NEBÃ sẽn tigim roogã pʋg n na n kelg sõssã baraarã taa neb 8000. Yɩɩ arzũm daare, yʋʋmd 1922 bõn-bɩʋʋng kiuugã pʋgẽ. Ne yibeoogã tɩ zĩigã ra zoe n sɩnga wɩngre. Taoor lʋɩtã rʋʋme n yeel nebã tɩ sõssã sasa, sẽn dat-a fãa tõe n yiime, la b pa na n bas ned t’a lebg n wa kẽ ye.

B sɩnga ne yɩɩla, n pẽg a Zeova. Rẽ poore, saam-biig a Joseph Rutherford rʋʋme n yals nebã taoore. Neb wʋsg ra zĩime, n yãgd n na n bãng a sẽn na n yeel bũmb ninga. La neb a wãn n da gilgd roogã pʋg n pa rat n zĩndi, tʋʋlgã yĩnga. A yeel-b lame tɩ b tɩ zĩnd b zĩisẽ wã n kelge. Rẽ masã la sõsgã sɩng-yã. La rẽ yĩnga nebã gũus n gesame tɩ fuug la b maneg n pil wa pĩiri, n yagl yĩngrã bɩ?

Saam-biig a Rutherford sõsgã gom-zug ra yaa: “Saasẽ Rĩungã kolgame.” A rɩka sẽn kolg lɛɛr la pʋɩ-sʋk n bilg pĩnd no-rɛɛsdbã sẽn moon ne raood to-to n togs Wẽnnaam Rĩungã waoongã. A ra gomdame t’a koɛɛgã wãgd ne roogã. A wa n soka nebã yaa: “Yãmb tẽedame tɩ Rĩmã sẽn tar ziirã sɩnga naam dɩɩb bɩ?” Kɛlgdbã naaga taab n zẽk b koees n leok tɩ “n-ye!”

Rẽ poore, a yeela ne a pãngã fãa yaa: “Sã n yaa woto bɩ y leb moonegã zĩisẽ, Wẽnnaam sẽn ka to kamba! Rĩmã rɩta naam masã! Yãmb yaa a koe-taasdba. Woto yĩnga, moon-y-yã, moon-y-yã, moon-y-yã.”

Wakat kãng la b pilg fuugã, tɩ nebã yã tɩ fuugã zugu, b gʋlsame tɩ: “Moon-y Rĩmã la a Rĩungã.”

Saam-biig a Ray Bopp tẽega sẽn yɩ to-to wã, n yeele: “Kɛlgdbã sũ-noogã pa tõe n bãng n bilg ye.” A Anna Gardner me yeelame tɩ “nu-pogsã pãng kɩtame tɩ ra yaa wa roogã rigimdame.” A Fred Twarosh yeelame: “Kɛlgdbã fãa tik n yika wa nin-yende.” A Evangelos Scouffas me yeelame: “Yaa wa pãng buud n kẽ-d fãa tɩ d tik n yiki. Tõnd yik n yasame tɩ d ninã pid ne nintãm.”

Kɛlgdbã wʋsg ra zoe n moonda Wẽnnaam Rĩungã koe-noogã. Baa ne rẽ, sõsgã kɩtame tɩ b rat ne b sũy fãa n wɩng ne tʋʋmdã n paase. A Ethel Bennecoff yeelame tɩ baraarã, Biiblã Zãmsdbã sẽn wa n yit tigsgã zĩigẽ wã tɩ b “sũyã pida ne nonglem la yẽesem n yɩɩd pĩndã.” A Odessa Tuck ra tara yʋʋm 18 wakat kãnga. A wilgame tɩ yẽ sẽn wa n yit tigs-kãsengã zĩigẽ wã tɩ yaa a Zeova sẽn sok tɩ ‘ãnda la mam na n tʋmã’ n da be yẽ yamẽ, t’a rat ne a sũur fãa n sak t’a tʋm-a. Ad a sẽn yeele: “M da pa mi a Zeova sẽn dat n tʋm-m tɩ m tɩ maan bũmb ninga, sẽn na n yɩ zĩig ninga, bɩ tʋʋmdã sẽn na n yɩ to-to ye. M sẽn da mi bal yaa tɩ m dat n dɩka a Ezayi togs-n-taare. A ra yeela a Zeova yaa: ‘Ad maam, tʋm-y maam!’” (Eza. 6:8) A Ralph Leffler yeelame: “Daar-n-kãng sɩd yɩɩ ra-kãsenga. Rẽ tɛka, neb kʋʋng n moond Rĩungã koɛɛgã. Rũndã-rũndã, koɛɛgã taa hal dũniyã gill zugu.”

 Tigis-kãsen-kãngã sẽn zĩnd Sedaar Põent Owayo yʋʋmd 1922 wã sɩd yaa a Zeova Kaset rãmbã kʋdemdã yel-kãseng a ye. A George Gangas yeelame: “Tigis-kãng kɩtame tɩ m yãk yam n pa na n vaal tigis-kãseng baa a ye.” Sɩd me, a pa tẽr t’a zoe n vaala tigis-kãseng ye. A Julia Wilcox yeelame: “M sã n karemd siglgã sebre, n wa yã b sẽn gomd Sedaar Põent tigsgã yell fãa, m pa tõe n bilg m sũ-noogã ye. M sẽn dat bal yaa m yeele: ‘Zeova, bark wʋsg f sẽn kɩt tɩ m zĩnd be baraarã.’”

Tõnd sʋkã, neb wʋsg tẽra tigis-kãsems sẽn sɩd yɩ-b noogo, n kɩt tɩ b maneg n nong tõnd Wẽnnaam a Zeova ne a Rĩmã, la b maneg n dat n tʋm Rĩungã tʋʋm ne yẽesem. Tõnd me sã n tẽeg tigis-kãsems a woto yelle, d sẽn dat bal yaa d yeele: “Zeova, bark wʋsg f sẽn kɩt tɩ m zĩnd be baraarã.”