MAMS-Y y yamẽ tɩ y kẽnda sor sẽn yaa lik bida pʋgẽ. Wĩndgã sẽn kẽ wã kaoosame, la y pa yɛɛsd y na n wa meneme, bala y zãada tors sẽn wit sõma. Y sã n tors yambẽ, y nee sẽn be y taoorã fãa. Y sã n tors yɩɩg me, vẽnegda y sorã tɩ y ne hal zĩ-zãrga.

D tõe n yeelame tɩ Biiblã yaa wa torse. Beoog ne a noor fãa zu-loeesã yaa wa bũmb nins sẽn tõe n dɩg y taoor y kẽndã pʋgẽ wã. La wa d sẽn zoe n togs tɩ loogã, Wẽnnaam Gomdã tõe n sõnga tõnd tɩ d welg-ba. Biiblã pʋd n maanda sẽn yɩɩd rẽ. A sõngda ned t’a ne hal yɩɩga, n ne sor ning a sẽn na n tũ n wa paam t’a beoog yɩ neere, t’a paam sũ-noog hakɩɩk wakat sẽn kõn sa. (Yɩɩn-sõamyã 119:105) Wãn to?

Bɩ d ges bũmb a yiib Biiblã sẽn sõngd ned t’a bãnge, n kɩt t’a kɩs sɩd t’a beoog na n yɩɩ neere: 1 Biiblã sõngda ned t’a neẽ t’a vɩɩmã tara võore, 2 a wilgda ned a sẽn na n maan to-to n yɩ a Naandã zoa wakat sẽn kõn sa yĩnga.

Biiblã saglsã tõe n sõng-d lame tɩ d mao ne d zu-loeesã. La pa sebr b sẽn gʋls tõnd mengã sõngr yĩng bal ye. Biiblã pʋd n yetame tɩ d gũus tɩ ra yɩ d mensã yell bal n pak-d ye. A sõngda tõnd tɩ d bãng tɩ vɩɩmã pa tek tõnd mengã la d raabã, la tɩ d segd n tagsda neb a taabã me yelle. Yaa d sã n mi rẽ la d vɩɩmã na n tall võore.

D rɩk makr ne saglg a ye Biiblã sẽn kõ. Ad b sẽn yeele: “Sẽn kõt-a sũ-noog yɩɩda sẽn deegd-a.” (Tʋʋmã 20:35, Sebr-Sõngo) Yãmb zoe n kõo ned bũmbu, a sẽn dat sõngr yĩng bɩ? Wall yaa y zoa n da rat n togs yãmb a sũur gomde, tɩ y maag y yĩng n kelg-a? Y sã n lebg n tẽege, y sũur pa noom sɩda? Y pa get tɩ y yolsa ned sɩda?

D sã n kõ ned bũmb bɩ n maan bũmb n sõng-a, n pa gũud rolbo, rẽ n kõt sũ-noog n yɩɩda. Seb-gʋlsd a ye yeelame tɩ “ned pʋd n pa tõe n sõng a to, tɩ  rolbã pa yɩɩg a sẽn maanã, sã n mik t’a sõng-a lame n pa tags rolb yell ye.” Sɩd me, d sã n sõng neda, sẽn yɩɩd fãa a soab sã n pa tõe n maan n lebse, pa na n yɩ zaalem ye. Yaa wa d sẽn naag d Naandã n tʋʋmdẽ, bala a yeelame tɩ d sã n maan nimbãan-ned neere, yaa wa samd d sẽn dogl yẽ, t’a na n dol-do. (Yel-bũnã 19:17) Hakɩɩka, Wẽnnaam sũur nooma ne ned sẽn sõngd ka-pãng soaba. A togsa vẽeneg tɩ d sã n maan-b neere, a na n keo-d lame, la tɩ keoorã na n yɩɩ vɩɩm sẽn kõn sa, arzãn pʋgẽ, tẽngã zugu. Pa tõe n yɩ keoor sẽn pa ta rẽ ye. Ad d beoog sɩd na yɩ neere!—Yɩɩn-sõamyã 37:29; Luk 14:12-14. *

Biiblã sõngda tõnd tɩ d bãng tɩ d sã n tũ a Zeova sẽn yaa Wẽnnaam sɩd-sɩdã, d vɩɩmã na n talla võore. Yaa rẽ n tar yõod n yɩɩda. Wẽnnaam Gomdã sagenda tõnd tɩ d pẽg Wẽnnaam la d waoog-a, la d sak-a, bala a segda ne rẽ. (Koɛɛg soaba 12:13; Vẽnegre 4:11) D sã n maand woto, yaa bũmb sẽn be neer hal tɩ pa tõe n bãng n bilgi. D noogda d Naandã sũuri. A yeta d ned kam fãa yaa: “Paam yam n noog m sũuri.” (Yel-bũnã 27:11) Yãmb we n tags n gese! Rat n yeelame tɩ d yam-yãkr pʋgẽ, d sã n tũ Biiblã saglsã, d saasẽ Ba wã sũur yaa noogo. Bõe yĩnga? Bala d yell pak-a lame, t’a rat tɩ d tũ a saglsã, d mengã sõngr yĩnga. (Ezayi 48:17, 18) Rẽ yĩnga bũmb le bee d sẽn tõe n maane, t’a yõod yɩɩd d sẽn na n tũ yĩngr la tẽng Naab sẽn ka to wã, n paam t’a sã n get d sẽn vɩ to-to wã bɩ a sũur noomẽ sɩda?

Biiblã leb n sagenda tõnd tɩ d modg n bao d Naandã zoodo. Ad b sẽn yeele: “Kolg-y Wẽnnaam, la bãmb na pẽneg yãmba.” (Zak 4:8) Wakat ninga, d mi n sãmbda ninsaal sã n sɩd tõe n yɩɩ Wẽnnaam sẽn yaa pãng sẽn ka to soabã zoa. La Biiblã yeta tõnd tɩ d bas d yam tɩ d sã n “bao bãmba,” d na “yãnd-ba,” bala b “ka zãr ne tõnd ned ba a yembr ye.” (Tʋʋmã 17:27) Biiblã sẽn sagend tɩ d bao Wẽnnaam zoodã sɩd na n sõng-d lame tɩ d wa paam tɩ d beoog yɩ neere. Bõe yĩng tɩ d yet woto?

Tags-y n ges-y! Baa d sẽn maan a soab fãa, tõnd ned baa a ye pa tõe n põs kũumã sẽn yaa d fãa bɛ wã ye. (1 Korẽnt-rãmbã 15:26) La Wẽnnaam yẽ bee wakat sẽn kõn sa. A kõn ki a bada! A ratame t’a zo-rãmbã me vɩɩmd wakat sẽn kõn sa. Biiblã togsa gomd sẽn wilgd Wẽnnaam sẽn dat tɩ sẽn baood-b yẽ wã paame. Gomdã yaa koɛɛga, la yaa koe-noog tɛkẽ! Ad b sẽn yeele: “Bɩ bãmb vɩɩmd wakat sẽn ka sɛta!”—Yɩɩn-sõamyã 22:27.

La y maanda wãn n yɩ Wẽnnaam zoa wakat sẽn kõn sa? Zãmsd-y Biiblã wakat fãa, tɩ rẽ la y na n bãng Wẽnnaam sõma. (Zã 17:3; 2 Tɩmote 3:16) Kos-y-yã-a t’a sõng-y tɩ y wʋm Biiblã goam võor neere. Biiblã yeta tõnd vẽeneg tɩ d sã n pelg d pʋg n “kos Wẽnnaam” yam, a na n kõ-d lame. * (Zak 1:5) Sẽn na n baase, modg-y n tũ-y y sẽn bãngd Biiblã zãmsg pʋgẽ wã, tɩ Wẽnnaam Gomdã yɩ wa ‘fɩtl yãmb kẽnd pʋga,’ la wa ‘vẽenem yãmb sor zugu,’ masã menga, la wakat sẽn kõn sa.—Yɩɩn-sõamyã 119:105.