1, 2. a) Bõe n wilgd t’a Zeova manesmã ne nebã yaa toor fasɩ ne dũniyã nin-kãsemsã? b) Bõe yell la d na n gom sõs-kãnga pʋgẽ?

NAOOR wʋsgo, dũniyã nin-kãsemsã soo b taabã ne “pãng n dɩt naam,” wall b pʋd n weoogd-b menga. (Mat. 20:25; Koɛ. 8:9) La a Zeova pa woto ye! Baa ne a sẽn yaa pãng sẽn ka to soaba, n yaa yĩngr la tẽng Naabã, a nanda ninsaalbã sẽn pa zems zãngã. A tagsda d yelle, n baood d neere. A mii tõnd tagsg sẽn yaa soab yell fãa pʋgẽ, la bũmb nins d sẽn datã. A zɩ n kos tõnd bũmb d sẽn pa tõe n maane, bala a “tẽrame tɩ tõnd yaa tẽng tom.”—Yɩɩn. 103:13, 14.

² Kibay wʋsg n be Biiblã pʋgẽ, n wilgdẽ t’a Zeova sɩd nanda sẽn tũud-b yẽ wã. D gom kibay a tãab yelle. Pipi, a Zeova sẽn sõng a Sãmwɛll sẽn da nan ya biigã ne bʋgsem to-to t’a taas maan-kʋʋdb kãsem a Eli a bʋ-kaoor koɛɛgã. Yiib-n-soaba, a sẽn maan sũ-mar to-to ne a Moyiizi, a Moyiiz sẽn wa n tagsd t’a pa na n tõog n yɩ Israyɛll nebã taoor soabã. La tãab-n-soaba, a sẽn wilg to-to t’a nanda Israyɛll nebã, a sẽn wa n na n tall-b n yi Eziptã. D sã n wa wɛgsd kibar fãa, d na n gesa  rẽ sẽn sõngd tõnd tɩ d bãng bũmb ning a Zeova zugã, la d sẽn tõe n tũ d sẽn bãngã to-to.

3. Biig a Sãmwɛll sẽn wa n gõe daar a ye yʋngo, bõe n maane, la kɩtame tɩ d sokd d meng bõe? (Ges-y sõsgã sɩngrẽ fotã.)

³ A Sãmwɛll sɩnga tʋʋm sɛk-roogẽ wã t’a nan ket n paoodẽ. (1 Sãm. 3:1) Daar a ye yʋngo, a wa n gõeeme, tɩ bũmb maane. * (Karm-y 1 Sãmwɛll 3:2-10.) A wʋma b sẽn bool-a. A tagsame tɩ yaa maan-kʋʋdb kãsem a Eli n bool-a, n zoe n kẽng n na n tɩ sake. A sẽn ta wã, a yeela a Eli yaa: “Ad maam! Bala, yãmb boola maam.” A Eli leok-a lame t’a pa bool-a ye. A buud maana naoor a yiib n paase, t’a Eli bãng tɩ yaa Wẽnnaam la sẽn boond a Sãmwɛllã. Rẽ n so t’a wilg-a a sẽn tog n leok to-to, t’a Sãmwɛll sɩd maan woto. Bõe yĩng t’a Zeova pa yeel a Sãmwɛll hal sɩngrẽ wã tɩ yaa yẽ la sẽn gomd ne-a wã? Biiblã pa togs rẽ ye. La wõnda a Zeova tagsa a Sãmwɛll sẽn nan paoodã, n pa rat n maan bũmb sẽn na n yirb-a ye.

4, 5. a) A Zeova sẽn wa n yeel a Sãmwɛll t’a taas a Eli a koɛɛgã, bõe la a maan-yã? b) Kiba-kãngã sõngda tõnd tɩ d bãng bõe a Zeova zugu?

⁴ Karm-y 1 Sãmwɛll 3:11-18. Tõogã a Zeova sẽn da kõ wã pʋgẽ, b wilgame tɩ kambã segd n waooga sẽn kʋʋl-bã, sẽn yɩɩd fãa, taoor dãmbã. (Yik. 22:27; Maan. 19:32) Woto wã, yãmb tagsdame t’a Sãmwɛll na n yika yibeoogã, n kẽng a Eli nengẽ ne raood n tɩ togs-a Wẽnnaam bʋ-kaoor koɛɛgã? Ayo! Sɩd me, Biiblã yeelame t’a “dag n zoeta rabeem n ka rat n wilg a Eli vẽnegr ning yẽnda sẽn paamã ye.” La a Zeova maaname t’a Eli bãng t’a boonda a Sãmwɛlle. Rẽ n so t’a Eli yeel-a t’a gome, la a ‘ra solg-a bũmb baa a yembr ye.’ A Sãmwɛll sakame, n togs-a “bũmbã fãa.”

⁵ A Sãmwɛll sẽn yeel bũmb ningã pa ling a Eli wʋsgo, bala “Wẽnnaam dao” n da pĩnd n wa taas a Eli koɛɛg a woto buudu. (1 Sãm. 2:27-36) Kiba-kãngã wilgdame t’a Zeova yamã ka to, la t’a nanda nebã.

6. A Zeova sẽn maan to-to n sõng a Sãmwɛllã kõta tõnd yam-bʋgo?

⁶ Kom-bɩɩse, biig a Sãmwɛll kibarã wilgdame t’a Zeova mii zu-loees nins y sẽn maood ne wã, la rẽ sẽn namsd-y to-to wã. Tõe tɩ y yaa yãn-zoeta, tɩ yaa toog ne-y tɩ y taas kãsembã koɛɛgã, wall y wilg vẽeneg tɩ y yaa toor ne y taabã. Y tõe n basa y yam t’a Zeova rat n sõng-y lame. Pʋʋs-y-yã-a, n togs-a bũmb ning fãa sẽn be y sũurẽ wã. (Yɩɩn. 62:9) Bʋgs-y a Sãmwɛll kibarã zugu, la Biiblã kibay a taab sẽn gomd kom-bɩɩs yelle. Sõs-y ne y tẽed-n-taas sẽn yaa kom-bɩɩs wa yãmb wall yʋʋm sẽn vẽsge. Tõe tɩ b maoo ne yãmb zu-loeesã buudu. B tõe n togsa yãmb a Zeova sẽn sõng-b to-to yɛl kẽer pʋgẽ. Tõe tɩ sõngrã yɩɩ wa b sẽn da pa tẽed menga.

7, 8. Wãn to la a Zeova wilg t’a nanda a Moyiizi?

⁷ A Moyiiz sẽn wa n tar yʋʋm 80, a Zeova kõ-a-la tʋʋmd sẽn da pa nana. A yeel-a lame t’a kẽng Ezipt n tɩ yiis Israyɛll nin-buiidã yembdo. (Yik. 3:10) Yaa na maan yʋʋm 40 la a Moyiiz yaa pe-kɩɩma, Madiyã tẽngẽ wã. Dẽnd Wẽnnaam sẽn dat t’a maanã tog n yɛɛs-a-la wʋsgo. A yeela Wẽnnaam yaa: “Maam la ãnda n na n kẽng Faarõ nengẽ  n tɩ yiis Israyɛll nebã Ezɩpt soolem pʋgẽ?” La Wẽnnaam yeel-a lame yaa: “Mam na n zĩnda ne foom.” (Yik. 3:11, 12) A paasame tɩ Israyɛll kãsem-dãmbã ‘na n kelga a koɛɛgã.’ Baa ne rẽ, a Moyiiz yeela Wẽnnaam yaa: “B ka na n kelg maam ye.” (Yik. 3:18; 4:1) Dẽnd a Moyiiz kɩɩsa Wẽnnaam sẽn yeelã! La a Zeova kell n maana sũ-mar ne-a. A maana sẽn yɩɩd rẽ menga. A kõ-a-la tõog t’a maan yel-soalma. Biiblã pʋgẽ, a Moyiiz n yɩ pipi ninsaal sẽn paam tõog a woto.—Yik. 4:2-9, 21.

⁸ Baa ne rẽ fãa, a Moyiiz ra ket n baooda pademse. A yeelame tɩ yẽ pa mi goam ye. La Wẽnnaam yeel-a lame yaa: “Mam na n zĩnda ne fo noorã, la m zãms foom bũmb ning fo sẽn segd n togsã.” Kɩtame t’a Moyiiz ya n bas a yam masã bɩ? Ayo! A pʋd n kosa Wẽnnaam t’a tʋm ned a to. Puuga a Zeova sũuri, la a kell n yɩɩ wʋmda. A yãka a Aarõ t’a na n gomd a Moyiiz yʋʋr yĩnga.—Yik. 4:10-16.

9. A Zeova sẽn maan sũ-mar ne a Moyiiz la a wilg t’a nand-a lame wã, wãn to la sõng-a t’a ges Israyɛll nebã yell sõma?

⁹ Bõe la kiba-kãngã sõngd tõnd tɩ d bãng a Zeova zugu? A sẽn yaa pãng sẽn ka to soabã, a ra tõe n bugsa a Moyiizi, n kẽes-a rabeem, t’a sak yẽ raabã tao-tao. La a maana sũ-mare, n bʋk a meng ne nin-kãngã sẽn da yaa sik-m-meng soabã, n sõng-a t’a bas a yam t’a na n zĩnda ne-a. A sẽn maan woto wã yãka neng bɩ? N-ye! Bala, a Moyiiz yɩɩ Israyɛll nebã taoor lʋɩta, n ges nin-buiidã yell ne sũ-mar la naneb wa a Zeova sẽn maan to-to ne yẽ wã.—Sõd. 12:3.

10. D sã n dɩk a Zeova togs-n-taar n maand sũ-mar ne nebã la d nand-ba, yõodã yaa bõe?

¹⁰ Yam-bʋg la d tõe n dɩk kiba-kãngã pʋgẽ? Yãmb sã n yaa pʋg-sɩda, roagda, wall y yaa kãsem-soab tiging pʋgẽ, neb n be tɩ yãmb get b yelle. Segdame tɩ y rɩk a Zeova togs-n-taare, n maand sũ-mar ne neb nins yell y sẽn getã, la y wilgdẽ tɩ y nand-b lame. (Kol. 3:19-21; 1 Pɩy. 5:1-3)  Y sã n modgd n dɩkd a Zeova ne a Zeezi Kirist sẽn yaa Moyiiz-kãsengã togs-n-taar woto, y na n yɩɩ ned pẽnegr sẽn yaa nana, tɩ y taabã tõe n paam yolsg yãmb nengẽ. (Mat. 11:28, 29) Rẽ me, y na n yɩɩ mak-sõngo, tɩ b tõe n dɩk y togs-n-taare.—Ebre. 13:7.

11, 12. Israyɛll nebã sẽn na n yi Eziptã, wãn to la a Zeova maan tɩ rabeem ka yõk-ba?

¹¹ Israyɛll nebã sẽn wa n yit Ezipt yʋʋmd 1513 sẽn deng a Zeezi rogmã, rẽ tɩ b sõorã tog n da yɩɩda milyõ a tãabo. Kamb ra be b sʋka, neb sẽn kʋʋle, la baa bãad-rãmb la koms-rãmba. Ra yaa tɩlɛ tɩ sẽn na n yiis-a nin-buiid a woto Ezipt soolmẽ wã yɩ wʋmda, la sũ-mar soaba. Sɩd me, a Zeova yɩɩ wʋmda, n maan sũ-mar ne-ba. A tũnuga ne a Moyiiz n ges b yell sõma. Kɩtame tɩ baa Israyɛll nebã sẽn da zɩ n zĩnd zĩig a to tɩ pa Eziptã, b yi n basa tẽngã, tɩ rabeem ka yõk-b ye.—Yɩɩn. 78:52, 53.

¹² A Zeova maana wãn tɩ rabeem ka yõk-ba? Ad bũmb a ye a sẽn maane: A kɩtame tɩ b tong taab “wa tãb-biis sẽn dabd zabre,” tɩ baa fʋɩ ra pa yaar ye. (Yik. 13:18, Sebr Sõngo) A Zeova sẽn sigl yɛlã fãa sõma woto wã, yaa vẽeneg tɩ sõnga nin-buiidã tɩ b bas b yam tɩ b Wẽnnaamã geta bũmb fãa yelle. Sẽn na yɩl tɩ b ra wa yĩm t’a bee ne-ba, n wilgd-b sor la a kogend-ba, a ra yãagd-b-la wĩndg “ne sawaodgo,” tɩ yʋng bɩ a yãagd-b ne “bugum vẽenem.” (Yɩɩn. 78:14) Sɩd me, pa kaoos la bũmb maane, tɩ ra yaa tɩlɛ tɩ b bas b yam zãng t’a bee ne-ba.

13, 14. a) Bõe la a Zeova maan mog-miuugẽ wã, tɩ wilg t’a ra geta Israyɛll nebã yell neere? b) Bõe la a Zeova maan tɩ wilg t’a pãng yɩɩda Ezipt sodaasã?

¹³ Karm-y Yikr 14:19-22. Mams-y y yamẽ tɩ yãmb naaga Israyɛll nebã n kẽnda. Y wa n mikame tɩ Ezipt sodaasã be y poorẽ n watẽ, tɩ mog-miuugã yaool n be yãmb taoore. Sẽn kẽedẽ kae ye. La Wẽnnaam maana bũmbu. A kɩtame tɩ sawadgã leb poorẽ, n tɩ be nin-buiidã ne Ezipt sodaasã sʋka. Lebga libsg ne-ba, tɩ yãmb nengẽ yaool n yaa vẽenem. A Moyiiz zẽka a nug n tees mogrã, tɩ seb-kãseng yi yaang n fug n kell n pasg mogrã a yiibu, tɩ lebg so-kẽenga. Yãmb ne y zakã rãmba, la y rũmsã fãa tũu nin-buiidã n dɩk sorã, n tong taab n kẽnd tɩ zũnd-zãnd kae ye. Bũmb a to me n ling yãmba! Tẽngã y sẽn tabdã pa bɛgd tɩ yaa sals ye. Yaa tẽn-koɛɛnga, tɩ kẽnã yaa nana. Woto sõngame tɩ baa sẽn maas-bã fãa tõog n pɩʋʋg n ta rʋʋnd a to wã.

¹⁴ Karm-y Yikr 14:23, 26-30. Baa ne a Farawõ sẽn yã yel-solemdã, a zẽk-m-mengã la a yalemdã yĩnga, a kell n kenga a sũur n na n pʋgl-yã. Wakat kãng la a Moyiiz le tẽeg a nugã mogrã zugu, tɩ koomã sẽn da yas wa lalsã le leb a zĩigẽ. A Farawõ ne a tãb-biisã baa a ye pa põs ye.—Yik. 15:8-10.

15. Kiba-kãngã wilgda tõnd bõe a Zeova zugu?

¹⁵ Kiba-kãngã wilgda tõnd t’a Zeova pa Wẽnnaam sẽn yaa zũnd-zãnd soab ye. (1 Kor. 14:33) Woto kɩtame tɩ d yam gãee bãane. A Zeova geta a nin-buiidã yell neer wa pe-kɩɩm sẽn nong a piisi, n maand bũmb toor-toor n sõngd-ba. A geta b yell ne nonglem tɩ b yam gãe bãane, la a kogend-b ne b bɛɛbã. Sẽn mik tɩ dũni-kãngã saabã tara kolgrã, woto kengda tõnd raood wʋsgo.—Yel. 1:33.

16. D sã n bʋgs a Zeova sẽn fãag Israyɛll nebã to-to wã, wãn to la nafd tõndo?

¹⁶ Rũndã-rũndã me, a Zeova ket n geta a nin-buiidã yelle. A sõngd-b-la  sẽn na yɩl tɩ bãmb ne yẽ zoodã ra wa sãame, la a kogend-b ne b bɛɛbã. Baa to-kãsengã sẽn wat ka la bilfã sasa me, a na n kell n maana woto. (Vẽn. 7:9, 10) Dẽnd to-kãsengã sasa, Wẽnnaam nin-buiidã fãa, kom-bɩɩsã la kãsembã, sẽn tar-b keelem la sẽn yaa-b koms-rãmbã fãa pa na n maan rabeem bɩ n yirb ye. * B pʋd n na n talla raoodo! B na n tẽega bũmb a Zeezi sẽn yeele. A ra yeelame yaa: “Bɩ y roog la y nak n gese, bala, yãmb fãagrã kolgame.” (Luk 21:28) Baa a Goog sẽn yaa tẽns wʋsg sẽn lagem taaba, tɩ b pãng yɩɩd a Farawõ wã sã n wa na n zab ne Wẽnnaam nin-buiidã, b na n kell n kɩsa sɩd t’a Zeova na n kogl-b lame. (Eze. 38:2, 14-16) Bõe yĩnga? Bala, b miime t’a Zeova pa toeemd ye. Wakat kãng me, a na n le yɩɩ a nin-buiidã fãagda, tɩ wilg t’a nong-b lame la a get b yell neere.—Eza. 26:3, 20.

17. a) Bõe la d tõe n maane, tɩ Biiblã kibay nins sẽn wilgd a Zeova sẽn ges a nin-buiidã yell to-to pĩnd wẽndẽ wã naf tõndo? b) Bõe yell la d na n gom sõsg ning sẽn pʋgdã pʋgẽ?

¹⁷ Sõs-kãngã pʋgẽ, d yãa kibay a wãn bal sẽn wilgd a Zeova sẽn get a nin-buiidã yell ne sũ-mar la naneb to-to wã, n wilgd-b sor la a fãagd-bã. Y sã n wa bʋgsd kiba-kãensã zugu, bɩ y tags neere, n gẽes bõn-paal y sẽn da pa mi a Zeova zugu, baa wõnd yaa yel-bõonese. Y sã n bãngd a Zeova sẽn yaa Wẽnnaam ning buudã n paasdẽ, y na n maneg n nong-a lame, n kɩs-a sɩd n yɩɩd pĩndã. Sõsg ning sẽn pʋgdã pʋgẽ, d na n bao n bãnga d sẽn tõe n dɩk a Zeova togs-n-taar to-to, n wilgdẽ tɩ d nanda d zakã neba, d tigingã neba, la d sẽn taasd b rãmb koɛɛgã.