1. Ne yɩɩlã maasem, bõe la d tõe n maane?

YƖƖN-MIT a ye n da yeel tɩ goam tõe n kẽe ned yamẽ, n kɩt t’a tagse, la tɩ yɩɩll kẽeda ned yam la a sũuri. Rĩungã yɩɩl d sẽn yɩɩndã pẽgda d Ba a Zeova sẽn be saasẽ wã, la wilgd-a d nonglem. Yaa yɩɩl sẽn kẽed d yam la d sũuri, n kɩtdẽ tɩ d maneg n nong a Zeova. Dẽnd pa zaalem la yɩɩlã sẽn naag bũmb nins tũudum hakɩɩkã neb sẽn maand a Zeova waoogr yĩngã ye. D yaa d ye n yɩɩndẽ, tɩ d naaga neb n yɩɩnd tigsg wakate, yaa a Zeova waoogre.

2, 3. a) Neb kẽer tagsg yaa wãn ne yɩɩlã d sẽn yɩɩnd tigissã sasa wã? b) Sogs-bʋs la d na n leoke?

² La rẽ yĩnga, yaa nana ne yãmb tɩ y zẽk y koɛɛg n naag tigingã neb n yɩɩl bɩ? Bɩ y yɛɛsdame? Tẽns kẽere, rapã getame tɩ yɩɩl neb sʋk yaa yãnde. Woto tõe n kɩtame tɩ tigingã neb pa nong yɩɩl ye. Sẽn yɩɩd fãa, sã n mik tɩ tigingã kãsem-dãmbã pa rat n naag n yɩɩle, wall b pʋd n maand bũmb a taab yɩɩlã sasa.—Yɩɩn. 30:13.

³ D sã n sak n deegame tɩ yɩɩlã yaa bũmb d sẽn maand a Zeova waoogr yĩnga, d pa na n wat tigissã yɩɩlã poore, wall d yikd n yit yɩɩlã sasa ye. Bɩ ned kam fãa sok a  meng yaa: ‘Mam tagsg yaa wãn ne yɩɩlã d sẽn yɩɩnd tigissã sasa wã? Sã n yaa toog ne-m tɩ m zẽk m koɛɛg n yɩɩl ne sũ-noogo, bõe n tõe n sõng-ma? Bõe n na n sõng-m tɩ m sã n yɩɩndẽ bɩ kẽed sũuri?’

4, 5. Israyɛll nebã wakatẽ wã, b ra sigla yɩɩlã wãn to wẽnd-doogẽ wã?

⁴ Hal pĩnd wẽndẽ wã n tãag rũndã, a Zeova nin-buiidã pẽgd-a-la ne yɩɩlã maasem. Israyɛll nebã sã n da wa tũud a Zeova ne b sũur fãa, mikdame tɩ yɩɩlã tara pãng b tũudmã pʋgẽ. Wala makre, rĩm a Davɩɩd sẽn wa n na n sigl wẽnd-doogã tʋʋmã, a yãka Levi buudã neb 4 000 sẽn na n waoogd a Zeova ne yʋʋm-teedo. Nin-kãens sʋkã, “yɩɩn-mitb” 288 n da “paam zãmsgo,” n na n yɩɩnd n waoogd a Zeova.—1 Kib. 23:5; 25:7.

⁵ Wẽnd-doogã pakr daar me, b yɩɩla ne yʋʋm-teed n pẽg a Zeova. Ad Biiblã sẽn yete: “Tãn-tãn-pɛɛbdbã ne yɩɩn-yɩɩndbã naaga taab n na n pẽg Sẽn-Ka-Saabo, . . . La tãn-tãadã ne kɛmã, la yʋʋm teedã fãa rag n naagame n yɩɩndẽ. . . . Sẽn-Ka-Saab ziirã ra pida roogã.” Tags-y n ges-y yel-kãngã sẽn keng Israyɛll nebã tẽeb to-to!—2 Kib. 5:13, 14; 7:6.

6. Bõe la a Neemi maan yɩɩlã wɛɛngẽ, a sẽn wa n yaa Zerizalɛm guvɛrneerã?

⁶ A Neemi me sẽn wa n na n lʋɩ taoor n ges tɩ Israyɛll nebã lebg n me Zerizalɛm lalgã, a sigla Levi buudã neb tɩ b na n yɩɩl ne yʋʋm-teed n pẽg a Zeova. Lalgã sẽn sa tɩ b na n maan kibsã, yɩɩlã kɩtame tɩ sɩd yɩ sũ-noog tɛkẽ! A Neemi yãka “yɩɩn-yɩɩndb sul-bɛd a yiibu,” tɩ b rʋ lalgã zugu. Sull a ye teesa goabga, t’a to wã tees rɩtgo, tɩ b gilg n yek taab lalgã zĩig ning sẽn pẽ wẽnd-doogã n yɩɩdã. B yɩɩlã rãamd ra zẽkdame, hal tɩ ned sã n be zĩ-zãrgẽ bɩ a wʋmdẽ. (Nee. 12:27, 28, 31, 38, 40, 43) Yaa vẽeneg t’a Zeova sũur yɩɩ noogo, a sẽn da wʋmd a nin-buiidã sẽn yɩɩnd n pẽgd-a ne b sũy fãa wã.

7. Bõe la a Zeezi maan-yã, tɩ wilgdẽ tɩ yɩɩlã tara yõod wʋsg ne kiris-nebã?

⁷ A Zeezi wakatẽ wã me, yɩɩlã ra ket n yaa bũmb sẽn naag a Zeova tũudmã. Ninsaalbã sẽn be tẽng zugã tɛka, daar kae sẽn yɩ ra-kãseng n ta daar ning a Zeezi sẽn ki tɩ yɩ maoongã ye. La tẽeg-y tɩ nand tɩ b wa yõk-a baraarã, a wilga a karen-biisã b sẽn tog n maan Soaalã zaabr dɩɩb to-to, la a kɩt tɩ b naag taab n yɩɩl n pẽg a Zeova.—Karm-y Matye 26:30.

8. Yɩɩl n pẽg Wẽnnaamã wɛɛngẽ, bõe la pipi kiris-nebã maan tɩ yaa mak-sõngo?

⁸ Pipi kiris-nebã ra naagda taab n yɩɩnd n pẽgd Wẽnnaam, hal tɩ yaa mak-sõng n kõ tõndo. Ra yaa b tẽed-n-taas zagsẽ la b ra wae n tigimd taaba. Yaa sɩd tɩ pa zĩis sẽn maneg sõma wa Zerizalɛm wẽnd-doogã ye. La baa ne rẽ, b sã n da tigim taaba, b yɩɩnda ne b sũy fãa. Tʋm-tʋmd a Poll ra yeela a tẽed-n-taasã yaa: “Zãms-y taab la y keoog taab ne yam meng-menga, ne yɩɩn-sõamyã, la Wẽnnaam yɩɩla, la yɩɩl Sɩɩg-sõng sẽn kõta. Yɩɩl-y bark pʋʋsg yɩɩl ne y sũyã fãa n pẽg Wẽnnaam.” (Kol. 3:16) Yɩɩl nins sẽn be Rĩungã yɩɩl sebrã pʋgẽ wã yaa “bark pʋʋsg yɩɩl” d sẽn tog n yɩɩl n pẽg Wẽnnaam. Yɩɩn-kãens naaga bũmb nins tʋm-tʋmd sẽn tũud sɩd la sẽn tar yamã sẽn kõt tõnd wakat ning fãa sẽn segde, d tẽebã kengr yĩngã.—Mat. 24:45.

9. a) Bõe n tõe n kɩt tɩ ned pa rat n zẽk a koɛɛg n yɩɩl ne sũ-noog d tigissã la d tigis-kãsemsã sasa? b) D sã n na n yɩɩle, bõe la d segd n maane? d) Yɩɩlã wɛɛngẽ, ãnd dãmb n segd n kõt mak-sõngo? (Ges-y sõsgã sɩngrẽ fotã.)

⁹ Bõe n tõe n kɩt tɩ ned pa rat n yɩɩl neb sʋka? Kẽer nengẽ, b buudã neb wall b zakã neb pa minim yɩɩl ye. Sãnda me sã n kelg yɩɩn-yɩɩndbã radio wã pʋgẽ bɩ tele wã pʋgẽ, n mak b koeesã noom ne bãmb rẽndã, komsda b raood tɩ b pa rat n yɩɩl ye. La woto fãa pa segd n kɩt tɩ d pa yɩɩnd n pẽgd a Zeova ye. A ratame tɩ d pẽgd-a ne yɩɩlã maasem. Y sã n na n yɩɩl bɩ y zẽk y yɩɩlã sebr yĩngri, n nak tɩ y yublã yaa tɩrga, n paam n yɩɩl tɩ yi sõma! (Ɛsd. 3:11; karm-y Yɩɩn-sõamyã 147:1.) Masã, Rĩungã rot wʋsg pʋgẽ, tele n be taoorã, tɩ yɩɩllã goam pukd be tɩ ned fãa tõe n zẽk a neng n ges n yɩɩl tɩ yi sõma. Bãng-y me tɩ Rĩungã tʋʋmd lekoll kãsem-dãmbã yĩngã sasa, b yɩɩnda Rĩungã yɩɩl masã. Woto tẽegda kãsem-dãmbã tɩ yɩta sõma tɩ b modg n kõt mak-sõng yɩɩlã wɛɛngẽ.

10. D sã n yɛɛsd n pa rat n zẽk d koɛɛg n yɩɩle, bõe la d segd n tẽege?

¹⁰ Nina yɛɛsdame n pa rat n yɩɩl tɩ yi, bala a tagsdame t’a pa koko-noog soaba, la t’a sã n zẽk a koɛɛg n yɩɩle, na n sãama yɩɩllã. La d tẽeg tɩ baa d fãa sẽn ‘tudgd ne d no-goamã,’ rẽ pa kɩt tɩ d bas n pa le gomd ye. (Zak 3:2) Woto wã, baa d tagsd tɩ d koɛɛgã pa noome, d ra bas tɩ rẽ kɩt tɩ d pa yɩɩnd n pẽgd a Zeova ye.

11, 12. Bõe la d tõe n maan n tõog n zẽkd d koɛɛg n yɩɩndẽ?

¹¹ Tõe me tɩ yaa d sẽn pa mi yɩɩl yĩng la d sẽn pa rat n zẽk d koɛɛg n yɩɩlã. La  bũmb kẽer n be d sẽn tõe n maan tɩ sõng-do. *

¹² Yɩɩlã sasa, y sã n vʋʋsdẽ tɩ sekdẽ, na n sõngame tɩ y tõog n zẽkd y koɛɛg n yɩɩndẽ tɩ yit sõma. D rɩk makr ne ãmpulli. Kʋʋra wã sã n tar pãnga, ãmpullã wita sõma. Woto me, yaa pemsmã y sẽn vʋʋsdã pãng n kɩtd tɩ y koɛɛgã yit sõma. Y yɩɩlã segd n yita sõma wa y sẽn gomd ne neda, wall pʋd n yɩɩg rẽ. (Ges-y Tirez profit de l’École du ministère théocratique sebrã neng 181-184.) Biiblã zĩis kẽere, b sagla a Zeova nin-buiidã tɩ b sã n wa yɩɩnd n pẽgd-a bɩ b ‘kaas ne sũ-noogo.’—Yɩɩn. 33:1-3.

13. Wilg-y bũmb kẽer d sẽn tõe n maan n tõog n yɩɩnd ne bas-m-yam.

¹³ Ad bũmb me y sẽn tõe n maane. Y zak pʋgẽ Biibl zãmsgã wakat wall sasa a to bɩ y yãk Rĩungã yɩɩl sẽn noom yãmba, n zẽk y koɛɛg n deng n karem goamã fãa gilli. Rẽ poor bɩ y lebg n sɩng karengã, n da sik y koɛɛgã ye. La so-kãngã wã, y sã n na n karem gomde, y tog n karem n tãaga yalsg bãnd n yaool n vʋʋse. Rẽ poor masã bɩ y yɩɩle, la segdame tɩ y koɛɛgã kell n zẽk wa y sẽn wa n karemdẽ wã. (Eza. 24:14) Woto, y koɛɛgã na n talla pãnga. Rẽ la sõma. Ra n tags-y tɩ y koɛɛgã pa noome, n zoe yãnd ye.

14. a) D sã n yaagd d noorã sõma n yɩɩndẽ, wãn to la rẽ tõe n sõng tɩ yit sõma? (Ges-y zĩ-gũbrã “ Y sẽn tõe n maan tɩ sõng-yã.”) b) Sagls bʋs me la yãmb tagsd tɩ tõe n sõngame?

¹⁴ D sã n dat n yɩɩndẽ tɩ yit sõma, yaa tɩlɛ tɩ d yaagd d noorã sõma. Dẽnd y sã n na n yɩɩle, yɩta sõma tɩ y yaagd y noorã n yɩɩd y sẽn mi n yaagd n gomdã. La y sã n getẽ tɩ y koɛɛgã pa yit sõma wall yaa yãang bɩ raaga? Ges-y Tirez profit de l’École du ministère théocratique sebrã neng  184, zĩig ning b sẽn yeel tɩ “Quelques problèmes particuliers à surmonter” wã tɩ y na n paama saglse.

15. a) Yʋʋmd 2016, siglgã yʋʋmd-yʋʋmd tigsgã sasa, kiba-bʋg la b taas-yã? b) Bõe yĩng tɩ b toeem d yɩɩlã sebre?

¹⁵ Yʋʋmd 2016, siglgã yʋʋmd-yʋʋmd tigsgã sasa, saam-biig a Stephen Lett sẽn yaa siglgã taoor lʋɩtb sull nedã togsa nebã tɩ yɩɩl seb-paall la b na n yiisi, t’a gom zugã yaa: Yɩɩl-y ne sũ-noog n pẽg a Zeova. Kɛlgdbã fãa sũy yɩɩ noog wʋsgo. Saam-biig a Lett wilga baraarã tɩ b sẽn toeem yɩɩlã sebrã yaa sẽn na yɩl tɩ zems ne Traduction du monde nouveau wã b sẽn lebs n manegã. Dẽnd yɩɩ tɩlɛ tɩ b toeem yɩɩlã goam kẽere. B paasa yɩɩl a taab sẽn gomd koe-moonegã yelle, la a taab me sẽn wilgd tɩ d sũy nooma d sẽn paam t’a Zeezi maoongã rond d yel-wẽnã. Sẽn paase, sẽn mik tɩ yɩɩlã naaga a Zeova tũudmã, siglgã taoor lʋɩtb sull ra ratame tɩ yɩɩlã seb-paallã yɩ sõma wʋsgo, t’a kõbgã wõneg Traduction du monde nouveau paallã.

16, 17. Bõe me la b maneg yɩɩlã sebre pʋgẽ?

¹⁶ B maaname tɩ yɩɩlã sẽn pʋgl taab to-to wã zems ne yɩɩll fãa sẽn gomd bũmb ning yellã, sẽn na yɩl tɩ yɩ nana ne d fãa. Wala makre, pipi yɩɩl piig la a yiibã gomda a Zeova yelle, tɩ yɩɩl a nii wã sẽn pʋgdã gomd a Zeezi la a maoongã yelle. Sebrã sɩngrẽ, ẽndɛgs n be be, tɩ saam-biig sã n dat n yãk yɩɩll zamã taoor sõsg yĩng bɩ yaa nana.

¹⁷ Sẽn na yɩl tɩ ned kam fãa tõog n yɩɩnd ne a sũur fãa, b manega goam kẽer tɩ lebg vẽenega, tɩ b võorã wʋmb me yaa nana. B yãka goam kẽere, n ledg ne goam nebã sẽn wae n pʋtẽ la b wʋmd a võor nana-nana. B manega goamã me sẽn na yɩl tɩ ned sã n yɩɩndẽ bɩ kẽed-a sõma la ra yɩ wa a sagenda a taabã ye. Woto, tigissã la tigis-kãsemsã sasa, sãambã, sẽn nan sɩng-b Biiblã zãmsgã, kambã la saam-bi-pogsã sã n wa yɩɩndẽ, pa na n yɩ wa b sagenda nebã, bala rẽ pa zems ye.

18. Bõe yĩng tɩ d segd n zãms d yɩɩlã? (Ges-y tẽngr vẽnegrã.)

¹⁸ Tõnd yɩɩlã seb-paallã yɩɩl wʋsg yaa wa pʋʋsgo. Yaa yɩɩl sẽn tõe n sõng-d tɩ d togs a Zeova sẽn be d sũurẽ. Yɩɩl a taab me yaa sẽn na n keng d raood tɩ d fãa “nong taaba,” la d “maan tʋʋm-sõamyã.” (Ebre. 10:24) Dẽnd yɩta sõma tɩ d modg n bãng yɩɩlã goam sẽn wʋg to-to wã, yɩɩlã sẽn wẽed to-to wã, la d sẽn segd n yɩɩl to-to wã. D sã n mi n kelgd yɩɩlã b sẽn dɩk tɩ be jw.org pʋgẽ wã, sõngdame. D sã n zãmsd yɩɩlã zakẽ, na n sõngame tɩ d wa tõe n yɩɩnd ne d sũur fãa la ne bas-m-yam. *

19. Bõe n na n sõng tɩ tigingã neb fãa naag n pẽg a Zeova?

¹⁹ Tẽeg-y tɩ yɩɩlã naaga bũmb nins d sẽn maand n waoogd a Zeova wã. D sã n yɩɩnd Rĩungã yɩɩlã, d pʋʋsda a Zeova bark a sẽn maan bũmb nins fãa n kõ-dã yĩnga, la d wilgdẽ tɩ d nong-a lame. Sɩd yaa bõn-sõng tɛkẽ! (Karm-y Ezayi 12:5.) Y sã n zẽkd y koɛɛg n yɩɩnd ne sũ-noogo, na n kõo y taabã me raood tɩ b yɩɩl ne bas-m-yam. Woto, tigingã neb fãa, kambã, kãsembã, la sẽn nan sɩng-b tigissã waoongã na n tõog n naag n yɩɩlame n waoog a Zeova. Rẽ wã, bas-y y yam n yɩɩnd ne y sũy fãa tigissã sasa. Tũ-y saglg yɩɩn-gʋlsdã sẽn kõ. A yeelame tɩ d “yɩɩl Sẽn-Ka-Saab yĩnga.” Bɩ d fãa yɩɩl ne sũ-noog n pẽg a Zeova!—Yɩɩn. 96:1.