Yʋng ning b sẽn na n yõk a Zeezi wã, a sagla a tʋm-tʋmdbã tɩ b ra bao yʋʋr b tẽed-n-taasã sʋk ye. A yeel-b lame yaa: “Soolem dĩm-dãmbã soo nebã ne pãnga, la sẽn tar-b noor ne nebã kɩtdame tɩ b boond bãmb tɩ tʋʋm-neer maandba. La a ka a woto ne yãmb ye.”—Luk 22:25, 26.

Tʋʋm-neer maandb nins yell a Zeezi sẽn da gomdã yaa ãnd dãmba? Sɛba, la gʋlsem sẽn be lals la ligd-koeems bɩ bũmb a taab zut wilgdame tɩ Rom nebã la gɛrk-rãmbã ra wae n boonda nin-kãsems la nanambs tɩ evɛrzɛt rat n yeel tɩ tʋʋm-neer maandba, n na n waoog-ba. B ra waoogda nin-kãensã woto, b sẽn da maan bũmb kẽer n sõng nin-buiidã yĩnga.

Nanambs wʋsg la b ra boond tɩ tʋʋm-neer maandba. Wala makre, Ezipt naab a Toleme a tãab-n-soabã la a Toleme a nii-n-soabã, Rom naab a Zill Sezaar ne a Ogust, n paas Zide naab a Erood Legarã. A Erood nengẽ wã, tog n yaa komã sẽn wa n kẽ tẽngã t’a kɩt tɩ b wa ne kood n kõ nebã, la a ges tɩ nimbãan-dãmb paam futã yĩng la b sẽn da boond-a woto wã.

A Adolf Deissmann sẽn yaa Biibl-mit sẽn yit Alemayn wã yeelame tɩ b ra wae n boonda neb wʋsg tɩ “tʋʋm-neer maandba.” A paasame: “Ned sã n na n gẽes gom-kãensã b sẽn gʋls lals bɩ bũmb a taab zugu, a tõe n yãa a buudã sẽn yɩɩd naoor koabga, tɩ pa rɩk a sẽkã meng ye.”

Woto wã, a Zeezi sẽn yeel a karen-biisã tɩ pa segd n yɩ woto ne bãmbã, a rat n yeelame tɩ bõe? Yaa sẽn dat n yeel tɩ nin-buiidã neer pa segd n pak-b bɩ? Ayo! Wõnda a Zeezi ra ratame tɩ b tags bũmb ning sẽn segd n kɩt tɩ ned maan a to neerã.

A Zeezi rãmb wakatẽ wã, rakã-rãmbã sẽn da rat yʋ-noogã yĩnga, b ra kõta ligd n teend reem buud toor-toore, la b met park-rãmb la wẽnd-doto, la b maand bũmb a taaba. La b sẽn da maand woto fãa wã yaa sẽn na yɩl tɩ nebã pẽg-ba, bɩ sẽn na yɩl tɩ b yʋʋrã yi, wall b sẽn dat tɩ b vot-bã. Sebr a ye pʋgẽ, b yeelame tɩ “baa b kẽer sẽn da mi n kõt ne pʋ-peelmã, naoor wʋsgo, b kõta sẽn na yɩl n bao naam.” Yaa sẽn mik tɩ yaa naamã baoob la b mengã nafr yĩng la b ra maand woto wã, la a Zeezi sẽn sagl kiris-nebã tɩ b gũus n da wa maan wa bãmbã.

Yʋʋm a wãn poore, tʋm-tʋmd a Poll yeela bũmb sẽn wilgd tɩ d sã n na n kõ bũmbu, segd n sɩd yɩɩ ne yam-sõngo. A yeela Korẽnt kiris-nebã yaa: “Bɩ ned kam fãa kõ wa sẽn zems a sẽn yãk yam a sũur pʋgẽ, la ra yɩ ne nen-gãneng wall modgr ye. Bala, Wẽnnaam nonga ned ning sẽn kõt ne sũ-noogo.”—2 Kor. 9:7.