Daar a ye, biigã maana woto tɩ sãan sok-a yaa: “Fo pa mi tɩ bilfã yɩɩda bedrã naoor a yi la? Biigã laame, n bas n leok-a t’a miime. Sãana sok-a lame tɩ sã n yaa rẽ, bõe yĩng t’a pa yãk bilfã? Biigã leokame tɩ yẽ sã n yãk bilfã, nebã na n bãngame tɩ yẽ pa yalmã, la tɩ b pa na n le reem woto ne yẽ ye. La a bas n sok sãana yaa: “Fo mii ligd mam sẽn paam a pʋgẽ?” Bi-riblã talla yam. Yam yaa bũmb sẽn nafd baa kãsembã.

Biiblã yeta woto: “M biiga, gãd yam ne bãngr neere, la f ra bas-b tɩ b zãag ne-f ye. Woto, fo na n kẽndame n ka yɛɛsdẽ ye, la f naoor me kõn lak bũmb ye.” (Yel. 3:21, 23) La bõe n wilgd tɩ ned tara yam? D sã n tar yam, wãn to la kogend tõndo? D sã n bãng rẽ, na n sõngame tɩ d naoor da wa lak bũmbu, rat n yeel tɩ n maan bũmb n sãam Wẽnnaam sũur ye.

Ned sẽn tar yam yaa toor ne ned sẽn tar bãngre, la ned sẽn tõe n wʋm bũmb võore. Ned sẽn tar bãngr yaa ned sẽn mi bũmb ka tɛka. Ned sẽn tõe n wʋm bũmb võor yaa ned sẽn tõe n fees yell n bãng a vɩʋʋgo. La ned sẽn tar yam yaa ned sẽn tar bãngre, n tõe n wʋm bũmb võor me, la a tõe n kɩt tɩ rẽ sõng-a t’a sẽn maand fãa tall nafa.

Wala makre, ned tõe n karma Biiblã sɩd yetame tɩ bõe? sebrã wakat bilf pʋgẽ n sa, n tõog n wʋm sebrã goam võore. Biiblã zãmsg sasa, a tõe n leokda sogsgã sõma. A tõe n sɩnga tigissã waoong menga, hal n tõe n zẽk a nug n leok sogsgã sõma. Yaa sɩd tɩ woto fãa tõe n wilgdame t’a tẽebã bɩtame. La rẽ yĩnga a paamda yam zãmsgã pʋgẽ sɩda? Bũmb pa wilgd rẽ ye. Tõe t’a wʋmda bũmb nins a sẽn zãmsdã võor tao-tao bala. La yaa a sã n tũud a sẽn zãmsdã la wilgd t’a paamda yam. A yam-yãkr sã n wom bi-sõma, wilgdame t’a maga sõma, la t’a tagsa yɩɩga. Rẽ la yaa vẽeneg t’a tara yam.

Matye 7:24-27 wã pʋgẽ, a Zeezi goma rap a yiib sẽn me b rot yelle. A yeelame tɩ b nin-yend n yaa “yam soaba.” A reng n tagsa yell ning sẽn tõe n wa maan roogã, n yãk yam n me kugr zugu. A talla yam, bala, a tagsa yɩɩga. Sẽn tar-a yamã pa tags t’a sã n me a roogã bĩisr zug la a pa na n yiis ligd wʋsgo, wall na n yɩɩ tao-tao ye. A talla yam, n pĩnd n tags a tʋʋmdã sẽn tõe n wa baas to-to. Rẽ n so tɩ baa seb-kẽeng sẽn wa n fugi, roogã pa lʋɩ ye. La bõe la ned tõe n maan n paam yam, la a kell n gãd-a neere?

Pipi, d tẽeg tɩ Miise 6:9 yeta woto: “Sẽn tar-b yamã zoeta [Wẽnnaam] yʋʋrã.” Zoe a Zeova yʋʋrã rat n yeelame tɩ f waoog a yʋʋrã, n da  maan bũmb sẽn na n paoog-a, la f tũ a saglsã. Yɩl n bãng n waoog neda, rẽnda f mi a sẽn nong la a sẽn kisi. Woto, f tõe n kɩs-a-la sɩda, n dɩk yam a nengẽ, la f tũ a mak-sõngã. D yam-yãkr fãa pʋgẽ, d sã n deng n tags d tʋʋm-tʋmdɩ wã sẽn tõe n maneg wall sãam tõnd ne a Zeova zoodã, la d tũ a Zeova saglsã, wilgdame tɩ d paamda yam.

Yiib-n-soaba, d tũ Yel-bũn 18:1 goamã. Be, b yeta woto: “Sẽn vɩ-a a yembr maanda a sẽn date, la saglg buud fãa puugda a sũuri.” D sã n pa gũusi, d tõe n wa zãaga d meng ne a Zeova la a nin-buiidã. Sẽn na yɩl n da wa bak n vɩ toore, yaa tɩlɛ tɩ d nong n be ne sẽn zoet-b Wẽnnaam yʋʋrã la b modgd n tũud a noyã. Sã n pa bʋʋm-tɩrg yĩnga, segdame tɩ wakat fãa bɩ d kẽnd Rĩungã roogẽ n kelgd tigissã, n paamd n tigimd ne d tẽed-n-taasã. Tigissã sasa bɩ d modg n kelg neere, tɩ b sẽn yetã kẽ-d sõma.

Rẽ sẽn yãk a toogo, d sã n pelgd d pʋg n pʋʋsd a Zeova, tõnd ne yẽ zoodã na n paasdame. (Yel. 3:5, 6) D sã n wa karemd Biiblã la a Zeova siglgã sɛbã bɩ d pak d sũurã tɩ goamã kẽ-do. Rẽ, nand tɩ d maan bũmbu, d na n reng n tags n gesa sẽn tõe n wa ne biis ninsã, n paam tɩ d tʋʋm-tʋmdɩ wã la d sẽn magd n na n maanã zems ne a Zeova raabã. Segdame me tɩ d kelgd d tẽed-n-taas nins tẽeb sẽn bɩ sõma wã saglse. (Yel. 19:20) Woto, ned sã n sagl-do, d pa na n puug d sũur ye. Saglsã kelgr na n pʋd n sõng-d lame tɩ d paam yam.

Yam tõe n sõnga zak rãmba. D rɩk makr ne Biiblã sẽn yet tɩ pag fãa waoog a sɩdã. (Efɛ. 5:33) Bõe la pʋg-sɩd tõe n maan n paam t’a pag waoogd-a? A sã n modgd a pagã t’a waoogd-a, pa na n zãag zĩig ye. Pagã sã n pa rat no-koɛɛma, raoã sã n be yambẽ, a na n maanda wa a waoogd-a lame. La rẽ yĩnga, raoã sã n wa pa be yambẽ, a na n wilgda bũmb fãa pʋgẽ t’a waoogda a sɩdã bɩ? Yaa vẽeneg tɩ na n yɩɩ toogo. Sẽn são yaa raoã sẽn na n tags n bãng a sẽn tõe n maan t’a pagã sɩd waoogd-a wakat fãa. A sã n bɩɩsd zʋg-sõma nins Wẽnnaam vʋʋsem sõngã sẽn sõngd ned t’a bɩɩsã, n nong a pagã la a maand-a neere, a na n paamame t’a waoogd-a ne a sũur fãa. La yaa vẽeneg tɩ pag sẽn tũud a Zeova segd n waoogda a sɩdã, baa a sã n pa tar manesem-sõngo.—Gal. 5:22, 23.

Biiblã sagenda pʋg-sɩd fãa me t’a nong a paga. (Efɛ. 5:28, 33) Pag tõe n tagsame tɩ sẽn na yɩl t’a sɩd ket n nong-a, sẽn são yaa a sẽn na n solgd yɛl kẽer a sɩdã sẽn segd n bãnge. La wilgdame t’a tara yam sɩda? A sɩdã sã n wa bãng bũmb a sẽn solg-a, bõe n na n maane? A na n maneg n nong-a lame bɩ? Na n yɩɩ toogo. La pagã sã n bao wakat sẽn zemse, n maag a yĩng n togs yellã baa ne sẽn pa na n yɩ a sɩdã noogã, tõe t’a pẽg-a a pʋ-peelmã yĩnga. Rẽ la a sɩdã na n maneg n nong-a.

Kambã tog n saka b roagdbã, tɩ roagdbã me kibind-b ne a Zeova noyã. (Efɛ. 6:1, 4) La rat n yeelame tɩ roagdbã segd n gãnega noy ka tɛka, n wilg kambã sẽn segd la sẽn pa segd bɩ? Sẽn tar yõod n yɩɩdã pa kambã sẽn na n mi noy nins b sẽn gãneg zakã pʋgẽ wã, la b beegr fãa sɩbgr sẽn na n yɩ bũmb ning ye. Kiblgã zʋʋga rẽ. Roagd sẽn tar yam miime tɩ sẽn são yaa a sẽn na n sõng biig fãa t’a bãng bũmb ning sẽn kɩt t’a segd n yɩ sakdã.

D rɩk makr wa biig sẽn na n gom n paoog a ba bɩ a ma. Roagdã sã n tãs biigã wall a sɩbg-a, tõe n sãama biigã sũuri, pa rẽ bɩ kɩt t’a sĩnd n pa le gomda, mik a maanda sũ-kẽka. Rẽ yaool n tõe n wa kɩtame t’a pa le nong a roagdbã zĩigẽ woto ye.

Roagd sẽn tar yam rengd n tagsa a sẽn na n kibl a biig fãa to-to, la rẽ sẽn tõe n maan biigã bũmb ningã. Pa segd t’a sɩbg biigã zĩig pʋgẽ, paoogrã sẽn zabd-a wã yĩng ye. A tõe n baoo sẽk tɩ b sõse, tõe n yɩɩ yẽ ne biigã bala, t’a maag a yĩng n sõng biigã t’a bãng t’a Zeova sẽn dat tɩ kambã waoog b roagdbã yaa sẽn na yɩl tɩ b wa paam n vɩɩmd wakat sẽn kõn sa. Rẽ na n sõnga biigã t’a bãng t’a sã n waoogd a roagdbã, yaa a Zeova la a waoogda. (Efɛ. 6:2, 3) Roagdã sã n bʋk a meng ne biigã woto, saglgã na n kẽ-a lame. A na n sɩd neeme t’a roagdbã rata a neere, tɩ rẽ kɩt t’a maneg n waoogd-ba. Woto, yell sã n wa namsd-a, wall yaa bũmb la a rat n maane, a na n kosa a roagdbã sõngre.

Roagdb kẽer me sẽn pa rat n sãam b kambã sũyã, b tolg n pa kibind-b ye. La biig sã n pa paam kiblgu, a sã n wa lebg kãsma, bõe n na n maane? Rẽ yĩnga, a na n zoeta a Zeova, la a sak n deeg t’a noyã tũub yaa yam bũmb bɩ? A na n sak n tũuda a Zeova ne pʋ-peelem bɩ, bɩ a na n baka toor n maand a sẽn date?—Yel. 13:1; 29:21.

Ned sẽn peesd raad n maand teed sã n mi a tʋʋmd sõma, nand t’a maan bũmbu, a rengd n maga a sẽn na n pees-a to-to tɩ yɩ neere. A pa sɩngd tʋʋmdã bal n saagdẽ tɩ na n yɩɩ neer ye. Roagdb sẽn tar yam me baooda sẽk n zãmsd a Zeova noyã sõma, la b modgd n tũudẽ, tɩ wilgdẽ tɩ b zoeta a Zeova yʋʋrã. B sẽn pa zãagd b mens ne a Zeova la a nin-buiidã, kɩtame tɩ b paamd yam n tõogd n sõngd b zakã rãmba.

Daar ne a to fãa, d yãkda yam n maand bũmb wʋsgo, tɩ d yam-yãkr kẽer biis na n kaoos yʋʋma. D sã n dat n maan bũmb bɩ d ra yɩ yãg-yãg ye. Yɩta sõma tɩ d reng n tags neere, n maag d yĩng n ges sẽn na n wa ne biis nins kaoosg zugẽ. D bao sagls a Zeova nengẽ la d tũ. Woto, d wilgdame tɩ d gãda yam neere. Rẽ na n kɩtame tɩ d paam vɩɩm.—Yel. 3:21, 22.