YƲƲMD 1937 tʋʋlg kiuug rasem 26, neb a yiib n togd sor tɩ yaamsã wʋm-ba. B wẽna b kamyõ sẽn puk ne wubsgu, n kẽ Sidney sẽn be Ostrali wã. B sẽn yi tẽngã yʋʋmd la woto. B maana kilo 19300 la zaka, n gilg soolmã babs nins vɩɩm sẽn yaa toogo, la sẽn zãr wʋsgã. B pa bãngdb sẽn gilg n vaees tẽngã, wall neb sẽn gilg n ges tẽngã woto bal ye. Yaa a Arthur Willis ne a Bill Newlands. B naaga so-pakdb nins sẽn tar yẽesem, la sẽn yãk yam n na n kɩt tɩ Wẽnnaam Rĩungã koe-noogã ta Ostrali babg ning b sẽn boond tɩ awutbakã sẽn yalem wʋsgã.

Yʋʋmd 1920 wã loogr poor tɛka, Biiblã Zãmsdb * sõor sẽn da pa waoogã ra moonda Ostrali, sẽn yɩɩd fãa, yaa tẽn-bɛd la tẽn-bõones nins sẽn be mogrã noorã. La sẽn da ket yaa awutbakã sẽn zãr ne mogrã. Yaa zĩig nebã sẽn yaa kar-kare, tɩ saagã me pa niid sõma, t’a yalmã yaool n yɩɩd Etazĩni pʋɩ-sʋka. La saam-biisã ra mii vẽeneg t’a Zeezi karen-biisã segd n kõo a kaset “hal tɩ ta dũniyã tɛk fãa,” baa Ostrali awutbakã pʋgẽ. (Tʋʋ. 1:8) La wãn to la b na n tõog n tʋm tʋʋm-kãseng a woto? B sẽn da kɩs sɩd zãng t’a Zeova na n ninga b modgrã barkã, b yãka yam n na n maan b sẽn tõe.

Yʋʋmd 1929 wã, Kʋwĩnslãnd ne Ostrali ogsɩdãntall tigimsã manega mobila n ning bũmb nins sẽn yaa tɩlɛ so-toak yĩnga, n na n tɩ moon zĩis nins sẽn zãr ne mogrã. So-pakdb sẽn tar yĩns keelem n tõe n vɩɩmd zĩ-kãens vɩɩm sẽn yaa toogã, la sẽn tõe n maneg mobill n da wẽnd-bã. So-pakdbã tɩ moona zĩis wʋsg a Zeova Kaset rãmb sẽn zɩ n moone.

So-pakdb kẽer sẽn pa tõe n paam mobill zomba wiid n kẽ awutbakã. Wala makre, yʋʋmd 1932, a Bennett Brickell sẽn da tar yʋʋm 23 yii Rokamptõn sẽn be Kʋwĩnslãndã, n na n gilg n moon koɛɛgã kiis a nu tẽn-kãng rɩtg sẽnese. A zɩlga a weefã ne fu-gobse, futu, rɩɩb la ne sɛb wʋsgo. A weefã pine-rãmb sẽn wa n sa wã, a kell n kẽnga taoore, n kɩs sɩd t’a Zeova na n wilg-a-la sore. A tusa a weefã kilo 320, n pasg zĩig ko-yũud sẽn zoe n kʋ neba. Yʋʋm 30 wã sẽn pʋglã pʋgẽ, saam-biig a Brickell toga sor naoor wʋsg ne weefo,  ne montɛɛr wall ne mobill n maan kilo tus-kobse. Yẽ n sɩng koɛɛgã mooneg aborizɛn-dãmbã sʋka. A sõngame me tɩ b lugl tigims paalse, hal tɩ awutbakã soolmã fãa, neb wʋsg mi-a la b nand-a.

Ostrali ra naaga dũniyã tẽns nins nebã sẽn yaa kar-kar n yɩɩdã, sẽn yɩɩd fãa, awutbakã pʋgẽ. Baa ne rẽ, a Zeova nin-buiidã modga ne b sũur fãa sẽn na yɩl n moon neb nins sẽn be tẽngã babs nins sẽn zãrã.

A Stuart Keltie ne a William Torrington sẽn da yaa so-pakdbã maana woto. Yʋʋmd 1933, b pasga rasempʋɩɩg ning b sẽn boond tɩ dezɛɛr de Sĩmpsõnnã sẽn pid ne bĩisr tãensã, n tɩ moon Alis Sprĩngs tẽngã sẽn be Ostrali tẽn-sʋkã. B mobillã sẽn yaa bilfã wa n sãamame, tɩ yɩ tɩlɛ tɩ b bas-a. Dẽ, saam-biig a Keltie kargã sẽn fiuug tɩ b rɩk raoog n maan karg n tongã kell n kẽnga taoor ne koe-moonegã. La a ra zaoa yʋgemd masã. So-pakdbã modgrã woma biisi, b sẽn wa n seg lotɛll soab a ye tẽrã gaar sẽn be William Krik sẽn yaa tẽn-bilã. Lotɛllã soabã yʋʋr la a Charles Bernhardt. A wa n saka sɩdã, n koos a lotɛllã, n lebg so-pakd n moon a ye yʋʋm 15. A moona Ostrali zĩis nins saagã sẽn pa niid wʋsgã, la sẽn zãr n yɩɩdã.

Yaa vẽeneg tɩ pipi so-pakdbã ra baooda raood wʋsg sẽn na yɩl n tõog zu-loees nins b sẽn segã. A Arthur Willis ne a Bill Newlands d sẽn gom b rãmb yell sɩngrẽ wã sẽn wa n moond Ostrali awutbakã pʋgẽ wã, vugri, saagã tiig n nii wʋsgo, tɩ zĩigã fãa lebg bɛgdo. Woto kɩtame tɩ yɩl n maan kilo 32, b namsa semen a yiib tõre. Wakat ninga, b ra maooda ne b pãng fãa sẽn na yɩl n tus b kamyõ wã n dʋʋg bĩisr tãensã, tɩ wĩntoogã sẽn zabdã me kɩt tɩ b tʋʋlgã kaooge. B pasga zĩis sẽn yaa kuga, la kʋɩls sẽn gãneg ne bĩisri. Naoor wʋsgo, b mobillã sãamame. Sã n wa yaa woto, b kẽnda nao wall b zomb weef n maan rasem n ta tẽng ning sẽn pẽ be n yɩɩdã. B sã n ta be, b segd n gũu semen-dãmb hal tɩ ned yi tẽng a to n wa ne bũmb nins b sẽn dat n toeem mobillã pʋgẽ wã. Baa ne zu-loeesã fãa, so-pakdbã pa koms raood ye. A Arthur Willis tẽega gomd b sẽn da yeel L’Âge d’Or pʋgẽ, n yeel yaa: ‘Sor sẽn pa sõmbe, wall sẽn wogem pa tõe n gɩdg a Zeova Kaset rãmbã ye.’

A Charles Harris sẽn yɩ so-pakd n kaoos wʋsgã wilgame tɩ yẽ sẽn da yaa a ye awutbakã pʋgẽ, la zu-loees nins a sẽn seg be wã kɩtame tɩ yẽ ne a Zeova zoodã pãng paase. A yeelame tɩ ned sã n vɩ n pa tar bũmb wʋsgo, rẽ la sõma n yɩɩda. A paasame: “Sã n da yaa tɩlɛ, a Zeezi sakdame n gãand yɩnga. Woto wã, d tʋʋmdã sã n kɩt tɩ d segd n maan dẽ, tõnd me tog n saka ne yamleoogo.” Yaa woto la so-pakdb wʋsg maan-yã. B sẽn modg wʋsg n pa zoe yaamsã yĩnga, koe-noogã taa Ostrali ween-vɩɩs a naasã, n sõng neb ka tɛk tɩ b yãk yam n teel Wẽnnaam Rĩungã.