A Rozi yeelame: “Wakat fãa, m maanda yɩɩr tɩ looge, la yaa m sẽn zẽnd yɛlã m yamẽ wã, bɩ m sẽn tagsd tɩ yellã na n kengame wã yĩnga.” Biiblã vɛrse-bʋs n sõng-a? Vɛrse a ye sẽn sõng-a yaa Matye 6:34. Be, b yetame: “Bɩ y da maan yɩɩr ne beoog yell ye, bala, daar fãa yell sek-a lame.” Masã, a Rozi yeelame t’a Zeezi gomdã sõng-a lame t’a pa le maand yɩɩr ne bũmb ning sẽn tõe n maan beoog ye. A paasame: “M yɛlã sek-m-la woto, tɩ b pa gomd m na le maand yɩɩr ne yell sẽn nan ka be, la sẽn pʋd n tõe n pa zĩnd ye.”

A Yasmin me ra wa n getame t’a maanda yɩɩr tɩ loog nugu. A yeelame: “Semen pʋgẽ, m da yãbda rasem a yiib bɩ sẽn yɩɩd rẽ. Yyʋn-kẽer me, m da pa tõe n gũs ye. M da neeme tɩ tags-kɛgã kɩtdame tɩ m pa le tar sũ-noog ye.” Biiblã vɛrse-bʋg n sõng-a? Yaa 1 Pɩyɛɛr 5:7. Be, b yetame: “Sik-y yãmb yɩɩrã fãa n bas ne bãmba, bala, bãmb n get yãmb yelle.” Ad a Yasmin sẽn yeele: “M wa n minim n pʋʋsda a Zeova, n neẽ t’a leokda m pʋʋsgã. Yaa wa b sẽn sik zɩɩb m sẽn da zɩlg m bãgdẽ. Wakat ninga, tags-kɛgã mi n le waame, la masã, m bãnga m sẽn tõe n maan to-to.”

Pag yʋʋr sẽn boond t’a Izabɛlla yeelame: “M tog n doga ne minun-wẽn-kãnga. Bala m baaba me ra yaa  a woto. M tõe n viiga tʋʋm-tɩrga, n yaool n pa na n maan baa fʋɩ ye. M na n zĩi zaalem wall m get tele. Yaa minun-wẽnga, bala tʋʋmã wat n lebga wʋsg tɩ yaa yɩɩre. Rẽ me, wat n yaa f wee n tʋm n paam f menga.” Biiblã vɛrse ning sẽn sõng-a wã yaa 2 Tɩmote 2:15. Be, b yetame: “Nang pãng n yals Wẽnnaam taoor wa ned sẽn bɩ, tʋmtʋmd sẽn kõn sulg a zug ne yãnd ye.” A Izabɛlla yeelame: “M pa rat t’a Zeova ges m tʋʋmã tɩ yaa yãnde, m sẽn minim n viigd m tʋʋmã yĩng ye.” A tõog n toeema wʋsgo.

A Kɛlsi me yeelame yaa: “M mi n tara tʋʋmd n segd n tʋme, la m na n viig-a lame hal tɩ sẽkã wa lebg pẽdga, tɩ m yãbda, n pa gõe, tɩ yaa yɩɩre. Ra pa manegd maam ye.” Wẽnnaam Gomdã sẽn yeel Yel-bũn 13:16 n sõng-a. Be, b yeelame tɩ “gũus-m-meng soab tʋmda ne bãngre, la yalem wilgda a yalemd bala.” A wilga a sẽn bʋgs vɛrse kãnga zug tɩ sõng-a t’a bãng bũmb ningã. A yeelame: “F sã n tall yam, n deng n sigl f tʋʋmã, rẽ n são. Masã, m tara sebr m taablã zugu, n dengd n gʋlsd tʋʋm nins m sẽn segd n wa tʋmã. Woto kɩtame tɩ m mi m tʋʋmd fãa ne a wakate, n pa le viigd tʋʋmã tɩ sẽkã wa lebg pẽdg ye.”

A Kiristin yeelame: “Mam kãadmã sãamame. M sɩdã basa maam ne kom-bõoneg a naase.” Biiblã sagl-bʋg n sõng-a? Yel-bũnã 17:17. Be, b yeelame tɩ ned zoa hakɩɩk nong-a-la wakat fãa, n yaa a ba-biig sẽn na n sõngd-a yel-pakr wakate. A Kiristin yõga zood ne neb sẽn yaa a Zeova Kaset rãmb wa yẽ. Sõng-a lame bɩ? Ad a sẽn yeele: “M zo-rãmbã ra nong n maanda bũmb wʋsg n teend-ma. Kẽer mi n daa fɩlɛɛr-dãmb la teed a taab n wa rɩgl m doogã noore. Naoor a tãab la b wa wʋsgo, n sõng maam ne m kambã tɩ d wʋk d teedã n toeem zaka. B nin-yend n sõng maam tɩ m paam tʋʋma. M sã n da rat sõngr fãa, b sõngd-m lame.”

A Dɛlfin, pag ning yell d sẽn da gomã me ra lebga a ye, tɩ namsd-a wʋsgo. A tẽega yel-beed nins sẽn tiig n paam-a wã, n yeel yaa: “M yamẽ, ra lebga wa neb a taabã n vɩ bala, tɩ mam be kɛɛnga, n yaa m ye tãa, n get-ba. M sẽn da lebg m yembrã ra namsd-m-la wʋsgo.” Yɩɩn-sõamyã 68:7 goamã n sõng-a. Be, b yeelame tɩ “Wẽnnaam kõta neb nins sẽn ka tar neda yi tɩ b zĩndi.” A yeelame: “M da miime tɩ pa rat n yeel bal tɩ Wẽnnaam na n kõ-m-la yir sɩd-sɩd ye. M wa n pʋd n neeme tɩ nonglem ning sẽn be maam ne a Zeova Kaset rãmb a taabã sʋkã tara pãnga, hal tɩ d yaa wa zak a ye neba, tɩ yaa wa Wẽnnaam kõ-d-la yir tɩ d vɩ be. La m da miime tɩ maam ne a Zeova zoodã sã n pa paam pãng sõma, maam ne m taabã zood me pa tõe n tall pãng ye. Rẽ wɛɛngẽ, Yɩɩn-sõamyã 37:4 n sõng-ma. Be, b yetame: ‘Maan sũ-noog Sẽn-Ka-Saab pʋgẽ, la b na n kõo foom f sũur sẽn date.’”

Sẽn na n baase, a yeelame yaa: “M bãngame tɩ m segd n maneg n gãda a Zeova sõma n yɩɩd pĩndã. Yẽ la zoa hakɩɩk sẽn ka to. M baoo sebr n gʋls bũmb kẽer m sẽn na n naagd m taabã n maandẽ, n paam n yõg zood ne nin-kãensã sẽn nong a Zeova wã. Bilf-bilfã, m wa n geta neb a taabã zʋg-sõma wã, n maand wa m pa ne b pãn-komsmã ye.”

Yaa sɩd tɩ baa d zo-rãmb nins sẽn tũud Wẽnnaamã ket n yaa koangdba. A Zeova Kaset rãmbã me maooda ne zu-loees wa neb a taabã. La ned sã n zãms Biiblã, kɩtdame t’a rat ne a sũur fãa n sõng neb a taabã wa a sẽn tõe. Y sã n yõg zood ne neb a woto n são. La rẽ yĩnga, ned sã n tar zu-loɛɛg sẽn nan pa tar tɩɩm, wala makre, bãag sẽn pa sate, wall yaa a ned n maan kaalem, Biiblã saglsã tõe n sõnga a soab bɩ?