Yãmb karma Gũusg Gasg nins b sẽn yiis yaoolmã sõma bɩ? Bɩ y ges y sã n tõe n leoka sogs-kãensã:

Roagdb sã n tɩ be tẽn-zẽng ne b kamba, bõe yĩng tɩ b segd n bao n bãng sẽn yaa buud-gomd ning la b kambã wʋmd n yɩɩda, n tõog n sõng-b tɩ b tũ a Zeova sõma?

Kambã sẽn kẽnd lekoll la b mi n be ne b taabã, b zãmsda tẽngã buud-gomdã. Kambã sã n wʋmd buud-goam a yiib bɩ sẽn yɩɩd rẽ, tõe n sõng-b lame. Roagdbã segd n bao n bãnga sẽn yaa buud-gomd ning pʋgẽ la Wẽnnaam goamã kẽed b kambã n tɩ yɩɩda, tɩ tõe n sõng-b tɩ b tẽebã tall pãngã. Rẽ, b bãngda b zakã rãmb sã n na n kẽnga bãmb buud-gomdã tiging pʋgẽ, wall tẽngã buud-gomd tiging pʋgẽ. Roagdb nins sẽn yaa kiris-nebã sẽn dat n tɩ yɩɩd yaa b sõng b kambã tɩ b tẽebã bɩ. Pa sẽn noom bãmb mensã la b baood ye.—w17.05 s.n. a 9-11.

A Zeezi sẽn sok a Pɩyɛɛr tɩ: “fo nonga maam n yɩɩd bãmbã” wã, bõe yell la a ra gomda? (Zã 21:15)

Wõnda yaa zĩmã sẽn da rʋr yambẽ wã yell la a ra gomda, wall yaa zĩmã yõg n koosã yell la a gomda. A Zeezi kũumã poore, a Pɩyɛɛr da leb n tɩ tʋmda a daar fãa tʋmdã sẽn da yaa zĩmã yõgbã. Segdame tɩ kiris-nebã gũus tɩ ra wa yɩ bao-n-kõ-noorã n pak-b n tɩ yɩɩd ye.—w17.05 s.n. 22-23.

Bõe la a Elias Hutter maan-yã, tɩ ra sõngd sẽn dat-b n zãms ebre buud-gomdã?

Sẽn na yɩl n sõng karen-biisã tɩ b tõe n bãng ebre wã gom-biisã yẽg nana-nana, a maaname tɩ gom-biisã yẽg yaa tagd-tagdo, tɩ b ne rẽ n bake. Woto me la b maan Les Saintes Écritures. Traduction du monde nouveau (avec notes et références) tẽngr vẽnegr kẽer pʋgẽ.—wp17.2 s.n. 11-12.

Bõe n na n sõng kiris-ned t’a bãng a sã n tõe n baoo bug-raoog wall zab-teoog a to sẽn na yɩl n kolg a meng ne nin-wẽnse?

Ad bũmb kẽer Biiblã sẽn wilgi: Wẽnd n so nin-saal vɩɩm. A Zeezi pa sagl a karen-biisã tɩ b bao zab-teed n kogl b mens ye. (Luk 22:36, 38) Tõnd tog n dɩka d zabr sʋʋsã n kud wãgse. Ninsaal vɩɩm yõod yɩɩda ligd bɩ teed hal zĩig sẽn zãre. D tagsda d taabã sũur-kaset yelle, la d maood n kõt mak-sõngo. (2 Kor. 4:2)—w17.07 s.n. 31-32.

Bõe yĩng t’a Matye evãnzillã ne a Luk evãnzillã sẽn togsd bũmb nins a Zeezi rogmã la a yãadmã wɛɛngẽ wã pa yembre?

A Zozɛf yell la a Matye gomd n tɩ yɩɩda. A manesem sẽn yɩ to-to a sẽn wa n wʋm t’a Maari tʋtame wã, malɛkã sẽn wa n yeel-a t’a zoe n kẽng Eziptã, la a le wa yeel-a t’a yik n leb Israyɛllã. A Luk yẽ gomda a Maari yell n yɩɩda. Malɛk a Gabriyɛll sẽn gom ne-a wã, a sẽn tɩ ges a Elizabɛtã, la a manesem sẽn yɩ to-to b sẽn wa n loog n bas a Zeezi wẽnd-doogẽ wã n pa bãngã.—w17.08 s.n. 32.

Wilg-y bũmb kẽer sẽn da tõe n kɩt tɩ Biibl ka be rũndã-rũndã ye.

Ebre wã la gɛrkã sẽn yaa buud-goam nins pʋgẽ b sẽn da gʋls Biiblã sɩngrẽ wã toeemame. Naamã sẽn da toeemd nugã me mi n kɩtame tɩ buud-gomd ning paam pãnga, tɩ lebg rẽ la nin-buiidã gomd n yɩɩda. Neb n da maand b sẽn tõe fãa sẽn na yɩl tɩ b ra lebg Biiblã tɩ nin-buiidã paam n karem ye.—w17.09 s.n. 19-21.

Ned fãa tara a malɛk t’a kogend-a bɩ?

Ayo. Yaa sɩd t’a Zeezi yeela daar a ye t’a karen-biisã malɛgsã geta Wẽnnaam nenga. (Mat. 18:10) La pa rat n yeel tɩ malɛgsã maanda yel-soalem n kogend karen-biig fãa ye. Rat n yeelame bal tɩ b ned kam fãa yell paka malɛgsã.—wp17.3 s.n. a 5.

Nonglmã buk ning sẽn yɩɩd a taabã la bʋgo?

Nonglmã buk ning sẽn yɩɩd a taabã yaa agapɛ. Nonglem kãng kɩtdame tɩ d sũyã pʋsẽ bɩ d nong d taabã, n dat b neere. La sẽn yɩɩd fãa, kɩtdame tɩ d maand bũmb toor-toor b yĩnga, n pa baood tõnd mengã nafr ye.—w17.10 s.n. a 7.