1, 2. Ned sã n bãngd a Zeova n paasdẽ, a wat n maanda bõe? Rɩk-y makre.

MAMS-Y wa b sẽn na n kõ bi-bilf bũmbu, t’a roagdbã yeel t’a pʋʋs barka. A pʋʋsa barka, a roagdbã sẽn yeel-a wã yĩng bala. La a sã n bɩtẽ, a wat n wʋmda a roagdbã sẽn wilg-a tɩ ned sã n maan-a neere, a segd n pʋʋsa barkã võore. Rẽ masã, yẽ meng n na n pʋʋsd bark ne a sũur fãa, bala a bãngame tɩ yaa bũmb sẽn segde.

² Tõnd me sẽn wa n bãng a Zeova paalmã, d yãa Biiblã pʋgẽ tɩ segdame tɩ d tũud a noyã. La d sã n bãngd-a n paasdẽ, d wat n mi a tagsg bũmb wʋsg zugu, a sẽn kis la a sẽn nonge, la a manesem sẽn yaa to-to yɛl toɛy-toɛy pʋgẽ. Woto masã, d yam-yãkr la d sẽn maand fãa pʋgẽ, d sã n bao n bãng a Zeova tagsgo, n tũ rẽ, wilgdame tɩ d tagsa wã lebga yẽ rẽndã.

3. Bõe yĩng tɩ yɩl n tõog tɩ d tagsa wã yɩ a Zeova rẽndã pa nana wakat fãa?

³ D sẽn modgd tɩ d tagsa wã lebgd a Zeova rẽndã noom-d lame, la pa wakat fãa la yaa nana, bala d pa zems zãng ye. Wala makre, d mii a Zeova tagsg sẽn yaa a soab ne yoobã,  arzɛgsã nonglmã, koe-noogã moonegã, zɩɩmã tall n tɩpã, la bũmb a taaba. La d tõeeme n pa wʋmd a sẽn tagsd woto wã võor sõma ye. Woto wã, bõe la d tõe n maan n wa tõog tɩ d tagsa wã zems ne a Zeova rẽndã? Wãn to la rẽ na n sõng-d tɩ d bãngd n yãkd yam bũmb fãa pʋgẽ masã menga, la baa beoog sẽn wate?

4. D sã n dat n paam yam-wek-paall wa a Poll sẽn sagend tõndã, bõe la d segd n maane?

⁴ Karm-y Rom-dãmb 12:2. Tʋm-tʋmd a Poll wilga bũmb nins d sẽn segd n maane, n tõog tɩ d tagsa wã yɩ wa a Zeova rẽndã. A yeelame tɩ d pa segd n le ‘yɩ wa dũni-kãngã nebã’ ye. Sõsg ning sẽn loogã pʋgẽ, d yãame tɩ woto rat n yeelame tɩ d tog n gũusame n da wa sak dũniyã nebã tagsa wã, bɩ n wa maand wa bãmb ye. La a Poll paasame me tɩ d segd n ‘paama yam-wek-paalle.’ Dẽnd yaa tɩlɛ tɩ d zãmsd Biiblã sõma, n mao n wʋm a goamã võore, n bʋgsd rẽ zugu, la d modg tɩ d tagsa wã zems ne Wẽnnaam tagsa wã sẽn be be wã.

5. D sã n na n zãms Biiblã, d tog n maana wãn-wãna?

⁵ Biiblã zãmsg pa d sẽn na n karemd Biiblã woto bala, wall d sẽn na n karemd sebr sẽn wɛgsd a goamã, n dẽegd sogsgã leoor ye. D sã n wa zãmsd Biiblã, d segd n tags n gesa d sẽn karemd bũmb ninsã sẽn sõngd tõnd tɩ d bãng a Zeova mengã la a manesmã zugã, la a tagsg sẽn yaa a soabã. Segdame tɩ d bao n bãng bũmb ning sẽn kɩt t’a Zeova kõ noor tɩ d maan bũmb kẽere, la a gɩdg tɩ d ra maan kẽerã. Yaa tɩlɛ me tɩ d bʋgs n ges d sẽn tõe n toeem d tagsa wã la d tʋʋm-tʋmdɩ wã to-to, n paam n tũ bũmb ning d sẽn bãngã. Pa rat n yeel tɩ Biiblã zãmsg fãa sasa, d segd n maana woto fãa tɩlɛ ye. La yɩta sõma tɩ d yãt sẽk n bʋgsd d sẽn zãmsdã zugu. Wala makre, bʋgsgã tõe n kaoosame n ta sẽk ning d sẽn yãk zãmsgã yĩngã pʋɩ-sʋka.—Yɩɩn. 119:97; 1 Tɩm. 4:15.

6. D sã n bʋgsd Wẽnnaam Gomdã zug n pa vaandẽ, rẽ yõod yaa bõe?

⁶ D sã n yãk wakat n bʋgsd Wẽnnaam Gomdã zug n pa vaandẽ, rẽ yõod yaa bõe? D wat n ‘bãnga Wẽnnaam daabo,’ n kɩs sɩd tɩ yaa yẽ tagsa wã n yaa sõma zãnga. Woto, bũmb fãa pʋgẽ, d na n wa mii a tagsg sẽn yaa a soaba, n wʋmd a sẽn tagsd woto wã võore, la d sak n deeg tɩ yẽ sẽn yetã la sõma. Rẽ, d paamda yam-wek-paalle, tɩ d tagsa wã teke. Tarẽ-n-tarẽ, d tagsa wã wat n yaa a yembr ne a Zeova tagsa wã.

7, 8. a) A Zeova tagsg yaa wãn ne ligdã la teedã? (Ges-y sõsgã sɩngrẽ fot-rãmbã.) b) Tõnd me tagsg ne ligdã la teedã sã n yaa wa a Zeova, bõe la d na n lʋɩɩsd taoor wakat fãa?

⁷ D ra tags tɩ tagsa wã paada d yamẽ wã bal ye. Tagsa wã ne tʋʋm-tʋmdɩ wã tũuda taaba. (Mark 7:21-23; Zak 2:17) Ad makr a wãn sẽn na n sõng-d tɩ d wʋm a võore. A Zeezi rogmã kibar sẽn be Biiblã pʋgẽ wã tõe n sõnga tõnd tɩ d bãng a Zeova tagsg sẽn yaa a soab ne ligdã la teedã. A Zeova yãka a Maari t’a na n dog a Zeezi, tɩ yẽ ne a Zozɛf wub-a. B yaool n da yaa naong rãmba. (Maan. 12:8; Luk 2:24) A Zeezi rogmã daare, a Maari kong n gãneg-a-la “rũms rɩɩb koglg pʋgẽ, weer sẽn ka be sik-zĩigẽ wã yĩnga.” (Luk 2:7) A Zeova ra tõe n gesame t’a Biigã sẽn na n dog zĩig ningã yɩ sõma n yɩɩd woto. La sẽn da tar yõod n yɩɩd a nifẽ, yaa a Biigã we n paam roagdb sẽn lʋɩɩsd yẽ tũudmã taoore.

⁸ Kiba-kãngã sẽn be Biiblã pʋgẽ wã wilgda tõnd a Zeova tagsg ligdã la teedã zugu. Roagdb n be n maand b sẽn tõe fãa sẽn na yɩl tɩ b kambã paam b sẽn dat fãa, baa rẽ  sã n na n kɩtame tɩ b kambã pa tõe n tall zood sõma ne a Zeova. La yaa vẽeneg tɩ sã n yaa ne a Zeova tagsgo, d sẽn na n tar zood ne yẽ la sõma n yɩɩda. Yãmb me tagsda wa a Zeova bɩ? Y tʋʋm-tʋmdɩ wã la y yel-manesmã wilgda bõe rẽ wɛɛngẽ?—Karm-y Ebre-rãmb 13:5.

9, 10. Wãn to la d tõe n wilg tɩ tõnd me tagsdame tɩ maan tɩ f to lʋɩ wã yaa yel-wẽn-kãsenga?

⁹ Makr a yiib-n-soabã yaa bũmb a Zeezi sẽn togse, tɩ wilgd tõnd a Zeova tagsg sẽn yaa a soab ne ned sẽn na n maan t’a to lʋɩ tũudmã wɛɛngẽ. A yeelame yaa: “Ned sã n maan kom-bãooneg kãens sẽn tẽed maamã ned a yembr t’a lʋɩ, sẽn yaa neer n yɩɩd a soab yĩnga, yaa b sẽn na n loe a yubl ne neer kugr n lob-a ko-kãsengã pʋgẽ.” (Mark 9:42) Gom-kãensã wilgdame tɩ maan tɩ f to lʋɩ yaa yel-wẽn-kãsenga! D miime t’a Zeezi tagsg yaa wa a Ba wã bal kɛpɩ. Dẽnd d tõe n kɩsa sɩd tɩ ned sã n pa maan gũusgu, t’a manesem ning yɩ sabaab t’a tẽed-n-taag lʋɩ, yaa yel-wẽn-kãseng a Zeova me nifẽ.—Zã 14:9.

¹⁰ Yãmb me tagsda wa a Zeova ne a Zeezi bɩ? Y manesmã la y tʋʋm-tʋmdɩ wã wilgda bõe rẽ wɛɛngẽ? Wala makre, y sã n miẽ tɩ y sẽn mi n manegd y meng to-to wã, bɩ fut kẽer y sẽn nong tõe n sãama sãnda sũur tigingã pʋgẽ, wall n kɩt tɩ kẽer tall tʋls-wẽnse, y maanda wãna? Y sẽn nong y tẽed-n-taasã, n dat b neerã yĩnga, y na n sak n basa sẽn noom yãmbã bɩ?—1 Tɩm. 2:9, 10.

11, 12. D sã n kis a Zeova sẽn kisi, la d mao n bɩɩs yõk-m-menga, wãn to la na n sõng-do?

¹¹ Makr a tãab-n-soabã yaa a Zeova tagsg sẽn yaa a soab ne sẽn yaa kɛgre. A kisa wẽng buud fãa. (Eza. 61:8) Yaa sɩd t’a Zeova miime tɩ d sẽn pa zems zãngã, yɩl n maan sẽn yaa tɩrgã pa nana wakat ning ye. La a ratame tɩ d mao n dɩk a togs-n-taare, n kisg sẽn yaa wẽnga. (Karm-y Yɩɩn-sõamyã 97:10.) D sã n bʋgsd bũmb ning sẽn kɩt t’a Zeova kis sẽn yaa wẽngã, tõnd me na n wa tagsda wa yẽ, hal n maneg n dat n kisg wẽng buud fãa.

¹² D sã n kis sẽn yaa wẽngã wa a Zeova, na n sõng-d lame tɩ d gũusd n bãngd baa tʋʋm-wẽns nins b sẽn pa sõdg Biiblã pʋgẽ n wilg vẽeneg tɩ yaa wẽngã. Wala makre, saoog kẽer n be tɩ nebã saood bɛɛl la bala. Lebga bũmb sẽn piuugdi. Kẽer tagsdame tɩ saoog a woto pa maneg n yaa wẽnga, bala pa wa ned la f kẽ ne ye. * La a Zeova tagsg yaa woto sɩda? D tẽeg t’a kisa wẽng buud fãa. Bɩ d kisg a Zeova sẽn kisi, la d mao me n bɩɩs yõk-m-menga. Woto, d tõogd n zãaga d meng ne wẽng buud fãa.—Rom. 12:9.

13. Bõe yĩng tɩ d segd n tags n ges yɛl d sẽn tõe n wa sege, n bao n bãng a Zeova tagsg yel-kãens zugu?

¹³ D sã n wa zãmsd Biiblã, d segd n bʋgs n gesa yɛl d sẽn tõe n wa sege, n bao n bãng a Zeova tagsg sẽn yaa a soab rẽ zugu. Woto, d sã n wa be yell pʋgẽ, n tog n yãk d sẽn na n maanegã zĩig pʋgẽ, na n mikame tɩ d zoe n mii d sẽn segd n maane. (Yel. 22:3) D tẽeg kibay a wãn b sẽn togs Biiblã pʋgẽ.

14. A Zozɛf sẽn pa sak n kẽ ne a Potifaar pagã wilgda tõnd bõe?

¹⁴ A Potifaar pagã ra wa n datame t’a Zozɛf kẽ ne-a, la a zãgsa zĩig pʋgẽ. A Zozɛf sẽn tall manesem ningã wilgdame t’a ra zoe n bʋgsame n bãng t’a Zeova ratame tɩ pag ne a sɩd maan sɩd ne taaba. (Karm-y Sɩngr 39:8, 9.) A yeela pagã yaa: “Mam na n yɩɩ a wãn n maan yel-be-kẽen-kãngã n beeg Wẽnnaam?” Woto wilgdame t’a ra maoome t’a tagsa wã yaa a Zeova rẽndã. La tõnd yẽ?  Wala makre, y tʋmd-n-taag sã n wa tar rolsem manesem ne-yã, y na n maana a wãna? La ned sã n tool yãmb bũmb y portaablã zugu, tɩ y mik tɩ yaa mesaaz sẽn nekd pag ne rao lageng tʋlsem, wall fot-yoodo? * D sã n deng n bao n bãng a Zeova tagsg yɛl a woto zugu, n mao tɩ lebg tõnd me tagsgo, la d pĩnd n yãk d sẽn na n maanega, na n yɩɩ nana tɩ d tõog n maan sɩd ne a Zeova.

15. Bõe n na n sõng-d tɩ d kell n maan sɩd ne a Zeova wa kom-bɩɩs a tãabã?

¹⁵ D gom a Sadrak ne a Mesak la a Abɛdnego yelle. Ra yaa kom-bɩɩs sẽn yaa ebre-rãmba. Rĩm a Nebukadnezaar ra wa n lugla sãnem bõn-naandga, n yeel tɩ nebã wõgemd n waoog-a, la a Sadrak ne a Mesak la a Abɛdnego zãgsame. B sẽn leok rĩmã to-to wã wilgdame tɩ b ra pĩnd n yãka b sẽn na n maaneg n kell n maan sɩd ne a Zeova. (Yik. 20:4, 5; Dãn. 3:4-6, 12, 16-18) D rɩk makr wa yãmb patrõ sẽn na n yeel-y tɩ y lob ligd tɩ b maan tigr y sẽn mi tɩ naaga ne ziri tũudmã yel-maandɩ. Y manesem na n yɩɩ wãna? Yaa masã meng la y segd n bao n bãng a Zeova tagsg sẽn yaa soab yell a woto zugu, nand t’a buud paam-yã. Dẽ, yell a woto pʋgẽ, y bãngd n yãka yam wa a Sadrak ne a Mesak la a Abɛdnego.

16. D sã n mi a Zeova tagsg sẽn yaa a soabã neere, wãn to la na n sõng-d tɩ d pĩnd n segl d menga, d sã n wa rat tɩbsg tao-tao?

¹⁶ D sã n deng n tags d sẽn na n maaneg n kell n maan sɩd ne a Zeova, tõe n sõng-d lame me tɩ d sã n wa rat tɩbsg tao-tao bɩ d bãng n yãke. Yaa sɩd tɩ d pa na n tol n sak tɩ b ning-d zɩɩm, wall zɩɩmã pʋgẽ bõn-kãsems a naasã baa a yembr ye. (Tʋʋ. 15:28, 29) La tɩbsg kẽer n be n tõe n tũ ne tõnd mengã zɩɩm wall zɩɩmã pʋgẽ bõn-kɩdsã, tɩ yaa tɩlɛ tɩ ned fãa reng n tags Biiblã saglsã zug n bãng a Zeova tagsgo, tɩ sõng-a t’a bãng sẽn sakd ne yẽ. Yaa vẽeneg tɩ yaa masã meng la d segd n tags neere, n yãk d sẽn na n sak tɩbsg ningã. Pa d sã n wa be logtor yirã n gãe ne toogo, tɩ nebã me pẽdgd tõndã la d na n bãng n yãk zĩig pʋgẽ ye.  Yaa masã la d segd n maan vaeesgo, n gʋls d kart depeya (DPA) wã la d tɩbsgã sɛb a taabã n wilg d sẽn dat tɩbsg ningã vẽenega, la d gom rẽ yell ne d logtorã. *

17-19. Bõe yĩng tɩ yaa masã meng la d segd n deng n bʋgs n bãng a Zeova tagsg yɛl toɛy-toɛy zugu? Rɩk-y makre.

¹⁷ D tẽeg a Zeezi sẽn leok a Pɩyɛɛr zĩig pʋgẽ to-to wã me. A Pɩyɛɛr ra yeel-a lame yaa: “Zu-soaba, Wẽnd na zãage! Yel-kãngã kõn paam yãmb abada.” Wõnda a Zeezi ra pĩnd n tagsa a Zeova sẽn tʋm-a tẽngã zugã võore, la bãngr-goam nins sẽn tog n pids yẽ zugã yelle. Sõng-a lame t’a kell n maan sɩd ne a Zeova, la a sak n ki tɩ yɩ maoong tõnd yĩnga.—Karm-y Matye 16:21-23.

¹⁸ Rũndã-rũndã, a Zeova ratame t’a nin-buiidã tall zood sõma ne-a la b tʋm tʋʋmd ning a sẽn kõ-bã ne b sũur fãa. (Mat. 6:33; 28:19, 20; Zak 4:8) Wa a Pɩyɛɛre, neb sẽn dat d neer tõe n baoome n na n koms d raood tɩ d ra kell n wɩng ne tʋʋmdã ye. Wala makre, y patrõ sã n dat n kõ-y tʋʋmd la a paas y yaoodã, tɩ yaool n na n kɩt tɩ y pa le tõe n kẽnd tigissã n pa vaandẽ, wall y pa le tõe n yit koe-moonegã woto, y maanda wãna? Bɩ y sã n yaa karen-biiga, n paam n na n kẽng lekoll a to n tɩ karem n paase, tɩ yaool n yaa tɩlɛ tɩ y bas y roagdbã n tɩ zĩnd zĩig a to? Rẽ yĩnga, yaa wakat kãng masã la y na n pʋʋs a Zeova, n maan vaeesgo, n yẽs ne y roagdbã wall kãsem-dãmbã, n yaool n yãk y sẽn na n maanegã bɩ? Sẽn são yaa y sẽn na n bao n bãng a Zeova tagsg masã menga, la y mao tɩ lebg yãmb me tagsgo. Rẽ, yell a woto taoore, y pa na n getẽ tɩ yãkrã yaa toog ye. Bala, y sẽn dat n maan a Zeova tũudmã pʋgẽ wã yaa vẽeneg y yamẽ, tɩ y rat n maan y sẽn tõe fãa n pids rẽ.

¹⁹ Y tõe n tags n gesa yel-lingdem a taab me sẽn tõe n wa kɩt tɩ kell n maan sɩd ne a Zeova wã pa yɩ nana ye. Yaa vẽeneg tɩ d pa na n tõog n segl d meng yell fãa sẽn tõe n wa yĩng ye. La wakat ning fãa d sẽn wat n zãmsd Biiblã, d sã n nong n bʋgsd a Zeova tagsa wã zugu, sẽn wa n yaa yell ning fãa n paam-do, na n yɩɩ nana tɩ d tẽeg bũmb ning d sẽn bãngã, la d tũ. Rẽ wã, d sã n wa zãmsd Biiblã bɩ d bʋgsd neere, n bãngd a Zeova tagsg bũmb toor-toor zugu, la d mao tɩ lebg tõnd me tagsgo, la d tags n ges woto sẽn tõe n sõng-d tɩ d bãng n yãk yam masã menga, la beoog sẽn wate.

20, 21. a) Bõe yĩng tɩ dũni-paalgã pʋgẽ bɩ d na n paam lohorem meng-menga? b) Bõe la d tõe n maane, n paam sũ-noog masã menga?

²⁰ Tõnd yãgdame tɩ dũni-paalgã wa tao-tao. Kiris-nebã fãa la bal saagdame tɩ b na n wa vɩɩmda arzãnã pʋgẽ, tẽngã zugu. Wẽnnaam Rĩungã sã n wa so tẽngã, nebã na n paama lohorem meng-menga. B na n paama b mens ne bũmb nins fãa sẽn namsd ãdem-biisã rũndã-rũndã wã. Yaa vẽeneg me tɩ baa wakat kãnga, ned fãa na n ket n tara sor n yãkd sẽn noom yẽ, la a sẽn dat n maanega.

²¹ La pa rat n yeel tɩ tõnd na n tara lohorem n maand d sẽn dat fãa ye. Sẽn yaa wẽng bɩ sõmbã wɛɛngẽ, a Zeova na n ket n kõta noy la a togsd tõnd a tagsgo, tɩ d tikd rẽ n yãkd d sẽn na n maanegã. Na n kɩtame tɩ d paam sũ-noog meng-menga, tɩ laafɩ la bãan be zĩig fãa. (Yɩɩn. 37:11) La nananda, d sã n mao tɩ d tagsa wã yaa a Zeova rẽndã, d zoe n tõe n paama sũ-noogo.