1, 2. a) Bõe n tar yõod n yɩɩd yãmb vɩɩmã pʋgẽ? b) Bõe la d bãng tɩ noogd d sũur wʋsgo, la bõe yĩnga? (Ges-y fot-rãmbã sẽn be yĩngrã.)

BÕE n tar yõod n tɩ yɩɩd yãmb vɩɩmã pʋgẽ? Y na n sak n tek-a-la ne bũmb yõod sẽn pa ta rẽ bɩ? Sogs-kãensã leokr pa toog ne neb nins sẽn dɩk b mens n kõ a Zeova wã ye. Yaa tõnd ne a Zeova zoodã n tar yõod n yɩɩd d vɩɩmã pʋgẽ. D pa na n tol n sak n tek rẽ ne baa fʋɩ ye. D nonga Biiblã goamã me wʋsgo, bala yaa rẽ n sõngd tõnd tɩ d tõe n paam d saasẽ Ba wã zoodo.—Kol. 1:9, 10.

² Tags-y n ges-y a Zeova sẽn yaa d karen-saam-kãsengã sẽn zãmsd tõnd bũmb nins ne Biiblã maasmã! A sõnga tõnd tɩ d bãng a yʋʋrã, la d bãngd a võorã n paasdẽ, la a zʋgdã sẽn yaa sõma zãngã. A sõnga tõnd tɩ d bãng t’a nong-d-la wʋsgo, hal n kɩt t’a Bi-ribl a Zeezi wa ki tɩ yɩ maoong tõnd yĩnga. A song-d-lame me tɩ d bãng t’a lugla Rĩungu, n yãk a Zeezi sẽn yaa Mesi wã t’a yaa Rĩma. A leb n sõng-d lame tɩ d bãng tɩ d beoog na n yɩɩ neere. Kiris-neb kẽer na n tɩ vɩɩmda saasẽ wakat sẽn kõn sa, tɩ b sẽn boond-b rãmb tɩ ‘piis a taabã’ me vɩɩmd wakat  sẽn kõn sa tẽngã sẽn na n lebg arzãna zugu. (Zã 10:16) A wilgd-d-la d sẽn tog n vɩɩmd to-to me. D sũur yaa noog ne bõn-kãensã d sẽn bãngã, bala sõngdame tɩ zood ning d sẽn tar ne d Naandã paasdẽ, la kɩtdẽ tɩ d vɩɩmã tar barka.

3. Bõe n wilgd t’a Zeova pa rat tɩ d yao t’a sõng-d tɩ d bãng sɩdã?

³ A Zeova yaa Wẽnnaam sẽn yaa kõata, n nong n maand nebã neere. A sã n ne ned sẽn baood sɩdã, a sõngd-a lame t’a bãnge. A sakame meng n kõ a bi-nongrã tɩ yɩ maoong tõnd yĩnga. A pa na n tol n yeel-d tɩ d yao t’a sõng-d tɩ d bãng sɩdã ye. Sɩd me, rao a ye yʋʋr sẽn boond t’a Sɩmo n da rat n kõ a Pɩyɛɛr ligd sẽn na yɩl t’a kõ-a tõog t’a sã n tik ned bɩ a soab tõe n paam vʋʋsem sõngã, la a Pɩyɛɛr zab-a lame n yeel yaa: “Bɩ f ligdã naag foom n sãam, fo sẽn tẽed tɩ ligd tõe n daa Wẽnnaam kũunã yĩnga.”—Tʋʋ. 8:18-20.

4. Bõe yell la d na n gom sõs-kãnga pʋgẽ?

⁴ Karm-y Yel-bũn 23:23. Ned sã n dat n zãms Biiblã n bãng sɩdã, bũmb kẽer la a segd n maane. Yaa tɩlɛ t’a sak n mong a menga. Ned sã n “bao sɩdã” me n wa bãnge, wa yel-bũn sebrã sẽn yeelã, a segd n gũusame n da wa “bas-a” ye. Bɩ d ges d sẽn tog n maan to-to n bao sɩdã n paame, la bũmb kẽer d sẽn segd n sak n mong d menga. Woto na n sõngame tɩ d maneg n nong bũmb nins d sẽn bãng Biiblã pʋgẽ wã, la d rat n mao ne d sũur fãa n da wa “bas” sɩdã ye. Na n kɩtame tɩ d kɩs sɩd tɩ bũmb kae t’a yõodã ta “sɩdã” a Zeova sẽn sõng tõnd tɩ d bãngã ye.

5, 6. a) Yɩl n bao sɩdã n paamã pa ligd yelle, la bõe n yaa tɩlɛ? Rɩk-y makre. b) Wãn to la Wẽnnaam Gomdã sẽn yaa sɩdã nafd tõndo?

⁵ Baa b sã n yeel tɩ d pa yaood n paam bũmbu, pa rat n yeel tɩ d tõe n paamame n pa nams ye. Ebre wã gom-bil ning b sẽn lebg Yel-bũn 23:23 tɩ “bao” wã rat n yeelame me tɩ “mao n paame.” Gom-biis a yiibã fãa wilgdame tɩ d sã n dat bũmb d sẽn mi tɩ tara yõod wʋsgo, yaa tɩlɛ tɩ d maan modgre, wall d sak n bõn bũmb n yaool n paame. D rɩk makr ne b sẽn na n moon n yeel tɩ zĩig n be tɩ b kõt banand zaalem. Rẽ yĩnga, d na n zĩime bal tɩ banandã wa rɩg d taoor bɩ? Ayo! Yaa tɩlɛ tɩ d zẽk d karg n kẽng zĩig ning b sẽn kõt banandã. Yaa sɩd tɩ b kõta zaalem, la baooda weer la modgre. Woto me, baa yɩl n “bao sɩdã” n paamã pa ligd yelle, yaa tɩlɛ tɩ d maan modgr n yaool n paame.

⁶ Karm-y Ezayi 55:1-3. Vɛrse-kãensã pʋgẽ, a Zeova sõngda tõnd tɩ d bãng d sẽn tog n maan to-to n “bao sɩdã” n paame. A maka a goamã ne koom la bĩisim ne reezẽ rãam. Sɩd me, ned sã n paam n bãng Wẽnnaam goamã sẽn yaa sɩdã, kõt-a-la pãng la raoodo, wa ko-yũud sẽn na n tar ned t’a paam ko-maasg n yũ. Bĩisim me kõta ned pãnga, la sõngd kambã tɩ b bɩtẽ. Woto me, Wẽnnaam goamã kɩtdame tɩ tõnd ne Wẽnnaam zoodã pãng paasdẽ. La bõe yĩng tɩ Wẽnnaam mak a goamã ne reezẽ rãam? Biiblã yetame tɩ rãam noogda sũuri. (Yɩɩn. 104:15) Dẽnd a Zeova sẽn yeel tɩ d ‘wa ra reezẽ rãamã,’ yaa sẽn na n wilg tɩ d sã n sak n tũ yẽ noyã la a saglsã, d paamda sũ-noogo. (Yɩɩn. 19:9) Hakɩɩka, woto wilgdame tɩ Wẽnnaam Gomdã zãmsg la a tũub sɩd nafda tõnd wʋsgo! Bɩ d ges bũmb a nu d sẽn tog n maane, n tõog n bao sɩdã n paame.

7, 8. a) Bõe n wilgd tɩ sɩdã baoob yaa sẽk yelle? b) Bõe la pag a ye sak n maan sẽn na yɩl n bãng sɩdã, la baasa wãna?

⁷ Sẽka. Yaa tɩlɛ ne ned ning fãa sẽn dat n bao sɩdã t’a yã sẽk n kelg Rĩungã koe-noogã,  n karemd Biiblã la sɛb sẽn wɛgsd a goamã, n zãms Biiblã ne a Zeova Kaset soaba, n segend tigissã, la a kẽnd tigissã n pa vaandẽ ye. Sẽn na yɩl n maan woto fãa, yaa tɩlɛ tɩ d bas bũmb kẽer yõod sẽn pa tolg n waoogẽ, n tõog n paam weere. (Karm-y Efɛɛs-rãmb 5:15, 16.) La kaoosda wakat a wãn tɩ ned yaool n wa bãng Biiblã zãms-nana wã? Bee ne ned fãa yɛlã. Bũmb nins d sẽn tõe n bãng a Zeova zugã pa tar saab ye. Makre, a yamã, a manesmã ne a noyã, la bũmb nins fãa a sẽn maanã. (Rom. 11:33) Pipi Gũusg Gasgã sẽn yi yʋʋmd 1879 wã pʋgẽ, b yeelame tɩ sɩdã yaa wa “fɩlɛɛr sẽn solg mood sʋka,” la b paas tɩ “f sã n paam fɩlɛɛr a ye, f pa segd n bas gẽesgã ye. A ye sã n da sekame, Wẽnnaam ra pa na n kɩtẽ tɩ yaa wʋsg ye. Ket n gẽesdẽ, n wa paam a taab n paase.” Bɩ ned fãa soka a meng yaa: ‘Fɩlɛɛr-dãmbã m sẽn paam n tigsã lebga wʋsg bɩ?’ Baa d sã n wa vɩ wakat sẽn kõn sa, d na n ket n bãngda bũmb wʋsg a Zeova zugu. La nananda, segdame tɩ d maood wakat fãa n yãt weer sẽn na yɩl n bao n bãng bũmb wʋsg a Zeova zug wa d sẽn tõe tɛka. Bɩ d gom ned a ye sẽn maan woto yelle.

⁸ A Mariko * yaa pag sẽn yi Zapõ n kẽng Niuyork tẽngã pʋgẽ n na n tɩ karme. A ra naaga tũudum a ye sẽn sɩng Zapõ soolmẽ wã yʋʋmd 1959 wã. Saam-bi-poak a ye sẽn yaa so-pakd n wa n moond zak-zaka, n seg a Mariko, t’a sak n na n sɩng Biiblã zãmsgo. A sẽn da zãmsd bũmb nins Biiblã pʋgẽ wã ra noom-a-la wʋsgo, hal t’a kos tɩ b na n wat n zãmsd-a naoor a yiib semen fãa. A lekollã ra kɩtame t’a sẽkã pa waooge, t’a ra tar tʋmd me n paase. Baasgo, a kell n sɩnga tigissã kẽnde. Sẽn na yɩl n yã sẽk n bao n bãng a Zeova n paase, a booga bũmb nins a sẽn da nong n naagd neb a taab tɩ b maand n kokd pemsmã. A sẽn mao n maan bõn-kãensa fãa wã sõngame t’a tẽebã bɩ tao-tao. Pa ta yʋʋmd la a reeg lisg ye. Kiis a yoob poore, a lebga wakat fãa so-pakda. Yɩɩ yʋʋmd 2006 pʋgẽ. Hal ne rũndã, a Mariko ket n yaa so-pakda.

9, 10. a) Ned sã n bãng sɩdã, wãn to la toeemd a tagsg sẽn da yaa a soab ligdã la teedã wɛɛngẽ wã? b) Bõe la pag a ye sak n base, la a tagsg yaa wãn ne rẽ?

⁹ Ligdã la teedã. Sẽn na yɩl n paam n bãng sɩdã, tõe n yɩɩ tɩlɛ tɩ d sak n bas tʋʋmd sẽn da yaood sõma, wall d sẽn da nong wʋsgo. A Zeezi sẽn na n bool a Pɩyɛɛr ne a Ãndere tɩ b lebg a karen-biisã, rẽ tɩ b ra yaa zĩm-yõgdba, la b sak n “basa zĩm-gãmba wã” n tũ a Zeezi. (Mat. 4:18-20) La yaa vẽeneg tɩ pa rat n yeel tɩ ned sã n bãng sɩdã, a tog n basa a tʋʋmd ye. Yaa tɩlɛ t’a tʋm n ges a meng la a zak rãmb yelle. (1 Tɩm. 5:8) La naoor wʋsgo, ned sã n bãng sɩdã, a tagsg sẽn da yaa a soab ligdã la teedã wɛɛngẽ wã toeemdame. A bãngda bũmb nins sẽn tar yõod n yɩɩd vɩɩmã pʋgẽ wã. Ad saglg a Zeezi sẽn da kõ: ‘Da bĩng-y paoong yãmb yĩng dũniyã zug ka ye.’ A pʋd n paasame tɩ d bĩng d paoongã saasẽ. (Mat. 6:19, 20) Yaa woto la pag yʋʋr sẽn boond t’a Mariya maan-yã.

¹⁰ A Mariya ra nong n tãooda golf t’a nan pa kẽ lekoll meng ye. A sẽn wa n karemd kolɛɛsã, a ra ket n tãoodame, t’a minimã tar paasgo. B wa n kõ-a-la burs t’a na n tɩ karem inivɛrsite a yembrẽ. A ra rata ne a sũur fãa tɩ golfã tãoob lebg a tʋʋmde, t’a paam n wʋk ligdi. Yaa wakat kãng la a Mariya sɩng Biiblã zãmsgo. A ra nonga bũmb nins a sẽn bãngd Biiblã zãmsg pʋgẽ wã wʋsgo, hal n sɩng tũubu,  t’a sũur noom ne rẽ sẽn toeemd a vɩɩmã. Ad a sẽn yeele: “M sã n da tõog n tũ noor bɩ saglg sẽn be Biiblã pʋgẽ fãa, m sũ-noogã paasdame.” A wa n bãngame tɩ na n yɩɩ toog t’a kell n wɩng ne golfã tãoobo, la a ket n tar zood sõma ne a Zeova. (Mat. 6:24) A sakame n na n bas golfã a sẽn da nong ne a sũur fãa, la sẽn da na n kɩt t’a paam ligd la yʋʋrã. Rũndã-rũndã, a Mariya yaa so-pakda. A yetame meng tɩ woto wã la a tar “sũ-noog n yɩɩda, la tɩ vɩɩm kae n tar bark n le yɩɩd wã ye.”

11. Ned sã n bãng sɩdã, tõe n waa ne bõe?

¹¹ Zood la rogem. D sã n bãng sɩdã n yãk yam n na n tũ d sẽn bãng Biiblã pʋgẽ wã, zems-n-taar ning d sẽn da tar ne d zo-rãmba, d roagdb la d mitinsã tõeeme n pa le yɩ wa pĩndã ye. Bõe yĩnga? Bũmb la a Zeezi pʋʋs n kos a poorẽ dãmbã yĩnga, tɩ wilgd a võore. A kosa a Zeova yaa: “Soog-y bãmb zãng ne-y sɩdã. Yaa yãmb goamã la sɩdã.” (Zã 17:17) ‘Soog-y bãmb zãngã’ tõe n dat n yeelame me tɩ ‘welg-y bãmb toore.’ D sã n bãng sɩdã, d lebgda toor ne dũniyã nebã, bala, d pa le maand wa bãmb ye. Nebã getame tɩ d yaa toore, bala sẽn tar yõod n yɩɩd ne tõndã pa yembr ne pĩndã ye. Lebga Biiblã sẽn yetã la d tũuda. Baa ne sẽn pa welgr la d ratã, d zo-rãmb la d roagdb ne d mitins tõeeme n pa le tolg n nong d zĩigẽ, wall b pʋd n namsd tõndo, d sẽn toeem tũudmã yĩnga. Woto pa lingd tõnd ye. A Zeezi ra yeelame tɩ “ned yir dãmb meng n na n yɩ a bɛɛba.” (Mat. 10:36) La a yeelame me tɩ d bas d yam tɩ baa d sẽn sak n bõn a soab fãa n na n tũ sɩd tũudmã, d keoorã na n yɩɩga d sẽn bõnã naoor ka tɛka.—Karm-y Mark 10:28-30.

12. Bõe la rao a ye sẽn da yaa zʋɩf sak-yã, a sẽn dat n tũ sɩdã yĩnga?

¹² A Aarõ yɩɩ rao sẽn da yaa zʋɩfe. Hal a yãadmẽ, b ra wilg-a lame tɩ pa segd t’a pʋd Wẽnnaam yʋʋrã ye. La a ra nonga Wẽnnaam n dat n bãng sɩdã a zugu. Daar a ye, a Zeova Kaset soab n wilg-a t’a sã n bao gʋls-bi-wãgds n naag Wẽnnaam yʋʋrã sẽn gʋls ne ebre wã sor-wãgds a naasã, tõe n boolame tɩ “Zeova.” A sũurã yɩɩ noog wʋsgo, hal t’a kẽng b sɩnagoogẽ wã n tɩ togs karen-saam-dãmbã. B manesmã pa yɩ wa a Aarõ sẽn da tẽedã ye. B pa maan sũ-noog ye. B pʋd n tʋbs-a-la kolkood la b rig-a. A zakã rãmb me sũur pa yɩ noog ne-a ye. La a pa bas tɩ woto fãa koms a raood t’a pa nang pãng n bao sɩdã ye. A lebga a Zeova Kaset soaba, n tũ a Zeova a yõor tɛka. Segdame tɩ ned fãa segl a menga, n miẽ t’a sã n sak sɩdã, a zems-n-taarã ne neb kẽer pa na n le yɩ wa pĩndã ye.

13, 14. Bõe la d segd n sak n toeeme, d sã n sak sɩdã? Togs-y kibare.

¹³ Tagsa la yel-manesem sẽn pa sõma. D sã n wa bãng sɩdã n dat n tũ Biiblã sẽn yetã, yaa tɩlɛ tɩ d sak n toeem d tagsa wã la d yel-manesmã. Tʋm-tʋmd a Pɩyɛɛr ra yeelame: “Bɩ y yɩ kom-sakdse, la y ra sak wẽng ratem nins yãmb sẽn dag n sak wakat sẽn looge, y sẽn dag n be y zɩɩlem pʋgã ye.” A paasame: “Bɩ yãmb me welg toor n yɩ pʋ-peelem dãmb y yel-manesemã buud fãa pʋgẽ.” (1 Pɩy. 1:14, 15) Korẽnt tẽngã neb wʋsg ra tara yel-manesem sẽn pa lebd be. Ra yaa tɩlɛ ne sẽn dat-a n ta a Zeova yam t’a mao n toeem fasɩ. (1 Kor. 6:9-11) Rũndã-rũndã me, neb wʋsg mao n toeema b yel-manesmã fasɩ sẽn na yɩl n sak sɩdã. A Pɩyɛɛr yeela bũmb sẽn bilgd rẽ sõma. Ad a sẽn yeelã: “Wakat sẽn looge, yãmb dag n maanda wa neb nins  sẽn ka pʋʋsd Wẽnnaamã sẽn maandã. Yaa n sekame. Yãmb dag n kẽnda raglem pʋga, ratem wẽnse la yũ rãam n tuumdẽ wã pʋga, la rã-tɩgrã ne yão-beedã pʋga, la wẽn-naandsã pʋʋsg sẽn yaa bõn-wẽng wʋsgã pʋga.”—1 Pɩy. 4:3.

¹⁴ A Devin ne a pag a Yasmin yɩɩ rã-yũud-kãas na maan yʋʋm wʋsgo. Baa ne a Devin sẽn da yaa kõntaabl sẽn mi a tʋʋmd sõma wã, rã-tɩgrã ra kɩtame t’a pa tõe n paam tʋʋmd tɩ kaoos ye. Nebã ra mi a Yasmin, a sũ-yikrã la a nen-kɛglmã yĩnga. Daar a ye, a sega pag ne a sɩd sẽn yaa misioneer-dãmba. Rẽ t’a ra suume. B rɩka sɛk n na n kẽng a zakẽ wã n tɩ zãms-a Biiblã. La b sẽn kẽng semen ning sẽn pʋglã, b mikame t’a Yasmin ne a Devin fãa ra suume. B ra pa tagsd tɩ b yell paka misioneer-dãmbã tɩ sek b na sɩd wa ye. Misioneer-dãmbã sẽn lebg n wa daar a to wã, b mikame tɩ b ra pa su ye. B sak n sɩnga Biiblã zãmsg hal n da nong b sẽn zãmsdã ne b sũur fãa. Tao-tao bal tɩ b sɩnga tũubu. Kiis a tãab pʋgẽ bala, b yãka yam n bas rãamã yũubu. B wa n tɩ gʋlsa b kãadmã tɩ zems ne laloa wã. B tẽngã neb wʋsg sẽn yã b sẽn toeem to-to wã, bãmb me tʋlgame n na n zãms Biiblã.

15. Ned sã n bãng sɩdã, bõe n tõe n yɩ toog wʋsg ne-a, la bõe yĩnga?

¹⁵ Rog-n-mik la minimd sẽn pa tat Wẽnnaam yam. Neb kẽer sã n bãng sɩdã, yɩl n sak n bas rog-n-mik la minimd sẽn pa tat Wẽnnaam yamã pa toog ne-b ye. La sãnda nengẽ yẽ tõe n yɩɩ toog wʋsgo. B zoeta b zakã rãmb manesem sẽn na n yɩ to-to ne-bã, wall b tʋmd-n-taasã, pa rẽ bɩ b zo-rãmbã. B miime tɩ naoor wʋsgo, nebã pa reemd ne rog-n-migs kẽere, wala makre, yaab-rãmbã bɩ kɩɩmsã waoogrã. (Tõo. 14:1) Woto wã, bõe n tõe n sõng-d tɩ d tõog n zãag d meng ne rog-n-mik la minimd sẽn pa tat Wẽnnaam yam? D tõe n dɩka yam Efɛɛz kiris-nebã nengẽ.

16. Bõe la Efɛɛz neb sak n maane, b sẽn wa n bãng sɩdã?

¹⁶ Efɛɛz tẽngã yʋʋr ra yiime, a nebã sẽn da nong tɩtã la zĩn-dãmb yɛlã yĩnga. Sẽn wa n bãng-b sɩdã maana wãn n bas rẽ fãa? Ad Biiblã sẽn yete: “Neb wʋsg sẽn da be bãmb sʋkã n yaa bag-bʋgdbã talla b sɛbã n wa yõog bugum nebã fãa taoore. La b geela sɛbã ligd n mik tɩ taa wanzuri ligd tus pis-nu. Woto kɩtame tɩ Zu-soabã koɛɛg saag ne pãnga, la tõogre.” (Tʋʋ. 19:19, 20) B sak n yõoga b sɛbã ligd sẽn da yaa toogã, la a Zeova ning-b-la bark rẽ yĩnga.

17. a) Wilg-y bũmb kẽer d sẽn maan sẽn na yɩl n sak sɩdã. b) Sogs-bʋs la d na n leok sõsg ning sẽn pʋgdã pʋgẽ?

¹⁷ Bõe la yãmb yẽ sak n maan sẽn na yɩl n bao sɩdã n paame? D fãa sak n kẽesa d sẽka. Kẽer sak n basa tʋʋmd bɩ bũmb a to sẽn da kẽesd-b ligd wʋsgo. Sãnda me nengẽ, yaa b zo-rãmb wall b roagdb n pa le nong b zĩigẽ woto. Yɩɩ tɩlɛ me ne neb wʋsg tɩ b toeem b tagsa la b yel-manesem, la b bas rog-n-migs ne minimd sẽn pa tat Wẽnnaam yam. Sẽn yaa a soab fãa la d maan sẽn na yɩl n sak sɩdã, d pa bʋʋd ye. Bala, d kɩsa sɩd tɩ d sẽn bãng Biiblã pʋgẽ wã yõod yɩɩda bũmb fãa hal zĩig sẽn zãre. Biiblã sõnga tõnd tɩ d paam zood ne a Zeova. Rẽ n yaa bũmb ning sẽn tar yõod n yɩɩd d vɩɩmã pʋgẽ wã. D sã n get bark toor-toorã d sẽn paamd d sẽn sak sɩdã tɛkã, d tõe n tagsdame tɩ ned kõn saag n bas sɩdã ye. La yɩta wãn tɩ ned wa bas sɩdã? Bõe la d tõe n maan tɩ yel-beed a woto ra paam-do? D na n leoka sogs-kãensã sõsg ning sẽn pʋgdã pʋgẽ.