1. Bõe la a Ezayi ra pĩnd n togs a Zeezi zugu, la bõe yĩng tɩ kengd raoodo?

NO-RƐƐS a Ezayi ra pĩnd n goma a Zeezi Kirist yelle, hal t’a sẽn yeelã kengd pɛlg wʋsgo. A ra yeelame t’a Zeezi “ka na n kao bʋʋdã wa sẽn zems yẽnda ninã sẽn ne wã,” la t’a “ka na n welg yɛlã wa sẽn zems yẽnda tʋb sẽn wʋm ye.” A paasame t’a “na n kaoo ka-pãens rãmbã bʋʋd ne zemsgo.” (Eza. 11:3, 4) Bõe yĩng tɩ woto kengd raoodo? Bala, rũndã-rũndã, dũniyã pida ne sãbs-taaba, tɩ nebã nong n tikd ninã sẽn ne wã n kaood b taabã bʋʋdo. Yaa ne d sũur fãa la d gũud a Zeezi sẽn yaa bʋ-kaood sẽn zems zãngã. A pa na n tol n tik ninã sẽn ne wã, n kao d bʋʋd ye.

2. Bõe la a Zeezi yeel-yã, la bõe yell la d na n gom sõs-kãnga pʋgẽ?

² Tõnd ned kam fãa tara a sẽn tagsd a taabã zugu. La pa wakat fãa la d sẽn tagsdã yaa sɩd ye. Bala, d pa zems zãng wa a Zeezi ye. Naoor wʋsgo, d tagsg sẽn yaa a soab d taabã zugã tika ninã sẽn ne wã, rat n yeel tɩ rẽ la d tikd n kaood b bʋʋdo. A Zeezi yaool n yeelame: “Da bʋ-y bʋʋdã tɩ zems ne nin sẽn yãtã ye, bʋ-y bʋ-tɩrga.” (Zã 7:24) Dẽnd a Zeezi ratame tɩ d rɩk yẽ togs-n-taare, n da tikd ninã sẽn ne wã n  kaood d taabã bʋʋd ye. Sõs-kãnga pʋgẽ, d na n goma buudã ne tarmã la yʋʋmã yelle. Nebã nong n tikda yel-kãensã n kaood b taabã bʋʋdo. Sẽn paase, d na n bãnga d sẽn tõe n maan to-to n tũ a Zeezi sẽn yeelã.

3, 4. a) Bõe n wa n kɩt t’a Pɩyɛɛr toeem a tagsg sẽn da yaa a soab bu-zẽmsã zugã? (Ges-y sõsgã sɩngrẽ fotã.) b) Bõe la a Zeova sõng a Pɩyɛɛr t’a bãnge?

³ Mams-y n ges-y tʋm-tʋmd a Pɩyɛɛr tagsg sẽn da yaa a soaba, b sẽn wa n yeel-a t’a yik n kẽng Sezaare, a Korney sẽn da yaa bu-zẽngã zakẽ wã. (Tʋʋ. 10:17-29) A Pɩyɛɛr ra tagsda wa zʋɩf-rãmb a taabã tɩ bu-zẽmsã yaa rẽgdo. B wub-b lame tɩ b tẽed woto. La bũmb kẽer n wa n kɩt t’a Pɩyɛɛr toeem a tagsgã. Wala makre, Wẽnnaam kɩtame t’a yã bõn-makre. (Tʋʋ. 10:9-16) Bõe la a yã-yã? A yãa bũmb sẽn wõnd peen-bedr sẽn yi yĩngr n sigda, n pid ne rũms buud toor-toor zʋɩf-rãmbã sẽn da get tɩ yaa rẽgdo. A wʋma koɛɛg sẽn yeel-a t’a “yik n kʋ n dɩ.” Yɩɩ hal naoor a tãabo. Naoor a taabã fãa, a Pɩyɛɛr zãgsame. La wakat fãa, koɛɛgã ra yet-a lame tɩ “Wẽnnaam sẽn yeel tɩ bũmb ning yaa yɩlgemdã bɩ a ra bool bõn-kãng tɩ yaa rẽgd ye.” Rẽ poore, a Pɩyɛɛr ra sokda a meng bõn-makrã võore. Wakat kãng la neb yi a Korney nengẽ n nan tata. Vʋʋsem sõngã yeela a Pɩyɛɛr t’a yi n tũ-b n kẽng a Korney zakẽ wã, t’a sɩd sak n tũ-b n kẽnge.

⁴ A Pɩyɛɛr sã n da gesẽ-la a Korney sẽn yaa buud ningã bala, a ra kõn sak n kẽng a zakẽ wã ye. Zʋɩf-rãmbã ra pa sakd n kẽ bu-zẽng zakẽ ye. Bõe yĩng t’a sak n kẽnge? Baa a sẽn da tar tags-kɛg bu-zẽmsã zugã, bõn-makrã a sẽn yã wã, la vʋʋsem sõngã sẽn yeel-a bũmb ningã kɩtame t’a toeem yam. A sẽn kelg a Korney wã poore, a yeelame: “Moasã, mam sɩd bãngame tɩ Wẽnnaam ka tũusd neb ye. Ned ning fãa, sẽn yaa buud ning fãa sẽn zoet Wẽnnaam la a maand tɩrlem, yẽnda soab tata bãmb yam.” (Tʋʋ. 10:34, 35) Ad a Pɩyɛɛr sẽn bãng woto wã sɩd yɩ-a-la noogo! A sẽn bãng bũmb ningã na n sõnga kiris-nebã fãa me. Wãn to?

5. a) Bõe la a Zeova rat tɩ kiris-ned fãa bãnge? b) Baa ne d sẽn mi Biiblã sẽn yetã, bõe la d tõe n ket n maandẽ?

⁵ A Zeova tũnuga ne a Pɩyɛɛr n na n sõng kiris-nebã fãa tɩ b bãng tɩ yẽ pa bakd neb ye. Pa ned yĩn-kõbgo, a buudu, wall a buud-gomdã la a Zeova get ye. Baa d sẽn yaa ned ning fãa, d sã n zoet Wẽnnaam la d maand sẽn yaa tɩrga, d tata a yam. (Gal. 3:26-28; Vẽn. 7:9, 10) Tõe tɩ y zoe n mii rẽ. La sã n mik tɩ y zakã rãmba, wall b sẽn wub yãmb zĩig ningã neb wae n sãbsda b taabã? Baa y sã n tagsdame tɩ y pa bakd neba, tõe tɩ y ket n sãbsda neb y sũurẽ wã n pa miẽ ye. A Pɩyɛɛr meng sẽn sõng a taabã tɩ b bãng tɩ Wẽnnaam pa bakd nebã wa n le sãbsa neba. (Gal. 2:11-14) Wãn to la d tõe n tũ a Zeezi sẽn yeelã, n da le tik ninã sẽn ne wã n kaood d taabã bʋʋdo?

6. a) Bõe n tõe n sõng-d tɩ d yiis sãbs-taab d sũurẽ wã? b) Bõe la saam-biig a ye yeel-yã, la rẽ wilgda bõe?

⁶ D segd n maaga d yĩng n fees d meng ne Wẽnnaam Gomdã maasem, n ges d sã n pa sãbsd neb d sũurẽ wã. (Yɩɩn. 119:105) D tõeeme me n sok d zoa d sẽn kɩs sɩd ne, n ges a sã n tagsdame tɩ d sãbsda neba, bala wakat ninga d ka tõe n bãng d toor ye. (Gal. 2:11, 14) Tõeeme meng tɩ d minim n sãbsda d  taabã, hal n pʋd n pa le ne tɩ yaa sãbsg ye. D rɩk makr ne kãsem-soab a ye sẽn gom n pẽg rao ne a pag sẽn kẽes b meng zãng a Zeova tʋʋmdã pʋgẽ. Raoã buudã neb ra pa waooge, tɩ nebã wʋsg ra wae n sãbsd-ba. Wõnda kãsem-soabã ra pa mi tɩ yẽ mengã sãbsda bu-kãng nebã ye. A pẽga saam-biigã sõma, n bas n yeel tɩ “baa a sẽn yaa bu-kãng nedã, a manesmã la a sẽn vɩ to-to wã sõngda nebã tɩ b bãng tɩ f tõe n yaa bu-kãng neda, n yaool n pa rẽgdo, la f pa tar minim-wẽns wa buudã neb wʋsgã ye.” Yam-bʋg la d tõe n dɩke? Sẽn yaa tʋʋmd ning fãa la d tar a Zeova siglgã pʋgẽ, d segd n feesa d meng sõma, la d sak tɩ b sõng-d tɩ d bãng d sã n pa sãbsd neba. Bõe me la d tõe n maane?

7. Bõe n na n wilg tɩ d paka d sũurã yaleng n nong d taabã?

⁷ D sã n pak d sũurã yaleng n nong d taabã, na n sõngame tɩ d tõog n yiis sãbs-taab d sũurẽ wã. (2 Kor. 6:11-13) Yãmb sẽn nong n be ne neb ninsã yaa y buudã neb bala, wall neb sẽn gomd yãmb buud-gomdã bal bɩ? Sã n yaa rẽ, bao-y n yõg-y zood ne neb a taab me. Y tõe n mi n boola y tẽed-n-taag sẽn yaa bu-zẽnga, tɩ y tũ taab n moon koɛɛgã, wall y bool-a y zakẽ tɩ y naag taab n dɩ, pa rẽ bɩ y maan bũmb a to. (Tʋʋ. 16:14, 15) Tarẽ-n-tarẽ, y na n wa nonga y taabã ne y sũur fãa, hal n pa le sãbsd-b baa bilf ye. La bũmb a to me la d tõe n get n kaood d taabã bʋʋdo. Yaa tarmã. Bɩ d gom rẽ yell masã.

8. Bõe la Maan-kʋʋr 19:15 yeta, tɩ wilgdẽ tɩ d tõe n wa tika ned tarem bɩ a naong n kao a bʋʋdo?

⁸ D sã n pa gũusi, d tõe n gesa ned tarem n kao a bʋʋdo. Ad Maan-kʋʋr 19:15 sẽn yete: “Ra mong naong soab bʋʋm a naongã yĩnga, la f ra kõ nin-kãseng bʋʋm a sẽn yaa nin-kãsengã yĩng ye. Bɩ y kao ba-biig bʋʋd tɩrga.” La bõe yĩng meng tɩ d tõe n wa tik ned tarem bɩ a naong n kao a bʋʋdo?

9. Bõe la a Salomo yeel-yã, la wilgda tõnd bõe?

⁹ Wẽnnaam ra kɩtame t’a Salomo yeel yaa: “Baa naong soab yak ka nong-a ye. La arzɛk soab tara zo-rãmb wʋsgo.” (Yel. 14:20, Wẽnnaam Sebre, 1983) Bõe la yel-bũn-kãngã wilgd tõndo? Wilgda tõnd tɩ d sã n pa gũusi, d tõe n wa baooda d tẽed-n-taas nins nus sẽn zãadã zoodo, n pa baood sẽn pa tar-bã zĩigẽ ye. La d sã n get nebã tarmã n kaood b bʋʋdo, wata ne yɛla. Bõe yĩnga?

10. A Zak keooga pipi kiris-nebã yel-bʋg wɛɛngẽ?

¹⁰ D sã n get d tẽed-n-taasã sẽn tar bɩ b sẽn pa tarã n kaood b bʋʋdo, tõe n waa ne welsg tigingã pʋgẽ. A buud zĩnda pipi kiris-nebã wakatẽ, tɩ karen-biig a Zak keoog-b rẽ wɛɛngẽ. (Karm-y Zak 2:1-4.) Rũndã-rũndã me, d segd n gũusame tɩ welsg a woto ra zĩnd tigimsã pʋsẽ ye. Woto wã, bõe la d tõe n maane, n da wa get bũmb nins nebã sẽn tarã n kaood b bʋʋdo?

11. Bõe n wilgd tɩ ned zood ne a Zeova pa be ne a tarem wall a naongo?

¹¹ Tõnd tagsg sẽn yaa a soab d tẽed-n-taasã zugã segd n yɩɩ a ye ne a Zeova. Pa ned arzɛk wall a naong n kɩtd t’a Zeova nong-a ye. Tõnd ne a Zeova zoodã pa be ne bũmb nins d sẽn tar bɩ d sẽn pa tarã ye. Yaa sɩd t’a Zeezi yeelame tɩ “na n yɩɩ toog ne arzɛk soab t’a kẽ arzãn soolem pʋga,” la a pa yeel tɩ pa tõe ye. (Mat. 19:23) Vugr me,  a yeelame yaa: “Bark bee yãmb sẽn yaa naong rãmba zutu, bala, Wẽnnaam soolem yaa yãmb dẽnda.” (Luk 6:20) La woto pa rat n yeel tɩ naong rãmbã fãa na n sak n tũu a goamã, n paam Wẽnnaam barkã ye. Naong rãmb wʋsg n zãgs tɩ b kõn tũ a Zeezi ye. Dẽnd yaa vẽeneg tɩ d pa tõe n tik ned tarem n bãng a sã n tara zood sõma ne a Zeova bɩ a pa tar ye.

12. Bõe la Biiblã yet sẽn tar-bã la sẽn pa tar-bã me?

¹² A Zeova nin-buiidã sʋka, arzɛk rãmb beeme, tɩ naong rãmb me beẽ. La b fãa nonga a Zeova, n tũud-a ne b sũur fãa. Biiblã sagenda kiris-neb nins nus sẽn zãadã tɩ b ‘da rɩk b teegrã n teeg arzegs b sẽn ka tar a hakɩɩkã,’ la tɩ b “teeg Wẽnnaam.” (Karm-y 1 Tɩmote 6:17-19.) La a sagenda Wẽnnaam nin-buiidã fãa, sẽn tar-bã la sẽn pa tar-bã, tɩ b gũus n da wa nong arzɛgsã ye. (1 Tɩm. 6:9, 10) D sã n mao tɩ d tagsg sẽn yaa a soab d tẽed-n-taasã zugã yaa yembr ne a Zeova, d pa na n wa rat n tik b sẽn tar wall b sẽn pa tar n kao b bʋʋd ye. La segdame tɩ d tik ned yʋʋm n kao a bʋʋd bɩ? Bɩ d gom rẽ yell masã.

13. Biiblã yetame tɩ d manesem segd n yɩɩ wãn ne sẽn kʋʋl-bã?

¹³ Biiblã vɛrse-rãmb wʋsg n wilgd tɩ d tog n waooga sẽn kʋʋl-bã. Wala makre, Maan-kʋʋr 19:32 yetame: “Bɩ y põond n waoog zoob-peend soaba, la y waoog nin-kẽema. Bɩ f zoe Wẽnnaam.” Yel-bũn 16:31 me yetame yaa: “Zoob-peend yaa ziir maanfo, la yaa tɩrlem sor zug la b paamd-a.” A Poll ra sagla a Tɩmote me t’a ra leng nin-kẽem ne pãnga, la t’a sagl-a wa a ba. (1 Tɩm. 5:1, 2) Yaa sɩd t’a Tɩmote ra tara sor n na n wilg saam-biis nins sẽn kʋʋlã b sẽn tog n maan bũmb kẽer pʋgẽ, la a ra segd n maana rẽ ne waoogre, la ne bʋgsem.

14. Wakat bʋg la tõe n wa yɩ tɩlɛ tɩ d wilg ned sẽn yɩɩd tõnd a kongre?

¹⁴ La ned yʋʋm sẽn vẽsg sã n yãk yam n maand yel-wẽnde, wall a sagend a taabã tɩ b maan bũmb a Zeova sẽn kisi? Ned sã n maand yel-wẽn ne yamleoogo, baa a sã n kʋʋlame, a Zeova pa na n ges a yʋʋmã, n bas-a taal ye. D tẽeg bũmb ning b sẽn yeel Ezekɩyɛll 9:5, 6 pʋgẽ wã. Be, b yeelame: “Mam nifẽ, a yeela neb a taabã yaa: ‘Pʋg-y-yã-a n saag tẽngã n kʋ nebã. . . . Kʋ-y la y sãam nin-kẽembã, kom-bɩɩsã, pʋg-sadbã, pagbã, la zagsã neb fãa.’” Goam a woto buud me n be Ezayi sebrã pʋgẽ. (Eza. 65:20) Dẽnd wakat fãa, sẽn segd n pak tõnd n yɩɩdã yaa d waoog a Zeova, a soab ning b sẽn boond Biiblã pʋgẽ tɩ “nin-kẽem kulkuugã.” (Dãn. 7:9, 10, 13, 14) Rẽ na n kɩtame tɩ d tall raood n wilg ned a kongre, baa a yʋʋm sẽn yaa to-to fãa.—Gal. 6:1.

15. Kom-bɩɩsã waoogr wɛɛngẽ, yam-bʋg la d tõe n dɩk a Poll nengẽ?

¹⁵ La d tẽed-n-taas nins sẽn nan yaa kom-bɩɩsã yẽ? D segd n waoogda bãmb me bɩ? N-ye! A Poll ra yeela a Tɩmote yaa: “Da sak n maan tɩ ned paoog foom f yãadem yĩng ye. Yɩ mamsg neb nins sẽn maand sɩdã yĩnga, ne f noor goamã, ne f kẽnde, ne f nonglem, ne f tẽebo, ne f sõmblem.” (1 Tɩm. 4:12) A Poll sẽn wa n yet a Tɩmote woto wã t’a Tɩmote yʋʋmã ra tog n zemsa 30. Baa ne rẽ, a Poll ra kõ-a-la tʋʋm-kãsems kiris-nebã tiging pʋgẽ. Woto wilgda tõnd bõe? Wilgdame tɩ d pa segd n ges saam-biig yʋʋm n sãbs-a ye. D tẽeg t’a Zeezi sẽn  wa n na n ta yʋʋm 33 wã, rẽ t’a tʋma tʋʋm nins a sẽn da segd n tʋm tẽngã zugã fãa n sa.

16, 17. a) Bõe la kasem-dãmbã tikd n bãng b sã n tõe n yãka saam-biig t’a lebg kãsemb-sõngd bɩ kasem-soaba? b) Bõe yĩng tɩ kãsem-soab tagsg wall a tẽngã minimd tõe n pa zems ne Biiblã sẽn yeta?

¹⁶ Tẽns kẽere, nebã pa wae n nand kom-bɩɩsã ye. Rẽ tõe n kɩtame tɩ baa bi-bɩɩg tar minim bɩ a tigingã kãsem-dãmb pa rat n sak n yãk-a t’a lebg kãsemb-sõngda, wall kãsem-soab ye. La kãsem-soab fãa segd n tẽegame tɩ Biiblã pa yãk yʋʋm sõore, tɩ saam-biig sã n pa ta rẽ bɩ a pa tõe n yɩ kãsemb-sõngd wall kãsem-soab ye. (1 Tɩm. 3:1-10, 12, 13; Tit 1:5-9) Kãsem-soab sã n tik b tẽngã minungu, n yãk yʋʋm sõor tɩ saam-biig sã n pa ta rẽ bɩ b pa tõe n kõ-a tʋʋmd tigingã pʋgẽ, pa zems ne Biiblã sẽn yetã ye. Pa tẽngã minung wall b mensã tagsg la kãsem-dãmbã tog n tik n bãng bi-bɩɩg sã n tõe n lebga kãsemb-sõngd wall kãsem-soab ye. Yaa Biiblã sẽn yetã la b tog n tũ.—2 Tɩm. 3:16, 17.

¹⁷ Kãsem-dãmb sã n pa tũ Biiblã sẽn yet kãsemb-sõngdbã la kãsem-dãmbã yãkr wɛɛngẽ wã, tõe n kɩtame tɩ b pa kõ saam-biis sẽn tar minim tʋʋmd tigingã pʋgẽ ye. Tẽng a ye pʋgẽ, kãsemb-sõngd n da tʋmd wʋsg a tigingã pʋgẽ, hal tɩ kasem-dãmbã sak n deeg t’a tara minim sẽn sek a na lebg kãsem-soaba. Baasgo, kẽer yʋʋm sẽn vẽsg yeelame tɩ wõnda a paooda wʋsg ne a na lebg kasem-soaba. Yɩɩ woto tɩ b pa sak n na n yãk-a t’a lebg kãsem-soaba, sẽn wõnd a paoodame wã yĩng bala. Wõnda yaa woto tẽns wʋsgo. D segd n teega Biiblã sẽn yetã, la d ra teeg tõnd mengã tagsg wall d tẽngã minimd ye. Yaa d sã n maand a woto la d tũud a Zeezi sẽn yeelã, n pa tikd ninã sẽn ne wã n kaood nebã bʋʋd ye.

18, 19. Bõe n na n sõng-do, tɩ d tagsg sẽn yaa a soab d taabã zugã yɩ wa a Zeova?

¹⁸ Yaa sɩd tɩ d pa zems zãnga, la d tõe n maoome tɩ d tagsg sẽn yaa a soab d taabã zugã yɩ wa a Zeova, n pa bakd ned baa a yembr ye. (Tʋʋ. 10:34, 35) La rẽnda d maood wakat fãa, la d paamd sagls sẽn yit Wẽnnaam Gomdã pʋgẽ. Yaa d sã n tũud sagl-kãens la d na n tõog n maan wa a Zeezi sẽn yeelã, n pa tikd ninã sẽn ne wã n kaood nebã bʋʋd ye.—Zã 7:24.

¹⁹ Ka la bilfu, a Zeezi Kirist sẽn yaa d Naabã na n kaoo dũniyã nebã fãa bʋʋdo. La pa na n yɩ wa sẽn zems yẽnda ninã sẽn ne wã, bɩ a tʋbã sẽn wʋmdã ye. A na n bʋʋ bʋʋdã tɩrga. (Eza. 11:3, 4) D gũuda wakat kãng ne d sũur fãa!