1-3. Tõe tɩ yaa bõe n kɩt t’a Evodi ne a Sẽntiis moor yõsge? Bõe n tõe n sõng-d tɩ d gil yɛl a woto? (Ges-y fotã sẽn be yĩngrã.)

NEB nins sẽn tũud a Zeova wã nonga Biiblã, n sakd a sẽn yetã, bala b miime tɩ yaa a Zeova Gomde. Sagls n be be n tõe n sõng-d tɩ d gil zu-loeese, tɩ d sã n wa tudg me bɩ tõe n dems-do. Rẽ yĩnga, d sakd n tũuda Biiblã saglsã bɩ? D gom a Evodi ne a Sẽntiis yell bilfu. Yaa pĩnd wẽndẽ pagb sẽn paam vʋʋsem sõngã zaeebo. La mo-yõsr n wa n zĩnd b sʋka. Yaa sɩd tɩ Biiblã pa wilg bũmb ning sẽn wa ne b mo-yõsrã ye. La d rɩk makre.

² Tõe t’a Evodi boola b tigingã neb a yirã, tɩ b rɩ la b sõse, n pa bool a Sẽntiis ye. A Sẽntiis sẽn wa n wʋm tɩ b gomd sẽn yɩ noog to-to wã, sãama a sũuri. Tõe t’a yeela a meng yaa: ‘M da pa tẽed t’a Evodi na maan bũmb a woto n pa bool maam ye. M da tagsdame tɩ d yaa zo-rãmb meng-menga.’ A Sẽntiis yamẽ, a Evodi sẽn maan woto wã wilgdame t’a pa nong yẽ zĩigẽ, la t’a gind-a lame. Yẽ me boola neb nins a Evodi sẽn da boolã tɩ b rɩ la b sõse, n pa bool  a Evodi ye. Tõe meng tɩ yellã sãama tigingã neb kẽer zems-n-taare. Biiblã pa togs sẽn baas to-to ye. La wõnda b tũu saglg tʋm-tʋmd a Poll sẽn kõ-ba, n welg yellã, n da ket n tũud a Zeova ne sũ-noogo.—Fili. 4:2, 3.

³ Rũndã-rũndã me, yɛl a woto mi n bee tigimsã pʋsẽ. La d sã n tũ Wẽnnaam Gomdã saglsã, sõngdame tɩ d welg-ba, wall d pʋd n gil-ba. D sã n sakd n tũud Biiblã saglsã, d wilgdame tɩ d nonga Wẽnnaam Gomdã.—Yɩɩn. 27:11.

4, 5. Sagl-bʋs la Biiblã kõt tõndo, n na n sõng-d tɩ d tõogd d sũurã?

⁴ Yɩl tɩ bũmb fãa pʋgẽ bɩ f tõogd f sũurã pa nana ye. Ned sã n paoog-do, wall a maan-d-la bũmb sẽn pa segde, d buudã bɩ d yĩnga kõbg pa rẽ bɩ bũmb a to yĩnga, tõe n yika sũur wʋsgo. La sã n yaa d tẽed-n-taag n maan-d woto, zabda sũur n yɩɩda. Yel-kãensã buud sã n paam-do, Biiblã sagl-bʋs n tõe n sõng-do?

⁵ Ninsaalbã sẽn be tẽngã zug tɛka, a Zeova nee b manesem sẽn yaa to-to ne taaba. A mii ned fãa yel-manesem, sẽn be a yamẽ la a sũurẽ. Yell sã n sãam ned sũur bɩ n zab-a, tõe n kɩtame t’a maan bũmbu, n wa maand a bãngẽ. Biiblã pʋgẽ, a Zeova yeta tõnd ned kam fãa woto: “Ra sak tɩ f sũur yik tao-tao ye.” Tags-y n ges-y sagl-kãngã tũub sẽn na n kɩt tɩ d gil yɛl ninsã. (Karm-y Koɛɛg soab 7:9; Yel-bũn 16:32.) Dẽnd d fãa segd n maoodame n tõogd d sũurã. Biiblã leb n yeta tõnd tɩ d kõt taab sugri. Sɩd me, a Zeezi yeelame tɩ ned sã n pa kõt a taabã sugri, a Zeova pa na n kõ yẽ me sugr ye. (Mat. 6:14, 15) Bɩ ned fãa sok a meng woto: ‘Sũ-marã, la sugrã kũun wɛɛngẽ, m getame tɩ m segd n modg n paasame bɩ?’

6. Bõe yĩng tɩ d segd n modg n tõogd d sũurã?

⁶ Naoor wʋsgo, ned sã n pa tõe a sũuri, a lebgda sũ-to-neda. Rẽ tõe n kɩtame tɩ nebã pa nong a zĩigẽ ye. Sũ-to-ned tõe n kɩtame tɩ tigingã neb tẽ a goamã, tɩ wa ne yɛla. Baa a sã n modgd n na n solg a sũ-toogã bɩ a kisgrã, a sũurã sẽn pid ne tags-wẽnsã, “a wẽnemã na n wa puka nebã fãa nifẽ.” (Yel. 26:24-26) Kãsem-dãmbã na n sõnga ned a woto ne Biiblã maasem t’a bãng tɩ ned sẽn tar zʋg-wẽns wa sũ-toogo, ned kisgr la sũ-kẽk pa segd n zĩnd Wẽnnaam nin-buiidã sʋk ye. Yaa a Zeova Gomdã meng n wilgd rẽ vẽenega. (Maan. 19:17, 18; Rom. 3:11-18) B sã n sagl-y woto, y na n sak n tũume bɩ?

7, 8. a) Wãn to la a Zeova wilgd a nin-buiidã sẽn be tẽngã zugã sore? b) Wilg-y bũmb kẽer Biiblã sẽn yet tɩ d maane, la y wilg bõe yĩng tɩ d segd n tũ?

⁷ Yaa a Zeova meng n wilgd a nin-buiidã sẽn be tẽngã zugã sore. Wãn to la a maand rẽ? A yãka Kiristã t’a yaa tigingã “Zu-soaba,” tɩ Kiristã me yãk tʋm-tʋmd sẽn tũud sɩd la sẽn tar yamã t’a sõngd kiris-nebã tɩ b bãngd Wẽnnaam sẽn dat tɩ b maanã. (Mat. 24:45-47; Efɛ. 5:23) Wa pipi kiris-nebã taoor lʋɩtbã, tʋm-tʋmd sẽn tũud sɩdã me sak n deegame tɩ Biiblã yaa Wẽnnaam Gomde, n nong-a la b tũud a noyã ne b sũur fãa. (Karm-y 1 Tesalonik-rãmb 2:13.) D tẽeg Biibla noy a wãna.

⁸ Biiblã yeta tõnd vẽeneg tɩ d kẽnd tigissã n da vaandẽ ye. (Ebre. 10:24, 25)  A yeta tõnd me tɩ d mao tɩ d sẽn tẽed bũmb nins Wẽnnaam la a raabã wɛɛngẽ wã yɩ yembre, tɩ welgr da zĩnd d sʋk ye. (1 Kor. 1:10) A leb n yetame tɩ d ‘reng n bao Wẽnnaam soolmã.’ (Mat. 6:33) Biiblã wilgame me tɩ d segd n moona koɛɛgã zak-zaka, zãma wã zĩisẽ, la neb sẽn beẽ fãa. (Mat. 28:19, 20; Tʋʋ. 5:42; 17:17; 20:20) A yeta kãsem-dãmbã tɩ b segd n maoome tɩ tigimsã kell n yɩ yɩlma. (1 Kor. 5:1-5, 13; 1 Tɩm. 5:19-21) A Zeova wilgame me tɩ ned kam fãa segd n maoome n kell n yɩ yɩlemd tũudmã la yĩngã wɛɛngẽ.—2 Kor. 7:1.

9. Ãnd la a Zeezi yãk t’a sõngd kiris-neb hakɩɩkã tɩ b wʋmd Biiblã goamã võore?

⁹ Neb n be n tẽed tɩ b tõe n wʋma Biiblã goamã võor b toore. A Zeezi yaool yãka tʋm-tʋmd sẽn tũud sɩdã, tɩ yaa sul-kãng bal n segd n sõng nebã tɩ b bãng Wẽnnaam la a raabã. Yʋʋmd 1919 wã tɛka, a Zeezi Kirist tũnugda ne tʋm-tʋmdã n sõngd kiris-neb hakɩɩkã tɩ b wʋmd Biiblã goamã võore, la b tũudẽ. Tõnd fãa sã n tũud noy nins sẽn be Biiblã pʋgẽ wã, sõngdame tɩ tigingã kell n yɩ yɩlemde, tɩ laafɩ la zems-n-taar me beẽ. Yɩta sõma tɩ ned kam fãa sok a meng woto: ‘Mam maanda sɩd ne a Zeezi, n sakd tʋm-tʋmd sẽn tũud sɩdã sẽn yet bũmb ninsã bɩ?’

10. A Ezekɩyɛll sẽn yã bũmb ningã pʋgẽ, wãn to la b bilg a Zeova siglgã babg ning sẽn be saasẽ wã?

¹⁰ Biiblã sõngda tõnd tɩ d bãng tɩ zũnd-zãnd pa be a Zeova siglgã babg ning sẽn be saasẽ wã me pʋgẽ ye. D rɩk makr ne bũmb a Zeova sẽn vẽneg a Ezekɩyɛll t’a yã. A yãa a Zeova siglgã babg ning sẽn be saasẽ wã, tɩ b mak-a ne saare. (Eze. 1:4-28) A Zeova meng n zao saarã, n kɩtdẽ t’a kẽnd zĩig ning fãa yẽ sẽn date. La a Zeova siglgã babg ning sẽn be tẽng zugã kẽnd me tũuda a siglgã babg ning sẽn be saasẽ wã. Kaset toor-toor n wilgd t’a Zeova saarã kẽnda ne tʋʋlem. D tags n ges bũmb nins fãa b sẽn toeem tɩ lebg sõma n paas yʋʋmã noorã, la d tẽeg tɩ rẽ fãa yaa a Zeova nugu. Ka la bilfu, Kiristã ne malɛgsã na n sãama dũniyã. Zĩig zãnga, ned kõn le paoog a Zeova wall a sãam a yʋʋre, pa rẽ bɩ a tags t’a naamã pa zems ye.

11, 12. Sõdg-y bũmb kẽer a Zeova siglgã sẽn maan yaoolem wakatã.

¹¹ D lebg n tẽeg bũmb kẽer a Zeova siglgã sẽn maan yaoolem wakatã. Rotã meebo. D tẽed-n-taas bãmb kobs n tʋmd ne b sũy fãa n sõngd n met d biru kãsengã sẽn be Warwick, Niuyork soolmẽ wã. Sull ning sẽn get siglgã rot meeb yellã modgdame tɩ d tẽed-n-taas tusa paamd noy la sagls sẽn sõngd-b tɩ b met Rĩungã roto, la b yalgd siglgã rot a taab dũniyã gill zugu. D pʋʋsda d tẽed-n-taasã sẽn tʋmd woto ne b sũy fãa  wã bark wʋsgo. A Zeova nin-buiidã sẽn be zĩig fãa wã me kõta b sẽn tõe, n sõngd ne tʋʋmã, t’a Zeova ningd d fãa barka, d sẽn sikd d mens n sakd n tʋmdẽ la d kõt ligd n teend siglgã tʋʋmã.—Luk 21:1-4.

¹² Zãmsgã d sẽn paamdã. A Zeova ratame t’a nin-buiidã paam zãmsg sõma. Woto noom-a-la wʋsgo. (Eza. 2:2, 3) Tags-y n ges-y siglgã lekoll toor-toorã. Wala makre, so-pakrã tʋʋmd lekolle, Rĩungã koe-moondb lekolle, Gileaad lekolle, sẽn na sɩng-b Betɛllẽ wã tʋʋm paalmã lekolle, tigims sull yel-gɛtbã ne b pagbã lekolle, tigingã kãsem dãmb lekolle, Rĩungã tʋʋmd lekolle, Betɛll-rãmbã yel-gɛtb ne b pagbã lekolle. Sẽn paase, d tara sɩt sẽn yaa jw.org, tɩ nebã tõe n kẽ be, n paam Biiblã la sɛb a taab ne buud-goam kobs n karme, n tõog n bãng Wẽnnaam la a raabã. Sɩtã pʋgẽ, sagls n be kambã yĩnga, la zagsa rãmb yĩnga. Zĩig n be be me tɩ d tõe n paam kibay. Yãmb tʋmda ne tõnd sɩtã koe-moonegã sasa, la y zak pʋgẽ Biibl zãmsgã sasa bɩ?

13. D sẽn yaa a Zeova nin-buiidã, yaa tɩlɛ ne-d tɩ d maan bõe?

¹³ Tõnd sẽn paam n naag n yaa a Zeova nin-buiidu, n mi a raabã yaa zu-zẽkre! La kɩtame tɩ yaa tɩlɛ ne-d tɩ d sak a raabã, n maan sẽn yaa tɩrga. Dũniyã sẽn lebgd wẽng n paasdẽ, t’a nebã nong sẽn pa sõma wã, tõnd segd n modgame n ‘kisg wẽnga.’ (Yɩɩn. 97:10) D pa rat n yɩ wa neb nins sẽn “boond wẽng tɩ sõama la b boond sõama tɩ wẽngã” ye. (Eza. 5:20) Tõnd sẽn dat t’a Zeova sũur noom ne-dã, d maanda d sẽn tõe fãa n yaa yɩlem tũudmã wɛɛngẽ, la d tagsa wã ne d yĩngã pʋgẽ me. (1 Kor. 6:9-11) Tõnd nonga a Zeova, n kɩs-a sɩda. Rẽ n so tɩ d maand sɩd ne-a, n tũud noy nins fãa a sẽn kõ a Gomdã pʋgẽ wã. Yaa d zagsẽ, d tʋʋm zĩisẽ, d lekoll dãmbẽ, tigingã pʋg wall zĩig a to, d tũuda Biiblã noyã. (Yel. 15:3) D ges d sẽn tõe n maan sɩd ne a Zeova to-to kambã wubr wɛɛngẽ, d yam-yãkr buud fãa pʋgẽ, la saglsã tũub wɛɛngẽ.

14. Kambã wubr wɛɛngẽ, wãn to la kiris-ned tõe n wilg t’a maanda sɩd ne a Zeova?

¹⁴ Kambã wubri. Segdame tɩ roagdbã tũ bũmb nins Biiblã sẽn wilg kambã wubr wɛɛngẽ wã. Woto, b maanda sɩd ne a Zeova. Kiris-neb nins sẽn tar kambã pa tũud b buudã minimdã bɩ dũniyã neb tagsa n wubd b kambã ye. (Efɛ. 2:2) Zĩis kẽere, rapã yetame tɩ “yaa pag n wubd kamba.” La rao sẽn yaa kiris-ned pa na n tũ rẽ ye. Biiblã yeta ba-rãmbã vẽeneg tɩ b wub b kambã, ‘n sagl-ba, la b keoog-b wa sẽn zems Zu-soabã raabo.’ (Efɛ. 6:4) Pagb la rap nins sẽn tũud a Zeova la b tar kambã ratame tɩ b kambã tall zood sõma ne a Zeova wa a Sãmwɛll. Biiblã yeelame t’a “Sãmwɛll dag n bɩtame, la Sẽn-Ka-Saab rag n bee ne yẽnda.”—1 Sãm. 3:19.

15. Nand tɩ d yãk yam n maan bũmbu, wãn to la d tõe n wilg tɩ d maanda sɩd ne a Zeova?

¹⁵ D yam-yãkr buud fãa pʋgẽ. Nand tɩ d yãk yam n maan bũmbu, yɩta sõma tɩ d maan vaeesg Biiblã la siglgã sɛb pʋsẽ, n bãng sẽn noom a Zeova. Woto na n wilgame tɩ d maanda sɩd ne-a. Wala makre, neb n tɩ be sãand weoog n baood ligdi. B sã n dog biiga, sẽn na yɩl n tõog n kell n tʋm n bao ligdã, b talld-a lame n tɩ bas b ba-yirã, tɩ b buudã ned wub-a. Yaa sɩd tɩ ned fãa n yãkd a sẽn  na n maanega. La d tẽeg tɩ tõnd ned kam fãa na n togsa Wẽnnaam a meng yelle. (Karm-y Rom-dãmbã 14:12.) D sẽn dat tɩ tõnd ne d zakã rãmb vɩɩm tall barkã, yɩta sõma tɩ d reng n bao n bãng Biiblã sẽn yet tʋʋmã yãkr la zakã yell gesg wɛɛngẽ. Yaa tɩlɛ t’a Zeova sẽn yaa tõnd saasẽ ba wã sõng-do, bala, ninsaal pa tõe n bãng a sor ye.—Yel. 20:24.

16. Bõe la pag a ye sẽn da tɩ be sãand ra segd n maan tɩ pa nana? Bõe n sõng-a t’a tõog n maan sẽn segde?

¹⁶ Pag a ye sẽn da tɩ be sãand weoog n dog bi-ribla, n da rat n tall-a n tɩ bas ne a yaab-rãmbã tɩ b wubi. Wakat kãnga, a sɩnga Biiblã zãmsg ne a Zeova kaset soaba, n da wɩngd ne zãmsgã. Zãmsgã sõng-a lame t’a bãng t’a segd n wuba a biigã, n sõng-a t’a bãng a Zeova. (Yɩɩl 127:3; Yel. 22:6) A pʋʋsa a Zeova ne a sũur fãa n kos sõngre, wa Biiblã sẽn sagend tõndã. (Yɩɩn. 62:9, 10) A sõsa yellã zug ne saam-bi-poak ning sẽn zãmsd-a Biiblã, la ne tigingã neb a taab me. Baa ne a zo-rãmbã la a roagdbã sẽn da pẽdgd-a, n dat tɩ b tall biigã n tɩ bas ne a yaab-rãmbã, a bãngame tɩ b sẽn dat t’a maanã pa segd ye. A sɩdã sẽn yã tigingã neb sẽn sõngd a pagã ne a biigã to-to wã, yɩ-a-la noog wʋsgo, hal t’a sak n sɩng Biiblã zãmsgo, la a tũud a pagã ne a biigã n kẽnd tigissã. Tags-y n ges-y pagã sũur sẽn yɩ noog to-to, a sẽn yã t’a Zeova leoka a pʋʋsgã!

17. D sã n zãmsd ned Biiblã, siglgã sagl-bʋs la d segd n tũ?

¹⁷ Saglsã tũub wɛɛngẽ. Kiris-ned sẽn maand sɩd ne a Zeova tũuda noy la sagls nins a siglgã sẽn kõtã. Wala makre, b sagenda tõnd tɩ d sã n wa sɩng Biiblã zãmsg ne ned Biiblã sɩd yetame tɩ bõe? sebrã pʋgẽ, zãmsg fãa poor bɩ d sõng karen-biigã minit a wãn pʋgẽ t’a bãng bũmb a Zeova siglgã zugu. Bõe la b maand Rĩung roogẽ? video wã, ne Ãnd dãmb n maand a Zeova raabã rũndã-rũndã? borsiirã tõe n sõng-d-la wʋsgo. B yeelame me tɩ d sã n zãms Biiblã sɩd yetame tɩ bõe? sebrã n sa tɩ karen-biigã ket n modgd sõma, la baa a sã n deega lisgu, bɩ d modg n zãms Kell-y n pa-y “Wẽnnaam nonglmã pʋgẽ” sebrã ne-a, sẽn na yɩl n sõng-a t’a “tall tẽeb kãenkãe.” (Kol. 2:7) Rẽ yĩnga, y maanda woto bɩ?

18, 19. Wilg-y bũmb a wãn sẽn kɩt tɩ d segd n pʋʋs a Zeova barka.

¹⁸ Bũmb wʋsg la a Zeova maan-yã, tɩ d segd n pʋʋs-a bark rẽ yĩnga. Pʋd n yaa yẽ n naan tõndo, yẽ n zãad tõnd yõorã, tɩ d tõe n maan d sẽn maandã fãa. (Tʋʋ. 17:27, 28) A leb n kõo tõnd Biiblã sẽn yaa yẽ Gomdã. Wa Tesalonik kiris-nebã, tõnd me nonga Biiblã ne d sũur fãa, n sak n deeg t’a yaa Wẽnnaam Gomde, la d pʋʋsd Wẽnnaam barka.—1 Tes. 2:13.

¹⁹ Biiblã sõnga tõnd tɩ d paam zood hakɩɩk ne a Zeova. (Zak 4:8) D paamame tɩ d saasẽ ba wã bool-do, tɩ d wa naag a nin-buiidã, tɩ rẽ yaa zu-zẽkre. Yɩɩn-gʋlsdã ra yeela bũmb sẽn wilgd tõnd me tagsgo. A ra yeelame: “Pʋʋs-y Sẽn-Ka-Saab bark b sõmblmã yĩnga, bala, bãmb nonglmã paada wakat fãa!” (Yɩɩn. 136:1) “Bãmb nonglmã paada wakat fãa” wã yaa Yɩɩn-sõamyã 136 soabã reesgo. Yɩɩn-kãng pʋgẽ, naoor 26 la b yet woto. Hakɩɩka, tõnd ned kam fãa sã n kell n maan sɩd ne a Zeova, la a tũ noy la sagls nins a sẽn kõt tõnd ne a siglgã maasmã, a na n wa paam n vɩɩmda wakat sẽn kõn sa, n bãng t’a Zeova nonglmã sɩd paada wakat fãa.