1, 2. a) Bõe la b maan a Nabot ne a kom-dibli wã tɩ yaa kɛgre? b) Bõe yell la d na n gom sõs-kãnga pʋgẽ?

RAO a ye la nin-yaals a yiib rõd t’a tʋʋsa Wẽnnaam ne rĩma. Bʋ-kaoodbã kaoo a bʋʋdo, n yeel t’a segda ne kũum. B sɩd lob-a-la kug t’a ki, la b kʋ a kom-dibli wã me. Mams-y n ges-y neb nins sẽn nong tɩrlmã sũy sẽn sãam to-to, b sẽn get b sẽn kʋ raoã ne a kambã zaalmã! Pa kibar b sẽn naan ye. Yaa yell sẽn paam rao sẽn da tũud a Zeova ne a sũur fãa. A yʋʋr la a Nabot. A zĩnda Israyɛll rĩm a Akaab wakatẽ wã.—1 Rĩm. 21:11-13; 2 Rĩm. 9:26.

² Sõs-kãnga pʋgẽ, d na n goma bũmb ning sẽn paam a Nabotã yelle. D na n goma kãsem-soab sẽn zĩnd pipi kiris-nebã wakatẽ me yelle. A maana bũmb sẽn yɩ tudgr tɛkẽ. Kiba-kãensã na n sõng-d lame tɩ d bãng tɩ d sã n dat n dɩk a Zeova togs-n-taar tɩrlmã wɛɛngẽ, yaa tɩlɛ tɩ d yɩ sik-m-mens rãmb la sug-kõatba.

3, 4. A Nabot ra yaa nin-bʋg buudu? Bõe yĩng t’a zãgs t’a kõn koos a pʋʋgã ne rĩm a Akaabe?

³ Rĩm a Akaab ne a pagã ra maanda sẽn yaa wẽnga, tɩ  Israyɛll neb wʋsg rɩk b togs-n-taare. B ra pʋʋsda wẽn-naandg a Baale, tɩ b toog kae ne a Zeova la a noyã ye. A Nabot yẽ ra sakda a Zeova ne a sũur fãa. A ra getame t’a zoodã ne a Zeova tara yõod n yɩɩd bũmb fãa, baa a mengã yõorã.

⁴ Karm-y 1 Rĩm-dãmb 21:1-3. A Akaab ra ratame t’a Nabot koos a viyn pʋʋgã ne yẽ, wall a bas tɩ yẽ reeg a pʋʋgã n soog la a kõ-a a to sẽn yaa sõma n yɩɩda. La a Nabot zãgsame. Bõe yĩnga? Ne waoogre, a yeela rĩmã yaa: “Abada! Bɩ Sẽn-Ka-Saab ra sak tɩ m dɩk m yaab-rãmbã zĩis n kõ yãmb ye.” A Nabot sẽn zãgsã yaa a sẽn dat n tũ noor a Zeova sẽn kõ Israyɛll nebã. A yeel-b lame tɩ b pa segd n koos b yaab-rãmb pʋʋg tɩ b soog wakat fãa yĩng ye. (Maan. 25:23; Sõd. 36:7) Yaa vẽeneg t’a Nabot tũu a Zeova raab yel-kãngã pʋgẽ.

5. Bõe la a Zezabɛll maan sẽn na yɩl t’a sɩdã paam a Nabot pʋʋgã?

⁵ A Nabot sẽn zãgsã, rĩm a Akaab ne a pagã pa bas yellã tɩ sa ye. B maana bũmb sẽn yɩ wẽng wʋsgo. Sẽn na yɩl t’a sɩdã paam pʋʋgã, rĩm-poak a Zezabɛll kɩtame tɩ rap a yiib rõd a Nabot. Rẽ n wa ne a Nabot la a kom-dibli wã kʋʋbã. A Zeova manesem yɩɩ wãn ne yel-be-kãngã?

6, 7. Bõe la a Zeova maan tɩ wilg t’a nonga sẽn yaa tɩrga? Bõe yĩng tɩ d tõe n yeel tɩ belsa a Nabot zakã rãmb ne a zo-rãmbã bilfu?

⁶ Tao-tao bala, a Zeova tʋma no-rɛɛs a Eli a Akaab nengẽ. A Eli yeel-a lame t’a yaa nin-kʋʋd la fãada. A Zeova na n maana a Akaab bõe? A yeelame tɩ b na n kʋʋ a Akaab ne a pagã la a kom-dibli wã, wa b sẽn kʋ a Nabot ne a kom-dibli wã.—1 Rĩm. 21:17-25.

⁷ A Nabot ne a kom-dibli wã kaalmã sãama a zakã neb a taabã ne a zo-rãmbã sũy hal wʋsgo. A Zeova yãa yel-beed ning a Akaab sẽn maanã, n maan bũmb tao-tao n wilg tɩ yaa kɛgre. Woto tog n belsa a Nabot zakã rãmb ne a zo-rãmbã sũy bilfu. La bũmb n maan rẽ poore, tɩ ra tõe n lebg toog tɩ b kell n yɩ sik-m-mens rãmb la b kɩs a Zeova sɩda.

8. A Akaab sẽn wʋm a Zeova sẽn yeel t’a na n maan-a-la bũmb ningã, a manesem yɩɩ wãna? Bõe la a Zeova maan-yã?

⁸ Biiblã yeelame t’a Akaab sẽn wʋm a Zeova sẽn yeel t’a na n maan-a-la bũmb ningã, a “pãrsa a futu, n yeelg sũ-sãang futu, n loe noore.” B paasame t’a “rag n gãee ne fu-kãense,” la t’a “sã n kẽnda, a kẽnda soaa-soaa.” A Akaab sika a menga! A sẽn maanã sɩd sãama a sũuri. Baasa wãna? A Zeova yeela a Eli yaa: “Yẽnda sẽn sik a meng mam taoorã yĩnga, mam ka na n kɩt tɩ yel-beedã paam-a a sẽn ket n vɩ wã wakat ye. La yaa wakat ning yẽnda biig sẽn wat n dɩt naamã la mam na n kɩt tɩ yel-beedã paam a roogã.” (1 Rĩm. 21:27-29; 2 Rĩm. 10:10, 11, 17) A Zeova sẽn mi sẽn be ned fãa sũurẽ wã, a zoee a Akaab nimbãanega.—Yel. 17:3.

9. Bõe yĩng tɩ sik-m-meng ra tõe n sõng a Nabot zakã rãmb la a zo-rãmbã?

⁹ A Nabot zakã rãmb ne a zo-rãmbã sẽn wʋm tɩ yaa a Akaab kũumã poor la a roogã neb na n paam sɩbgrã, b manesem yɩɩ wãnã? Yaa bũmb sẽn da tõe n koms b tẽebã. La sik-m-meng tõe n sõng-b lame. Bala na n kɩtame tɩ b kell n tũ a Zeova ne b sũy fãa, n kɩs sɩd t’a pa tõe n maan kɛgr ye. (Karm-y Tõod 32:3, 4.) A Zeova na n manega yellã fasɩ, a sã n wa vʋʋg a Nabot ne a kom-dibli wã la b zakã neb a taabã. Rẽ, b fãa  na n yãame t’a Zeova tɩrlmã sɩd ka to ye. (Zoob 14:14, 15; Zã 5:28, 29) Sik-m-meng soab tẽegdame tɩ “Wẽnnaam na n bʋʋ tʋʋmã fãa bʋʋdo, la yɛl nins fãa sẽn dag n solgã, yel-sõama wã ne yel-wẽnsã bʋʋdo.” (Koɛ. 12:14) Yell fãa pʋgẽ, a Zeova mii bũmb kẽer tõnd sẽn pa mi. Rẽ n so t’a sã n na n bʋ yelle, a bʋʋdã yaa tɩrg wakat fãa. Rẽnd sik-m-meng sɩd tõe n sõnga ned t’a tẽebã ra koms ye.

10, 11. a) Wilg-y yɛl kẽer sẽn tõe n koms d tẽebã? b) Wãn to la sik-m-meng tõe n sõng-do?

¹⁰ Kãsem-dãmbã sã n wa rɩk sard tɩ y pa wʋmd a võore, wall pa noom yãmba, y manesem na n yɩɩ wãna? Wala makre, yãmb wall y zak ned pa rẽ bɩ y zoa sã n da tar tʋʋmd tigingã pʋgẽ tɩ b wa reege, y manesem na n yɩɩ wãna? La sã n yaa y pag wall y sɩda, pa rẽ bɩ y biig wall y zoa y sẽn nong wʋsg la b yiis tigingã pʋgẽ tɩ y tagsdẽ tɩ pa zemse? Tigingã ned sã n maan yel-wẽn-kãseng tɩ kãsem-dãmbã kõ-a sugri, tɩ yãmb getẽ tɩ pa zemse, y maanda wãna? Yɛl a woto buud tõe n kɩtame tɩ lebg toog tɩ d kell n kɩs a Zeova sɩda, la d sak a sẽn sigl yɛlã to-to tigingã pʋgẽ wã. A buud sã n paam-do, bõe la sik-m-meng na n sõng-d tɩ d maane? Bɩ ges bũmb a yiibu.

 ¹¹ Pipi, d sã n yaa sik-m-meng soaba, d na n sak n deegame tɩ d pa mi yellã vɩʋʋg fãa ye. Baa d tẽed tɩ d mii yellã vɩʋʋgo, d ra yĩm tɩ yaa a Zeova bal n tõe n bãng sẽn be ned sũurẽ ye. (1 Sãm. 16:7) D sã n tẽeg rẽ, d na n sika d meng n sak n deeg tɩ d pa mi bũmb fãa, la d sak n toeem d tagsg sẽn yaa a soab yellã zugã. Yiib-n-soaba, sik-m-mengã na n sõng-d lame tɩ d ra yɩ kɩɩsda, la sõng-d tɩ d maan sũ-mar n gũ t’a Zeova wa welg yellã, sã n mikame tɩ sɩd yaa kɛgre. Biiblã yeelame tɩ “sẽn zoet-b Wẽnnaamã na n paama sũ-noogo,” la tɩ “nin-wẽng ka na n tol n paam sũ-noog ye.” B paasame t’a “ka na n vɩɩmd n kaoos” ye. (Koɛ. 8:12, 13) Yell buud fãa pʋgẽ, d sã n kell n yɩ sik-m-meng soaba, na n nafa tõnd la neb nins fãa yellã sẽn pakã.—Karm-y 1 Pɩyɛɛr 5:5.

12. Bõe yell la d na n gome, la bõe yĩnga?

¹² Pipi kiris-nebã wakate, bũmb n maan Ãntiyoos tigingã pʋgẽ, tɩ ra tõe n yɩ toog ne beenẽ kiris-nebã tɩ b kell n yɩ sik-m-mens rãmb la sug-kõatba. Bɩ d gom bũmb ning sẽn maanã yelle, tɩ na n sõng-d lame tɩ d fees d meng n ges d sã n sɩd yaa sug-kõata. Na n sõng-d lame me tɩ d bãng tɩ baa a Zeova sẽn tũnugd ne neb sẽn pa zems zãng n pidsd a raabã, rẽ pa boogd a tɩrlmã ye.

13, 14. Bõe la a Pɩyɛɛr maan-yã, tɩ yaa tʋʋm-kãsemse? Bõe n wilgd t’a ra tara raoodo?

¹³ Tʋm-tʋmd a Pɩyɛɛr ra yaa kãsem-soab pipi kiris-neb wʋsg sẽn da mi. A yɩɩ a Zeezi zoa. A Zeezi kõ-a-la tʋʋm-kãsemse. (Mat. 16:19) Wala makre, yʋʋmd 36 soabã, yẽ n taas a Korney ne a zakã rãmb Wẽnnaam koɛɛgã. A buud ra zɩ n maan ye. Bala, a Korney ra yaa bu-zẽng neda, n pa kẽ bãong ye. Baraare, a Korney ne a roogã neb paama vʋʋsem sõngã. Kɩtame t’a Pɩyɛɛr bãng tɩ b tõe n deega lisgu. A yeelame: “Nin-bãmbã sẽn paam Sɩɩg-sõng pidb wala tõndã, moasã b tõe n gɩdga bãmb tɩ b ka paam koom lisg sɩda?”—Tʋʋ. 10:47.

¹⁴ Yʋʋmd 49 wã, tʋm-tʋmdbã ne kãsem-dãmb nins sẽn be Zerizalɛmmã tigma taab n na n ges sã n yaa tɩlɛ ne bu-zẽms nins sẽn lebg kiris-nebã tɩ b kẽ bãongo. Tigsgã sasa, a Pɩyɛɛr goma ne raoodo, n wilg tɩ yʋʋm a wãn sẽn looge, bu-zẽms sẽn pa kẽ bãong n paam vʋʋsem sõngã, tɩ yẽ meng maan kaset ne rẽ. Yaa a Pɩyɛɛr sẽn yeelã n sõng pipi kiris-nebã taoor lʋɩtbã tɩ b bãng b sẽn segd n yãk yam ningã. (Tʋʋ. 15:6-11, 13, 14, 28, 29) Kiris-neb nins sẽn yaa zʋɩf-rãmbã, la b rãmb nins sẽn yaa bu-zẽmsã sũur tog n yɩɩ noog ne a Pɩyɛɛre, a sẽn tall raood n gomã. Rẽnd ra yaa nana tɩ b kɩs a Pɩyɛɛr sɩda, a tẽebã sẽn tar pãngã yĩnga.—Ebre. 13:7.

15. A Pɩyɛɛr sẽn wa n be Ãntiyoosã, bõe la a maan tɩ yaa tudgr tɛkẽ? (Ges-y sõsgã sɩngrẽ fotã.)

¹⁵ Tigsgã poore, pa kaoos la tʋm-tʋmd a Pɩyɛɛr kẽng Ãntiyoos sẽn be Siiri wã ye. A sẽn wa n be be wã, a ra nong n naagda a tẽed-n-taas nins sẽn yaa bu-zẽmsã n maand bũmb wʋsgo. Sãmbg sẽn kae, b zãmsa bũmb wʋsg a Pɩyɛɛr nengẽ, t’a minimã ne a bãngrã naf-ba. Rẽnd a Pɩyɛɛr sẽn wa n tiig n pa le rat n naag-b n dɩ wã, ling-b lame la sãam b sũy hal wʋsgo. A Pɩyɛɛr tõogame tɩ kiris-neb kẽer sẽn yaa zʋɩf-rãmb maan wa yẽ, baa a Barnabas menga. Sɩnga wãn t’a Pɩyɛɛr sẽn yaa kãsem-soaba, t’a tẽebã tar pãngã wa tudg woto? A sẽn maanã yaool n da tõe n waa ne welgr tigingã pʋgẽ. Yam-bʋg la d tõe n dɩk  kibarã pʋgẽ tɩ sõng-do, kãsem-soab sã n wa gom gomd wall a maan bũmbu, tɩ zabd tõndo?

16. A Poll sẽn yã a Pɩyɛɛr manesmã, bõe la a maan-yã? A Pɩyɛɛr tudgrã kɩtame tɩ d sokd d meng sogs-bʋse?

¹⁶ Karm-y Galat-rãmb 2:11-14. Yaa ninsaal zoees n kɩt t’a Pɩyɛɛr tudgã. (Yel. 29:25) A ra mii a Zeova sẽn dat tɩ b tall manesem ning ne bu-zẽmsã. La kiris-neb sẽn yaa zʋɩf-rãmb n da yi Zerizalɛm n wa, t’a Pɩyɛɛr da yɛɛsd b tagsg sẽn na n yɩ a soaba, b sã n yã t’a naagda bu-zẽmsã n maand bũmb kẽere. Tʋm-tʋmd a Poll togsa a Pɩyɛɛr vẽeneg t’a sẽn maandã pa zems ye. Bõe yĩnga? Bala, tigsg ning sẽn zĩnd Zerizalɛm yʋʋmd 49 wã, a Poll wʋma a Pɩyɛɛr sẽn yeel bũmb ning bu-zẽmsã wɛɛngẽ wã. (Tʋʋ. 15:12) A Pɩyɛɛr sẽn maan woto n sãam kiris-neb nins sẽn yaa bu-zẽmsã sũyã, b manesem na n yɩɩ wãna? B na n basame tɩ koms b tẽebã bɩ? A Pɩyɛɛr tudgrã yĩnga, b na n deega tʋʋm nins a sẽn da tar kiris-nebã sʋkã bɩ?

17. Bõe n wilgd t’a Zeova kõo a Pɩyɛɛr sugri?

¹⁷ A Pɩyɛɛr sika a meng n sak a Poll goamã. Biiblã pa wilg zĩig baa a ye tɩ b reega tʋʋm nins a sẽn da tar kiris-nebã sʋkã ye. A wa n paamame meng n gʋls lɛta a yiib sẽn be Biiblã pʋgẽ. A lɛtr a yiib-n-soabã pʋgẽ, a boola a Poll tɩ “tõnd ba-bi-nongr a Poll.” (2 Pɩy. 3:15) A Pɩyɛɛr tudgrã sãama kiris-neb nins sẽn da yaa bu-zẽmsã sũyã, la a Zeezi sẽn yaa tigingã Zu-soabã ra ket n kõt-a-la tʋʋma. (Efɛ. 1:22) Yel-kãnga yɩɩ segb tigingã neb sẽn paame, n tõe dɩk a Zeezi ne a Ba wã togs-n-taar n kõ a Pɩyɛɛr sugri. D tẽedame tɩ b ned baa a ye pa bas tɩ ninsaal sẽn pa zems zãng kongr koms a tẽebã ye.

18. Yel-bʋs pʋgẽ la tõe n yɩ toog tɩ d rɩk a Zeova togs-n-taar tɩrlmã wɛɛngẽ?

¹⁸ Kãsem-soab sẽn zems zãng pa zĩnd pipi kiris-nebã tigimsẽ ye. Yaa woto rũndã-rũndã me. Bala, Biiblã yeelame tɩ “tõnd fãa tudgda ne tuudg buud wʋsgo.” (Zak 3:2) Pa toog tɩ d sak n deeg rẽ ye. La y tẽed-n-taag sã n wa maan bũmb tɩ sãam y sũuri, y manesem na n yɩɩ wãna? Y na n dɩka a Zeova togs-n-taar tɩrlmã wɛɛngẽ bɩ? Wala makre, kãsem-soab sã n gom gomd tɩ y getẽ tɩ yaa bak-n-sõng bɩ welgre, y manesem na n yɩɩ wãna? Kãsem-soab sã n gom gomd n pa reng n tags neere, tɩ zabd yãmba, y na n basame tɩ koms y tẽebã bɩ? Y na n yɩɩ tao-tao n tags t’a pa segd n le yɩ kãsem-soab bɩ, bɩ y na n maana sũ-mar n gũ a Zeezi sẽn yaa tigingã Zu-soabã sẽn na n maanega? Y na n tagsda saam-biigã sẽn modgd to-to wã, wala makre, a sẽn tũud a Zeova yʋʋm wʋsgã, bɩ y na n basa rẽ tɩ yaa a sẽn maanã yell la y tagsda? Saam-biig sẽn beeg yãmb sã n ket n yaa kãsem-soaba, wall a pʋd n paam tʋʋm a taab tigingã pʋgẽ n paase, y na n maana sũ-noog ne-a bɩ? D sã n sakd n kõt sugri, wilgdame tɩ d rɩkda a Zeova togs-n-taar tɩrlmã wɛɛngẽ.—Karm-y Matye 6:14, 15.

19. Yell fãa pʋgẽ, bõe la d rat n maane?

¹⁹ Wakat n wat t’a Zeova na n kɩt tɩ yel-kɛgã fãa a Sʋɩtãan ne a dũniyã neb sẽn wa ne wã sa. Sẽn nong-b tɩrlmã gũuda wakat kãng ne yãgbo. (Eza. 65:17) La nananda, yell fãa pʋgẽ bɩ d sik d meng n sak n deeg tɩ pa bũmb fãa la d mi, la d sak n kõt d taabã sugri. Woto, d wilgdame tɩ d rɩkda a Zeova togs-n-taar tɩrlmã wɛɛngẽ.