DŨNIYÃ sẽn pid ne zu-loeesã, yɩl n paam sũur pʋgẽ bãan pa nana ye. Yaa tɩlɛ tɩ d mao. D sã n tar sũur pʋgẽ bãan baa yaa bilf me, d sã n pa mao, d wat n pa le tar-a ye. Wãn to la Wẽnnaam Gomdã tõe n sõng-d tɩ d paam laafɩ bɩ bãan hakɩɩka? Wãn to la d tõe n sõng neb a taab me tɩ b paam laafɩ bɩ bãan hakɩɩkã?

D sã n dat laafɩ hakɩɩkã, yaa tɩlɛ tɩ d paam tɩ d yamã gãe, tɩ d sũurã me noom ne d vɩɩmã. Segdame me tɩ d tar zo-rãmba, la d mao tɩ d zoodã tall pãnga. La sẽn yɩɩda, yaa tɩlɛ tɩ d mao n paam zood sõma ne Wẽnnaam. Bõe n na n sõng-do?

D sã n tũud a Zeova saglsã la a noyã sẽn yaa tɩrsã, wilgdame tɩ d teeg-a lame, la tɩ d rata a zoodo. (Zer. 17:7, 8; Zak 2:22, 23) Rẽ na n kɩtame t’a Zeova me sak tɩ d yɩ a zoa, la a kõ-d sũur pʋgẽ bãane. Ezayi 32:17 yetame: “Tɩrlmã tʋʋmd na n yɩɩ vɩ-bãane, la tɩrlmã biis yaa yam-gãnega, la vɩ-bãan wakat sẽn ka sɛt yĩnga.” Dẽnd yaa d sã n sakd a Zeova ne d sũur fãa la d paamd sũur pʋgẽ bãan meng-menga.—Eza. 48:18, 19.

Sẽn paase, d paamdame tɩ d saasẽ Ba wã kõt tõnd a vʋʋsem sõngã. Rẽ me sõngda tõnd tɩ d paamd laafɩ hakɩɩkã.—Tʋʋ. 9:31.

Tʋm-tʋmd a Poll sẽn wa n sõdgd zʋg-sõma nins vʋʋsem sõngã sẽn sõngd ned t’a bɩɩsã, laafɩ bɩ bãanã la a sõdg tãab-n-soaba. (Gal. 5:22, 23) Dẽnd d sã n dat laafɩ hakɩɩkã, yaa tɩlɛ tɩ d sak tɩ Wẽnnaam vʋʋsem sõngã sõng-do. Bala, yaa ne vʋʋsem sõngã maasem la ned tõe n paam laafɩ hakɩɩkã. La wãn to la vʋʋsem sõngã tõe n sõng-do? D gom bũmb a yiib yelle.

 Pipi, d sã n modgd daar fãa n karemd Wẽnnaam Gomdã a sẽn kɩt tɩ b gʋls ne a vʋʋsem sõngã maasmã, na n sõng-d lame tɩ d paam bãane. (Yɩɩn. 1:2, 3) D sã n wa karemd Biiblã la d bʋgsd a goamã zugu, vʋʋsem sõngã sõngd-d lame tɩ d bãng a Zeova raabã sẽn yaa a soab bũmb toor-toor zugu. Wala makre, d yãta a sẽn maan tɩ wilgdẽ t’a yaa laafɩ soaba, la a sẽn nong laafɩ wã võore. D sã n tũud bũmb nins d sẽn bãngdã, d bãanã na n paasdame.—Yel. 3:1, 2.

Yiib-n-soaba, d segd n pʋʋsda Wẽnnaam n kot-a a vʋʋsem sõngã. (Luk 11:13) A Zeova yeelame tɩ d sã n bao yẽ sõngre, d na n paamame t’a ‘laafɩ wã sẽn yɩɩd ninsaalbã bãngr fãa wã gũ tõnd sũyã ne d tagsdã a Zeezi Kirist pʋgẽ.’ (Fili. 4:6, 7) D sã n nong n pʋʋsd a Zeova n kot-a a vʋʋsem sõngã, a na n kɩtame tɩ d paam bãan hakɩɩkã, bãan ning a sẽn kõt neb nins sẽn tar zood sõma ne yẽ wã balã.—Rom. 15:13.

Wãn to la kẽer tũ sagl-kãensã tɩ sõng-b tɩ b tõog n tõeeme, tɩ rẽ kɩt tɩ b tar laafɩ ne Wẽnnaam, sũur pʋgẽ bãane, la laafɩ ne b taabã?

Neb n da yaa sũ-tʋʋls rãmb nand tɩ b bãng a Zeova, la masã b gũusdame n pa paoogd b taabã, b maand-b-la neere, b yaa sũ-maasem dãmba, la neb sẽn baood laafɩ. * (Yel. 29:22) D gom d tẽed-n-taas a yiib yelle. B paama sõngr n tõog sũ-yikri, la b tõog n baood laafɩ ne b taabã.

A Davɩɩd zʋgdã ra kɩtame t’a no-goamã ra wae n pa lebd be ye. Nand t’a lebg a Zeova Kaset soaba, a ra nong n wɩta a taabã, n da pa tar mo-noog me ne a roagdbã la a yaopã ye. La a wa n bãngame tɩ yaa tɩlɛ t’a toeem n lebg ned sẽn baood laafɩ. Bõe n sõng-a? Ad a sẽn yeele: “M sẽn wa n sɩng Biiblã saglsã tũubã, sõngame tɩ maam ne m roagdbã la m yaopã ra maneg n waoogd taaba.”

A Rasɛll me ra rɩka a zakã rãmb zʋgdo. Ad a sẽn yeele: “Baa ne masã, m maooda sẽn na yɩl n tõogd m sũurã, bala tõnd zakã rãmb ra yaa sũ-tʋʋls rãmba.” Bõe n sõng-a t’a lebg  ned sẽn baood laafɩ? A yeelame: “M pʋʋsda a Zeova wakat fãa n kot-a sõngre.”

Woto yaa kibay a yiib bal sẽn wilgd tɩ d sã n tũud Wẽnnaam Gomdã saglsã, la d pʋʋsd-a n kot a vʋʋsem sõngã, d na n paama laafɩ hakɩɩkã. Sɩd-sɩdã, baa d sẽn be dũni sẽn gudg pʋgẽ wã, d tõe n paama bãane, tɩ sõng tɩ zems-n-taar zĩnd d zagsã pʋsẽ, la tõnd ne d tẽed-n-taasã sʋka. La a Zeova ratame tɩ d mao tɩ ‘laafɩ zĩnd tõnd ne nebã fãa sʋka.’ (Rom. 12:18) Rẽ yĩnga, tõeeme bɩ? D sã n tõoge, nafa wã na n yɩɩ bõe?

Ne koe-moonegã maasem, d sõngda nebã tɩ b tõe n paam Wẽnnaam Rĩungã koe-noogã sẽn yaa laafɩ koɛɛgã n kelge. (Eza. 9:5, 6; Mat. 24:14) Wʋsg saka koɛɛgã, tɩ sõng-b tɩ b pa le maand yɩɩr b sẽn tagsd tɩ sẽn maand kae yĩng ye. B pa le basdẽ me tɩ yel-kɛgã sẽn maandã yikd b sũur tɩ loog ye. Masã, b kɩsa sɩd tɩ manegr n wate. Rẽ kɩtame tɩ b ‘baood vɩ-bãane,’ la b maand bũmb nins sẽn wat ne-a wã.—Yɩɩn. 34:15.

La pa nebã fãa n dat n kelg koɛɛgã, sẽn yɩɩd fãa sã n yaa b pipi. (Zã 3:19) Baa ne rẽ, d paamda vʋʋsem sõngã sõngre, n tõe n taas-b koɛɛgã ne waoogre, la d tõog me tɩ laafɩ zĩndi. Woto zemsa ne sagls nins a Zeezi sẽn kõ koɛɛgã mooneg wɛɛngẽ tɩ be Matye 10:11-13. Ad a sẽn yeele: “Y sã n wa kẽed zakẽ wã, bɩ y yeel tɩ laafɩ zĩnd ne zakã rãmba. La zag-kãng sã n zemsa ne laafɩ, bɩ yãmb laafɩ wã zĩnd ne a nebã. La a sã n ka zems ne laafɩ, bɩ yãmb laafɩ wã leb y nengẽ.” D sã n tũ a Zeezi saglgã, sõngdame tɩ d loog ne laafɩ, n tõe n paam segb nindaar n taas-b koɛɛgã.

D sã n wa yẽsd ne goosneemã tʋm-tʋmdbã, yaa tɩlɛ me tɩ yɩ ne waoogre. Woto sõngdame tɩ laafɩ zĩndi, baa b pa nong tõnd tũudmã. Wala makre, Afirik tẽng a ye pʋgẽ, goosneemã sẽn da tar tags-kɛg a Zeova Kaset rãmbã zugã kɩtame tɩ b pa rat n kõ-d sor tɩ d me Rĩung rot ye. Rẽ n so tɩ siglgã tʋm saam-biig a ye sẽn da yɩ misioneer tẽn-kãng pʋgẽ t’a tɩ yẽs ne tẽngã ãmbasadɛɛr sẽn be Lõndre, Ãngeletɛɛr soolmẽ wã. A ra tog n tɩ wilga ãmbasadɛɛrã t’a Zeova Kaset rãmbã tʋʋmdã pa wat ne gudgr ye. Baasa wãna?

Ad saam-biigã sẽn yeele: “Mam sẽn ta ãmbasaadẽ wã n yã pag ning sẽn deegd nebã sẽn yelg fut ninsã, m bãnga a sẽn yaa tẽngã buud ning neda. M da zãmsa b buud-gomdã. Rẽ n so tɩ m pʋʋs-a a buud-gomdã pʋgẽ. Ling-a lame, t’a sok maam n na n bãng m waoongã võore. Ne waoogre, m yeel-a lame tɩ yaa ãmbasadɛɛrã la m dat n yã. A rɩka telefõnnã n bool-a n togse. Ãmbasadɛɛrã yiime n wa, n pʋʋs maam b buud-gomdã pʋgẽ. Rẽ poore, a maaga a yĩng n kelg-ma, tɩ m togs-a a Zeova Kaset rãmbã sẽn tʋmd tʋʋm ninsã, la m wilg-a tɩ pa wat ne gudgr ye.”

Saam-biigã sẽn gom ne waoogre, n bilg yɛlã woto wã, sõngame tɩ ãmbasadɛɛrã bas tags-kɛg la sãmbs nins a sẽn da tar tõnd tʋʋmdã zugã. Rẽ zugẽ, tẽngã goosneemã wa n kõo d tẽed-n-taasã sor tɩ b tõe n me Rĩung roto. Yellã sẽn welg ne laafɩ woto wã yɩɩ d tẽed-n-taasã noog hal wʋsgo! Hakɩɩka, d sã n waoogd d taabã, laafɩ na n zĩnda d sʋka, d na n paama nafa a taab me.

Rũndã-rũndã, laafɩ la bãan hakɩɩk bee a Zeova nin-buiidã sʋka, hal tɩ yaa wa b zoe n bee arzãn pʋgẽ. Laafɩ bɩ bãanã naaga zʋg-sõma nins Wẽnnaam vʋʋsem sõngã sẽn sõngd ned t’a bɩɩsã. Tõnd ned kam fãa sã n maood wakat fãa n na n kell n yɩ ned sẽn baood laafɩ, na n paasa bãan ning sẽn be a Zeova nin-buiidã sʋkã. La sẽn tɩ yɩɩd fãa, d na n paamame t’a Zeova sũur yɩ noog ne-do, la d wa paam n vɩɩmd dũni-paalgã pʋgẽ ne bãan hakɩɩk wakat sẽn kõn sa.—2 Pɩy. 3:13, 14.