1, 2. a) A Zeezi tagsg ra yaa wãn ne Wẽnnaam tõogã? b) Wãn to la gʋlsdbã la fariziẽ-rãmbã ra golemd a Moyiiz tõogã?

A ZEEZI ra nonga a Moyiiz tõogã. Rẽ pa lingr ye. Bala, yaa a Zeova sẽn yaa a soab ning a Zeezi sẽn nong n yɩɩdã n kõ tõogã. Yɩɩn-sõamyã 40:9 wã ra pĩnd n wilgame t’a Zeezi na n nonga Wẽnnaam toogã wʋsgo. Be, b yetame: “Mam Wẽnnaam, mam dat n maana yãmb daabo, la m bĩng yãmb tõogã m sũurẽ.” Ne a no-goamã la a tʋʋm-tʋmdɩ wã, a Zeezi wilgame tɩ Wẽnnaam tõogã zemsa zãnga, tɩ nafda neda, la t’a fãa na n paama pidsgu.—Mat. 5:17-19.

² Sãmbg kae t’a Zeezi sũur sãama a sẽn da ne gʋlsdbã la fariziẽ-rãmbã sẽn golemd a Ba wã tõogã, tɩ wõnd a tũub yaa toogã. B ra gũusda wʋsgo, n tũud baa tõogã yel-bõonegã. Sɩd me, a Zeezi yeel-b lame tɩ b yãkda ‘mant la anet ne kume’ piig-pʋɩɩre. La yellã ra yaa bõe? Ad a sẽn yeele: “Yãmb basda bũmb nins sẽn yaa neer n yɩɩd tõogã pʋgẽ sẽn yaa tɩrlem, la nimbãan-zoeere, la sɩda.” (Mat. 23:23, Wẽnnaam Sebre, 1983) Sẽn da pak-b yaa gãneg noy nin-buiidã yĩnga. B ra pa wʋmd tõogã võore, la b ra tagsdẽ me tɩ b sãoo b taabã. La a Zeezi yẽ ra wʋmda tõogã võore. A ra mii bũmb ning sẽn kɩt t’a Zeova kõ tõogã, la tõogã noor fãa sẽn sõngd tɩ d bãng bũmb ning a Zeova zugu.

3. Bõe yell la d na n gom sõs-kanga pʋgẽ?

 ³ A Moyiiz tõogã tũub pa tɩlɛ ne tõnd ye. (Rom. 7:6) Baasgo, a Zeova kɩtame tɩ be Biiblã pʋgẽ, sẽn na yɩl tɩ d bao n bãng bũmb ning sẽn kɩt t’a kõ tõogã, la d bao n wʋm tõogã noor fãa võore, n bãng n tũ. Wala makre, soondg tẽnsã kibarã sõngda tõnd tɩ d bãng bõe? Sõsg ning sẽn loogã pʋgẽ, d yãa ned sẽn zoe n kẽng soondg tẽngẽ sẽn segd n maanega, la yam ning d sẽn tõe n dɩk rẽ pʋgẽ. La soondg tẽnsã leb n sõngda tõnd tɩ d bãng bũmb kẽer a Zeova mengã zugu, la d sẽn tõe n dɩk a togs-n-taar to-to. Sõs-kanga pʋgẽ, d na n leoka sogsg a tãabo: Soondg tẽnsã sõngda tõnd tɩ d bãng bõe a Zeova nimbãan-zoeerã wɛɛngẽ? Wãn to la sõngd tõnd tɩ d bãng a tagsg sẽn yaa a soab ninsaal vɩɩmã wɛɛngẽ? Wãn to me la sõngd tõnd tɩ d bãng t’a tɩrlmã ka to? D sã n wa leokd sokr fãa bɩ d maag d yĩng n ges d sẽn tõe n dɩk d saasẽ Ba wã togs-n-taar to-to.—Karm-y Efɛɛs-rãmb 5:1.

4, 5. a) Bõe n da kɩt tɩ yaa nana ne ned t’a zoe n kẽng soondg tẽngẽ? b) Bõe la rẽ sõngd tõnd tɩ d bãng a Zeova zugu?

⁴ Soondg tẽns a yoobã fãa ra yaa zĩis b sẽn tõe n kẽng nana-nana. A Zeova ra kɩtame tɩ b yãk tẽns a tãab Zʋrdẽ kʋɩlgã rʋʋnd a ye, a tãab rʋʋnd a to wã. Bõe yĩnga? Yaa sẽn na yɩl tɩ yɩ nana ne ned t’a zoe n ta be tao-tao. (Sõd. 35:11-14) Soay nins sẽn da rabd soondg tẽnsẽ wã ra manega sõma. (Tõo. 19:3) Zʋɩf-rãmbã kʋdemdã sɛb pʋgẽ, b wilgame tɩ b ra ninga bãna, tɩ ned tõe n bãng sorã nana. Soondg tẽns sẽn da be wã, ra pa tɩlɛ tɩ ned sẽn yãk yõor ne yĩdg zoe n kẽng bu-zẽms tẽngẽ, tɩ rẽ wa yɩ sabab t’a bas a Zeova tũub n pʋʋsd bõn-naands ye.

⁵ A Zeova meng n yeel tɩ ned sã n kʋ a to bɩ b yãk yẽ me yõorã. La a leb n kɩtame tɩ ned sẽn yãk yõor ne yĩdg tõe n paam tɩ b zoe a nimbãanega, la b kogl-a. Yãmb we n tags n gese! Biibl-mit a ye yeelame tɩ b ra maana bũmba fãa tɩ yaa vẽenega, la nana zãnga. A paasame tɩ woto sɩd wilgdame tɩ Wẽnnaam yaa maan-neer soaba. A Zeova pa bʋ-kaood sẽn pa mi nimbãan-zoeere, n dat bal n sɩbg a nin-buiidã ye. A yaa Wẽnnaam ‘sẽn tar nimbãan-zoeer wʋsgo.’—Efɛ. 2:4.

6. Bõe n wilgd tɩ fariziẽ-rãmbã ra pa rɩkd a Zeova togs-n-taar nimbãan-zoeerã wɛɛngẽ?

⁶ Fariziẽ-rãmbã yẽ ra pa kʋmd b taabã ye. Zʋɩf-rãmbã kʋdemdã sɛb pʋgẽ, b wilgame tɩ ned sã n maan yel-wẽnd n yɩlme, sã n yɩɩg naoor a tãabo, fariziẽ-rãmbã pa sakd n kõ-a sugr ye. A Zeezi rɩka makr n gom fariziẽ la yõor-yaood dɛɛgd yelle, n na n wilg tɩ fariziẽ-rãmbã  manesmã pa sõma ye. A yeelame tɩ fariziẽ wã pʋʋsame, n yeel yaa: “Mam Wẽnnaam, m pʋʋsda yãmb bark mam sẽn ka wẽnd wa neb a taabã sẽn yaa wagda la nin-wẽnse, la yoaadbã, la m ka wẽnd baa yaood-deegd-kãnga wã yĩnga.” Yõor-yaood dɛɛgdã yaool n sika a meng n kot Wẽnnaam sugri. Bõe yĩng tɩ fariziẽ-rãmbã ra pa rat n sak n kõ b taabã sugri? Biiblã yeelame tɩ yaa b sẽn da “paoogd b taabã” yĩnga.—Luk 18:9-14.

7, 8. a) Ned sã n beeg-yã, wãn to la y tõe n dɩk a Zeova togs-n-taare? b) Bõe yĩng tɩ d yetẽ tɩ sugrã kũun tõe n wilga ned sã n yaa sik-m-meng soaba?

⁷ Rɩk-y-yã a Zeova togs-n-taare, la y ra maan wa fariziẽ-rãmbã ye. Kʋmd-y y taabã nimbãanega. (Karm-y Efɛɛs-rãmb 4:32.) Tall-y manesem sẽn na n kɩt tɩ yaa ne nebã tɩ b kos-y sugri. (Luk 17:3, 4) Sok-y y meng yaa: ‘Ned sã n beeg-ma, baa yaa naoor ka tɛka, m sakd n kõo sugr nana, la tao-tao bɩ? Ned sã n beeg-m wall a maan bũmb tɩ sãam m sũuri, m tʋll n manega yellã tɩ laafɩ le zĩnd bɩ?’

⁸ Sugrã kũun tõe n wilga ned sã n yaa sik-m-meng soaba. Fariziẽ-rãmbã sẽn da tagsd tɩ b sãoo b taabã n kɩt tɩ b ra pa sug-kõatbã. La d sẽn yaa kiris-nebã, d sikda d mense, n getẽ tɩ d taabã yɩɩda tõndo, tɩ rẽ kɩt tɩ d sakd n kõt-b sugri. (Fili. 2:3) Bɩ d sok d meng yaa: ‘M dɩkda a Zeova togs-n-taare, n yaa sik-m-meng soab bɩ?’ Y manesmã sã n kɩt tɩ yaa nana ne y taabã tɩ b kos-y sugri, yaa wa y manegda y sugrã kũun “sor” tɩ b tõe n tũ n ta y nengẽ nana. Bɩ d kõt sugr tao-tao, la d mao tɩ d sũur da yikd tao-tao ye.—Koɛ. 7:8, 9.

9. Bõe la a Zeova maan tɩ sõng Israyɛll nebã tɩ b bãng tɩ b segd n nanda ninsaal vɩɩm?

⁹ Ad bũmb a ye sẽn kɩt tɩ b yãk soondg tẽnsã: Yaa sẽn na yɩl tɩ zɩɩm taal ra wa zĩnd Israyɛll nebã zug ye. (Tõo. 19:10) A Zeova nanda ninsaal vɩɩmã. A kisa “nus sẽn daagd bʋʋm soab zɩɩm.” (Yel. 6:16, 17) A sẽn yaa sõng la tɩrgã, ned sã n yãk a to yõore, baa yaa ne yĩdgu, a pa tõe n bas taal woto bal ye. Yaa sɩd tɩ sã n yaa ne yĩdgu, a paamdame tɩ b zoe a nimbãanega. La a segd n deng n tɩ yãa kãsem-dãmbã, n togs yellã. Kãsem-dãmbã sã n fees yellã n mik t’a sɩd pa maan pʋ-toogo, a segd n kell n zĩnda soondg tẽngẽ wã n tãag maan-kʋʋdb kãsmã kũum. Tõe meng t’a na n paa be a yõor tɛka. No-kãnga ra sõngda Israyɛll nebã fãa tɩ b bãng tɩ b segd n nanda ninsaal vɩɩmã. Sẽn na yɩl n wilg tɩ b waoogda b Naandã, ra yaa tɩlɛ tɩ b gũus n da wa maan bũmb sẽn tõe n yãk b to yõor ye.

10. Bõe la a Zeezi yeel-yã, tɩ wilgdẽ tɩ gʋlsdbã ne fariziẽ-rãmbã ra pa nand ninsaal vɩɩm?

¹⁰ Gʋlsdbã la fariziẽ-rãmbã ra pa rɩkd a Zeova togs-n-taar ye. B ra pa nand ninsaal vɩɩm ye. Ad a Zeezi sẽn yeel-ba: “Yãmb feooga bãngr kʋɩlen-bilã. Yãmb mens ka rat n kẽ ye, la y gɩdgda neb nins sẽn dat n kẽ wã tɩ b ka tõe n kẽ ye.” (Luk 11:52) Yaa bãmb n da tog n sõng nebã tɩ b  wʋm Wẽnnaam goamã võore, la b sõng-b tɩ b wa paam vɩɩm sẽn kõn sa wã. La bãmb n wẽneg n kẽesd nebã moogo, n maand b sẽn tõe sẽn na yɩl tɩ b ra tũ a Zeezi sẽn yaa “vɩɩm-naabã” ye. (Tʋʋ. 3:15) Woto yaool n da na n kɩtame tɩ nebã wa sãam wakat sẽn kõn sa. B wuk-m-mengã la b rat-m-ye wã yĩnga, b ra pa baood b taabã neer ye. Ad b sɩd ka mi nimbãan-zoeer ye!

11. a) Bõe la tʋm-tʋmd a Poll maan-yã, tɩ wilg t’a nanda ninsaal vɩɩmã wa a Zeova? b) Bõe n na n sõng-d tɩ d rɩk a Poll togs-n-taare?

¹¹ Bõe n na n sõng-d tɩ d rɩk a Zeova togs-n-taare, la d ra yɩ wa gʋlsdbã ne fariziẽ-rãmbã? D wilg tɩ d nanda ninsaal vɩɩmã sẽn yaa Wẽnd kũunã. Tʋm-tʋmd a Poll maana a sẽn tõe fãa, n taas neb wʋsg koe-noogã, tɩ wilgdẽ t’a sɩd nanda ninsaal vɩɩm. Rẽ n so t’a wa tõog n yeel yaa: “Yãmb ned a yembr sã n sãame, a taalã ka be ne maam ye.” (Karm-y Tʋʋm 20:26, 27.) La a sẽn da moond koɛɛgã, pa sẽn na yɩl n da tall zɩɩm samde, leb n pa sẽn yaa tʋʋmd a Zeova sẽn bobl-a wã yĩng ye. Yaa a sẽn da nong nebã. A ra ratame tɩ ned buud fãa paam vɩɩm sẽn kõn sa wã. (1 Kor. 9:19-23) Segdame tɩ tõnd me nand ninsaal vɩɩmã wa a Zeova. A ratame tɩ ned buud “fãa tek yam n kos sugri,” n wa paam vɩɩm sẽn kõn sa. (2 Pɩy. 3:9) La yãmb yẽ? Tõnd me sũyã sã n pid ne nimbãan-zoeere, na n kɩtame tɩ d wɩng ne koɛɛgã moonego, tɩ d sũ-noogã me paase.

12. Bõe yĩng tɩ yõyã koglg yell tar yõod wʋsg Wẽnnaam nin-buiidã nifẽ?

¹² D sã n maand gũusg tõnd mengã la d taabã yõor koglg yĩnga, wilgdame tɩ d nanda ninsaal vɩɩmã wa a Zeova. Soayã zutu, tʋʋmã zĩisẽ, la wakat buud fãa, d tog n gũusdame, baa yaa siglgã roog la d met pa rẽ bɩ n manegdẽ, wall yaa tigissã zĩigẽ la d rabda. D tẽegdẽ tɩ yõyã koglg yõod yɩɩda sẽkã kẽgsgo, wall d sẽn na n paam ligd bɩ yõod wʋsgo. Tõnd Wẽnnaamã maanda sẽn yaa tɩrg wakat fãa, tɩ d rat n dɩk a togs-n-taare. Segdame tɩ kãsem-dãmbã maand gũusg n yɩɩda. B segd n tẽegda bãmb mensã la sẽn be-b ne bãmbã yõyã koglg yelle. (Yel. 22:3) Kãsem-soab sã n tẽeg yãmb noy kẽer vɩɩmã koglg wɛɛngẽ bɩ y sak n tũ. (Gal. 6:1) Wilg-y tɩ y nanda ninsaal vɩɩmã wa a Zeova, “tɩ zɩɩm taal ra wa zĩnd yãmb zug ye.”

13, 14. Bõe la Israyɛll kãsem-dãmbã ra tõe n maane, tɩ wilg tɩ b rɩkda a Zeova togs-n-taare?

¹³ A Zeova ra yeela Israyɛll kãsem-dãmbã tɩ b rɩk yẽ togs-n-taar tɩrlmã wɛɛngẽ. Ned sã n kʋ a to tɩ b na n bʋ, b segd n deng n bao n bãnga yellã vɩʋʋg sõma. Rẽ poore, b na n bao n bãnga bũmb ning sẽn kɩt t’a kʋ-a wã, la a manesem sẽn da yaa a soab ne kiidã, n ges b sã n tog n kõo sugri. Yaa tɩlɛ tɩ b bao n bãng sã n yaa ‘kisgr’ yĩng la a maan “pʋ-toog” n kʋ-a. (Karm-y Sõdb 35:20-24.) Kaset rãmb sã n beeme, yaa b yiib bɩ sẽn yɩɩd rẽ sã n kõ kaset t’a maana pʋ-toogo, la b tõe n ning-a taale.—Sõd. 35:30.

¹⁴ Kãsem-dãmbã sã n bãng yellã vɩʋʋgo, segdame tɩ b tags a soabã yelle, la b ra tagsd a sẽn maanã bal ye. B pa segd n dɩk yellã zugẽ-zugẽ ye. Yaa tɩlɛ tɩ b tall yam, n maag b yĩng n bʋgs neer n bãng yellã sẽn sɩng to-to. Sẽn yɩɩd fãa, yaa tɩlɛ tɩ b paam a Zeova vʋʋsem sõngã, tɩ sõng-b tɩ b rɩk a togs-n-taare, n bʋ yellã ne yam, nimbãan-zoeer la tɩrlem.—Yik. 34:6, 7.

15. Bõe n wilgd t’a Zeezi tagsg sẽn da yaa a soab yel-wẽn-maandbã zugã pa yembr ne fariziẽ-rãmbã?

¹⁵ Fariziẽ-rãmbã ra pa bʋʋd yell ne nimbãan-zoeer ye. B sã n na n kao ned bʋʋdo, sẽn pak-b n yɩɩd yaa a sẽn maanã, pa a mengã ye. Daar a ye, a Matɩe maana kibs a zakẽ wã, n bool a Zeezi. Fariziẽ-rãmbã sẽn yã a Zeezi be wã, b soka a karen-biisã yaa: “Yaa bõe tɩ yãmb karen-saambã rɩt ne yaood-dɛɛgdb la yel-wẽn maandba?” A Zeezi leokame yaa: “Ka neb nins sẽn tar laafɩ wã n baood tɩp ye, yaa bãad-dãmba. Dẽ, kẽng  n zãms-y koe-kãngã võore: ‘Mam sẽn dat yaa nimbãan-zoeere, ka maand ye.’ Bala, mam ka wa tɩ bool nin-tɩrs ye, yaa yel-wẽn-maandbã.” (Mat. 9:9-13) A Zeezi gomdã rat n yeelame tɩ yel-wẽnã maaneg pa wẽng bɩ? Ayo. A koe-moonegã pʋgẽ, a ra wae n yeta nebã tɩ b segd n teka yam n kos sugri. (Mat. 4:17) A ra neeme tɩ “yaood dɛɛgdbã ne yel-wẽn maandb” kẽer sɩnga yam tekre. B pa wa a Matɩe nengẽ rɩɩbã yĩng bal ye. B wʋsg ra zoe n pʋgda a Zeezi. (Mark 2:15) La fariziẽ-rãmbã fãa la bal tagsg nin-bãmbã zug ra pa yembr ne a Zeezi ye. B ra geta b taabã wa yel-wẽn-maandba, n tagsdẽ tɩ b pa tol n tõe n toeem ye. B ra yetame tɩ bãmb tũuda a Zeova, la b yaool n da pa rɩkd a togs-n-taar ye.

16. Ned sã n maan yel-wẽn-kãseng tɩ kãsem-dãmbã na n bʋ, bõe la b segd n bao n bãnge?

¹⁶ Rũndã-rũndã me, yaa tɩlɛ tɩ kãsem-dãmbã rɩk a Zeova togs-n-taare, n ‘nong tɩrlem.’ (Yɩɩn. 37:28) B sã n wʋm tɩ ned n maan yelle, b segd n deng n ‘sok n bãnga yellã neere.’ B sã n mik tɩ sɩd yaa yel-wẽnde, b segd n tũu Biiblã sẽn yetã n bãng n bʋ. (Tõo. 13:13-15) Ned sã n maan yel-wẽn-kãseng tɩ kãsem-dãmbã na n bʋ, b segd n maaga b yĩng n bao n bãng a sã n teka yam. Yɩl n bãng rẽ pa nana wakat fãa ye. Sẽn maan-a yellã tagsg sẽn yaa a soab a yel-wẽndã zugã, la sẽn be a sũurẽ wã tõe n sõngame tɩ b bãng a sã n teka yam. (Vẽn. 3:3) Kiris-ned sẽn maan yel-wẽnd sã n dat tɩ b zoe a nimbãaneg n kõ-a sugri, yaa tɩlɛ t’a tek yam. *

17, 18. Bõe n tõe n sõng kãsem-dãmbã tɩ b bãng ned sã n sɩd teka yam? (Ges-y sõsgã sɩngrẽ fotã.)

¹⁷ A Zeova ne a Zeezi tõe n bãnga sẽn be ned sũurẽ. La kãsem-dãmbã pa tõe ye. Woto wã, bõe n tõe n sõng kãsem-soab t’a bãng ned sã n sɩd teka yam? Pipi, a segd n pʋʋsa Wẽnnaam n kos yam. (1 Rĩm. 3:9) Yiib-n-soaba, a segd n maana vaeesg Biiblã la siglgã sɛb pʋgẽ, tɩ sõng-a t’a bãng ned sũ-sãang sã n yaa “sũ-sãang ning sẽn yit Wẽnnaam nengẽ wã,” rat n yeel tɩ sũ-sãang sẽn wilgd t’a sɩd teka yam, bɩ yaa ‘dũni wã su-sãanga.’ (2 Kor. 7:10, 11) Kibay n be Biiblã pʋgẽ, n gomd neb sẽn tek yam la neb sẽn pa tek yam yelle. A sã n bʋgs rẽ zug neere, a bãngda sẽn tek-a yam tagsg la a manesem.

¹⁸ Tãab-n-soaba, a segd n tagsa nedã yelle, n da tags a sẽn maanã bal ye. A bʋgs n ges a soabã sẽn yaa woto wã võore, la a tags a yam-yãkr kẽere, la a zu-loeesã yelle. Biiblã ra pĩnd n yeelame t’a Zeezi sẽn yaa tigingã Zu-soabã na n kaoo bʋʋd tɩrga. B yeelame: “Yẽnda ka na n kao bʋʋdã wa sẽn zems yẽnda ninã sẽn ne wã ye. Yẽnda ka na n welg yɛlã wa sẽn zems yẽnda tʋb sẽn wʋm ye. Yẽnda na n kaoo ka-pãens rãmbã bʋʋd ne zemsgo. A na n bʋʋ tẽngã nimbãan-nebã bʋʋd wa sẽn zemse.” (Eza. 11:3, 4) Kãsem-dãmba, yaa a Zeezi n yãk yãmb tɩ y get tigingã yelle. A na n sõnga yãmb me tɩ y bʋ yell fãa ne tɩrlem la nimbãan-zoeere. (Mat. 18:18-20) D sẽn tar kãsem-dãmb tɩ b get d yell sõma wã sɩd noom-d lame. D sũur yaa noog me b sẽn maood n sõngd tõnd tɩ d bɩɩsd tɩrlem la nimbãan-zoeerã.

19. Yam-bʋg la yãmb dɩk soondg tẽnsã kibar pʋgẽ, n dat n tũ?

¹⁹ A Moyiiz tõogã wilgda tõnd ‘bãngrã la sɩdã sore,’ rat n yeel tɩ tõe n sõnga tõnd tɩ d bãng a Zeova la a noyã sõma. (Rom. 2:20) Wala makre, soondg tẽnsã kibarã sõngda kãsem-dãmbã tɩ b bãng b sẽn tõe n maan to-to n ‘kao bʋʋd tɩrga.’ Wilgda tõnd fãa me d sẽn tõe n ‘maan taab neer’ la d ‘zoe taab nimbãaneg’ to-to. (Zaka. 7:9) Yaa sɩd tɩ d pa le tũud a Moyiiz tõogã ye. La a Zeova pa toeem ye. A ket n nonga tɩrlem la nimbãan-zoeere. A naana tõnd a meng wẽnego, tɩ d tõe n dɩk a togs-n-taare. D sẽn paam n tũud-a, la d tõe n paam soondg zĩig a nengẽ wã sɩd yaa zu-zẽkre!