Yãmb ra miime bɩ?

ÉCOUTER EN

Yãmb ra miime bɩ?

Pĩnd wẽndẽ, ned ra tõe n sɩd kẽe a to pʋʋgẽ n bʋd nadens bɩ?

A Zistiniyẽ sebrã b sẽn ges n lebs gʋls yʋʋmd 1468. Sebrã tara kibay wʋsg sẽn wilgd b sẽn welg yɛl kẽer to-to pĩnd wẽndẽ

MATYE 13:24-26 pʋgẽ, a Zeezi wẽe yel-bũnd n yeele: “Arzãn soolem wẽnda wa rao sẽn bʋd bõn-bu-sõng a pʋʋgẽ. La nebã sẽn gõe wakate, a bɛ wã waa n bʋda nadens koodã sʋk n bas n looge. Koodã sẽn zẽk n wom biisi, nadensã me pukame.” Seb-gʋlsdb kẽer yetame tɩ bãmb pa kɩs sɩd tɩ bũmb a woto ra maandame ye. La Rom dãmbã bʋ-kaoor sɛb n wilgd t’a buud ra beeme.

Sebr a ye yeelame tɩ Rom laloa wã pʋgẽ, ned sã n bʋd nadens a to pʋʋgẽ sũ-dokr yĩnga, a segda ne sɩbgre. Sebrã paasame tɩ b sẽn yiis noor yel-kãngã wɛɛngẽ wã wilgdame tɩ yaa bũmb sẽn da wae. Bʋ-kaoor yel-mit a Alastair Kerr yeelame tɩ yʋʋmd 533 wã, Rom naab a Zistiniyẽ yiisa sebr b sẽn boond tɩ Digeste. Be, a sõdga Rom nebã laloa wã noyã fãa, la bʋ-kaoor yɛl kẽer sẽn zĩnd yʋʋmd 100 soabã sẽnes n tãag yʋʋmd 250. Seb-kãng pʋgẽ, b wilgame tɩ bʋ-kaood a Ilpiyẽ lebg n tẽega yell a ye Rom nin-kãseng a Sɛlsiis sẽn welge. Yaa ned n da bʋd nadens a to pʋʋgẽ, tɩ sãam koodã. Sebrã pʋgẽ, b wilga bũmb toor-toor pʋʋgã soab sẽn da tõe n maan n paam tɩ bʋ-kaoodbã kɩt tɩ bɛɛgdã yao n dole.

Bũmb a woto sẽn da be Rom naamã sasa wã wilgdame t’a Zeezi sẽn gom bũmb ning yellã sɩd ra beeme.

Rom nanambsã ra kõo zʋɩf-rãmbã taoor dãmb sor tɩ b tõe n ges bũmb fãa yell Ziide soolmẽ wã bɩ?

PIPI kiris-nebã wakat tɩ Ziide ra bee Rom nebã nugẽ, tɩ b ra yãk guvɛrneer t’a so soolmã, n tar a sodaase. Guvɛrneerã n da reesd yõor yaoodã, la a get laafɩ wã la bãanã yelle. Rom nebã ra zabda ne sẽn kɩɩsd-b laloa wã, la b sɩbgd neb nins sẽn wat ne gudgr soolmã pʋgã. La b ra wae n basdame tɩ zʋɩf-rãmbã taoor dãmb get bũmb a taabã yelle.

Sãnedrẽ wã sẽn bʋʋd neda

Sãnedrẽ wã ra yaa zʋɩf-rãmbã bʋ-kaoodb sull ning sẽn tar noor n yɩɩdã. Bãmb n da get zʋɩf-rãmbã tõogã yelle. Bʋ-kaoodb sul-bõones n da be Ziide tẽnsẽ wã. Yell sã n da be neb sʋka, wall yaa ned n kɩɩs laloa wã, wõnda yaa sul-kãens n da wae n bʋʋdẽ, tɩ Rom nanambsã pa kẽesd b toog ye. Ad bũmb a ye zʋɩf-rãmbã taoor dãmb sẽn da pa tar sor n na n maane: B sã n kao ned bʋʋd t’a segd ne kũum, pa bãmb n tõe n kɩt tɩ b kʋ-a ye. Yaa Rom nanambsã n da tõe n kõ sore. La a Etɩyɛn kʋʋbã pa yɩ woto ye. Yaa Sãnedrẽ wã n kɩt tɩ b lob-a ne kug n kʋ.—Tʋʋ. 6:8-15; 7:54-60.

Sãnedrẽ wã sẽn maanã yaa bũmb b sẽn da pa tar sor n na n maane. Bãngd a ye yeelame tɩ bũmb sã n da wõnd na n waa ne gudgr soolmã pʋgẽ, Rom nanambsã tõe n yãka b sẽn na n maaneg zĩig pʋgẽ, n pa bao n bãng zʋɩf-rãmbã taoor dãmb tagsg meng ye. Wala makre, a Kolood Liziyaas sẽn da wa n yaa sodaas koabg naabã, zʋɩf-rãmbã ra rat n maana a Poll yelle, t’a Kolood kɩt tɩ b yõk-a n ning bãens roogo, n na n kogl-a.—Tʋʋ. 23:26-30.