1-3. a) Bõe la d segd n sõdg n naag bũmb nins d sẽn tẽedã? b) Bõe yĩng tɩ yaa tɩlɛ tɩ d tẽ kũum vʋʋgrã? (Ges-y fotã sẽn be yĩngrã.)

NED sã n kos yãmb tɩ y sõdg bũmb kẽer y tũudmã rãmb sẽn tẽede, y na n sõdga bõe? Yaa vẽeneg tɩ y na n yeelame tɩ d kɩsa sɩd t’a Zeova n yaa Naandã, la tɩ yaa yẽ n naan tõndo. Y na n yeel-a lame me tɩ d tẽeda a Zeezi Kiristi, la t’a kiime n na n dol tõnd yel-wẽnã. Y na n goma tẽngã sẽn na n wa lebg arzãna, tɩ wẽn-sakdbã vɩɩmd a zug wakat sẽn kõn sa wã me yelle. La rẽ yĩnga, y na n wilgame tɩ d tẽeda ne d sũur fãa tɩ wakat n wat tɩ sẽn ki-bã na n vʋʋg bɩ?

² Yaa sɩd tɩ d saagdame tɩ to-kãsengã na n wa mik-d lame, la tɩ d na n põsame, n vɩɩmd tẽngã zug wakat sẽn kõn sa. Baasgo, d tara bʋʋm n na n sõdg kũum vʋʋgrã n naag bũmb nins d sẽn tẽedã. Tʋm-tʋmd a Poll togsa bũmb sẽn wilgd tɩ yaa tɩlɛ tɩ d tẽ kũum vʋʋgrã. A yeelame: ‘Sã n yaa tɩ kũum vʋʋgr ka be, rẽnd Kirist me ka vʋʋg ye.’ Kirist sã n da ka vʋʋge, a ra pa na n yaẽ tõnd Rĩm ye. Rẽ me, tõnd sẽn moond n yetẽ t’a rɩta naamã yaa tʋʋm-zaalle. (Karm-y 1 Korẽnt-rãmb 15:12-19.) La tõnd mii vẽeneg t’a Zeezi vʋʋgame. D sẽn kɩs sɩd ne rẽ wã kɩtame tɩ d pa wa sadiseẽ-rãmbã sẽn da pa tẽed baa bilf tɩ ned  sẽn ki tõe n vʋʋgame wã ye. Baa nebã yaand tõndo, d kɩsa sɩd ne d sũur fãa tɩ Wẽnnaam tõe n vʋʋga sẽn ki-bã.—Mark 12:18; Tʋʋ. 4:2, 3; 17:32; 23:6-8.

³ A Poll wilgame tɩ ‘kũum vʋʋgrã’ d sẽn tẽedã naaga ‘Kirist goamã zãms-naana wã.’ (Ebre. 6:1, 2) A yeela vẽeneg tɩ yẽ kɩsa sɩd tɩ sẽn ki-bã na n wa vʋʋgame. (Tʋʋ. 24:10, 15, 24, 25) Baa ne kũum vʋʋgrã sẽn naag “zãms-naana wã” bɩ Wẽnnaam goamã “pipi koees sẽn yaa naana wã,” yaa tɩlɛ tɩ d maag d yĩng n zãms Biiblã sẽn yet rẽ wɛɛngẽ wã, n wʋm a võor sõma. (Ebre. 5:12) Bõe yĩnga?

4. Tõe tɩ bõe la d sokd d mens kũum vʋʋgrã wɛɛngẽ?

⁴ Ned sã n sɩng Biiblã zãmsgo, naoor wʋsgo, pa kaoosd la a karem kibay sẽn gomd neb sẽn vʋʋg yell ye. Wala makre, a Lazaar vʋʋgrã kibare. A bãngdame t’a Abrahaam ne a Zoob la a Dãniyɛll ra kɩsa sɩd tɩ wakat n wat tɩ sẽn ki-bã na n vʋʋge. La rẽ yĩnga bũmb bee Biiblã pʋgẽ, n wilgdẽ tɩ sẽn ki-bã na n sɩd wa vʋʋgame, baa Wẽnnaam sẽn pʋlem rẽ hal sẽn kaoosã bɩ? Ned sã n sok yãmb woto, y leokdame tɩ bõe? Biiblã togsda sẽn yaa wakat ning la sẽn ki-bã na n vʋʋg bɩ? D sã n bãng sogs-kãensã leoore, na n kenga d tẽebã.

5. Bõe yell la d na n deng n gome?

⁵ B sã n yeel tɩ ned maana kaalem tɩ pa kaoos tɩ b vʋʋg-a, tõe tɩ d na n sak n tẽe nana-nana. (Zã 11:11; Tʋʋ. 20:9, 10) La b sã n pʋlem hal daar zãr tɩ ned na n vʋʋgame, y na n tẽeme bɩ? Sã n kaoos yʋʋm ka tɛk tɩ pʋlengã nan pa pidsi, y na n ket n tẽedame bɩ? A soabã kii hal sẽn kaoos bɩ sẽn pa kaoose, y na n sak n tẽeme t’a na n wa vʋʋgame bɩ? Bãng-y tɩ ned a ye n ki n lebg n vʋʋge, tɩ yãmb tẽeda. Yaool n yaa hal yʋʋm kobs la b ra pĩnd n togs a vʋʋgrã. Yaa ãnd soaba? Wãn to la na n kɩt tɩ d maneg n kɩs sɩd tɩ sẽn ki-bã na n wa vʋʋgame?

6. Wãn to la Yɩɩn-sõamyã 118 wã goam pids a Zeezi zugu?

⁶ D gom ned ning vʋʋgr b sẽn da pĩnd n togs hal sẽn kaoosã yelle. B goma a soabã yell Yɩɩn-sõamyã 118 wã pʋgẽ. Neb kẽer tagsdame tɩ yaa a Davɩɩd n gʋls yɩɩn-kãnga. Yɩɩllã pʋgẽ, b yeelame: “Sẽn-Ka-Saabo, d wẽed-y-la kãntɩɩga, wa-y n fãag-y-do! . . . Bark bee ned ning sẽn wat-a ne Sẽn-Ka-Saab yʋʋrã zugu!” Yaa Mesi wã yell la b sẽn gomd ka wã. Tõe tɩ y tẽra bũmb sẽn maan rasem a wãn sẽn deng a Zeezi kũumã. A sẽn wa n kẽed Zerizalɛm Nizã kiuug rasem a 9 wã daarã, neb kʋʋng n lebg n togs yɩɩllã goamã n na n pẽg-a. (Yɩɩn. 118:25, 26; Mat. 21:7-9) La wãn to la Yɩɩn-sõamyã 118 soabã wilgd tɩ ned n na n wa vʋʋg hal kaoosg zugẽ? Ad bũmb a to b sẽn yeel yɩɩllã pʋgẽ: “Tãn-metbã sẽn zãgs kugr ningã, kug-kãng lebga roogã pãng zĩigẽ kugri.”—Yɩɩn. 118:22.

7. Bõe la zʋɩf-rãmbã maan-yã, tɩ wilgdẽ tɩ b zãgsa a Zeezi?

⁷ “Tãn-metbã” yaa zʋɩf-rãmbã taoor dãmbã. B zãgsa Mesi wã. Pa b sẽn pa tẽ t’a Zeezi n yaa Kiristã, la b pa sak n na n tũ-a wã bal ye. Zʋɩf-rãmb wʋsg naaga neb nins sẽn yeel a Pɩlat t’a kɩt tɩ b kʋ a Zeezi wã. (Luk 23:18-23) Hakɩɩka, bãmb n yɩ sabab tɩ b kʋ-a.

8. Sẽn na yɩl t’a Zeezi lebg “roogã pãng zĩigẽ kugri,” bõe n da yaa tɩlɛ?

⁸ B sẽn zãgs a Zeezi, n kʋ-a wã, wãn to la a tõe n lebg “roogã pãng zĩigẽ kugri”? Sã n pa a vʋʋgame, pa tõe ye. A Zeezi meng wẽe yel-bũnd sẽn wilgd rẽ. A goma pʋʋg soab sẽn tʋm a tʋm-tʋmdb a pʋʋgã koaadb nengẽ yelle. Koaadbã  namsa tʋm-tʋmdbã, wa Israyɛll nebã me sẽn nams no-rɛɛsdb nins Wẽnnaam sẽn da tʋm b nengẽ wã. Pʋʋgã soab wa n baas n tʋma a meng bi-riblã a koaadbã nengẽ, n tagsdẽ tɩ b na n kelg-a lame. La b kʋʋ biigã, wa Israyɛll nebã me sẽn da na n wa kʋ Mesi wã sẽn yaa a Zeova Bi-riblã. A Zeezi sẽn wẽ yel-bũndã poore, a lebs n togsa goam nins sẽn be Yɩɩn-sõamyã 118:22 pʋgẽ wã. (Luk 20:9-17) Tʋm-tʋmd a Pɩyɛɛr sẽn wa n gomd ne “zʋɩf-rãmbã nanambs la kãsem-dãmbã ne tõog karen-saam-dãmbã” sẽn da tigim Zerizalɛmmã, yẽ me lebs n togsa Yɩɩn-sõamyã 118:22 goamã. A yeel-b lame tɩ b bãng tɩ Wẽnnaam vʋʋga “Nazarɛt dao a Zeezi Kiris” bãmb sẽn ka ra-lukã zugã. A paasame t’a Zeezi n yaa “kugr ning” bãmb a “tãn-metbã sẽn dag n zãgsã, la kug-kãng n lebg roogã pãng kugri.”—Tʋʋ. 3:15; 4:5-11; 1 Pɩy. 2:5-7.

9. Yɩɩn-sõamyã 118:22 ra pĩnd n togsa bõe?

⁹ Hakɩɩka, Yɩɩn-sõamyã 118:22 ra pĩnd n wilga hal sẽn ta yʋʋm kobs tɩ ned n na n wa vʋʋge. B wilgame tɩ b ra na n zãgsa Mesi wã, n kʋ-a, la t’a na n vʋʋgame, n lebg roogã pãng zĩigẽ kugri. A vʋʋgrã poore, lebga ne yẽ maasem la d tõe n paam fãagre. Sɩd me, Biiblã yeelame tɩ “Wẽnnaam ka kõ ned yʋʋr a to ninsaalba sʋk dũniyã zug tɩ tõnd tõe n tũ n paam fãagr ye.”—Tʋʋ. 4:12; Efɛ. 1:20.

10. a) Bõe la Yɩɩn-sõamyã 16:10 yeta? b) Bõe yĩng tɩ d miẽ tɩ pa a Davɩɩd yell la b sẽn gomdã?

¹⁰ Bɩ d ges vɛrse a to me sẽn gomd kũum vʋʋgrã yelle. B sẽn gʋls a goamã, kaoosa yʋʋm tusr tɩ yaool n na n pidsi. Rẽ segd n kɩtame tɩ d maneg n kɩs sɩd tɩ b tõe n pʋlma hal sẽn kaoos tɩ ned na n wa vʋʋgame, tɩ sɩd wa pidsi. Yɩɩn-sõamyã 16 soabã pʋgẽ, a Davɩɩd yeelame: “Yãmb ka na n bas maam kɩɩm-kulg ye. Yãmb ka na n sak n bas y nin-nongrã t’a põog yaoogẽ ye.” (Yɩɩn. 16:10) A Davɩɩd ra pa rat n yeel tɩ yẽ pa na n tol n ki, wall tɩ b pa na n mum-a yaoogẽ ye. Biiblã wilgda vẽeneg t’a Davɩɩd wa n kʋʋlame, n maan kaalem, “tɩ b tɩ mum-a a Davɩɩd tẽngã pʋga.” (1 Rĩm. 2:1, 10) Woto wã, yaa ãnd yell la b sẽn gomd Yɩɩn-sõamyã 16:10 pʋgẽ wã?

11. Wakat bʋg la a Pɩyɛɛr gom Yɩɩn-sõamyã 16:10 yelle?

¹¹ A Zeezi vʋʋgrã yɩ tɩ semen a wãna, a Pɩyɛɛr sõsa ne neb tusa sẽn da yaa zʋɩf-rãmb la neb sẽn tuub n sak zʋɩf-rãmbã tũudum, n wilg sẽn yaa ned ning yell la Yɩɩn-sõamyã 16:10 gomda. Rẽ t’a Davɩɩd sẽn da gʋls Yɩɩn-sõamyã 16 yɩɩda yʋʋm tusri. (Karm-y Tʋʋm 2:29-32.) A yeelame t’a Davɩɩd ra maana kaalem tɩ b mum-a. Sẽn da kelgd-b a Pɩyɛɛrã ra mii rẽ vẽenega. La a Pɩyɛɛr paasame t’a “Davɩɩd da reng n goma Kirisã vʋʋgrã” yelle, rat n yeel tɩ Mesi wã vʋʋgrã yelle. Biiblã pa wilg tɩ ned n zĩnd be n kɩɩs a goamã ye.

12. Wãn to la Yɩɩn-sõamyã 16:10 goamã pids-yã, la bõe la rẽ wilgd kũum vʋʋgrã wɛɛngẽ?

¹² Sẽn na yɩl t’a goamã maneg n yɩ vẽenega, a Pɩyɛɛr lebs n togsa goam nins sẽn be Yɩɩn-sõamyã 110:1 pʋgẽ wã. Yaa a Davɩɩd goama. (Karm-y Tʋʋm 2:33-36.) A Pɩyɛɛr sẽn tik Gʋlsg Sõamyã n sõs ne nebã, sõng-b lame tɩ b bãng t’a Zeezi yaa ‘Zu-soab la Kiristi.’ Sẽn yɩɩd fãa, b bãngame t’a Zeezi vʋʋgrã pidsa Yɩɩn-sõamyã 16:10 goamã. Tʋm-tʋmd a Poll me sẽn wa n sõsd ne zʋɩf-rãmbã Ãntiyoos sẽn be Pisidi wã, a sõng-b-la woto me. A sẽn yeel bũmb ningã sɩd yɩ-b-la noogo, hal tɩ b ra rat t’a le wa sõs ne-b n paase. (Karm-y Tʋʋm 13:32-37, 42.) Bãngr-gom-kãensã sẽn gomd kũum vʋʋgr yellã sẽn pids baa ne sẽn kaoos yʋʋm kobsã, segd n kenga tõnd me tẽebo.

13. Tõe tɩ bõe la d rat n bãng kũum vʋʋgrã wɛɛngẽ?

¹³ D sẽn mi tɩ b sã n pʋlem tɩ ned na n vʋʋgame, baa kaoosd yʋʋm kobse, wat n pidsame wã kengda d raoodo. La tõe tɩ nina sok yaa: ‘Woto rat n yeelame tɩ ma-me na n gũume n kaoos n yaool n paam n yã m neb nins sẽn maan kaalmã bɩ? Wakat bʋg la sẽn ki-bã na n vʋʋge?’ D bãng t’a Zeezi ra yeela a tʋm-tʋmdbã tɩ bũmb kẽer la b pa mi, la tɩ yɛl n be b sẽn pa tõe n bãnge. A yeel-b lame yaa: “Ka be ne yãmb tɩ y bãng wakate la sasa ning m ba sẽn yãk ne noor ning b sẽn tarã ye.” (Tʋʋ. 1:6, 7; Zã 16:12) La kũum vʋʋgrã sẽn na n yɩ wakat ningã wɛɛngẽ, bũmb kẽer la d mi.

14. Bõe n wilgd t’a Zeezi vʋʋgrã pa tall to?

¹⁴ D tẽeg neb nins sẽn vʋʋg pĩnd wẽndẽ tɩ Biiblã gom b yellã. B fãa sʋkã, a Zeezi vʋʋgrã n pa tall to. Bala, yẽ sã n da pa vʋʋge, tõnd ned baa a ye kõn saagd t’a neb nins sẽn maan kaalmã na n wa vʋʋgame ye. Sẽn paase, neb a taabã sẽn vʋʋgã le lebg n kiime. Wala makre, a Eli ne a Eliize sẽn vʋʋg-b rãmbã le kiime tɩ b mum-ba, tɩ b lebg tẽng tom. La a Zeezi “sẽn vʋʋg n yi kũum sʋkã,” a “kõn leb n ki” ye. ‘Kũum ka leb n so-a ye.’ A bee saasẽ, n na kell n vɩɩmd “zamaan woo zamaane.”—Rom. 6:9; Vẽn. 1:4, 5, 18; Kol. 1:18; 1 Pɩy. 3:18.

15. Bõe yĩng tɩ b boond a Zeezi tɩ kũum vʋʋgr “dẽenem soaba”?

¹⁵ A Zeezi n yɩ pipi n vʋʋg n lebg malɛk n kẽng saasẽ. Leb n yaa yẽ n yɩ pipi n vʋʋg n pa na n tol n le n ki ye. (Tʋʋ. 26:23) La neb a taab me n na n vʋʋg n kẽng saasẽ. A Zeezi ra pʋlma a tʋm-tʋmdb nins sẽn kell n maan sɩd ne-a wã tɩ b na n wa tɩ naaga yẽ n dɩ naam saasẽ, tɩ yɩ b keoore. (Luk 22:28-30) La na n yɩɩ b kũum poore. Wa a Zeezi, bãmb me sã n ki, b na n vʋʋgame n lebg malɛgse. Ad a Poll sẽn yeele: ‘Kirist vʋʋgame, bãmb yaa kũum vʋʋgr dẽenem soaba.’ La a kell n wilgame tɩ neb a taab me n na n vʋʋg n tɩ vɩɩmd saasẽ. A yeelame yaa: ‘Nebã fãa wa sẽn zems b sẽn yaa bũmb ningã, Kirist yaa kũum vʋʋgr dẽenem soaba, dẽ poore, yaa neb nins sẽn yaa Kirist rẽndã n na n vʋʋg bãmb waoong wakate.’—1 Kor. 15:20, 23, Wẽnnaam Sebre, 1983.

16. Bõe n sõngd tõnd tɩ d bãng sẽn na n kẽng-b saasẽ wã vʋʋgr sẽn na n yɩ wakat ningã?

¹⁶ A Poll gomdã sõngda tõnd tɩ d bãng sẽn na n kẽng-b saasẽ wã vʋʋgr sẽn na n yɩ wakat ningã. Na n yɩɩ Kiristã “waoong wakate.” Hal sẽn kaoose, Biiblã sõnga a Zeova Kaset rãmbã tɩ b bãng tɩ yaa yʋʋmd 1914 tɛk la Kiristã waoongã wakat  sɩng-yã. Masã, dũniyã sɛɛb ta n saame.

17, 18. Kiristã waoong wakate, na n yɩɩ wãn ne sẽn paam-b vʋʋsem sõngã zaeeb n ket tẽng zugã?

¹⁷ Sẽn na n kẽng-b saasẽ wã vʋʋgrã wɛɛngẽ, bũmb a taab me la Biiblã togsda. Ad b sẽn yeele: ‘Tõnd ka rat tɩ yãmb zɩ neb nins sẽn gõe wã yell . . . ye. Sɩd me, tõnd sã n tẽed t’a Zeezi kiime la tɩ b leb n vʋʋgame, tõnd tẽedame tɩ neb nins sẽn ki Kirist tũudum pʋgẽ wã, Wẽnnaam na n kɩtame tɩ Kirist vʋʋg-ba . . . Tõnd sẽn ket n vɩ Zu-soabã waoong daarã, tõnd ka na n deng neb nins sẽn gõe wã ye. Bala, koɛɛg n na n zẽke . . . La neb nins sẽn ki Kirist tũudum pʋgẽ wã n na n deng n vʋʋge. Sẽn pʋgda, b na n lagma tõnd sẽn ket n vɩ wã ne bãmb n zẽk sawat pʋse, tɩ d seg Zu-soabã yĩngri. La woto, tõnd na n bee ne Zu-soabã daar fãa.’—1 Tes. 4:13-17.

¹⁸ Kiristã “waoong” wakat sɩngr poor la sẽn na n kẽng-b saasẽ wã vʋʋgrã ra na n sɩnge. To-kãsengã sasa, kiris-neb nins sẽn paam vʋʋsem sõngã zaeeb n ket tẽng zugã na n ‘zẽka sawat pʋsẽ.’ Nin-bãmba na n kiime n lebg n vʋʋg zĩig pʋgẽ. Rẽ n so tɩ b yeel tɩ b “ka na n ki ye.” B na n “paama tedgr wakat a yembre, nif kamsg pʋgẽ, yaoolem baorg peebgã wakate.”—1 Kor. 15:51, 52; Mat. 24:31.

19. ‘Vʋʋgr sẽn yaa sõma n yɩɩdã’ la bʋgo?

¹⁹ Rũndã-rũndã, kiris-nebã fãa la bal pa na n kẽng saasẽ n tɩ rɩ naam ne Kiristã, bala b pa paam vʋʋsem sõngã zaeeb ye. Bãmb gũuda a Zeova daarã, rat n yeel tɩ dũni-kãnga sãoongã. Ned baa a ye pa mi daarã takɩ ye. La yɛlã sẽn yaa to-to wã wilgda vẽeneg tɩ ta n saame. (1 Tes. 5:1-3) Rẽ poore, neb a taab me n na n vʋʋge. La bãmb na n vʋʋg n vɩɩmda tẽngã zugu, arzãn pʋgẽ. B sã n kell n sak Wẽnnaam, b na n paam n lebga neb sẽn zems zãnga, n vɩɩmd wakat sẽn kõn sa. Woto na n yɩɩ “vʋʋgr sẽn yaa sõama n yɩɩda,” bala sẽn vʋʋg-b pĩnd wẽndẽ wã wa n lebg n kiime.—Ebre. 11:35.

20. Bõe n kɩt tɩ d kɩs sɩd tɩ kũum vʋʋgrã sẽn watã pa na n yɩ yaare?

²⁰ Biiblã wilgame tɩ sẽn na n kẽng-b saasẽ wã ned kam fãa vʋʋgr na n yɩɩ ‘wa sẽn zems a sẽn yaa bũmb ningã.’ (1 Kor. 15:23, Wẽnnaam Sebre, 1983) Rẽnd d tõe n kɩsa sɩd tɩ sẽn na n zĩnd-b tẽng zugã me vʋʋgrã pa na n yɩ yaar ye. Woto tõe n kɩtame tɩ d sokd d meng yaa: Kirist sã n wa sɩng a naamã sẽn na n kaoos yʋʋm tusrã, rẽ poor bilfu, yaa neb nins sẽn ki sẽn nan pa kaoosã n na n deng n vʋʋg tɩ b nebã sẽn mi-b sõma wã reeg-b bɩ? Bɩ yaa rap kẽer sẽn yɩ wẽn-sakdb pĩnd wẽndẽ, n tar minim neb kʋʋng zãab wɛɛngẽ wã n na n deng n vʋʋge, sẽn na yɩl n sõng n sigl Wẽnnaam nin-buiidã dũni-paalgã pʋgẽ? La neb nins sẽn pa paam n bãng a Zeova wã yẽ? Zĩ-bʋgo, la wakat bʋg la bãmb na n vʋʋge? Tõe tɩ sogsg wʋsg n wat d yamẽ. La rẽ yĩnga, sogs-kãensã leoorã bãngr yaa tɩlɛ sɩda? Sẽn são pa d gũ n ges sɩda? D tõe n kɩsa sɩd tɩ d sã n paam n na n yã a Zeova sẽn na n welg yel-kãensã to-to wã, na n talla yamleoogo.

21. Bõe la yãmb gũuda?

²¹ La nananda, d segd n maoome n paas d tẽebã pãnga, n kɩs sɩd zãng ne a Zeova. A pʋlmame tɩ ne a Zeezi maasem, neb nins fãa sẽn maan kaalem t’a tẽr b yellã na n wa vʋʋgame. (Zã 5:28, 29; 11:23) A Zeezi yeela bũmb sẽn wilgd vẽeneg t’a Zeova sɩd na n vʋʋga sẽn ki-bã. A yeelame t’a Zeova nifẽ, a Abrahaam ne a Izaak la a Zakoob “fãa vɩɩme.” (Luk 20:37, 38) Hakɩɩka, tõnd me tara bʋʋm n na n yeel wa tʋm-tʋmd a Poll tɩ d “tara tẽeb kãng ne Wẽnnaam . . . tɩ kũum fãa na n vʋʋgame.”—Tʋʋ. 24:15, Wẽnnaam Sebre, 1983.