1. Bõe la ninsaal buud fãa rata?

NED yãmb sẽn mi sõma la y nand wʋsg sã n yĩm y yʋʋrã, wall a pʋd n yã yãmb n pa bãng-yã, na yɩ-y noog sɩda? Ayo! Tõe n sãama y sũur wʋsg menga. Bõe yĩnga? Bala, ninsaal buud fãa ratame t’a taabã nand-a. La pa rẽ bal ye. D ratame me tɩ b bãng d sẽn yaa ned ning buudã, la b bãng bũmb kẽer d sẽn tõog n maane, n pẽg-do.—Sõd. 11:16; Zoob 31:6.

2, 3. Bõe yĩng tɩ d tõe n wa rat pẽgr tɩ looge? (Ges-y fotã sẽn be yĩngrã.)

² La d sẽn pa zems zãngã, d sã n pa gũusi, d tõe n wa rata pẽgrã tɩ loog nugu. A Sʋɩtãan ne a dũniyã tõe n wa kɩtame tɩ d baood yʋʋr la ziir wʋsgo, hal n pa le tẽegdẽ tɩ yaa d Ba a Zeova sẽn be saasẽ wã n tog ne ziir la waoogr ye.—Vẽn. 4:11.

³ A Zeezi wakatẽ wã, tũudmã taoor dãmb kẽer ra baooda pẽgr tɩ looge. A Zeezi keooga a karen-biisã, n yeel yaa: “Gũus-y y mens ne gʋlsdbã sẽn nong n gõod ne fu-wogdo,  n nongẽ tɩ nebã pʋʋsd bãmb raasẽ, la b baood n zĩnd waoogr goeels zut karen-dotẽ, la rɩɩb zĩisẽ wã.” A paasame yaa: “Bãmb na n paama sɩbgr sẽn yaa toog n yɩɩda.” (Luk 20:46, 47) Pʋg-kõor n yaool n ning ligd bilf wẽnd-doogã koglgẽ, tɩ wõnd ned pa bãng menga, la a Zeezi pẽgame. (Luk 21:1-4) Woto wilgdame tɩ pẽgrã wɛɛngẽ, a Zeezi tagsg ra yaa toor fasɩ ne neb a taabã. Sõs-kãngã na n sõng-d lame tɩ d kell n tall tagsg sẽn zems pẽgrã wɛɛngẽ, rat n yeel tɩ tagsg ning a Zeova sẽn dat tɩ d tallã.

4. Pẽgr bʋg buud la tõnd segd n bao, la bõe yĩnga?

⁴ Pẽgr bʋg buud la d segd n bao? Pa pẽgr ning neb wʋsg sẽn baood ne karen-bɛdã maasem, arzɛgsã bɩ ɛspoorã la reem a taabã maasmã ye. Bũmb la a Poll yeel-yã, tɩ wilgd pẽgr ning d sẽn tog n bao wã. A yeelame: ‘Moasã, yãmb sẽn bãng Wẽnnaamã, la sẽn yɩɩd fãa Wẽnnaam sẽn bãng yãmbã, yɩta a wãn tɩ yãmb leb n kẽed dũni bõn-kãensã sẽn ka pãnga la sẽn ka yõodã, n na n leb n lebg b yembse?’ (Gal. 4:9) Wẽnnaam sẽn yaa yĩngr la tẽng Naabã sã n mi neda, sɩd yaa a soab zu-zẽkre. Wẽnnaam nonga tõndo, n dat tɩ d yɩ a zo-rãmba. A pʋd n naana ninsaal t’a tõe n bao n ta a Naandã yam, n paam a zoodo.—Koɛ. 12:13, 14.

5. D maanda wãn n paam t’a Zeova bãng-do?

⁵ A Moyiiz yɩɩ Wẽnnaam zoa. Daar a ye, a yeela a Zeova yaa: “Mam kotame tɩ y kɩt tɩ mam bãng yãmb soayã.” Ad a Zeova sẽn leok-a: “Mam na n maana wa fo sẽn kosã kɛpɩ. Bala, fo paama bark mam nifẽ, la mam mii foom ne f yʋʋre.” (Yik. 33:12-17) Tõnd me sã n paam t’a Zeova mi tõnd a woto, d na n paama bark ka tɛka. La d maanda wãn n paam t’a Zeova bãng-do? Yaa tɩlɛ tɩ d nong-a, la d rɩk d meng n kõ-a, n na n maan a raabã.—Karm-y 1 Korẽnt-rãmb 8:3.

6, 7. Bõe n tõe n wa kɩt tɩ ned pa kell n yɩ a Zeova zoa?

⁶ D sã n paam tɩ d Ba sẽn be saasẽ wã bãng-do, d segd n kell n maoome n yɩ a zoa wakat fãa. Wa a Poll sẽn yeel Galat kiris-nebã, tõnd me pa segd n leb n bao yʋʋr la ziir dũniyã pʋgẽ, wall d bao dũniyã bũmb a taabã “sẽn ka pãnga la sẽn ka yõodã,” n wa lebg b yembs yɛs ye. (Gal. 4:9) Galat kiris-nebã ra zoe n bãnga Wẽnnaam, tɩ Wẽnnaam me mi-ba. La a Poll yeelame tɩ b ra ‘leb n kẽeda’ dũniyã bũmb nins sẽn ka yõodã. Yaa wa a sẽn sok-b tɩ: “Yãmb sẽn paam n bãng Wẽnnaamã, bõe yĩng tɩ y leb n targ n na n yɩ bõn-zaal sẽn ka yõod yembs yɛsa?”

⁷ A buud tõe n paama tõnd bɩ? N-ye, tõeeme. Tõnd sẽn wa n bãng a Zeova wã, tõe tɩ wa a Polle, tõnd me basa bũmb sẽn da kɩt tɩ d tar ziir dũniyã nebã nifẽ. (Karm-y Filip-rãmb 3:7, 8.) Tõe tɩ yaa karen-bɛda, tʋʋmd sẽn yaood sõma, pa rẽ bɩ bũmb a to sẽn da tõe n kɩt tɩ d paam arzɛka. Tõeeme me tɩ yaa ɛspoor ninga, wall yɩɩl bɩ reem a to pʋgẽ la d ra tõe n paam tɩ d yʋʋrã yi, la d basa rẽ fãa. (Ebre. 11:24-27) La d sã n lebg n maand d bãngẽ d sẽn bas bõn-kãensa wã, n tagsdẽ tɩ ra na n kɩtame tɩ d vɩɩmã yɩ sõma n yɩɩda, pa zems ye! Tõe n kɩtame tɩ d le lebg n baood  dũniyã bũmb nins d sẽn da get tɩ “ka pãnga” la “ka yõodã.” *

8. Bõe n na n kɩt tɩ d maneg n dat ne d sũur fãa t’a Zeova pẽg-do?

⁸ Bõe n na n kɩt tɩ d maneg n dat ne d sũur fãa t’a Zeova pẽg-do, la d ra bao dũniyã neb pẽgrã? Bũmb a yiib la d segd n tẽegd wakat fãa. Pipi, a Zeova kõn tol n yĩm ned sẽn tũud-a ne a sũur fãa ye. (Karm-y Ebre-rãmb 6:10; 11:6.) A Zeova nonga sẽn tũud-b yẽ wã ned kam fãa wʋsgo. A getame meng t’a sã n yĩm ned sẽn tũud yẽ yelle, yaa kɛgre. A Zeova ‘mii neb nins sẽn yaa yẽ rẽndã.’ (2 Tɩm. 2:19) A “mii nin-tɩrsã sore,” la a mi a sẽn na n maan to-to n fãag-ba.—Yɩɩn. 1:6; 2 Pɩy. 2:9.

9. Togs-y bũmb a Zeova sẽn maan n wilg t’a mii a nebã n bake, la t’a sũur nooma ne-ba.

⁹ Wakat ninga, a Zeova maanda bũmb ned sẽn da pa tẽede, n wilg t’a mii yẽ nebã n bake, la t’a sũur nooma ne-ba. (2 Kib. 20:20, 29) Wala makre, tẽeg-y-yã a sẽn maan bũmb ning n fãag a nebã mog-miuugẽ wã, wakat ning a Farawõ ne a tãb-bi-kʋʋngã sẽn da yik n pʋgl-ba, n dat n zab ne-bã. (Yik. 14:21-30; Yɩɩn. 106:9-11) Yɩɩ yel-solemd tɛkẽ! Baa yʋʋm 40 poore, tẽn-yagsã neb ra ket n tar n gomdame. (Zoz. 2:9-11) D sã n tẽegd a Zeova sẽn fãag a nebã pĩnd wẽndẽ to-to, tɩ wilgd a pãngã la a nonglem ne-bã, kengda d raood sõma, bala, ka la bilfu, a Goog sẽn yit Magoogã na n yika zabr ne tõndo. (Eze. 38:8-12) Wakat kãnga, d sũur na n yɩɩ noog wʋsg d sẽn bao pẽgr Wẽnnaam nengẽ, n pa bao ninsaalbã pẽgrã.

10. Bũmb a yiib-n-soab d sẽn tog n tẽegã yaa bõe?

¹⁰ Bũmb a yiib-n-soab d sẽn tog n tẽege, yaa t’a Zeova tõe n maana bũmb d sẽn da pa tẽede, n keo-do, a sẽn mi tõndã yĩnga. Ned sã n maand sẽn yaa neere, a sẽn dat tɩ nebã pẽg-a yĩng bala, a Zeova pa na n keo-a ye. Bõe yĩnga? Bala, a Zeezi yeelame tɩ nebã sẽn pẽg-a wã, a zoe n paama a keoore. (Karm-y Matye 6:1-5.) La a Zeezi yeelame tɩ ned sã n soos n maan a to neer tɩ nebã pa bãnge, a Ba wã na n yãame, n keo-a. Wẽnnaam nee tʋʋm-sõma a woto buudã ned kam fãa sẽn maandã, n na n keo-a. La wakat ninga, a Zeova sã n na n keo neda, yɩɩgda a sẽn da tẽedã. Bɩ d ges makr a wãna.

11. Bõe la a Zeova maan n wilg a Maari t’a mi-a lame?

¹¹ A Zeova sẽn wa n dat t’a Zeezi wa tẽngã zugã, a kɩtame tɩ pa-kul na n dɩk pʋg n dog-a. A yʋʋr la a Maari. A ra bee Nazarɛt sẽn yaa tẽn-bila, n zãr ne Zerizalɛm la a wẽnd-doogã sẽn da be rasãnd wʋsgã. (Karm-y Luk 1:26-33.) Bõe yĩng tɩ yaa a Maari la a Zeova yãk-yã? Malɛk a Gabriyɛll sẽn wa a Maari nengẽ wã, a yeel-a lame t’a “paama bark Wẽnnaam nifẽ.” A Maari sẽn yeel a Elizabɛt bũmb ning rasem a wãn poorã sɩd wilgdame t’a ra yaa a Zeova zoa meng-menga. (Luk 1:46-55) A Zeova ra neeme t’a Maari tũud-a-la ne a sũur fãa, t’a yãk-a t’a na n yɩ a Zeezi ma. Yaa bark a sẽn da pa tẽede.

12, 13. A Zeezi rogmẽ wã, wãn to la a Zeova maan tɩ b bãng-a? A Maari sẽn tall-a n kẽng wẽnd-doogẽ wã a rog tɩ rasem 40, bõe la a Zeova maan-yã?

 ¹² A Maari sẽn wa n dog a Zeezi wã, a Zeova pa maan tɩ Zerizalɛm bɩ Betlehɛm nin-kãsems wall nanambs bãng ye. Yaa pe-kɩɩmb sẽn da be Betlehɛm weoogẽ wã n gũud b rũms la a kɩt tɩ malɛgs tɩ togs biigã rogem. (Luk 2:8-14) Rẽ poore, pe-kɩɩmbã tɩ gesa bi-pɛɛlgã. (Luk 2:15-17) A Maari ne a Zozɛf sẽn yã tɩ yaa pe-kɩɩmb la a Zeova togs biigã rogmã ling-b lame, la tog n yɩ-b-la noogo. A Zeova manesmã sɩd yaa toor fasɩ ne a Sʋɩtãana. A Sʋɩtãan sẽn kɩt tɩ ãds bagbã wa na n ges a Zeezi ne a roagdbã, a maaname tɩ Zerizalɛm nebã fãa bãng t’a Zeezi rogame, hal tɩ tẽngã rãmbe. (Mat. 2:3) Wa n baasa ne kamb ka tɛk kʋʋbo.—Mat. 2:16.

¹³ A Zeezi rog tɩ rasem pis-naase, a Maari ne a Zozɛf tall-a lame n na n kẽng Zerizalɛm wẽnd-doogẽ wã, n tɩ maan maoong n kõ a Zeova wa tõogã sẽn da wilgã. Betlehɛm ne Zerizalɛm taa kilo a 9. (Luk 2:22-24) Tõe tɩ sorã zugu, a Maari ra sokda a meng n get maan-kʋʋdã sã n na n goma tʋʋmd ning a Zeezi sẽn na n wa tʋmã yelle, n waoog-a? Baraarã, b waooga a Zeezi, la tõe tɩ b sẽn waoog-a to-to wã yɩɩ bũmb a Maari sẽn da pa tagse. A Zeova kɩtame t’a Sɩmeyõ sẽn yaa “nin-tɩrga,” la a ‘sakd Wẽnnaamã,’ ne pʋg-kõor a Ann sẽn da yaa no-rɛɛs-poaka, n tar yʋʋm 84 gom biigã yelle, n wilg t’a na n wa lebga Mesi wã, rat n yeel tɩ Kiristã.—Luk 2:25-38.

14. Wãn to la a Zeova keo a Maari?

¹⁴ La a Maari sẽn wa n wubd a Zeezi wã, a Zeova wilgame t’a sũur nooma ne-a bɩ? N-ye! A kɩtame tɩ b gʋls a Maari goam kẽere, la bũmb kẽer me a sẽn maane, tɩ be Biiblã pʋgẽ. Wõnda a Zeezi sẽn gilg n moon koɛɛgã yʋʋm a tãab la pʋɩ-sʋkã, a Maari pa tõog n tũ-a n gilg ye. Tõe t’a ra tog n paa Nazarɛte, a sẽn da lebg pʋg-kõorã yĩnga. Dẽnd bũmb wʋsg a Zeezi sẽn maan la a pa paam n yã. La a Zeezi kũumã sasa t’a ra bee ne-a. (Zã 19:26) Yɩɩ Pãntekotã daar la karen-biisã sẽn da tigim Zerizalɛmmã paam vʋʋsem sõngã zaeebo. La ket tɩ rasem a wãna, a Maari ra bee Zerizalɛm ne-ba. (Tʋʋ. 1:13, 14) Dẽnd wõnda yẽ me paama vʋʋsem sõngã zaeebo. Sã n yaa rẽ, rat n yeelame t’a na n paam n naaga a Zeezi n dɩ naam saasẽ wakat sẽn kõn sa. Ad sɩd yaa keoor tɛkẽ!

15. A Zeezi sẽn wa n be tẽngã zugã, wãn to la a Zeova wilg t’a sũur nooma ne-a?

¹⁵ A Zeezi pa bao nanambsã la tũudmã taoor dãmb pẽgr ye. La yaa hal naoor a tãab la a Zeova zĩnd saasẽ n gome, n wilg a Biigã t’a nong-a lame. Woto tog n sɩd kenga a raood wʋsgo! A sẽn deeg lisg Zʋrdẽ kʋɩlgẽ wã poor bala, a Zeova gomame, n yeele: “Ada yaa mam Bi-ribl-nongr sẽn ta mam yam zãnga.” (Mat. 3:17) Wõnda yaa yẽ ne a Zãmbatiis bal n wʋm gom-kãensa. Na maan yʋʋmd sẽn deng a kũumã, a tʋm-tʋmdb a tãab n da be ne-a, n wa wʋm a Zeova sẽn yeel yaa: “Ada yaa mam Bi-ribl-nongr sẽn ta mam yam zãnga. Kelg-y-yã-a.” (Mat. 17:5) A kũumã ket tɩ rasem a wãna, a Zeova le zĩnda saasẽ n gom ne-a.—Zã 12:28.

16, 17. Bõe la a Zeova maan n keo a Zeezi, tɩ yaa bũmb sẽn yɩɩd a Zeezi sẽn da tẽedã?

 ¹⁶ A Zeezi ra miime tɩ b na n dõd-a lame t’a yaa wẽn-tʋʋsa, la b kʋ-a wa bi-bɛɛg n ning-a yãnde. Baa ne rẽ, a pʋʋsa Wẽnnaam n yeel-a yaa: “Bɩ a ra yɩ mam sẽn dat ye, a yɩ wa yãmb sẽn datã.” (Mat. 26:39, 42) A sẽn da pa baood ninsaalbã pẽgre, tɩ yaa a Ba wã na pẽg-a n da pak-a wã, a sakame n ki ra-luk zugu, n “pa zoe yãnd” ye. (Ebre. 12:2) Bõe la a Zeova maan n wilg t’a sũur nooma ne a Biigã?

¹⁷ A Zeezi sẽn wa n be tẽngã zugã, a pʋʋsame n kos a Ba wã t’a waoog-a ne ziir ning a sẽn dag n tar saasẽ nand t’a wa tẽngã zugã. (Zã 17:5) Biiblã zĩig baa a ye, b pa wilg t’a Zeezi ra tʋlla ziir sẽn yɩɩd rẽ ye. A sakame n wa maan a Ba wã raabã, la a ra pa tagsd t’a na n paama keoor sẽn na n kɩt t’a ziir yɩɩg pĩndã ye. Bõe la a Zeova maan n keo-a? A maana bũmb sẽn yɩɩg a Zeezi sẽn da tẽedã. A Zeova vʋʋg-a lame t’a leb saasẽ, n kɩt t’a paam “waoogr sẽn yaa kãsenga.” A kɩtame me t’a pa le tõe n ki a bada! * Malɛk bɩ ninsaal baa a ye ra zɩ n paam a buud ye. (Fili. 2:9; 1 Tɩm. 6:16) Ad sɩd yɩɩ keoor tɛkẽ!

18. Bõe n na n sõng-d tɩ d bao t’a Zeova pẽg-do, la d ra bao dũniyã neb pẽgrã?

¹⁸ Bõe n na n sõng-do, tɩ d ra bao dũniyã neb pẽgrã? D tẽegdẽ tɩ wakat fãa a Zeova pẽgda neb nins sẽn tũud-a ne b sũur fãa wã la a keood-ba, la tɩ naoor wʋsgo, yaa keoor b sẽn da pa tẽede. D pa tõe n bãng bark ka tɛkã d sẽn na n wa paamã zãng fasɩ ye. La nananda, d maooda ne dũni-kãngã zu-loees buud toor-toorã. Rẽ n so tɩ d segd n tẽegd wakat fãa tɩ dũni-kãngã loogdame, la tɩ yʋʋr bɩ ziir buud fãa d sẽn tõe n paam dũniyã pʋgẽ wã na n wa saame. (1 Zã 2:17) A Zeova sẽn yaa d Ba sẽn nong-dã ‘ka ka-tɩrlem soaba, n na n yĩm d tʋʋm sõamyã, wall nonglem ning d sẽn wilg a yʋʋrã yĩngã’ ye. (Ebre. 6:10) Hakɩɩka, a na n wa keoo tõndo, n wilg t’a pẽgd-d lame! Tõe meng tɩ yɩ keoor d sẽn da zɩ n tagse.