1. D sẽn yaa yel-wẽn-maandbã kɩtame tɩ d tagsg mi n yaa wãna?

DAAR a ye, tʋm-tʋmd a Poll yeelame yaa: “Mam yaa nimbãan-neda.” (Rom. 7:24) Rũndã-rũndã me, sẽn tũud-b a Zeova wã wʋsg tagsda wa a Polle. D rata ne d sũy fãa n maan a Zeova raabã. La bʋko, d sẽn yaa a Ãdem yagense, n yaa yel-wẽn-maandbã, d mi n kongame, tɩ sãamd d sũur wʋsgo. Kẽer sẽn maan yel-wẽn-kãseng pʋd n tagsdame tɩ b pa tõe n paam tɩ Wẽnnaam kõ-b sugr ye.

2. a) Wãn to la Yɩɩn-sõamyã 34:23 wilgd tɩ Wẽnnaam nin-buiidã pa segd n ningd b mens taal n pa satẽ? b) Bõe yell la d na n gom sõs-kãnga pʋgẽ? (Ges-y zĩ-gũbrã “ Yam ning d sẽn tõe n dɩkã.”)

² Biiblã wilga vẽeneg tɩ d soondg zĩig sã n yaa a Zeova nengẽ, d pa tar bʋʋm n na n ket n ningd d meng taale, n yɛɛsd b na n wa sɩbg-d ye. (Karm-y Yɩɩn-sõamyã 34:23.) Bõe la d tõe n maan t’a Zeova yɩ d soondg zĩiga? D sã n dat n paam t’a Zeova zoet d nimbãaneg la a kõt-d sugri, bõe la d segd n maane? Sẽn na yɩl n paam sogs-kãensã leoore, d na n goma tẽns nins Israyɛll nebã sẽn da yãk tɩ yaa soondg tẽnsã yelle. Yaa sɩd tɩ yaa a Moyiiz toogã pʋgẽ la Wẽnnaam da yeel Israyɛll nebã tɩ b yãk tẽns tɩ yɩ soondg zĩisi. La yʋʋmd 33 Pãntekotã daare, b  ledga tõogã kaool ne kaool a to. Baasgo, d tẽeg tɩ yaa a Zeova meng n da kõ tõogã. Dẽnd a sẽn da kɩt tɩ b yãk soondg tẽnsã tõe n sõnga tõnd tɩ d bãng a tagsg sẽn yaa a soab yel-wẽnã zugu, yel-wẽn-maandbã zugu, la sẽn tek-b yam n kot sugrã zugu. Bõe yĩng tɩ b ra yãk soondg tẽnse? Wãn to la b ra sigl yɛlã rẽ wɛɛngẽ? D reng n leok sogs-kãense.

3. Bõe la Israyɛll nebã ra segd n maan nin-kʋʋda?

³ Pĩnd wẽndẽ, Israyɛll soolmẽ wã, b sã n da yãk ned yõore, yaa yel-kãseng a Zeova nifẽ. Israyɛll ned sã n da yãk a to yõore, b tog n doka kiidã sũuri. “Sẽn tog n dok-a kiidã sũurã” tog n yɩɩ a zakã neda. A sã n paam nin-kʋʋdã, a segd n kʋ-a lame. (Sõd. 35:19) Woto, nin-kʋʋdã yõor ronda bʋʋm soabã yõore. B sã n bas nin-kʋʋdã, na n kɩtame tɩ kãabg tẽngã rẽgme, n pa le yaa yɩlemd Wẽnnaam nifẽ ye. Rẽ n so t’a Zeova yeel yaa: “Yãmb ka tog n dẽgem tẽng ning yãmb sẽn na n tɩ kẽ n zĩndã ye. Bala, [ninsaal] zɩɩm rẽgemda tẽnga.”—Sõd. 35:33, 34.

4. Israyɛll ned sã n da yãk a to yõor ne yĩdgu, bõe la a segd n maane?

⁴ La Israyɛll ned sã n da yãk a to yõor ne yĩdgu? Baa ne a sẽn pa maan pʋ-toogã, a tara taale, bala yaa ned yõor la a sẽn yãkã. (Sɩng. 9:5) La a Zeova nimbãan-zoeerã yĩnga, a ra kɩtame tɩ b yãk soondg tẽns a yoobe, tɩ nin-kʋʋd tõe n zoe n kẽng be tɩ sẽn tog n dok-a kiidã sũurã ra paam-a ye. A sã n ta soondg tẽngẽ, a tõe n paama koglgo. La yaa tɩlɛ t’a pa be n tãag maan-kʋʋdb kãsmã kũum.—Sõd. 35:15, 28.

5. Wãn to la a Zeova sẽn da kɩt tɩ Israyɛll nebã yãk soondg tẽnsã sõngd tõnd tɩ d bãng-a n paase?

⁵ Yaa a Zeova meng n yeel Israyɛll nebã tɩ b yãk soondg tẽnse. A ra yeela a Zozuwe yaa: “Bɩ y yãk tẽns wa mam sẽn da kɩt t’a Moyiiz togs yãmbã n maan tẽn-solgdse.” Yaa tẽns b sẽn yãk toore, tɩ yaa soondg tẽnse. (Zoz. 20:1, 2, 7, 8, Wẽnnaam Sebre, 1983) Wãn to la a Zeova sẽn kɩt tɩ Israyɛll nebã maan woto wã sõngd tõnd tɩ d bãng a nimbãan-zoeerã sẽn ta zĩig ningã? La wãn to la rẽ tõe n sõng-d tɩ bãng d sẽn tõe n maan to-to rũndã-rũndã, n paam soondg a Zeova nengẽ?

6, 7. a) Ned sã n da kʋ a to ne yĩdgu, bõe la kãsem-dãmbã segd n maane? (Ges-y sõsgã sɩngrẽ fotã.) b) Sẽn kʋ-a a to wã sã n togs kãsem-dãmbã yellã, bõe yĩng tɩ yaa yam bũmbu?

⁶ Israyɛll ned sã n da yãk a to yõor ne yĩdgu, a segd n zoe n kẽnga soondg tẽngẽ. A sã n ta, a rengd n ‘togsa a yellã tẽngã kãsem-dãmbã’ sẽn be tẽngã noorã. Kãsem-dãmbã reegd-a lame, n bao zĩig n kõ-a tẽngã pʋgẽ. (Zoz. 20:4) Sã n kaoos bilfu, kãsem-dãmbã wat n kɩtame t’a leb tẽng ningẽ yellã sẽn maanã, tɩ be kãsem-dãmbã bʋ yellã. (Karm-y Sõdb 35:24, 25.) Kãsem-dãmbã sã n bʋ, n yeel tɩ sẽn kʋ-a a to wã pa maan pʋ-toogo, tɩ yɩɩ ne yĩdgu, b segd n kɩtame t’a leb soondg tẽngẽ wã.

⁷ Bõe yĩng tɩ tẽngã kãsem-dãmbã kẽesd b toog yellã pʋgẽ? Yaa sẽn na yɩl n sõng tɩ Wẽnnaam nin-buiidã kell n pa yɩlemd a nifẽ, la b sõng tɩ sẽn kʋ-a a to wã ne yĩdgã paam t’a Zeova zoe a nimbãaneg n kõ-a sugri. Biibl-mit a ye yeelame tɩ sẽn kʋ-a a to wã sã n maan yaal-yaal n pa tɩ yã kãsem-dãmbã, tõe n tũu ne a yõore. Wakat kãnga, yẽ meng n bao a kũum, bala a pa tũ noy nins Wẽnnaam sẽn gãneg a põsg yĩngã ye. A tog n baoo sõngre, la a sak sõngrã n paam n põse. A sã n pa zoe n kẽng soondg tẽngẽ, kiidã zak ned sã n paam-a, a tara sor n kʋ-a.

8, 9. Kiris-ned sã n maan yel-wẽn-kãsenga, bõe yĩng t’a segd n tɩ togs kãsem-dãmbã?

⁸ Rũndã-rũndã me, kiris-ned sã n maan yel-wẽn-kãsenga, a tog n tɩ yãa kãsem- dãmbã tɩ b sõng-a t’a maneg a zoodã ne a Zeova. Bõe yĩng tɩ rẽ yaa tɩlɛ? A Zeova meng n sigl yɛlã tɩ segd n yɩ woto. Pipi, a yeela a Gomdã pʋgẽ tɩ ned sã n maan yel-wẽn-kãsenga, kãsem-dãmbã n segd n ges yellã welgre. (Zak 5:14-16) Yiib-n-soaba, kãsem-dãmbã sõngda yel-wẽn-maand sẽn tek yam t’a maneg a yellã, n le paam Wẽnnaam zoodo, la a mao n da le maan a buud ye. (Gal. 6:1; Ebre. 12:11) Tãab-n-soaba, a Zeova yãka kãsem-dãmbã, n sõng-b tɩ b tar minim n tõe n bels ned sẽn maan yel-wẽnd t’a paam raoodo, n da le ningd a meng taal ye. Biiblã pʋgẽ, a Zeova maka kãsem-dãmbã ne “soondg zĩig sa-kẽeng wakate.” (Eza. 32:1, 2) A Zeova sẽn sigl yɛlã woto wã yaa kaset t’a yaa nimbãan-zoɛt la sugr soaba.

⁹ Kiris-neb wʋsg sẽn bao kãsem-dãmbã sõngr maana kaset tɩ sɩd sõng-b lame tɩ b paam sũur pʋgẽ bãane. Wala makre, saam-biig a Dãniyɛll. A ra maana yel-wẽn-kãsenga, tɩ maan kiis t’a pa rat n togs kãsem-dãmbã ye. Ad a sẽn yeele: “Sẽn wa n kaoosã, m da tagsdame tɩ kãsem-dãmbã pa le tõe n maan bũmb n sõng-m ye. La wakat fãa, m da yɛɛsda yellã na n wa puki. M sã n da na n pʋʋs a Zeova fãa, m da getame tɩ yaa tɩlɛ tɩ m deng n kos-a sugri.” A wa n baas n kosa kãsem-dãmbã sõngre. A lebg n tẽega sẽn yɩ to-to wã, n yeele: “Hakɩɩka, m sẽn da tog n tɩ gom ne-bã ra kẽesd-m-la rabeem. La m sẽn tɩ gom ne-bã, yɩɩ wa b sẽn sõng-m n sik zɩɩb sẽn da zɩlg m bãgdã. Masã wã, m tõe n pʋʋsa a Zeova ne bas-m-yam.” A pa le ningd a meng taal ye. Sẽn nan pa kaoos menga, a lebga kãsem-sõngda.

10. Sẽn kʋ-a ned ne yĩdg sã n dat n paam tɩ b kõ-a sugri, bõe la a segd n maane?

¹⁰ Sẽn kʋ-a a to ne yĩdgã sã n dat n paam tɩ b kõ-a sugri, yaa tɩlɛ t’a zoe n kẽng soondg tẽng ning sẽn pẽ n yɩɩdã. (Karm-y Zozoe 20:4.) Yaa vẽeneg t’a pa na n maan a toog kae, bala yaa yõor  yelle. A segd n modg n taa soondg tẽngẽ wã tao-tao, la a pa be n tãag maan-kʋʋdb kãsmã kũum. A na n loog n basa a tʋʋm la a zaka, n pa le tõe me n gilgd tẽnsã a yam ye. * Dẽnd bũmb wʋsg la a pa le tõe n maane. (Sõd. 35:25) La rẽ n são. Bala, a sã n yi soondg tẽngẽ wã, wilgdame t’a toog kae ne a sẽn yãk yõorã, la leb n tõe n tũu ne yẽ mengã yõore.

11. Bõe la kiris-ned sẽn tek yam tõe n maan tɩ wilg t’a pa tagsd tɩ Wẽnnaam na n zoee a nimbãaneg woto bal n kõ-a sugri?

¹¹ Rũndã-rũndã me, kiris-ned sẽn maan yel-wẽn-kãseng sã n tek yam, yaa tɩlɛ t’a maan bũmb kẽer n yaool n paam tɩ Wẽnnaam kõ-a sugri. A tog n basa a yel-wẽndã fasɩ. La segdame me t’a gũus ne bũmb nins fãa sẽn tõe n wa kɩt t’a le maan yel-wẽndã. Tʋm-tʋmd a Poll ra goma Korẽnt kiris-neb sẽn tek yam yelle, n wilg bũmb nins b sẽn maanã. A yeelame: “Ad sũ-sãang ning sẽn yit Wẽnnaam nengẽ wã sẽn modg yãmb tɩ y maan bũmb ninsi: A kɩtame tɩ y yiis yell y mens zutu, a waa ne sũ-pa-noaanga, a waa ne rabeem, a waa ne ratem kãsenga, a waa ne yamleoogo, a waa ne sɩbgre.” (2 Kor. 7:10, 11) D sã n modg wa d sẽn tõe fãa n na n bas yel-wẽndã fasɩ, wilgda a Zeova tɩ yellã sɩd sãamda d sũuri, la tɩ tõnd pa tagsd t’a na n zoee d nimbãaneg woto bal n kõ-d sugr ye.

12. Kiris-ned sã n dat t’a Zeova zoet a nimbãaneg n kõt-a sugri, tõe n yɩɩ tɩlɛ t’a maan bõe?

¹² Kiris-ned sã n dat t’a Zeova ket n zoet a nimbãaneg n kõt-a sugri, tõe n yɩɩ tɩlɛ t’a maan bõe? Wakat ninga, a segd n sak n basa bũmb ning fãa sẽn tõe n kɩt t’a maan yel-wẽnde, baa yaa bũmb a sẽn nong wʋsgo. (Mat. 18:8, 9) Wala makre, y zo-rãmb sã n dat tɩ y maan bũmb a Zeova sẽn kisi, y na n sak n basa b tũud-n-taar bɩ? Sã n mik tɩ rãamã yaa y zu-loɛɛga, y na n gũusdame n da wa tɩ be zĩig y sẽn mi tɩ na n yɩɩ toog ne-y tɩ y ra yũ tɩ loog bɩ? Y sã n maooda ne yoob tʋlsem, rẽ yĩnga y gũusda ne filim-dãmba, ẽntɛrnetã zĩis kẽere, la bũmb a taab sẽn tõe n wa kɩt tɩ y tall tags-yood bɩ? Sẽn yaa bũmb ning fãa la d sak n mong d meng sẽn na yɩl n kell maan sɩd ne a Zeova, bɩ d tẽeg tɩ pa na n yɩ zaalem ye. Yell kae n tõe n sãam d sũur n ta d sẽn na n kong a Zeova zood ye. La bark me ka be n le ta d sẽn na n paam t’a nong-d ne a “nonglem sẽn ka sɛtã” ye.—Eza. 54:7, 8.

13. Bõe yĩng tɩ d tõe n yeel tɩ sẽn kʋ-a a to wã sã n tɩ be soondg tẽngẽ, a tõe n vɩɩmda bãane, tɩ rabeem kae, t’a vɩɩmã me tar barka?

¹³ Sẽn kʋ-a a to wã sã n paam n ta soondg tẽngẽ wã, a põsame. A Zeova ra yeela Israyɛll nebã tɩ soondg tẽnsã yaa tẽns b sẽn tõe n “tɩ kẽ n soonde.” (Zoz. 20:2, 3) A Zeova ra pa kõ noor tɩ b bʋ sẽn kʋ-a to wã n yɩlem ye. A pa kõ sor me tɩ ned ning sẽn tog n dok kiidã sũurã tõe n kẽ soondg tẽngẽ wã n kʋ-a ye. Sẽn kʋ-a a to wã sã n be soondg tẽngẽ wã, a pa le yɛɛsd b na n wa maan-a bũmb ye. A vɩɩ bãane, tɩ rabeem kae, bala a paamda a Zeova koglgo. A tara lohorem n tõe n maan a sẽn dat tẽngã pʋgẽ. Pa wa ned sẽn be bãens roog ye. A tõe n tʋma a tʋʋma, n sõng a taabã, la a tũud a Zeova tɩ yell kae ye. Hakɩɩka, a tõeeme t’a vɩɩmã tall barka!

14. Kiris-ned sẽn tek yam n kos sugr tõe n basa a yam ne bõe?

¹⁴ Kiris-neb kẽer sẽn da maan yel-wẽn-kãsems ket n ningda b mens taale, baa ne b sẽn tek yam n kos sugrã. Sãnda meng pʋd n tagsdame t’a Zeova pa na n tol n kõ-b sugr ye. Yãmb sã n tagsda woto, d kot-y lame tɩ y ra le ning y meng taal ye. Bas-y y yam t’a Zeova sã n kõ ned sugri, yaa wakat fãa yĩnga. Dãniyɛll ning yell d sẽn zoe n gomã kɩsa sɩd ne rẽ. Kãsem-dãmbã sẽn bʋ yellã la b sõng-a t’a le paam sũur-kaset sẽn  pa ningd-a taalã, a wilgame tɩ yẽ yamã gãee bãan masã. Ad a sẽn yeele: “M pa tar bʋʋm n na n le ning m meng taal ye. Sẽn loog loogame. Wa a Zeova sẽn yeelã, a rɩkda d yel-wẽnã sẽn yaa wa zɩɩb sẽn zɩlg-dã n zãag ne-do. D pa na n le wʋm a kibar ye.” Sẽn kʋ-a a to wã sã n be soondg tẽngã pʋgẽ, a pa segd n yɛɛsdẽ tɩ sẽn tog n dok-a kiidã sũurã na n wa paam-a n kʋ ye. A Zeova sã n kõ tõnd me sugri, d pa segd n yɛɛsdẽ t’a na n wa le tẽega d yel-wẽndã wall a sɩbg-d rẽ yĩng ye.—Karm-y Yɩɩn-sõamyã 103:8-12.

15, 16. Wãn to la a Zeezi sẽn ki tɩ yɩ maoongo, n leb n yaa d maan-kʋʋdb kãsmã kɩt tɩ d maneg n kɩs sɩd t’a Zeova kʋmda tõnd n kõt-d sugri?

¹⁵ Tõnd tara bʋʋm n yɩɩd Israyɛll nebã, n na n bas d yam t’a Zeova na n zoee d nimbãaneg n kõ-d sugrã. A Poll sẽn yeel tɩ yẽ yaa ‘nimbãan ned’ a sẽn mi n kongã yĩngã, a paasame: “Bɩ d pʋʋs Wẽnnaam bark tõnd Zu-soab a Zeezi Kiris maasem yĩnga.” (Rom. 7:25) Bõe yĩng t’a yet woto? A Poll ra maana yel-wẽn pĩndã, la a ra maood ne tʋls-wẽns me. La a teka yam n kos sugri, n kɩs sɩd masã tɩ Wẽnnaam kõ-a-la sugr a Zeezi maoongã maasem yĩnga. A Zeezi sẽn ki n dol tõnd yel-wẽnã kɩtame tɩ d sũur-kasetã lebg yɩlemde, la kɩt tɩ d tar sũur pʋgẽ bãane. (Ebre. 9:13, 14) A sẽn yaa d maan-kʋʋdb kãsmã, a tõe n fãaga neb nins sẽn kolgd Wẽnnaam yẽ maasem yĩngã, bala a “vɩɩ wakat fãa n yõkd sɛɛg b yĩnga.” (Ebre. 7:24, 25) Pĩnd wẽndẽ, maan-kʋʋdb kãsmã ra sõngda Israyɛll nebã tɩ b tõe n bas b yam t’a Zeova kõ-b-la b yel-wẽnã sugri. Sẽn yaa a Zeezi la d maan-kʋʋdb kãsmã, d tara bʋʋm n yɩɩda, n na n bas d yam tɩ d na n paama “sõngr wakat ning d sẽn tog n paame.”—Ebre. 4:15, 16.

¹⁶ Dẽnd tõnd sã n dat t’a Zeova yɩ d soondg zĩiga, yaa tɩlɛ tɩ d tẽ a Zeezi maoongã. Ra tags-y bal t’a Zeezi maoongã yaa nebã fãa yĩng ye. Segdame tɩ y kɩs sɩd t’a kii yãmb mengã yĩnga. (Gal. 2:20, 21) Kɩs-y sɩd tɩ ne a Zeezi maoongã maasem, a Zeova kõta yãmb y yel-wẽnã sugri. Kɩs-y sɩd t’a Zeezi maoongã yĩnga, yãmb tõe n wa paam n vɩɩmda wakat sẽn kõn sa. A Zeezi maoongã yaa wa kũun a Zeova sẽn kõ yãmba!

17. Bõe yĩng tɩ yãmb rat tɩ y soondg zĩig yɩ a Zeova nengẽ?

¹⁷ A Zeova sẽn da kɩt tɩ Israyɛll nebã yãk soondg tẽnsã wilgda a nimbãan-zoeerã la a sugrã. Wilgdame me tɩ ninsaal vɩɩm yaa bõn-sõng a Zeova nifẽ. Wilgda kãsem-dãmbã sẽn tõe n sõng tõnd to-to, ned sẽn tek yam n kot sugr sẽn segd n maanega, la bũmb ning sẽn kɩt tɩ d tõe n kɩs sɩd zãng t’a Zeova kõta sugrã. La rẽ yĩnga yãmb baooda soondg zĩig a Zeova nengẽ bɩ? Soondg zĩig a to sẽn tõe n sɩd kogl ned kae ye! (Yɩɩn. 91:1, 2) Sõsg ning sẽn pʋgdã pʋgẽ, d na n bãnga wãn to la soondg tẽnsã kibarã tõe n sõng-d tɩ d rɩk a Zeova togs-n-taar tɩrlmã la nimbãan-zoeerã wɛɛngẽ.