M SẼN wa n be lekollã, yɛlã pa toeem wʋsg tõnd sẽn da beẽ wã ye. Tõnd lekollẽ wã, ra yaa fo sẽn sɩng kareng ne neb ninsã n na n kell n yɩ f karen-bi-taas n tãag f karengã baasgo. Tẽngã neb fãa la bal ra mii taab yʋya.

Libɛrti tẽngã kɩremsã ra yaa pʋto. Naoor wʋsgo, yaa kamaan la nebã kooda. Mam dogame n mik tɩ m baaba ra tʋmda ned a ye pʋʋgẽ. M bi-bɩɩlmã wakate, m zãmsa koobã masĩn wẽnebo, la pʋtã tʋʋm a taaba.

M rogmẽ wã tɩ m baaba yʋʋmã ra zoe n vẽsgame. A ra tara yʋʋm 56, tɩ m ma tar yʋʋm 35. La ne rẽ fãa, m baaba ra tara keelem la pãng sõma, n da nong tʋʋma. A sẽn wub a kambã fãa to-to wã kɩtame tɩ bãmb me nong tʋʋma. A pa tol n lebg rakãagr ye. La a ra geta d yelle, tɩ d ra tar ro-gãaga, futu, la rɩɩb tɩ seke. Sẽn paas me, a ra wae n naagda tõnd n maand bũmb kẽere. A maana kaalem t’a tar yʋʋm 93. M ma maana kaalem a yʋʋm 86. B baa a ye pa yɩ a Zeova Kaset soab ye. M yao bi-ribl n wa n lebg a Zeova Kaset soaba. Hal yʋʋmd 1972 la a yaa kãsem-soaba.

M ma ra tara yẽesem a tũudmã pʋgẽ. Hat fãa, a  ra tallda tõnd n kẽng baptis-rãmbã wẽnd-doogẽ. M sẽn wa n tar yʋʋm 12 la m wʋm tɩ Wẽnnaam yaa mens a tãabo. Linga maam, tɩ m sok m ma yaa: “Maana wãn t’a Zeezi yaa Biigã, la a leb n yaa Ba wã?” M tẽrame t’a leoka maam yaa: “M biig sõngo, yaa yel-solemde. D pa tõe n wʋm a võor ye.” Sɩd me, ra yaa yel-solemd ne maam. Baasgo, m sẽn wa n tar yʋʋm 14, m deega lisgu. Baraarã, b bõra maam kʋɩlgẽ naoor a tãabo: Ba wã yʋʋr yĩnga, Biigã yʋʋr yĩnga, la vʋʋsem sõngã yʋʋr yĩnga.

M sẽn wa n be kolɛɛsã, m da tara zoa sẽn yaa bõgsɛɛre. A tõogame tɩ ma-me na n kẽ bõgsã. M sɩnga bõgsã zãmsgo, hal n wa tɩ naag bõgsɛɛr-dãmb sull a ye. M da pa tõe bõgsã sõma ye. Wags-taab a wãn poor bala, m kong n basame. B wa n boola maam sodaarã, n kɩt tɩ m kẽng Alemayn. Sodaasã taoor dãmb wa n kɩtame tɩ m na n tɩ karem sodaarã lekoll-bedrẽ, b sẽn da get tɩ m tõe n wa yɩɩ sodaas taoor soabã yĩnga. B ra ratame tɩ m yɩ sodaag m vɩɩmã tõre. La mam da pa rat n pa sodaarã pʋgẽ ye. Dẽnd yʋʋm a yiibã m sẽn da segd n maanã sẽn sa wã, m basa sodaarã. Yɩɩ yʋʋmd 1956. Rẽ poore, pa kaoos la m kẽ sodaar buud a to ye.

Mam sẽn wa n nan pa bãng a Zeova wã, m da tagsdame tɩ rao sɩd-sɩd tog n yɩɩ nin-toaaga. Yaa filim-dãmbã, la m sẽn da vɩ zĩig ningã neb manesmã n da kɩt tɩ m tagsd woto. M da getame tɩ rap nins sẽn taasd nebã Wẽnnaam goamã pa rap ye. La bũmb la m wa n bãnge, tɩ toeem mam vɩɩmã. Daar a ye, m da bee m mobillã pʋgẽ n gilgd tẽngã, tɩ kom-pugli a yiib kams maam tɩ m wa. D ra mii taaba. Ra yaa m kẽem-bi-pugl kãsengã sɩd yaopa. B yiibã fãa ra yaa a Zeova Kaset rãmba. B ra kõ-m-la Gũusg Gasgã ne Réveillez-vous ! wã tɩ m sak n deege, la m da getame tɩ Gũusg Gasgã goamã võor wʋmb yaa toogo. So-kãnga wã, b yeela maam tɩ m wa b tigsg a yembre. Ra yaa Sebrã zãmsg tigsgã. Yaa neb sul-bil n da tigimd taab bãmb zakẽ wã n zãmsd Biiblã. M yeel-b lame tɩ m na n tags n gesame. B yõgemda b noy la b sok yaa: “D gũ-fu?” M leokame tɩ: “Gũ-y-ma.”

M wa n tagsdame tɩ m bãngẽ m pa yet tɩ b gũ-m ye. La m sẽn paam n yeelã, m pa tõe n pa kẽng ye. Baraar zaabrã, m kẽnga tigsgã. Kambã sẽn da mi Biiblã sõma to-to wã n ling maam n tɩ yɩɩda. Baa m sẽn da tũud m ma hat daar fãa n kẽnd wẽnd-doogẽ wã m yãadmã wakatã, m sẽn da mi Biiblã zugã paoodame. M da rata ne m sũur fãa masã n bao n bãng Biiblã sõma. M sakame tɩ b na n zãmsd-m Biiblã. Pa kaoos la m bãng tɩ Wẽnnaam yʋʋr la a Zeova ye. Yʋʋm a wãn sẽn deng rẽ, m da soka m ma n na n bãng a Zeova Kaset rãmbã sẽn yaa b rãmba, t’a yeel maam bal tɩ: “Ae, yaa nin-kẽem yʋʋr sẽn boond t’a Zeova la b tũuda.” La m da neeme tɩ m yamã sɩnga vẽnegr masã!

M wɩnga ne zãmsgã, bala, m da miime tɩ b sẽn zãmsd-mã yaa sɩda. M deega lisg yʋʋmd 1957 tʋʋlg kiuugã. Yaa kiis a wɛ bal m sẽn kẽng tigsgã poore. Mam tagsg sẽn da yaa a soab vɩɩmã zugã toeemame. M sũur yaa noog m sẽn paam tɩ Biiblã sõng-m tɩ m bãng rao sɩd-sɩd manesem sẽn yaa to-to wã. A Zeezi ra yaa rao sẽn zems zãnga. Pãng la keelem wɛɛngẽ, rao kae n tõe n mak a meng ne-a ye. La a pa kẽes a toog zabã pʋgẽ ye. Wa Biiblã  sẽn da pĩnd n togsã, b ‘nams-a lame, n leng-a, la a ka tol n yaag a noor ye.’ (Eza. 53:2, 7) M bãngame tɩ kiris-ned hakɩɩk tog n “tara nonglem nebã fãa yĩnga.”—2 Tɩm. 2:24.

Yʋʋmd 1958 wã, m sɩnga so-pakrã. La pa kaoos la yɩ tɩlɛ tɩ m bas wakat bilf ye. Bõe yĩnga? M da rat n kẽe kãadem ne a Gloria. Yaa yẽ ne a ma-biig la sẽn da bool maam tɩ m kẽng Sebrã zãmsg tigsgã. M zɩ n maan m bãngẽ m sẽn kẽ kãadem ne-a wã ye. Wakat-kãng t’a ra yaa wa sãnem. Rũndã-rũndã me, a ket n yaa wa sãnem. Sã n yaa ne maam, a Gloria yɩɩda diyama. M sũur yaa noog wʋsg m sẽn paam t’a yaa m pagã! M bas t’a togs-y bũmb a wãn yẽ mengã zugu:

“Mam da tara ma-biis 16. M ma ra tũuda a Zeova ne a sũur fãa. Mam yʋʋm 14 la a maan kaalem. Wakat-kãng la m baaba sɩng Biiblã zãmsgo. M ma sẽn maan kaalmã yĩnga, m baaba tɩ yãa lekollã dɩrɛgtɛɛrã, n kos tɩ maam ne m kẽem-bi-puglã na n kẽnd karengã n deesd taaba. Rẽ tɩ kella yʋʋmd bal tɩ m kẽem-bi-puglã sa a karengã. Tõnd d yiibã nin-yend sã n kẽng karengã daare, a to wã n paad n ges d yaopã yelle, la a segl zakã rãmb fãa yĩnga. Woto, m baaba sã n yi tʋʋm n wa zaabre, mikdame tɩ rɩɩbã segl n saame. Dɩrɛgtɛɛrã sakame tɩ maam ne m kẽemã maan woto hal tɩ yẽ karengã wa sa. Zags a yiib neb sẽn yaa a Zeova Kaset rãmb n zãms maam ne m ma-biisã Biiblã, tɩ tõnd 11 sak n lebg a Zeova Kaset rãmba. M da nonga koe-moonegã, baa ne yãn-zoeerã sẽn da namsd-m wakat fãa wã. A Sam zɩ n bas mam sõngr yel-kãngã wɛɛngẽ ye.”

Maam ne a Gloria kẽe kãadem yʋʋmd 1959 wao-fudg kiuugã. D yiibã fãa sẽn da yaa so-pakdb n tũud taab n moond koɛɛgã ra noom-d lame. Yʋʋmd 1959 sẽoog kiuugã pʋgẽ, d gʋls n kosame n na n tɩ tʋm d biru-kãsengẽ wã. D ra rata ne d sũy fãa n tɩ tʋm be. Saam-biig a Simon Kraker sẽn da tʋmd be wakat-kãngã n deeg d sebrã. A sõsa ne tõndo, n yeel-d tɩ wakat-kãngã, b ra pa sakd tɩ sẽn kẽ-b kãadem wa tʋm Betɛllẽ wã ye. D ra ket n data ne d sũy fãa n tɩ tʋm Betɛllẽ wã. La maana yʋʋm ka tɛk tɩ d raabã yaool n pidi.

Tõnd gʋlsa sebr n tool d biru-kãsengẽ wã, n kos tɩ b wilg-d zĩis koe-moondb sẽn pa waooge, tɩ d tɩ sõng-ba. Zĩig a ye bal la b wilg tõndo. B yeelame tɩ d kẽng Pãyn Blof, Arkãnsas. Wakat-kãngã tɩ yaa tigims a yiib n be beenẽ. A ye yaa nasaar-dãmb tiginga, t’a to wã yaa nin-sabls tiginga. B tʋma tõnd nin-sablsã tigingẽ wã. B ra yaa koe-moondb 14 bala.

Tõe tɩ y sok tɩ maana wãn t’a Zeova Kaset rãmb wa tar nasaar-dãmb tiging toore, la nin-sabls tiging toore. Togs sɩdã, wakat-kãng tɩ d ra pa tõe n pa maan woto ye. Tẽngã laloa wã ra wilgame tɩ nasaar-dãmb la nin-sabls pa tar sor n naag taab n maan bũmb ye. Yel-kãnga poorẽ me, nebã ra tʋmda nen-kɛglem hal tɩ loog noore. Zĩis wʋsgo, saam-biisã ra yɛɛsda nebã na n wa sãam Rĩungã roogo, b sã n yã tɩ nasaar-dãmb la nin-sabls n tigimd taab beenẽ. A buud ra zoe n maaname. Nin-sabls sã n da moond koɛɛgã nasaar-dãmb sẽn beẽ, polɩɩs-rãmbã wat n yõg-b lame, la wakat ning menga, b pãb-b-la rẽ yĩnga. Rẽ n so tɩ d ra maand wa laloa wã sẽn yeelã, sẽn na yɩl n paam n ket n moond koɛɛgã, n saagdẽ tɩ yɛlã na n wa toeemame.

Pa wakat fãa me la d ra moond koɛɛgã tɩ yell kae ye. D mi n moonda nin-sabls sẽn beẽ, n wa tɩ wẽ zak noore, n mik tɩ yaa nasaara zaka. Zĩig pʋgẽ, d tog n bãnga d sã n na n taas-b-la koe-noogã koɛɛg-koɛɛga, wall d sã n na n yeel-b lame bal tɩ b maan-d sugr tɩ d tudgame, la d looge. Wakat-kãng tɩ ra yaa woto zĩis kẽere.

Yaa sɩd tɩ d ra yaa so-pakdba, la d ra segd n tʋma sẽn na yɩl n ges d meng yelle. Naoor wʋsgo, d sã n da tʋm daar pʋgẽ, dolaar a tãab la d paamda. A Gloria ra paamame tɩ neb a wãn kos-a t’a kẽnd n pɩɩsd b rotã la a yẽesdẽ. Zĩig a ye la b ra sak tɩ mam sõngd-a sẽn na yɩl tɩ sa tao-tao. D sã n tʋm n sa, zakã rãmb kõta tõnd wĩndgã rɩɩbo, tɩ maam ne a Gloria naag taab n dɩ la d looge. Semen fãa, a Gloria ra kẽnd n repaasda zak a ye rãmb futu, tɩ mam ges b zardẽ wã yelle, n yẽes feneta wã, la m tʋm zakã tʋʋm a taaba. Zak a ye rãmb sẽn yaa nasaar-dãmb n da kos tõnd tɩ d kẽnd n yẽesd b feneta wã. A Gloria yẽesda pʋgẽ wã, tɩ mam yẽesd yɩngã. Tʋʋmdã sẽn da yaa daarã tõrã yĩnga, b kõta tõnd wĩndgã rɩɩbo. A Gloria paada pʋgẽ n dɩ, la a pa naagd zakã rãmb ye. Mam yẽ rɩta mobillã sẽn kẽesdẽ  wã. M da pa bʋʋd ye. Bala, rɩɩbã ra noomame. Yaa zak rãmb sẽn da pa tar b toorẽ yelle, la yaa nebã wʋsg sẽn da maandã la bãmb me ra maanda. M tẽrame tɩ daar a ye, tõnd yalsame n ning d mobillã esãense, tɩ mam kell n sok ɛstasiyõ wã soab a Gloria sã n tõe n kẽe n yolsa a menga. A sũurã yikame t’a gẽen maam, n bas n yeele: “Pagame.”

La d ra paamd n naagda d tẽed-n-taasã n maand bũmb kẽere, hal tɩ ra yaa sũ-noogo. Koɛɛgã mooneg me ra nooma tõnd wʋsgo! Tõnd sẽn ta Pãyn Blofã, d reng n zĩnda saam-biig ning sẽn da yaa tigingã yel-gɛtã zakẽ. Rẽ t’a pagã nan pa a Zeova Kaset soab ye. A Gloria sɩnga Biiblã zãmsg ne-a. Ma-me wa n sɩnga Biiblã zãmsg ne b bi-pugl la a sɩda. Pagã ne a bi-puglã reega lisgu, n lebg a Zeova Kaset rãmba.

Tõnd da tara zo-rãmb nasaar-dãmbã tigingẽ. B mi n boola tõnd tɩ d wa naag-b n dɩ, la yaa tɩlɛ tɩ yɩ zĩ-sobdo, sẽn na yɩl tɩ ned ra yã ye. Wakat-kãng tɩ siglg a ye (Ku Klux Klan) sẽn da teend bu-welsgã la b pirsd nebã tɩ b tʋmd nen-kɛglmã ra tara b neb tɩ b be zĩig fãa n gũusd nebã. M tẽrame tɩ daar a ye menga, m yãa rao sẽn yelg siglg kãng nebã fut buud n zĩ a rig-noorẽ. La woto fãa pa kɩt tɩ saam-biisã bas n pa le maand taab sãand bɩ n maand taab neer ye. D ra wa n dat n kẽnga tigis-kãsenga, n yaool n pa tar ligd n na n yao n kẽng ye. Saam-biig n sak n na n deeg d mobillã n da, sẽn na yɩl tɩ d paam ligd n kẽnge. Sẽn zems kiuug rẽ poore, tõnd yiime n lebg n wa mik d mobillã d zakã noore. D yaamsã ra yaa wʋsgo, bala d kẽna nao n gilg n moon koɛɛgã la d zãms neb Biiblã, tɩ zĩigã yaool n da zabdẽ. D yãa sebr b sẽn sẽgemd taoor vɩtrẽ wã. B gʋlsa sebrã zug yaa: “Ad y mobillã. Yaa maam n kõt-y. Y saam-biigã.”

Bũmb a to me la mam pa tol n tõe n yĩmi. Yʋʋmd 1962, b yeela maam tɩ m wa naag n maan Rĩungã tʋʋmd lekolle. Ra yaa Saflãnsĩngi, Niuyork soolmẽ wã. Kiuug tõr la tigims yel-gɛtba, la tigims sull yel-gɛtba, ne distrik yel-gɛtb na n paam zãmsgo. La wakat-kãng tɩ m da pa tar tʋʋmde, tɩ ligdã yell ra pa nana ye. Zĩig a ye la b ra bool maam n sõse, n dat n dɩk-m tʋʋma. Yaa telekominikasiyõ ãnterepiriiz a ye sẽn be Pãyn Blof. B sã n dɩk-ma, maam n da na n yɩ pipi nin-sablg sẽn tʋmd be. B wa n boola maam n yeel tɩ b na n dɩk-m lame. M da sokda m meng m sẽn na n maane. M da pa tar ligd n na n kẽng Niuyorkã ye. Togs sɩdã, m wa n yeta m meng tɩ m na n tɩ sɩnga tʋʋmdã, la m bas lekollã. M wa n pʋd n segenda m meng n na n gʋls Betɛllã lɛtr n wilg tɩ m pa na n tõog n wa ye. Wakat-kãng la tigingã ned maan-m neer hal tɩ m pa tõe n yĩm ye.

Tõnd tigingã saam-bi-poak a ye n wa ne yibeoog pĩnd n wa kogs d kʋɩlengã, n tees maam ãnvelope. A sɩdã pa a Zeova Kaset soab ye. M mikame tɩ ãnvelopã pida ne ligdi. Sẽn na yɩl n paam ligd n kõ maam tɩ m kẽng Niuyorkã, saam-bi-poakã ne a  kom-bi a wãn n da yikd yibeoog pĩnd-pĩnda, n kẽng lamdã pʋtẽ wã n tɩ võ moodã tɩ b yao-ba. Saam-bi-poakã yeela maam yaa: “Kẽng lekollã, n tɩ zãms bũmb wʋsg wa f sẽn tõe tɛka, n wa paam n zãms tõndo.” M soka ãnterepiriizã rãmb n na n ges m sã n tõe n basame n wa sɩng tʋʋmã semen a nu poore. B yeela maam vẽeneg bal tɩ pa tõe ye. La m da pa bʋʋd ye. M da zoe n yãka m sẽn na n maanega. M sũur nooma m sẽn zãgs tʋʋmdã!

Ad a Gloria sẽn ket n tẽre, d sẽn zĩnd Pãyn Blofã: “M da nonga beenẽ moonegã! M Biibl karen-biisã sõor ra yaa 15 n digd 20. Kɩtame tɩ d ra moond zak-zak yibeoogo, tɩ daarã sẽn kellã fãa bɩ d tɩ zãms nebã Biiblã. Daar ning menga, d tata yʋng wakat 11. Koɛɛgã mooneg ra nooma wʋsgo! M sã n da paam n na n pa be, m sũur yɩtẽ-la noogo. Togs sɩdã, m da pa rat tɩ d bas la d gilgd n kaagd tigimsã ye. La a Zeova raabã ra yaa toore.” Yaa sɩda.

Tõnd sẽn wa n yaa wakat fãa so-pakdb n be Pãyn Blofã, d ra gʋlsa sebr n wilg tɩ d rat n yɩɩ zall so-pakdba. D ra saagda ne d sũur fãa tɩ b na n sakame. Bala, distrik yel-gɛtã ra ratame tɩ d lebg zall so-pakdba, n tɩ sõng Tɛgzas tiging a ye. Tõnd me ra rata rẽ. D talla gũubu, n da gẽegd leoorã ne d sũur fãa. La wakat fãa, d mikdame tɩ lɛtr nan pa wa ye. Daar a ye, d paama lɛtre, la b wilga lɛtrã pʋgẽ tɩ b ratame tɩ d gilgd n kaagd tigimsã. Yɩɩ yʋʋmd 1965 yʋʋm-vẽkr kiuugã. B yãka saam-biig a Leon Weaver me t’a na n yɩ tigims sull yel-gɛt wakat-kãnga. A yaa Etazĩni Betɛllã taoor lʋɩtb sullã yel-gɛt rũndã-rũndã.

M da maanda yɩɩr m sẽn lebg tigims sull yel-gɛtã yĩnga. Sẽn zems yʋʋmd woto, saam-biig a James Thompson sẽn da yaa distrik yel-gɛtã ra sõsa ne maam tʋʋmdã wɛɛngẽ. A maaga a yĩng n wilg-m bũmb nins sẽn tõe n sõng tigims sull yel-gɛt t’a tʋm a tʋʋmd neere, la zĩis kẽer mam sẽn tog n modg n paase. M sẽn sɩng tʋʋmdã, pa yã n kaoos la m mik tɩ yaa tɩlɛ tɩ m sɩd tũ a saglsã ye. Saam-biig a Thompson n yɩ pipi distrik yel-gɛt m sẽn tʋm ne. M paam n zãmsa bũmb wʋsg saam-bi-kãnga sẽn da tũud a Zeova ne a sũur fãa wã nengẽ.

Wakat-kãng tɩ tigims sull yel-gɛtbã ra pa paamd zãmsg wʋsg ye. M yãaga tigims sull yel-gɛt a ye t’a tɩ kaag tiginga, n ges a sẽn maand to-to wã. Semen ning sẽn pʋglã, a yãaga maam tɩ d tɩ kaag tiging a to, n da get mam sẽn maand to-to wã. A kõ-m-la saglse, la a wilg m sẽn tõe n maan bũmb kẽer to-to. Rẽ poore, lebga tõnd n segd n ges d sẽn na n maan to-to. M tẽrame tɩ m soka a Gloria yaa: “Yaa tɩlɛ t’a loog masã la?” La m wa n bãnga bũmb sẽn tar yõod wʋsgo. M bãngame tɩ wakat fãa, saam-biis  sẽn tõe n sõng-d na n beeme, la tɩ bee ne tõnd tɩ d sak tɩ b sõng-do. M sũur ket n nooma m sẽn paam tɩ saam-biis sẽn da tar minim sõng-mã. Wala makre, saam-biig a James Brown sẽn da yaa tigims sull yel-gɛt wakat-kãngã, la a Fred Rusk sẽn da tʋmd Betɛllẽ wã.

Bu-welsgã ra bee zĩig fãa. Daar a ye, Tenesi soolmã tẽng a ye pʋgẽ, Ku Klux Klan wã rãmb yiime n na n kẽne. Rẽ tɩ tõnd ra bee be n na n kaag tigingã. Daar a to me, tõnd ra moonda koɛɛgã, n wa kẽ rɛstorã pʋgẽ n na n vʋʋs bilfu. M wa n yikame n na n tɩ yols m menga, tɩ rao-wẽbr a ye sẽn yaa nasaara yik n pʋgl maam. A ra tara tatuwaas-rãmb sẽn wilgd t’a pa nong neb nins sẽn yaa yĩn-kõbg a to wã ye. La saam-biig sẽn yaa nasaara, t’a bedrem yɩɩd tõnd d yiibã fãa yik n pʋgla tõndo. A soka maam yaa: “Saam-biig a Herd, yell n be la?” Rao-wẽbrã kell n looga zĩig pʋgẽ, n pa kẽ rʋʋdmã zĩigẽ ye. Mam mengã wa n bãngame tɩ pa d yĩngã kõbg sẽn yaa toor-toorã yĩng la bu-welsg sẽn be wã, la tɩ yaa d fãa sẽn yaa a Ãdem yagense, n yaa yel-wẽn-maandbã yĩnga. M bãngame tɩ d saam-biig yaa d saam-biiga, baa a yĩn-kõbgã sẽn yaa to-to fãa, la tɩ sã n wa yaa tɩlɛ, a na n saka kũum tõnd yĩnga.

Yʋʋm 12 pʋgẽ la d sẽn da gilgd n kaagd tigimsã. Rẽ poore, m yɩɩ distrik yel-gɛt yʋʋm 21. Yʋʋm 33 fãa, d paama bark ka tɛka, la d paam n yã bũmb wʋsg sẽn kengd raoodo. Mik bark a to n nan ket taoore. Yʋʋmd 1997 sa-sik kiuugã, bũmb ning d sẽn da sɩng n datã yaa n pidsame. B yeela tõnd tɩ d wa tʋm Etazĩni Betɛllẽ wã. Rẽ tɩ lebga yʋʋm 38 masã la d sẽn da kos n na n tɩ tʋm be wã. Kiuug ning sẽn pʋglã, tõnd sɩnga tʋʋm Betɛllẽ wã. M da tagsdame tɩ saam-biisã ratame tɩ m wa sõng wakat a wãn bala. La pa yɩ woto ye.

Sɩngrẽ wã, b kɩtame tɩ m tɩ tʋm biru ningẽ b sẽn get koe-moonegã yellã. M paam n zãmsa bũmb ka tɛka. Kãsem-dãmbã la tigims sull yel-gɛtbã mi n gʋlsa sẽn tʋmd-b be wã, n kos sõngr sẽn na yɩl n bãng n welg yɛl kẽer sẽn pa nana. Saam-biisã maana sũ-mar ne-ma, n sõng-m tɩ m paam minim, tɩ m pʋʋsd barka. M tara hakɩɩk tɩ b sã n kɩt tɩ m na n le tɩ tʋm be, na n yɩɩ wa m sẽn nan sɩngd bala.

Maam ne a Gloria nonga Betɛllẽ vɩɩmã. D wae n nekda pĩnda. Sãmbg kae tɩ yaa minung sẽn sõngd Betɛllẽ tʋm-tʋmda. Na maan yʋʋmd poore, b kɩtame tɩ m tɩ sõngd a Zeova Kaset rãmbã taoor lʋɩtbã sull ning sẽn get koe-moonegã yellã. Yʋʋmd 1999 wã, b yãka maam tɩ m lebg a Zeova Kaset rãmbã taoor lʋɩtbã sull neda. M zãmsa bũmb wʋsg tʋʋmdã pʋgẽ. La sẽn yɩɩda, m yãa bũmb wʋsg sẽn kɩt tɩ m maneg n kɩs sɩd tɩ yaa a Zeezi Kirist la tigingã Zu-soaba, pa ninsaal ye.

M sã n mi n tags m vɩɩmã yelle, m getame tɩ m wõnda no-rɛɛs a Amoose. A ra yaa pe-kɩɩma, la a ra send kankamse. Kankamã ra yaa naong rãmb rɩɩbo. La a Zeova sũur yɩɩ noog ne a Amoos t’a yãk-a t’a lebg a no-rɛɛsa, baa a sẽn da yaa naong soabã. Sɩd yaa bark meng-menga. (Amoos 7:14, 15) A Zeova sũur yɩɩ noog ne ma-me sẽn yaa naong soab biigã, t’a ning-m bark tɩ seke, hal tɩ m pa tõe n togs fãa ye. (Yel. 10:22) M sɩd neeme tɩ m da yaa naong soab sɩngrẽ wã, la masã m paama arzɛk meng-menga, hal tɩ yɩɩd m sẽn da tõe n tagsã!