A ZEEZI yeela daar a ye tɩ “kũun bee barka n yɩɩd reegre.” (Tʋʋ. 20:35, Wẽnnaam Sebre, 1983) Tõnd ne a Zeova zoodã pʋgẽ me, yaa woto. Bõe yĩng tɩ d yet woto? A Zeova maana bũmb wʋsg n kõ tõndo, hal tɩ d sũur yaa noogo. La tõnd sã n yãkd d sẽn tarã me n kõt a Zeova, d sũ-noogã na n maneg n paasdame. Bõe la d tõe n kõ a Zeova? Ad Yel-bũn 3:9 sẽn yete: “Waoog Sẽn-Ka-Saab ne f paoongo.” Tõnd paoongã tõe n yɩɩ d sẽkã, d bãngr bɩ d minim, d pãngã, wall ligd bɩ teedo. D sã n kẽesd rẽ fãa a Zeova tʋʋmdã pʋgẽ, n na n sõng tɩ tũudum hakɩɩkã kẽng taoore, yaa wa d sẽn kõt a Zeova kũuni. Rẽ na n kɩtame tɩ d paamd sũ-noog wʋsgo.

Ligdã la teedã kũunã wɛɛngẽ, bõe n na n sõng-d tɩ d tẽegd n yãkdd sẽn tarã n kõt a Zeova? Tʋm-tʋmd a Poll ra sagla Korẽnt kiris-nebã tɩ b “ned kam fãa bĩng bũmb ning a sẽn tõe n kõ wã kɛɛnga.” (1 Kor. 16:2) Bõe la y tõe n maan n bãng ned sẽn tõe n maan to-to yãmb tẽngẽ wã n kõ yamleoog kũuni? Ges-y zĩ-gũbrã sẽn be tẽngrã.

Pa tẽnsã fãa pʋgẽ la ned tõe n kõ kũun ne ẽntɛrnetã maasem ye. Baasgo, y sã n kẽ tõnd sɩtã zĩig ning ned sẽn tõe n kẽ n kõ ligdã, y bãngda yãmb tẽngã neb sẽn tõe n maan to-to n kõ kũuni. Tẽns kẽere, y sã n kẽ sɩtã zĩ-kãnga, y paamda sogsg nebã sẽn wae n sokd kũunã wɛɛngẽ wã leoore.