Yell kangã wɛɛngẽ, pagã ne a sɩdã n yãkde. La yaa tɩlɛ tɩ b reng n tags neere, tɩ b yam-yãkrã ra wa kɩt tɩ b sũur-kasetã ningd-b taal ye. B segd n bao n bãnga terile wã sẽn maand pag yĩngẽ, la b bʋgs Biiblã sagls la a noy nins sẽn na n sõng-b b yam-yãkrã pʋgẽ.

A Zeova ra yeela a Ãdem ne a Awa yaa: “Rog-y kamb n fɩɩg n pid dũniyã.” Sa-kãsengã poore, a yeela a Nowe ne a zakã rãmb me woto. (Sɩng. 1:28; 9:1) Biiblã pa wilg tɩ Wẽnnaam kõo kiris-nebã no-kãnga ye. La bee ne pag ne a sɩd tɩ b tags n ges kamb a wãn la b na n doge, la b yãk sẽn yaa wakat ning la b rat n dog biiga, la tɩɩm ning b sẽn na n dɩkd rẽ yĩnga. La bõe yell la b segd n deng n tagse?

Kiris-neb sã n wa rat n yãk tɩɩm sẽn na n sõng-b tɩ b gɩdg rogem, b segd n tũu Biiblã saglse. Rẽ n so tɩ b pa na n saag n yiis pʋg sẽn na yɩl n gɩdg rogem ye. Pag sã n tar pʋga, biigã tog n bɩɩ a ma wã pʋgẽ hal n tãag a rogem. La b sã n maan bũmb n sãam pʋgã, yaa pʋg yiisgu. Woto pa zems ne Biiblã sẽn yetã, bala yaa yõor yãkre. (Yik. 20:13; 21:22, 23; Yɩɩn. 139:16; Zer. 1:5) La terile wã ningr yẽ?

Yʋʋmd 1979 bõn-bɩʋʋng kiuug pipi daar Gũusg Gasgã pʋgẽ (neng 30-31), b ra goma terile wã yelle. Terile-rãmb nins sẽn da wae wakat kãngã ra yaa ne sũudu, tɩ b pɩgend-a pagã rog-wʋʋgẽ sẽn na yɩl n gɩdg pʋg rɩkre. Gũusg Gasgã wilgame tɩ logtoɛɛmbã ra pa mi terile wã sẽn maand bũmb nins fãa pag yĩngẽ ye. Bãngdbã ra yeelame tɩ terile wã kɩtdame tɩ raoã rog-bullã pa tõe n ta pagã  gell ye. Rog-bullã sã n yaool n pa naag pagã gell tɩ kãadeng zĩndi, pʋg pa tõe n sɩng ye.

La kaset wʋsg n da be n wilgdẽ tɩ baa pag ning terile, gell kãadeng mi n zĩndame, rat n yeel tɩ pagã gell ne raoã rog-bull lagemda taaba. Wakat kanga, lebga pʋga. Gellã sẽn kãadmã tõe n paa rog-wĩirẽ wã n bɩ, wall a kẽng pagã rog-wʋʋgẽ wã. A sã n ta rog-wʋʋgẽ wã, terile wã tõe n gɩdg-a lame t’a pa tabend be sõma, tɩ pʋgã kell n sãame. Woto yaa wa b sẽn yiis pʋga. Baasgẽ wã, Gũusg Gasgã yeelame: “Kiris-ned sã n sokd a meng sã n togame t’a ning terile, yɩta sõma t’a maag a yĩng n tags woto fãa yelle, la a bʋgs n ges sã n zemsa ne Biiblã sẽn yet tɩ d segd n nanda ninsaal vɩɩmã.”—Yɩɩn. 36:10.

La yʋʋmd 1979 wã tɛka, bũmb wʋsg n toeem logtoeemdã la siãnsã wɛɛngẽ.

Terile buk a yiib n be rũndã-rũndã. A ye n naag ne zũudu. Yʋʋmd 1988 t’a ra bee Etazĩni soolmã zĩis wʋsgo. A to wã tara ormon sẽn kẽed pagã yĩngẽ. Yaa yʋʋmd 2001 la b sɩng yẽ soabã koosgo. Bõe la d mi terile-kãensã a yiibã zugu?

Sẽn naag-a ne zũudã: Wa d sẽn zoe n yeelã, terile wã kɩtdame tɩ yaa toog ne raoã rog-bullã t’a tũ pagã rog-wʋʋgã pʋgẽ n ta gellã sẽn beẽ wã, n ket n vɩ. Sẽn paase, zũudã sẽn be terile wã zugã tara wa zẽnem buud sẽn kʋʋd rog-bulã. * B wilgame me tɩ terile-kãng toeemda yɛl kẽer pagã rog-wʋʋgẽ, tɩ rẽ kɩt tɩ gellã pa tõe n zĩnd be ye.

Sẽn tar-a ormonnã: Ormon ning terile-kãnga soabã sẽn tarã yaa wa ormon ning sẽn be tɩ-vondem nins sẽn gɩdgd pʋg rɩkrã pʋgẽ wã. Ormonnã yitame n kẽed rog-wʋʋgẽ wã. Pagb kẽer nengẽ, kɩtdame tɩ gell pa yi ye. Gell sã n yaool n pa yi, kãadeng pa tõe n zĩnd ye. Rẽ sẽn yãk a toogo, ormonnã kɩtdame tɩ bũmb ning sẽn gãneg rog-wʋʋgã pʋgẽ wã lebg bãanega. * Sẽn paase, kɩtdame tɩ ko-saalgã lebg taoko, tɩ yaa toog tɩ raoã rog-bulã ta pagã rog-wʋʋgẽ wã. Pĩnd terile-rãmbã ra pa tõe n maan woto ye.

Wa d sẽn zoe n yeelã, wõnda terile wã buk a yiibã fãa toeemda yɛl kẽer pagã rog-wʋʋgẽ wã. Woto rat n yeelame tɩ pagã gell sã n yi, n kãadem ne raoã rog-bulli, a tõe n kẽnga rog-wʋʋgẽ wã, la a pa na n tõog n tabend be ye. Rẽ na n kɩtame tɩ pʋgã kell n sãame. La bãngdbã wilgame tɩ woto buud pa wae, la tɩ baa yaa tɩ-vondem nins sẽn gɩdgd pʋg rɩkrã la pag vonda, a buud mi n maaname.

Rẽnd ned baa a ye pa tõe n kɩs sɩd zãng tɩ terile ning sẽn naag ne zũudã, wall sẽn tar-a ormonnã kɩtdame tɩ gell kãadeng pa tol n tõe n zĩnd ye. La bãngdbã wilgame tɩ terile-kãens sẽn maand bũmb nins pag yĩngẽ, tɩ rẽ gɩdgd gell kãadengã, kɩtame tɩ pag sã n ning-a, a pa wae n dɩkd pʋg ye.

Saam-bi-poak sã n dat n ning terile, yẽ ne a sɩdã segd n deng n yẽsa ne logtor sẽn tar minim yel-kãng wɛɛngẽ. A na n sõng-b lame tɩ b bãng terile ning b sẽn tõe n paam bãmb babgẽ wã, la a wilg rẽ sẽn sõngd pag to-to, la yɛl nins a sẽn tõe n wa ne wã. B pa segd n bas tɩ ned a to, baa logtor meng yãk b sẽn na n maanegã ye. (Rom. 14:12; Gal. 6:4, 5) Yaa bãmb b yiibã bal n segd n yãke. Sẽn segd n pak-bã yaa b kell n ta Wẽnnaam yam, tɩ b sũur-kasetã me ra ning-b taal ye.—Ges-y 1 Tɩm. 1:18, 19; 2 Tɩm. 1:3.