Biiblã wilgdame tɩ malɛgsã ra mi n maana bũmb n kogl wẽn-sakdba, Wẽnnaam daabã pidsg yĩnga. (Yɩɩn-sõamyã 34:8) Wala makre:

• A Zeova sẽn wa n na n sãam Sodom ne Gomoorã, a kɩtame tɩ malɛgs sõng nin-tɩrg a Lot ne a zakã rãmb tɩ b zoe n põse.—Sɩngre 19:1, 15-26.

• Pĩnd wẽndẽ, Babilond rĩmã kɩtame tɩ b lob kom-bɩɩs a tãab sẽn yaa ebre-rãmb wʋng sẽn wɩng wʋsg pʋgẽ. La Wẽnnaam ‘tʋma a malɛk’ t’a wa fãag-ba.—Dãniyɛll 3:19-28.

• Daar a ye, b loba no-rɛɛs a Dãniyɛll gɩgma bokẽ, t’a pa be yʋng tõre, la gɩgma wã pa maan-a bũmb ye. Vẽkembeoogã, a yeelame tɩ yaa ‘Wẽnnaam n tʋm a malɛk t’a wa mum gɩgmã wã noy tɩ b ka tõog n maan yẽ bũmb ye.’—Dãniyɛll 6:17, 23.

Pipi kiris-nebã wakatẽ, sã n da wa yaa tɩlɛ, Wẽnnaam da mi n kɩtame tɩ malɛgs sõng kiris-nebã, a raabã pidsg yĩnga. Wala makre:

• B wa n yõka tʋm-tʋmdbã n page, tɩ malɛk wa pak bãens roogã kʋɩleng n yiis-ba, la a yeel-b tɩ b kẽng wẽnd-doogẽ wã, n kell n wɩng ne Wẽnnaam koɛɛgã taasgo.—Tʋʋmã 5:17-21.

• Malɛk n yeel koe-moond a Filip t’a tũ sor ning sẽn yit Zerizalɛm n pɩʋʋgd weoogã n debd Gaza wã, t’a na n yãa Etiopi ned sẽn wa n waoog Wẽnnaam n lebg n loogdẽ, n paam n taas-a koe-noogã.—Tʋʋmã 8:26-33.

• Wakat sẽn wa n ta tɩ Wẽnnaam na n sak masã tɩ bu-zẽmsã lebg kiris-nebã, malɛk n gom ne Rom soda-naab a Korney vẽnegr pʋgẽ, n yeel-a t’a tʋm tɩ b tɩ bool tʋm-tʋmd a Pɩyɛɛr t’a wa a yirã.—Tʋʋmã 10:3-5.

• B wa n yõka tʋm-tʋmd a Pɩyɛɛr n page,  tɩ malɛk vẽneg a meng ne-a, n yiis-a bãensã roogẽ.—Tʋʋmã 12:1-11.

Bũmb pa wilgd tɩ rũndã-rũndã, Wẽnnaam tʋmda malɛgsã tɩ b maand yel-soalem n sõngd nebã, wa b sẽn maan pĩnd wẽndẽ tɩ Biiblã gomd rẽ yellã ye. La a Zeezi goma bũmb sẽn na n maan tõnd wakatã yelle, n yeele: “Wẽnnaam soolmã koe-no-kãngã na n moona dũni gill fãa, tɩ yɩ kaset soolem toay-toayã fãa nebã yĩnga. Dẽ, wakat sɛɛb na yaool n ta.” (Matye 24:14) Rẽ yĩnga, yãmb miime tɩ Kirist karen-biisã tʋmda tʋʋm-kãngã dũniyã gill zugu, tɩ malɛgsã sõngd-b bɩ?

Vẽnegr sebrã wilgdame tɩ malɛgsã ra na n wa naag n sõnga nebã dũniyã gill zugu, tɩ b paam n bãng Wẽnnaam a Zeova, la a sẽn na n wa maan n kõ ãdem-biisã. Tʋm-tʋmd a Zã yeelame: “Mam yãnda malɛɛk a to sẽn yɩgd n pɩʋʋgd yĩngri: A rag n tara koe-noog sẽn paad wakat sẽn kõn sa, n na n togs neb nins sẽn be tẽng zugã, soolem fãa, buud fãa, goam buud fãa nebã, la tẽng fãa nebã. Yẽnda zẽka a koɛɛg n yetẽ yaa: Zoe-y Wẽnnaam dabeem la y waoog bãmba. Bala wakat taame tɩ bãmb na n kao bʋʋdo. Wõgemd-y soab ning sẽn naan-a yĩngr la tẽngã, ko-kãseng ne ko-bundsã taoore.” (Vẽnegre 14:6, 7) Kibay wʋsg n be rũndã-rũndã n wilgdẽ tɩ malɛgsã sõngda koe-moondbã sẽn moond koɛɛgã dũniyã gill zugã. Sɩd me, baa yaa yel-wẽn-maand a ye n tek yam n na n sak a Zeova, malɛgsã maanda sũ-noogo.—Luk 15:10.

La koe-moonegã tʋʋmd sã n wa ta a tɛka, bõe n na n maane? Malɛgsã sẽn be saasẽ wã na n naaga a Zeezi sẽn yaa rĩm-dãmb Rĩmã tɩ b zab Armagedõ zabrã sẽn yaa ‘Wẽnnaam sẽn tõe fãa ra-kãsengã’ zabrã. (Vẽnegre 16:14-16; 19:14-16) Malɛgs sẽn yaa pãn-kãsems rãmb la b na n tʋm tɩ b wa sãam “neb nins sẽn ka sakd tõnd Zu-soab a Zeezi koe-noogã.”—2 Tesalonik-rãmbã 1:7, 8.

La bãng-y tɩ yãmb yell paka malɛgsã. B baooda sẽn dat-b n tũ a Zeova ne b sũur fãa wã neere. Naoor wʋsgo, a Zeova tũnuga ne-b n kogl a nin-buiidã la a sõng-b tɩ b paam raoodo.—Ebre-rãmbã 1:14.

Bee ne tõnd ned kam fãa t’a yãk a sẽn na n maaneg masã. D na n sak n kelga koe-noogã b sẽn moond dũniyã gill zugã, la d tũ bɩ? A Zeova Kaset rãmbã sẽn be yãmb babgẽ wã na n saka ne sũ-noog n sõng-yã, tɩ yãmb me paam tɩ bũmb ning malɛgsã sẽn maand rũndã-rũndã wã naf-yã.