A ZOZƐF SẼN YIT ARIMATE wã pa mi a sẽn maan to-to n paam raood n tɩ gom ne Rom guvɛrneer a Põos Pɩlat ye. A Pɩlat ra maanda a sẽn date, tɩ ned pa tõe t’a toeem yam ye. La sẽn na yɩl tɩ b paam n mum a Zeezi wa sẽn segde, yaa tɩlɛ tɩ ned tɩ kos a Pɩlat sor n dɩk a kũumã. A Zozɛf sẽn tɩ gom ne a Pɩlatã, a sakame. Tõe t’a ra tẽedame tɩ na n yɩɩ toogo, la pa yɩ woto ye. A Pɩlat sokame n ges a Zeezi sã n zoe n kiime, tɩ b yeel t’a kiime. Rẽ poore, a yeela a Zozɛf t’a tõe n dɩka kũumã. Baa ne sũ-sãangã sẽn da ket n namsd a Zozɛfã, a wudgame n leb zĩig ning b sẽn ka a Zeezi wã.—Mark 15:42-45.

• Ãnda soab la b sẽn boond t’a Zozɛf sẽn yit Arimate wã?

• Bõe n be yẽ ne a Zeezi sʋka?

• A kibarã yõod ne yãmb yaa bõe?

A Mark evãnzillã pʋgẽ, b yeelame t’a Zozɛf yaa ‘karengã yɛl bʋ-bʋʋd nebã fãa sẽn waoogde.’ Karengã bʋ-bʋʋdbã la a yel-gɛtbã sull ning sẽn tar noor n yɩɩdã la b sẽn boond tɩ Sãnedrẽ wã. (Mark 15:1, 43) Dẽnd a Zozɛf ra yaa nin-kãseng nin-buiidã sʋka. Yaa rẽ yĩng la a sẽn paam sor n na n gom ne Rom guvɛrneerã. Pa lingr me la a sẽn da yaa arzɛk soabã ye.—Mat. 27:57.

Sãnedrẽ wã neb ra kisa a Zeezi. Bãmb n wẽn yɛlã n paam tɩ b kʋ-a. Baa ne a Zozɛf sẽn da yaa Sãnedrẽ wã nin-yendã, Biiblã yeelame t’a ra yaa “nin-sõngo la nin-tɩrga.” (Luk 23:50) A ra pa wa Sãnedrẽ wã neb wʋsg ye. A ra yaa pʋ-peelem soaba, n maand sẽn segde, la a tũud Wẽnnaam noyã. B yeelame me t’a “rag n gũuda Wẽnnaam soolem waoongo.” Tõe tɩ yaa rẽ yĩng la a sẽn lebg a Zeezi karen-biigã. (Mark 15:43; Mat. 27:57) Tog n yaa a sẽn da nong sɩda, la a nong sẽn yaa tɩrgã yĩng la a Zeezi goamã sẽn kẽ-a wã.

Zã 19:38 wã pʋgẽ, b yeelame t’a Zozɛf “dag n soos n yaa a Zeezi karen-biiga, a sẽn zoet Zʋɩf-rãmbã yĩnga.” Bõe yĩng t’a ra zoet-ba? A ra miime tɩ zʋɩf-rãmbã kisa a Zeezi, la tɩ b sɩɩga taab noor tɩ ned ning fãa sẽn na n tẽ a Zeezi, b na n diga a soab n yiis karen-doogẽ wã. (Zã 7:45-49; 9:22) B sã n dig ned n yiis karen-doogẽ wã, b ningd-a-la yãnde, a pa le tõe n naag a taabã, a lebgda wa ned b sẽn yiis buudu. Rẽ n so t’a Zozɛf ra pa rat n sak n wilg vẽeneg t’a tẽeda a Zeezi ye. Bala, na n sãama a yʋʋre, a kõn le paam ziir la waoogre.

Pa a Zozɛf bal n da tẽed a Zeezi la a pa rat n maan tɩ nebã bãng ye. Zã 12:42 yeelame tɩ “baa nanambsã sʋka, wʋsg tẽe a Zeezi, la Fariizẽ-dãmbã yĩnga, b ka sak n togs tɩ b tẽedame ye, tɩ b ra wa n rig-b n yiis karen-doogẽ wã ye.” Ned a to me sẽn maan woto yaa a Nikodɛm. Yẽ me ra yaa Sãnedrẽ wã nin-yende.—Zã 3:1-10; 7:50-52.

A Zozɛf ra yaa a Zeezi karen-biiga, la a ra pa tar daood n na n maan tɩ nebã bãng ye. Woto ra pa yel-bil ye. Bũmb la a Zeezi meng ra yeel-yã, tɩ sɩd wilgd rẽ. A ra yeelame yaa: “Ned sã n kɩs kaset nebã taoor t’a yaa mam neda, mam me na n kɩsa kaset m ba sẽn be arzãnã taoor tɩ yẽnda yaa mam neda. La ned sã n yeel nebã taoor t’a ka mi maam, mam me na n yeela m ba sẽn be arzãnã taoor tɩ m ka mi-a ye.” (Mat. 10:32, 33) Yaa sɩd t’a Zozɛf pa yeel t’a pa mi a Zeezi ye. La a pa tall daood n yeel t’a mi-a lame ye. La yãmb yẽ?

Biiblã pʋgẽ, b wilgame t’a Zozɛf pa naag Sãnedrẽ wã neb a taabã n wẽn yɛlã sẽn na  yɩl tɩ b kʋ a Zeezi ye. (Luk 23:51) Tõe tɩ wa neb kẽer sẽn yetã, a pa zĩnd a Zeezi bʋʋdã raar ye. Sẽn yaa a soab me, a Zozɛf sũurã tog n sãama wʋsg bʋʋdã sẽn yɩɩ kɛgrã yĩnga, la a ra pa tar a sẽn tõe n maan ye.

A Zeezi kũumã wakatã t’a Zozɛf tara raood masã. A pa le zoet rabeem, n pa rat n maan tɩ b bãng t’a yaa a Zeezi karen-biig ye. Mark 15:43 wilgda rẽ. Be, b yeelame: ‘Yẽnda maana raood n kẽng a Pɩlat nengẽ n tɩ kos a Zeezi kũumã.’

Wõnda a Zeezi sẽn wa n na n ki wã t’a Zozɛf ra bee be. Sɩd me, a renga a Pɩlat n bãng t’a Zeezi kiime. Rẽ n so t’a sẽn wa n kos sor n na n dɩk kũumã, linga a Pɩlate, a sẽn wʋm t’a Zeezi “zoe n kiime” wã. (Mark 15:44) Sã n mik t’a Zozɛf yãa a Zeezi sẽn da be raoogã zug n namsdẽ wã, tõe tɩ yaa rẽ n kɩt t’a tags neere, n bãng tɩ yaa tɩlɛ t’a wilg vẽeneg t’a yaa a Zeezi karen-biiga. Sẽn yaa a soab fãa, a Zozɛf paama raood masã n na n maan bũmb n wilg t’a yaa a Zeezi karen-biiga. A pa na n le solg ye.

Zʋɩf-rãmbã tõog pʋgẽ, b ra wilgame tɩ b sã n bʋ ned bʋʋd n kɩt tɩ b kʋ-a, b segd n muma kũumã tɩ wĩndgã nan pa kẽ ye. (Tõo. 21:22, 23) La Rom nebã yẽ ra basda bi-beesã kũum raoogã zug tɩ põoge, wall b tɩ lob-a zĩig ning b sẽn wae n lobd bi-beesã kũumã. La a Zozɛf ra pa rat tɩ b maan a  Zeezi kũumã woto ye. A ra tara a yaoog a sẽn kɩt tɩ b tu kugr zugu. Ra pẽe zĩig ning b sẽn ka a Zeezi wã. B ra nan pa mum ned be ye. Woto wilgdame tɩ tõe t’a Zozɛf ne a zakã rãmb sẽn yi Arimate * n wa Zerizalɛmmã nan pa kaoose, la t’a ra tuka yaoogã sẽn na yɩl t’a zakã ned sã n wa maan kaalem bɩ b mum-a be. (Luk 23:53; Zã 19:41) A Zozɛf sẽn kɩt tɩ b mum a Zeezi yaoog ningẽ a sẽn da tuk a meng yĩngã, a maan-a-la neere. La kell n pidsa b sẽn da pĩnd n togs tɩ b na n naaga Mesi wã “ne arzegs rãmb n mumã.”—Eza. 53:5, 8, 9.

Evãnzill-dãmb a naasã fãa pʋgẽ, b togsame tɩ b sẽn sik a Zeezi raoogã zugã, a Zozɛf reega kũumã, n vil-a ne lamd gĩs-bãaneg peend sẽn yaa sõma, n gãneg-a yẽ mengã yaoogã pʋgẽ. (Mat. 27:59-61; Mark 15:46, 47; Luk 23:53, 55; Zã 19:38-40) Ned a to me b sẽn togs vẽeneg t’a sõnga a Zozɛf yaa a Nikodɛm. A waa ne mumbã teed kẽere. B yiibã fãa sẽn da yaa nin-kãsems nin-buiidã sʋkã yĩnga, pa tog n yaa bãmb n dɩk kũumã b toor n tɩ solg ye. Wõnda b kɩtame tɩ b tʋm-tʋmdb sõng n dɩk kũumã n kẽng yaoogẽ wã la b ges solgrã yelle. Baa sã n yɩɩ woto, b mensã sẽn maan bũmb ningã pa bilf ye. Ned sã n da sɩɩs kũum, a lebgda rẽgd rasem a yopoe tõre, t’a sẽn sɩɩs bũmb ning fãa me lebg rẽgdo. (Sõd. 19:11; Aaze 2:13) Dẽnd Pakã kibsã rasem a yopoe wã fãa, a Zozɛf ne a Nikodɛm ra pa segd n naag nebã ye. B ra pʋd n pa tõe n maan kibsã ye. (Sõd. 9:6) Sẽn paase, Sãnedrẽ wã neb a taabã sã n bãng t’a Zozɛf gesa a Zeezi mumbã yelle, b na n yaal-a lame. La ne rẽ fãa, a yãka yam n na n ges t’a Zeezi solgrã yɩ wa sẽn segde, la a sak masã n na n wilg vẽeneg t’a yaa Kiristã karen-biiga, baa ne rẽ fãa sẽn tõe n wa ne zu-loeesã.

Biiblã pʋgẽ, b sẽn gom a Zozɛf yell a Zeezi mumbã sasa wã, b pa tol n le gom a yell ye. Rẽ kɩtame tɩ d sokd d meng a kibarã sẽn baas to-to. Togs sɩdã, d pa mi ye. La bũmb nins d sẽn zoe n bãng a zugã kɩtame tɩ d tõe n sɩd tags t’a maaname tɩ nebã bãng vẽeneg t’a yaa Kiristã karen-biiga. Sɩd me, yɛlã sẽn wa n wɩngã, a tẽebã ne a yẽesmã pa boog ye. Pʋd n da paasdame. Woto kɩtame tɩ d tõe n tags t’a toeema yam.

A Zozɛf kibarã segd n kɩtame tɩ ned kam fãa sok a meng yaa: Rẽ yĩnga bũmb n be m sẽn nand n yɩɩd m sẽn paam n tar zood ne a Zeova wã bɩ? Wala makre, ziir bɩ naam, tʋʋmde, tarem, lohorem wall m zakã rãmb sũ-noogo.