1. Bõe n kɩt tɩ ninsaal yaa toor fasɩ ne rũmsã?

A ZEOVA naana ninsaal t’a tar sũur-kaseto. Kɩtame tɩ ninsaal yaa toor fasɩ ne rũmsã. Bõe n wilgd t’a Ãdem ne a Awa ra tara sũur-kaseto? B sẽn kɩɩs a Zeova wã poore, b zoe n solgame. Wilgdame tɩ yaa b sũur-kasetã n da ningd-b taale.

2. Bõe yĩng tɩ d tõe n mak d sũur-kasetã ne batayo valo? (Ges-y fotã sẽn be yĩngrã.)

² Ned sũur-kaset sõngd-a lame t’a bãng sõma ne wẽng n bake. La a sũur-kasetã sã n pa paam kiblg sõma, lebgda wa batayo valo sẽn pa sõma. Batayo a woto sã n wa be mogrã zugu, sebgã la ko-wiisã na n kɩtame t’a bʋdge. La valo wã sã n yaa sõma, sẽn wẽnd-a batayo wã tõogdame t’a tees a sẽn datẽ wã. Tõnd sũur-kasetã me sã n paam kiblg sõma, d bãngd n maana sẽn yaa sõma bũmb fãa pʋgẽ.

3. Ned sũur-kaset sã n pa paam kiblg sõma, tõe n baasa wãna?

³ Ned sũur-kaset sã n pa paam kiblg sõma, a sã n wa rat n maan wẽnga, a sũurã pa na n keoog-a ye. (1 Tɩm. 4:1, 2) A sũur-kasetã tõe n pʋd n kɩtame t’a maan sẽn yaa wẽnga, n kɩs  sɩd tɩ rẽ la sõma. (Eza. 5:20) A Zeezi ra yeela a karen-biisã yaa: “Wakat pʋs n watame tɩ ned ning fãa sẽn na n kʋ-a yãmb na tẽ tɩ yẽnda maanda Wẽnnaam tʋʋmde.” (Zã 16:2) Wala makre, neb nins sẽn kʋ a Etɩyɛnnã ra tagsdame tɩ b sẽn maanã yaa Wẽnnaam daabo. (Tʋʋ. 6:8, 12; 7:54-60) Hal pĩnd n tãag masã, neb n lʋɩɩs tũudmã taoor n yãgs yõyã, n yetẽ tɩ yaa Wẽnnaam yʋʋr yĩnga. La sɩd-sɩdã, pʋd n yaa a noyã kɩɩsgo. (Yik. 20:13) Yaa vẽeneg tɩ sẽn maand-b woto wã sũur-kasetã kẽes-b-la moogo.

4. Bõe la d tõe n maane, n paam tɩ d sũur-kasetã ket n keoogd tõndo?

⁴ Bõe la d tõe n maan tɩ d sũur-kasetã tõog n keoogd-d wakat fãa? Wẽnnaam noyã la a saglsã sẽn be Biiblã pʋgẽ wã “bee yõod zãmsg yĩnga, tɩ kɩt tɩ ned bãng a kongre, tɩ rems neda, tɩ wub ned tɩrlem pʋgẽ.” (2 Tɩm. 3:16) Dẽnd d sã n zãmsd Biiblã sõma, n bʋgsd a goamã zug neere, la d tũud bũmb nins d sẽn bãngã, d sũur-kasetã na n paama kiblg sõma, t’a sẽn sakd tɩ d maan fãa zemsd ne Wẽnnaam daabã. Woto, d tõe n kɩsa sɩd t’a na n sõng-d lame tɩ d bãng n maan sẽn segd bũmb fãa pʋgẽ. Sõs-kãnga pʋgẽ, d na n yãa Wẽnnaam noyã la a saglsã sẽn tõe n sõng-d to-to tɩ d kibl d sũur-kasetã.

5, 6. Wãn to la Wẽnnaam noyã tũub nafd tõndo?

⁵ D sã n karemd Biiblã, d bãngda Wẽnnaam noyã. La d sã n dat tɩ Wẽnnaam noyã naf-do, d segd n maanã sẽn yɩɩd rẽ. Yaa tɩlɛ tɩ d nong Wẽnnaam noyã la d sak-ba. Ad Biiblã sẽn yete: “Kisg-y wẽng la y nong sẽn yaa neere.” (Amoos 5:15) La bõe n na n sõng-do? D mao tɩ d tagsg sẽn yaa a soab bũmb fãa pʋgẽ wã zems ne a Zeova raabã. D rɩk makr wa yãmb sẽn na n pa gõe yʋng sõma. Y tɩ yãa logtore, t’a wilg-y rɩbd kẽer y sẽn pa segd n dɩ, la a yeel-y tɩ y segd n maanda ɛspoor la y toeem y minimd kẽere. Y sɩd tũu a saglsã, tɩ sõng-yã. Y sũur kõn yɩ noog ne logtorã, a sẽn sõng-y woto wã yĩng sɩda?

⁶ A Zeova sẽn yaa tõnd Naandã me kõo tõnd noy. D sã n tũ, manegda tõnd vɩɩmã, bala sõngda tõnd tɩ d gind yel-wẽnã la bi-wẽns nins rẽ sẽn wat ne wã. D sã n tags n gese, d sɩd neeme tɩ d sẽn tũud Biiblã sẽn yet tɩ d pa segd n yag ziri, n zãmb neda, n zu, n yo, n maan ned pãnga, wall d maan zĩn-dãmb yɛlã naf-d lame. (Karm-y Yel-bũn 6:16-19; Vẽn. 21:8) D sã n ne a Zeova noyã tũub sẽn nafd tõnd to-to wã, kɩtdame tɩ d maneg n nong-a la d nong a noyã.

7. D sã n karem ned kibar Biiblã pʋgẽ la d bʋgse, wãn to la na n sõng-do?

⁷ Pa tɩlɛ tɩ d kɩɩs Wẽnnaam noore, n yã a biisã n yaool n dɩk yam ye. Neb n maan yel-wẽn pĩnd wẽndẽ, tɩ b kibayã be Biiblã pʋgẽ, tɩ d tõe n karem n dɩk yam. Yel-bũn 1:5 wã yetame: “Yam soab sã n kelge, a na paam yam n paase.” Sɩd me, d sã n karem ned kibar Biiblã pʋgẽ la d bʋgse, yaa Wẽnnaam la d kelgda, la yam ning d sẽn na n paamã ka to ye. Wala makre, tags-y n ges-y rĩm a Davɩɩd sẽn yo ne a Batseba, t’a yel-wẽndã biis nams-a to-to wã. (2 Sãm. 12:7-14) D sã n wa karem kibarã, n bʋgsdẽ, d tõe n soka d meng yaa: ‘Bõe n da tõe n sõng a Davɩɩd t’a gil zu-loe-kãensã? M sã n wa be yell a woto pʋgẽ, m na n tõogame n da kɩɩs Wẽnnaam bɩ? M na n zoe n põsa wa a Zozɛf bɩ, bɩ m na n maana wa a Davɩɩde?’ (Sɩng. 39:11-15) D sã n tagsd  zu-loees nins yel-wẽnã sẽn na n wa ne wã, na n kɩtame tɩ d maneg n ‘kisg wẽnga.’

8, 9. a) Wãn to la d sũur-kasetã tõe n sõng-do? b) Wãn to la d tõe n kibl d sũur-kasetã ne Biiblã saglsã maasem?

⁸ Yaa sɩd tɩ d zãagda d mens ne bũmb nins Wẽnnaam sẽn kisã. La d bãng tɩ yɛl kẽer wɛɛngẽ, Wẽnnaam pa kõ noy takɩ ye. Woto wã, d maanda wãn n bãng a sẽn date? D sũur-kasetã tõe n sõng-d lame tɩ d bãng n maan sẽn segde, sã n mik tɩ d kibind-a-la sõma ne Biiblã maasem.

⁹ A Zeova sẽn nong tõndã, sagls me la a kõ Biiblã pʋgẽ, tɩ tõe n sõng-d tɩ d kibl d sũur-kasetã. Ad a Zeova mengã sẽn yeele: “Maam . . . n yaa fo Wẽnnaam, mam na n zãmsa foom f meng sõngr yĩnga, maam n tɛt foom sor ning fo sẽn be wã zugu.” (Eza. 48:17, 18) D sã n maagd d yĩng n bʋgsd Biiblã saglsã zug tɩ kẽed tõndo, d tõogd n kibla d sũur-kasetã sõma. Woto la d na n tõog tɩ d yam-yãkr fãa yɩ sõma.

10. Saglg yõod yaa bõe? Bõe la a Zeezi sõng a karen-biisã tɩ b bãnge?

¹⁰ Saglg tõe n sõnga ned t’a bãng n yãk yam-sõngo. D sã n wʋmd Biiblã saglsã võor sõma, na n sõng-d lame tɩ d bãng a Zeova raab bũmb fãa pʋgẽ, la d bãng sẽn yaa bũmb ning yĩng la a sẽn kõ-d noy kẽerã. A Zeezi sẽn da yet a karen-biisã bũmb ninsã wʋsg ra yaa saglse. Ra yaa sẽn na n sõng-b tɩ b bãng tagsa kẽer la tʋʋm-tʋmdɩ kẽer sẽn tõe n wa ne biis ninsi. Wala makre, a wilg-b lame tɩ sũ-yikr tõe n waa ne nen-kɛglem, la tɩ ned sã n tagsd yoob yelle, tõe n wa kɩtame t’a sɩd yo. (Mat. 5:21, 22, 27, 28) A Zeova saglsã sã n be d yamẽ wakat fãa, na n sõngame tɩ d sũur-kasetã paam kiblg sõma, tɩ d bãngd n yãkd yam, tɩ Wẽnnaam paamd waoogre.—1 Kor. 10:31.

11. Bõe n wilgd tɩ nebã sũur-kaset pa yembre?

¹¹ Yell ning pʋgẽ, baa kiris-neb a yiib sẽn kibl b sũur-kasetã sõma yam-yãkr tõe n yɩɩ toor-toore. Wala makre, rãamã yũub wɛɛngẽ. Biiblã pa gɩdg rãam yũub ye. La a keoogda tõnd tɩ d gũus n da wa yũ tɩ loog-do, wall d bas tɩ rãamã soog-d ye. (Yel. 20:1; 1 Tɩm. 3:8) Woto rat n yeelame tɩ kiris-ned sã n tõog n yũud n zemsdẽ bala, sekame bɩ? Ayo! Baa rãamã yũub ka yell ne yẽ, a segd n tagsa neb a taabã sũur-kaset yelle.

12. Wãn to la Rom-dãmb 14:21 wã sõngd tõnd tɩ d tagsd d taabã sũur-kaset yelle?

¹² Tʋm-tʋmd a Poll wilgame tɩ segdame tɩ d tagsd neb a taabã sũur-kaset yell d yam-yãkr pʋgẽ. Ad a sẽn yeele: “Yaa sõama tɩ ra wãb nemdo, wall yũ rãam, wall bas n da sɩɩs bũmb ning sẽn na n yɩ kug-lakdg f ba-biig yĩnga.” (Rom. 14:21) Rẽ n so tɩ baa d sã n tar sor n na n yũ rãam, d na n sak n basame n da yũ, d sã n mi tɩ na n namsa d tẽed-n-taaga. Tõe tɩ d tẽed-n-taag ning ra yaa rãamã yamb nand t’a bãng a Zeova, n yãk yam n pa na n tol n le yũ ye. D pa rat n maan baa fʋɩ sẽn na n kɩt t’a wa le rɩk a pĩnd zʋgã ye. (1 Kor. 6:9, 10) Rẽ wã, d sã n bool d tẽed-n-taag a woto d zakẽ, n kãab-a rãam t’a zãgse, tɩ d pẽdgd-a t’a we n yũ bala, d wilgd-a-la d nonglem sɩda?

13. Bõe la a Tɩmote maan sẽn na yɩl tɩ neb sak n kelg koɛɛgã, tɩ yaa mak-sõngo?

¹³ A Tɩmote sẽn wa n kolg yʋʋm 20 bɩ sẽn yɩɩd rẽ bilfu, a sakame tɩ b kẽesa bãongo, baa sẽn da na n zab-a wʋsgã. La yaa zʋɩf-rãmb nins a sẽn na n tɩ taas  koɛɛgã sũur-kaset yĩnga. Wa a Polle, a Tɩmote me ra pa rat n yɩ kug-lakdg ned yĩng ye. (Tʋʋ. 16:3; 1 Kor. 9:19-23) Yãmb me sakd n mongda y meng bũmb kẽer y taabã yĩng bɩ?

14, 15. a) Bõe n wilgd tɩ kiris-ned tẽeb bɩɩme? b) Kiris-ned tẽeb sẽn bɩ manesem yaa wãn ne a taabã?

¹⁴ Segdame tɩ kiris-ned fãa ‘yõsg Kirist goamã zãms-naana wã,’ la a ket n maood n kẽngd taoor tũudmã wɛɛngẽ. (Ebre. 6:1) Pa d sẽn kaoos to-to tũudmã pʋgẽ wã n wilgd tɩ d yaa kiris-ned tẽeb sẽn bɩ ye. Yaa tɩlɛ tɩ d mao, n yaool n tõog tɩ d tẽebã bɩ. Bala, d bãngrã segd n paasdame, tɩ Wẽnnaam goamã võor me lebgd vẽeneg ne-d n paasdẽ. Rẽ n so tɩ b sagend tõnd wakat fãa tɩ d modg n karemd Biiblã daar fãa. (Yɩɩn. 1:1-3) Y sã n wɩng ne Biiblã kareng daar fãa, y na n wa wʋmda a Zeova noyã ne a saglsã võor sõma.

¹⁵ Noy nins kiris-nebã sẽn tog n tũ wã sʋka, bʋg n yɩɩda? Yaa nong Wẽnnaam, la nong f to wa f mengã. Ad a Zeezi sẽn yeel a karen-biisã: “Yãmb sã n nong taaba, nebã fãa na bãng tɩ yãmb yaa mam karen-biisi.” (Zã 13:35) A Zeezi ma-biig a Zak yeelame tɩ nonglmã yaa ‘naam tõogo.’ (Zak 2:8, Wẽnnaam Sebre, 1983) A Poll me yeelame tɩ “nonglem yaa tõogã pidsgu.” (Rom. 13:10) Woto fãa wilgda nonglmã yõodã sẽn ta zĩig ningã. La pa lingd tõnd ye. Bala, Biiblã meng yetame tɩ “Wẽnnaam yaa nonglem.” (1 Zã 4:8) La Wẽnnaam pa nong tõnd a sũurẽ bal ye. A maana bũmb wʋsg sẽn wilgd t’a nonga tõndo. Tʋm-tʋmd a Zã yeelame yaa: “Ad Wẽnnaam sẽn puk b nonglmã to-to tõnd yĩnga: Bãmb tʋma b Bi-ribl yendã dũniyã pʋgẽ tɩ tõnd tõe n paam vɩɩm bãmb maasem yĩnga.” (1 Zã 4:9) Tõnd sã n maand bũmb nins sẽn wilgd tɩ d nonga a Zeova ne a Zeezi la d tẽed-n-taasã ne neb a taabã, wilgdame tɩ d yaa kiris-ned tẽeb sẽn bɩ.—Mat. 22:37-39.

16. Bõe yĩng tɩ d yetẽ tɩ ned sã n modgd n bɩɩsd a tẽebã, a na n maneg n nee vẽeneg tɩ Biiblã saglsã sɩd sõngd-a-la wʋsgo?

¹⁶ D sã n modgd n bɩɩsd d tẽebã, d na n maneg n nee vẽeneg tɩ Biiblã saglsã  sɩd sõngd-d-la wʋsgo. Bala, naoor wʋsgo, b sã n gãneg noore, wilgda d sẽn tog n maan yell takɩ pʋgẽ, tɩ saglg yaool n tõe n sõng-d tɩ d bãng d sẽn tog n maaneg yɛl ka tɛk pʋgẽ. Wala makre, bi-kɩdg sẽn nan pa mi tũud-n-ta-wẽns sẽn tõe n wa ne yɛl ninsã yĩnga, yaa tɩlɛ t’a roagdbã gãneg noy takɩ, a koglg yĩnga. (1 Kor. 15:33) La a sã n bɩtẽ, yẽ mengã wat n tõe n bʋgsa Biiblã saglsã zug tɩ sõng-a t’a bãng n yãk tũud-n-ta-sõma. (Karm-y 1 Korẽnt-rãmb 13:11; 14:20.) D sã n wɩngd ne Biiblã saglsã zug bʋgsgo, d sũur-kasetã me na n lebgda sõma n paasdẽ, tɩ d tõe n teeg-a. Rẽ, bũmb fãa pʋgẽ, Wẽnnaam daabã na n yɩɩ vẽeneg d yamẽ.

17. Bõe yĩng tɩ d yetẽ tɩ d tara bũmb nins fãa sẽn tõe n sõng-d tɩ d bãng n yãk yam bũmb fãa pʋgẽ wã?

¹⁷ D tara bũmb nins fãa sẽn tõe n sõng-d tɩ d yam-yãkr fãa pʋgẽ bɩ d bãng n yãk sẽn tat a Zeova raab bɩ? N-ye! D sã n bas tɩ Biiblã noyã la a saglsã sõngd tõnd wakat fãa, d na n yɩɩ neb sẽn “paam manegr la seglg tɩ maan tʋʋm-sõamy buud fãa.” (2 Tɩm. 3:16, 17) Rẽ wã, wɩng-y ne Biiblã saglsã zug bʋgsgo, n tõog n ‘bãng bũmb nins a Zeova sẽn datã.’ (Efɛ. 5:17) Bũmb wʋsg la siglgã yiis tɩ tõe n sõng-do. Wala makre, ẽndɛgs-rãmbã, Guide de recherche pour les Témoins de Jéhovah wã, Watchtower Library wã, Watchtower SƐB VAEESG ZĨIGÃ sẽn be tõnd sɩtã pʋgẽ wã, la JW Library apilikasiyõ wã. Woto fãa tõe n sõnga tõnd d sã n wa maand d zak pʋgẽ Biibl zãmsgã, la d sã n wa zãmsd Biiblã d yembre.

18. D sã n tũud a Zeova noyã la a saglsã, bark bʋs la d paamda?

¹⁸ D sẽn tũud a Zeova noyã la a saglsã, manegda tõnd vɩɩmã. Yɩɩn-sõamyã 119:97-100 yetame: “Mam sɩd nonga yãmb tõogã! Mam tagsda a yell n ka basdẽ ye. Yãmb tõogã kõta maam yam n yɩɩd m bɛɛbã, bala, mam tar-a-la wakat fãa. Mam tara yam n yɩɩd m zu-soben-dãmbã, bala, yaa yãmb noyã yell bal la mam tagsda. Mam tara bãngr n yɩɩd nin-kẽemba, bala, mam sakda yãmb noyã.” D sã n modgd n yãt sẽk n tagsd Wẽnnaam noyã la saglsã yell neere, d na n mikame tɩ d bãngrã la d yamã na n paasdame, tɩ sõngd tõnd d sẽn maand fãa pʋgẽ. D sã n bas tɩ Wẽnnaam noyã la a saglsã sõng tõnd tɩ d kibl d sũur-kasetã sõma, d na n paam n yɩɩ “neb sẽn bɩ, n lebg wa a Zeezi sẽn yaa bũmb ningã, n zems zãngã.”—Efɛ. 4:13.