩde. A ra yeela woto: “Mam Wẽnnaam, mam dat n maana yãmb daabo, la m bĩng yãmb tõogã m sũurẽ.”—Yɩɩn. 40:9.
13, 14. Bõe la f tõe n maan tɩ f “Wẽnnaamã tũub yɩ sõama,” la wãn to la kom-bɩɩs kẽer maan dẽ tɩ naf-ba?
13 Sẽn na yɩl n sõng-f tɩ f maan bũmb nins sẽn na n kɩt tɩ f “Wẽnnaamã tũub yɩ sõama” wã, tags sogs-kãensã yelle: “Fo sã n mi n pʋʋsdẽ, f kota bũmb takɩ bɩ? F sẽn kot bũmb ninsã wilgdame tɩ f sɩd nonga a Zeova bɩ?” “F sã n wa na n zãms Biiblã, f baood n na n wʋma bõe võore?” “F mi n yita koɛɛgã mooneg baa f roagdbã sã n pa yi bɩ?” [1] Bao sebr n gʋls f sẽn na n leok sogs-kãensã to-to wã. Rẽ na n sõng-f lame tɩ f bãng f sẽn tõe n maan to-to n pelgd f pʋg n pʋʋsd a Zeova, n zãmsd Biiblã ne f sũur fãa, la f paasd f minimã koɛɛgã mooneg pʋgẽ.
14 Kom-bɩɩs kẽer sẽn da segend b mens n na n wa reeg lisg gʋlsa sogs-kãensã buudã leoor tɩ sõng-b wʋsgo. Saam-bi-poak a Tilda sẽn yaa bi-bɩɩgã maana woto tɩ sõng-a t’a yãk bũmb kẽer a sẽn segd n maan n wa tõog n deeg lisgu. A yeelame tɩ bilf-bilfu, a tõog n maana bõn-kãense, n deeg lisg yʋʋmd pʋgẽ bala. Saam-biig a Patrik me sẽn yaa bi-bɩɩgã tõog n maana woto. A yeelame: “Mam da zoe n yãka bũmb kẽer m sẽn dat n maane. La m sẽn gʋls rẽ sebr zugã, kɩtame tɩ m modg wʋsg n tõog n maan bõn-kãense.”
F na n kell n tũ a Zeova baa f roagdbã sã n bas-a bɩ? (Ges-y sull 15)
15. Bõe yĩng tɩ yaa ned kam fãa n segd n yãk a toorẽ yam n dɩk a meng n kõ Wẽnnaam?
15 Ad sokr a to sẽn tar yõodo, tɩ f segd n sok f menga: “Fo na n kell n tũ a Zeova, baa f roagdbã la f zo-rãmbã sã n bas-a bɩ?” Tẽeg tɩ f sã n wa rɩk f meng n kõ a Zeova n deeg lisgu, na n yɩɩ fo mengã n segd n modg tɩ foo ne yẽ zoodã tall pãnga. Rẽnd f pa segd n ges f roagdbã wall ned a to n tũ a Zeova ye. F sã n modg tɩ f yel-manesmã ne f Wẽnnaamã tũub yaa sõma, f wilgdame tɩ f kɩsa sɩd ne Biiblã sẽn yetã, la tɩ f rat n tũu Wẽnnaam noyã. F sã n modgd zĩ-kãens wɛɛngẽ, pa na n kaoos la f tõog n deeg lisg ye.
WILG TƖ F SŨUR NOOMA NE BŨMB NINS A ZEOVA SẼN MAANÃ
16, 17. a) Bõe n segd n kɩt tɩ ned yãk yam n lebg kiris-neda? b) Rɩk-y makr n wilg d sũur sẽn segd n yɩ noog ne a Zeezi sẽn ki tɩ yɩ maoongã võore.
16 Daar a ye, rao sẽn da mi a Moyiiz tõogã sõma soka a Zeezi woto: “Tõodã sʋka, bʋg n yaa kãseng n yɩɩda?” T’a Zeezi leok-a n yeele: “Nong Zu-soaba fo Wẽnnaam ne f sũur fãa, la ne f sɩɩgã fãa, la ne f tagsgã fãa.” (Mat. 22:35-37) A Zeezi sẽn yeel woto wã, a wilga bũmb ning sẽn segd n kɩt tɩ ned reeg lisg n lebg kiris-nedã. Yaa a soabã sẽn na n nong a Zeova. Bũmb f sẽn tõe n maan tɩ kɩt tɩ f maneg n nong a Zeova yaa f sẽn na n bʋgs bõn-kãseng ning a sẽn maan n wilg t’a nonga tõndã zugu. Bõn-kãng yaa a sẽn tʋm a Zeezi t’a wa ki tɩ yɩ maoongã. (Karm-y 2 Korẽnt-rãmb 5:14, 15; 1 Zã 4:9, 19.) F sã n bʋgsd a Zeezi sẽn ki tɩ yɩ maoongã zugu, la rẽ sẽn tõe n naf foo to-to wã, na n kɩtame tɩ f rat n wilg tɩ f sũur yaa noogo.
17 D tõe n dɩka makr n wilg f sũur sẽn segd n yɩ noog ne a Zeezi sẽn ki tɩ yɩ maoongã võore. Mams wa fo sẽn na n lʋɩ koomẽ tɩ koomã rat n dɩ-fo, tɩ ned kẽ n yiis-fu. Fo na n kulame, n tɩ toeem f futã la f yĩm nedã sẽn maan bũmb ningã sɩda? Ayo! Yaa vẽeneg tɩ f sũur na n yɩɩ noog ne nin-kãng f yõor tɛka. Sɩd me, yaa yẽ maasem yĩng la f sẽn ket n vɩ wã. La a Zeova ne a Zeezi Kiris sẽn maan bũmb ningã yɩɩda rẽ hal zĩig sẽn zãre. A Zeezi sã n da pa ki tɩ yɩ maoongo, yel-wẽndã ne kũumã ra na n dɩɩ tõnd wa koom. La b sẽn maan woto n wilg tɩ b nonga tõndã yĩnga, d saagdame n na n wa vɩɩmd arzãnã pʋgẽ tẽngã zug wakat sẽn kõn sa.
18, 19. a) Bõe yĩng tɩ f pa segd n yɛɛsdẽ, n pa rat n dɩk f meng n kõ a Zeova? b) Bõe yĩng t’a Zeova raabã maaneg na n kɩt tɩ f vɩɩmã maneg n yɩ noogo?
18 Fo sũur nooma ne bũmb nins a Zeova sẽn maan f yĩngã bɩ? Sã n yaa woto, zemsame tɩ f rɩk f meng n kõ a Zeova n deeg lisgu. F sã n dɩk f meng n kõ a Zeova, f pʋlm-a lame tɩ baa sẽn wa n yaa a soaba, f na n maana a raabã. La rẽ pa segd n kɩt tɩ f yɛɛsdẽ n pa rat n maan woto ye. Tẽeg t’a Zeova rata f neere, la t’a ‘ronda neb nins sẽn baood-a’ wã. (Ebre. 11:6) Ra tags tɩ f sã n dɩk f meng kõ a Zeova n deeg lisgu, f weoogda f meng ye. F vɩɩmã pʋd n na n maneg n yɩɩ noogo. Saam-biig a ye sẽn tar yʋʋm 24 sẽn deeg lisg t’a ket n paoodẽ yeelame: “Tõe tɩ m sã n da gũ yʋʋm a wãn n paase, m da na n wʋma yɛlã võor n yɩɩda. La m sẽn dɩk m meng n kõ a Zeova wã sõng-m lame tɩ m pa bao dũniyã yɛl ye.”
19 A Sʋɩtãan yẽ yaa toor fasɩ ne a Zeova. A yaa rat-m-ye soaba, n pa baood f neer ye. A pa na n kõ foo bũmb sẽn na n naf foo wakat fãa ye. A pʋd n pa tõe n kõ-f bũmb a woto ye. A miime t’a beoog-daarã pa na n yɩ neer ye. Rẽnd yaa vẽeneg t’a pa tõe n pʋlem foo bũmb yẽ mengã sẽn pa tar ye. Yaa sãoong n gũud a Sʋɩtãana, tɩ f sã n sak a raabã bɩ f na n wa naag-a n sãame.—Vẽn. 20:10.
20. Bõe la bi-bɩɩg tõe n maan tɩ sõng-a t’a wa tõog n dɩk a meng n kõ Wẽnnaam n deeg lisgu? (Ges zĩ-gũbr ning gom-zug sẽn yaa: “ Sõss sẽn tõe n sõng-f tɩ f bɩɩs f tẽebã.”)
20 Vẽenega, zemsame tɩ f rɩk f meng n kõ a Zeova. Fo segl n saame n tõe n maan dẽ bɩ? Sã n yaa woto bɩ f ra bas tɩ kaoos ye. La sã n mik tɩ f nan pa segl n sa bɩ f tũ sagls nins sẽn be sõs-kãngã pʋgẽ wã, n kell n bɩɩs f tẽebã. A Poll sagla Filip kiris-nebã tɩ b ket n bɩɩsd b tẽebã. (Fili. 3:16) F sã n tũ a saglgã, ka la bilfu, f na n dat n dɩka f meng n kõ a Zeova n deeg lisgu.
^ [1] (sull 13) Kom-bɩɩs wʋsg karma sogsg nins sẽn be Les jeunes s’interrogent — Réponses pratiques Volume 2 sebrã neng 308 ne 309 wã, n bʋgs tɩ sõng-ba.
