Yãmb me tagsda woto bɩ? Tõnd fãa mi n paama zu-loe-kɛgems wa a Samantha. La d sẽn welgd zu-loees nins sẽn tõe n kɩt tɩ d tʋm pʋ-likã to-to wã, tõe n wilga d sẽn sɩd yaa ned ninga. Wala makre, yell taoore, sẽn pak tõnd n yɩɩd sã n yaa modg n da paam taale, d tõe n wa getame tɩ baa d sã n maan pʋ-lika, pa wẽng ye. La sɩdã sã n wa vẽnege, d pʋ-likã biis tõe n yɩɩ wẽng wʋsgo. Ad makr a wãna.

Yɩl tɩ neb a yiib zood tall pãnga, rẽnda b kɩs taab sɩda. B sã n wa tõe n bas b yam ne taaba, b ned kam fãa pɛlg yaa kãn-kãe, tɩ rabeem pa tar-a ye. La ned pa wat n tiig n bas a yam ne a to ye. Yaa b sã n naagd taab n tʋmdẽ, n pelgd b pʋg n sõsd la b maand taab neere, la b tõe n wa kɩs taab sɩda. La pʋ-lik baa yaa bilf tõe n kɩtame tɩ ned pa le kɩs a to sɩd ye. Sã n wa n yaa woto, yɩl tɩ bas-yard lebs n zĩnd yaa toogo.

Ned y sẽn da nand wʋsg zoe n zãmba yãmb bɩ? Yãmb manesem yɩɩ wãna? Tõe tɩ sãama y sũur wʋsgo. La y bee bʋʋm. Vẽenega, pʋ-lik tõe n sãama zood sẽn tar pãnga.

Etazĩni inivɛrsite karen-saamb a Robert Innes yeelame tɩ “pʋ-lik yaa wa bã-loangdga.” Dẽnd y sã n wae n be ne neb sẽn nong pʋ-lika, y tõe n lebga wa bãmba.

Bõe n tõe n sõng-y tɩ y zãag ne pʋ-lika? Yaa Biiblã. D ges Biiblã sagls a wãn sẽn tõe n sõng-yã.