1. Bõe yĩng tɩ d sũur noom d sẽn paam n tar tẽebã?

PA NEBÃ fãa n tar tẽeb ye. (2 Tes. 3:2) La a Zeova kõta neb nins fãa sẽn tũud-a wã tẽebo. (Rom. 12:3; Gal. 5:22) D sũur yaa noog wʋsgo, d sẽn paam t’a Zeova sõng-d tɩ d tar tẽebã!

2, 3. a) Ned sã n tar tẽebo, bark bʋs la a tõe n paame? b) Sogs-bʋs la d na n leoke?

² A Zeezi Kirist yeelame t’a Ba sẽn be saasẽ wã boonda nebã ne yẽ maasem, tɩ b lebgd a zo-rãmba. (Zã 6:44, 65) Ned sã n tẽed a Zeezi, rẽ masã la Wẽnnaam tõe n sak n kõ-a a yel-wẽnã sugri. A soab tõe n paamame n yɩ a Zeova zoa, n wa vɩɩmd wakat sẽn kõn sa. (Rom. 6:23) Bõe yĩng tɩ Wẽnnaam maan tõnd neer woto fãa? Yaa a bark kũunã sẽn ka to wã. Tõnd sẽn yaa koangdbã, d sẽn da segd ne bal yaa kũum. (Yɩɩn. 103:10) La a Zeova yãame tɩ d ned kam fãa tõe n maana sẽn yaa sõma. A sõnga tõnd tɩ d wʋm koe-noogã, tɩ kẽ d sũyã. Rẽ tɛka, d sɩngame n tẽed a Zeezi,  n saagdẽ tɩ d na n wa paama vɩɩm sẽn kõn sa.—Karm-y 1 Zã 4:9, 10.

³ La rẽ yĩnga, tẽeb yaa f sẽn na n mi bũmb nins Wẽnnaam sẽn na n wa maan n kõ-dã bal bɩ? Rẽ bal sã n pa seke, bõe me la ned sẽn tar tẽeb segd n maane? Sogs-kãensã la d na n leoke.

4. Ned sã n tar tẽebo, kɩtdame t’a maand bõe?

⁴ Tẽeb pa tek f sẽn na n mi bũmb nins a Zeova ne a Zeezi sẽn na n wa maan n kõ-dã bal ye. Ned sã n tar tẽebo, kõt-a-la pãng t’a maand bũmb nins Wẽnnaam ne a Zeezi sẽn datã. Kɩtdame me t’a soab moond fãagr koe-noogã, sẽn na yɩl tɩ neb a taabã me wʋme. Tʋm-tʋmd a Poll ra yeelame: ‘Fo sã n kɩs Zu-soab a Zeezi kaset ne f noore, la fo sã n tẽ f sũurẽ tɩ Wẽnnaam vʋʋga bãmb n yiis kũum sʋka, fo na paam fãagre. Bala, yaa ned sẽn na n tar tẽeb a sũurẽ la a paamd tɩrlem, la yaa ned sẽn na n kɩs kaset ne a no-goam la a paamd fãagre.’—Rom. 10:9, 10; 2 Kor. 4:13.

5. Bõe yĩng tɩ d yetẽ tɩ tẽeb tara yõod wʋsgo? Bõe la d segd n maan tɩ d tẽebã tall pãnga? Rɩk-y makre.

⁵ Yaa vẽeneg tɩ yɩl n wa paam n kẽ dũni-paalgã pʋgẽ, n vɩɩmd wakat sẽn kõn sa, rẽndame tɩ d tall tẽeb la d mao tɩ d tẽebã kell n tall pãnga. Tẽebã yaa wa tɩɩg ned sẽn sele. Yɩl t’a ket n bɩtẽ, rẽndame t’a zãgsd-a koom. Tɩɩgã sã n pa paamd koom tɩ seke, a na n zelgame, n wa baas n ki. Tõnd sã n pa ges d tẽebã me yelle, a pa na n tall pãng ye. A tõe n tolg n kiime menga. (Luk 22:32; Ebre. 3:12) La d sã n get d tẽebã yell sõma, a na n talla pãnga, la a ket n bɩtẽ.—2 Tes. 1:3; Tit 2:2.

6. Wilg-y tẽebã buk a yiibã b sẽn bilg Ebre-rãmb 11:1 pʋgẽ wã.

⁶ Ebre-rãmb 11:1 wã pʋgẽ, Biiblã bilgda tẽeb sẽn yaa bũmb ningã. (Karm-y-yã.) B wilga be tɩ tẽebã yaa buk a yiibu: 1) Yaa ‘pɛl-kɛgeng ned sẽn tar ne bũmb nins a sẽn tẽed t’a na n paamame’ wã. Wala makre, d tẽeda Wẽnnaam sẽn pʋlem t’a na n wa kɩtame tɩ wẽnem buud fãa sa, la a kɩt tɩ tẽngã lebg arzãnã, n bas yard tɩ na n sɩd pidsame. 2) Tẽeb yaa “bũmb nins ned sẽn ka ne wã wilgri.” Rat n yeel tɩ bũmb f sẽn pa tõe n yã, n yaool n kɩs sɩd t’a beeme, hal n tõe n wilg ned rẽ. Wala makre, d pa ne Wẽnnaam a Zeova, a Zeezi Kiristi, a Rĩungã la malɛgsã sẽn be saasẽ wã, la d kɩsa sɩd tɩ b beeme. (Ebre. 11:3) Bõe la d tõe n maan n wilg tɩ d sɩd tẽeda a Zeova pʋlemsã, la bũmb a taab d ninã sẽn pa ne? D tõe n wilga rẽ ne d no-goamã, d tʋʋm-tʋmdɩ wã, la d sẽn vɩ to-to wã.

7. Bõe la a Nowe maan-yã, tɩ sõngd tõnd tɩ d bãng bũmb nins ned sẽn tar tẽeb sẽn segd n maane? (Ges-y sõsgã sɩngrẽ fotã.)

⁷ Ebre-rãmb 11:7 wã pʋgẽ, b goma a Nowe tẽebã yell n yeel woto: ‘Yaa ne tẽeb la a Nowe, wakat ning Wẽnnaam sẽn wilg-a bũmb nins neb sẽn dag n nan zɩ n yã wã, a zoee Wẽnnaam dabeem, n ka koom-kogl-bedre, n na n fãag a yirã rãmba.’ A Nowe wilga a tẽebo, a sẽn ka koom-koglg kẽengã. La tõe tɩ nebã sẽn yã t’a Nowe kaad koglg sẽn labs a woto wã, b sok-a lame n na n bãng a võore. Rẽ yĩnga, a sĩnda a noor wall a yeel-b tɩ b gom sẽn pak-b bɩ? Ayo! A tẽebã kɩtame t’a taas-b koɛɛgã ne yẽesem, n keoog-b tɩ Wẽnnaam bʋ-kaoor n wate. Wõnda a tolg n togs-b-la Wẽnnaam  sẽn yeelã bal kɛpɩ. Wẽnnaam da yeel-a lame yaa: “Mam yãka yam n na n menes bõn-vɩɩsã buud fãa. Bala, bãmb kɩtame tɩ dũniyã pid ne tʋʋm-beedo. . . . Mam na n kɩtame tɩ sa-kẽeng ni dũniyã zugu, n sãam bũmb ning fãa sẽn vɩ, n vʋʋsd ne yõor n be saasã tẽngrã. Bũmb ning fãa sẽn be dũniyã zugã na n sãamame.” Yaa vẽeneg t’a Nowe wilga nebã b sẽn segd n maan n paam n põse. A togs-b lame tɩ Wẽnnaam yeelame tɩ b segd n “kẽe koom koglgã pʋga.” A sẽn maan woto wã, a yɩɩ ‘tɩrlem koe-moaanda,’ tɩ rẽ me wilg t’a tara tẽebo.—Sɩng. 6:13, 17, 18; 2 Pɩy. 2:5.

8. A Zak sebrã sẽn be Biiblã pʋgẽ wã goma tẽebã yelle, n yeel tɩ bõe?

⁸ A Zak sebrã sẽn be Biiblã pʋgẽ wã me goma tẽebã yelle. Wõnda yaa tʋm-tʋmd a Poll sẽn gʋls a lɛtrã n tool ebre-rãmbã poor la a Zak gʋls a sebrã. Yẽ me wilgame tɩ tẽeb hakɩɩkã pa tek f sẽn na n tẽed f sũurẽ bala, la tɩ yaa tɩlɛ tɩ f tʋʋm-tʋmdɩ wã wilg f tẽebã. Ad a sẽn yeele: “Wilg maam f tẽeb tɩ tʋʋm ka tũ ye, la mam na n talla m tʋʋma n wilg foo m tẽebo.” (Zak 2:18) A Zak sẽn yeel bũmb ning rẽ poorã wilgda vẽeneg tɩ ned sẽn yet bal t’a tẽedame yaa toor ne ned sẽn sɩd tar tẽebo. A yeelame tɩ  zĩn-dãmbã me tẽedame tɩ Wẽnnaam beeme. B yaool n maanda b sẽn tõe fãa sẽn na yɩl tɩ Wẽnnaam daabã ra pidsi, tɩ wilgdẽ tɩ b sɩd pa tar tẽeb ye. (Zak 2:19, 20) Rẽ poore, a Zak goma ned sẽn tall tẽeb yelle. A sokame yaa: “Ka ne tʋʋm la tõnd ba a Abrahaam paam tɩrlem, a sẽn ning a bi-ribl a Izak tẽng-kugr zug n kõ Wẽnnaamã la?” A paasame: “Fo neeme tɩ tẽeb n dag n naag ne tʋʋmã, la a tʋʋmã yĩnga, Wẽnnaam kɩtame t’a zems zãnga.” Rẽ masã la a Zak yeel vẽeneg yaa: “Yĩng sã n ka naag ne sɩɩga, a yaa kũum. Woto me, tẽeb sã n ka naag ne tʋʋma a yaa kɩɩnga.”—Zak 2:21-23, 26.

9, 10. Bõe la tʋm-tʋmd a Zã yeel-yã, tɩ wilgd ned sẽn tar tẽeb sẽn segd n maane?

⁹ Sẽn yɩɩd yʋʋm 30 poore, tʋm-tʋmd a Zã gʋlsa a evãnzillã, ne lɛta a tãabã a sẽn tool tigimsã. Wa Biibl-gʋlsdb a taabã, yẽ me togsa bũmb nins ned sẽn segd n maan tɩ wilg t’a tara tẽeb hakɩɩka. A pʋda gɛrk gom-bil ning b sẽn lebg moorã pʋgẽ tɩ “tẽeb” bɩ “tẽ” wã n yɩɩd Biibl-gʋlsdb a taabã.

¹⁰ Wala makre, a yeelame: “Ned ning sẽn tẽed-a Bi-riblã tara vɩɩm sẽn kõn sa. La ned ning sẽn kɩɩsd-a Bi-riblã kõn paam vɩ-kãng ye, la Wẽnnaam sũ-puugrã na n ta-a lame.” (Zã 3:36) A gomdã wilgdame tɩ sẽn tar-a tẽeb segd n sakda a Zeezi. Sɩd me, a Zã sɛbã wilgdame tɩ yaa naoor wʋsg la a Zeezi yeel nebã vẽeneg tɩ yaa tɩlɛ tɩ b wilg tɩ b tẽeda yẽ ne a Ba wã.—Zã 3:16; 6:29, 40; 11:25, 26; 14:1, 12.

11. Bõe la d tõe n maane, n wilg a Zeova tɩ d sẽn paam n bãng sɩdã noom-d lame?

¹¹ A Zeova sẽn sõng tõnd ne a vʋʋsem sõngã maasem tɩ d bãng sɩdã, la d tõe n wilg d tẽebã yaa bõn-sõng tɛkẽ. (Karm-y Luk 10:21.) A sõnga tõnd ne a bi-riblã sẽn yaa “tõnd tẽebã sɩngd la a taasdã” maasem tɩ d paam a zoodo. D segd n pʋʋsd-a-la bark wakat fãa rẽ yĩnga. (Ebre. 12:2) Yaa a bark sẽn ka to wã yĩng la a sẽn maan-d neer woto wã. Sẽn na yɩl n wilg tɩ d sũur nooma ne rẽ, d segd n wɩngda ne pʋʋsgo, la ne a Gomdã zãmsgo, tɩ kengd d tẽebã.—Efɛ. 6:18; 1 Pɩy. 2:2.

12. D sã n tar tẽebo, na n kɩtame tɩ d maand bõe?

¹² Segdame tɩ d ket n wilgd ne d tʋʋm-tʋmdɩ wã tɩ d tẽeda a Zeova pʋlemsã ne d sũur fãa. Wala makre, d ket n moond Wẽnnaam Rĩungã koɛɛgã, la d sõngd nebã tɩ b lebgd a Zeezi karen-biisi. D ket n modgd n maand “nebã fãa neere,” sẽn yɩɩd fãa d “tẽeb pʋgẽ ba-biisã.” (Gal. 6:10) D ket n maand d sẽn tõe fãa me n tõog n ‘yeeg d yalẽ-kʋdgã ne a tʋʋmã,’ sẽn na yɩl tɩ baa fʋɩ ra wa sãam zood ning d sẽn tar ne a Zeova wã ye.—Kol. 3:5, 8-10.

13. Bõe la Biiblã yet tɩ wilgdẽ tɩ tẽeb tara yõod wʋsgo?

¹³ Biiblã yetame: “Tẽeb sã n kaẽ, ned ka tõe n ta Wẽnnaam yam ye. Ned ning sẽn wat Wẽnnaam nengẽ tog n tẽeme tɩ b beeme, la tɩ b ronda neb nins sẽn baood bãmbã.” (Ebre. 11:6) Biiblã wilgdame me tɩ tẽebã naaga bũmb nins ned sẽn segd n deng n paame, n yaool n tõog n lebg kiris-ned kakɩɩkã. D tõe n maka bõn-kãens fãa ne roog yẽbgre. (Ebre. 6:1, 2) Zʋg-sõma nins kiris-ned sẽn segd n bɩɩs n paasã yaa wa b sẽn na n dogl yẽbgrã zug n me n taasã.—Karm-y 2 Pɩyɛɛr 1:5-7; Zʋʋd 20, 21.

14, 15. Bõe yĩng tɩ d segd n bɩɩs nonglem la d ra bɩɩs tẽeb bala?

 ¹⁴ Biiblã gʋlsdb kẽer goma tẽebã yell n yɩɩd zʋg-sõma a taabã, tɩ wilgdẽ tɩ tẽebã tara yõod wʋsgo. La rat n yeelame tɩ yaa tẽebã la d segd n bɩɩs n yɩɩd zʋg-sõma nins sẽn ketã bɩ?

¹⁵ Tʋm-tʋmd a Poll togsa gomd sẽn wilgd tɩ d segd n bɩɩsa nonglem me, la d ra bɩɩs tẽeb bal ye. A yeela woto: “Mam sã n tar tẽeb sẽn tõe n sers tãmse, mam sã n ka tar nonglem, mam ka fɩ.” (1 Kor. 13:2) Daar a ye, ned n sok a Zeezi n na n bãng Wẽnnaam tõog ning sẽn yaa “kãseng n yɩɩda,” t’a leok tɩ yaa tõog ning sẽn yet tɩ d nong Wẽnnaamã. (Mat. 22:35-40) Nonglem kɩtdame tɩ d bɩɩs tẽeb la zʋg-sõma a taaba. Sɩd me, Biiblã yetame tɩ nonglem “tẽeda bũmb fãa.” Dẽnd nonglem kɩtdame tɩ d tẽed bũmb nins fãa Wẽnnaam sẽn wilg a Gomdã pʋgã.—1 Kor. 13:4, 7.

16, 17. a) Wãn to la b wilgd Biiblã pʋgẽ tɩ tẽebã la nonglmã fãa tara yõodo? b) B yiibã sʋka, bʋg n yɩɩda, la bõe yĩnga?

¹⁶ Nonglmã ne tẽebã fãa yõod sẽn waoogã kɩtame tɩ Biiblã gʋlsdbã kẽer mi n pʋt gom-biis a yiibã vɛrse yɛng pʋgẽ. Wala makre, a Poll sagla a tẽed-n-taasã tɩ b ‘bob tẽeb la nonglem wa gãntika.’ (1 Tes. 5:8) A Pɩyɛɛr me yeelame: ‘Baa ne yãmb sẽn nan ka yã a Zeezi Kirisã, yãmb nonga bãmba. Baa yãmb sẽn nan ka yã bãmbã, yãmb tẽeda bãmba.’ (1 Pɩy. 1:8) A Zak me ra soka a tẽed-n-taasã sẽn paam vʋʋsem sõng zaeebã woto: ‘Wẽnnaam ka yãk neb nins sẽn yaa naong rãmb dũniyã rãmb nifẽ tɩ bãmb na n paam tẽeb arzegse la b paam pʋɩɩr ne soolem ninga bãmb sẽn kãab neb nins sẽn nong bãmba la?’ (Zak 2:5, Wẽnnaam sebre, 1983) A Zã me ra yeelame: ‘Ad bãmb tõogã la a woto: Yaa tɩ d tẽ bãmb bi-ribl a Zeezi Kiris yʋʋre, la tɩ d nong taab wala sẽn zems tõog ning a Zeezi sẽn kõ tõndã.’—1 Zã 3:23.

¹⁷ Yaa sɩd tɩ tẽebã tara yõod wʋsgo. La pa na n le wa yɩ tɩlɛ tɩ d tẽ bũmb kẽer ye. Wẽnnaam pʋlemsã fãa sã n wa pidsi, d pa na n ket n tẽed-b ye. La d na n ket n bɩɩsda nonglem ning d sẽn tar ne Wẽnnaam la ne d taabã. Rẽ n so t’a Poll yeel woto: “Ad bũmb a tãab nins sẽn paadã: yaa tẽebo, la saag-sõngo, la nonglem. La sẽn yaa kãseng bãmb sʋk n yɩɩdã, yaa nonglem.”—1 Kor. 13:13.

18, 19. Wẽnnaam nin-buiidã sẽn tar tẽebã kɩtame tɩ b paamd bark bʋse, la ãnd n segd ne pẽgr dẽ yĩnga?

¹⁸ Rũndã-rũndã, a Zeova nin-buiidã sẽn sak t’a wilgd-b sor ne a vʋʋsem sõngã maasmã kɩtame tɩ b tẽed ne b sũur fãa t’a lugla a Rĩungã, n teend Rĩun-kãnga, la b nong taaba. (Gal. 5:22, 23) Rẽ woma bi-bʋse? Dũniyã gill zugu, b sõorã yɩɩda milyõ a nii masã. B tigimsã pʋsẽ, nonglem la zems-n-taar be b sʋka. Woto fãa wilgda vẽeneg tɩ tẽebã la nonglmã yõod sɩd waoogame.

¹⁹ Yaa ne tõnd Wẽnnaamã sõngr bal la nonglem la zems-n-taar sẽn be d sʋkã. A segda ne pẽgr dẽ yĩnga. (Eza. 55:13) Tõnd sũur nooma wʋsgo, a Zeova sẽn kɩt tɩ d tõe n wa paam ‘fãagre, tẽeb yĩngã.’ (Efɛ. 2:8) A na n kell n sõnga neb wʋsg tɩ b bãng-a, la b tẽ-a. Tẽngã na n wa pida ne neb sẽn zems zãnga, n nong tɩrlem, la b tar sũ-noogo, neb sẽn na n pẽg Wẽnnaam wakat sẽn kõn sa!