“YIBEOOGO! Yika laafɩ?”

Sãmbg kae tɩ y mi n pʋʋsa ned woto. Tõe meng tɩ y yõka a soab nug n paase, wall y mobg-a. Nebã sẽn pʋʋsd taab to-to wã bee ne b buudã la b minimdã. La b fãa bõn-daabã yaa yembre. Ned sã n pa minim n pʋʋsd a taabã bɩ n pa reegd b pʋʋsem, b getame meng tɩ yaa nin-pa-nandem, wall a sẽn pa nong neba.

La pa nebã fãa n nong n pʋʋsd b taabã ye. Kẽer nengẽ yaa yãn-zoeere, wall b sẽn pa nand b mens yĩnga. Sãnda me nengẽ, ned yĩn-kõbg sã n yaa toore, wall a yaa bu-zẽng neda, pa rẽ bɩ a yʋʋm pa ta bãmba, yaa toog tɩ b pʋʋs a soaba. D sã n yaool n pʋʋs neda, baa yaa koɛɛg-koɛɛga, nafa wã tõe n yɩɩ ka tɛka.

D sok d meng yaa: ‘Pʋʋsem nafa yaa bõe? Bõe la Wẽnnaam Gomdã sõngd tõnd tɩ d bãng pʋʋsmã wɛɛngẽ?’

A Korney n yɩ pipi bu-zẽng sẽn lebg kiris-neda. Tʋm-tʋmd a Pɩyɛɛr sẽn wa n na n tɩ sõng-a t’a paam n lebg kiris-nedã, a yeelame yaa: “Wẽnnaam ka tũusd neb ye.” (Tʋʋ. 10:34) Kaoosg zugẽ, a Pɩyɛɛr yeelame tɩ Wẽnnaam raab yaa nebã “fãa tek yam n kos sugri.” (2 Pɩy. 3:9) Tõe tɩ d sã n wʋm vɛrse-kãensã, d tagsda sẽn nan zãmsd-b Biiblã yelle. La a Pɩyɛɛr yeela kiris-nebã me yaa: “Waoog-y nebã fãa. Nong-y y ba-biisã.” (1 Pɩy. 2:17) Woto wã, pa segd tɩ d pʋʋsd d taabã, baa b yĩn-kõbgo, b buud wall b minimd sẽn yaa a soab sɩda? Segdame! Yaa bũmb sẽn wilgd tɩ d nand-b lame, la tɩ d nong-b lame.

Tʋm-tʋmd a Poll sagla kiris-nebã, n yeele: “Reeg-y taab neer wa Kiris sẽn deeg yãmbã.” (Rom. 15:7) A Poll goma a tẽed-n-taas yelle, n yeel tɩ b yɩɩ ‘neb sẽn paas yẽ daoodo.’ Yaa rũndã-rũndã la d segd n paasd d tẽed-n-taasã raood n yɩɩda, bala, a Sʋɩtãan maneg n zabda ne Wẽnnaam nin-buiidã.—Kol. 4:11; Vẽn. 12:12, 17.

Biiblã vɛrse-kãensã wilgdame tɩ d sã n pʋʋsd d taabã, wilgdame tɩ d reegd-b-la neere. La pa rẽ bal ye.

Wẽnnaam sẽn wa n na n maan yel-solemd t’a Maari rɩk pʋg n dog a Zeezi wã, a reng n tʋma malɛk t’a wa gom ne-a. Malɛkã sẽn ta wã, a yeela a Maari yaa: “Mam pʋʋsda foom, ned ning Wẽnnaam sẽn ning barkã. Zu-soabã bee ne foom.” A Maari yɛɛsame. A ra pa mi bũmb ning sẽn kɩt tɩ malɛk wa gomd ne-a wã ye. Rẽ n so tɩ malɛkã yeel-a yaa: “Maari, da zoe rabeem ye. Bala, fo paama bark Wẽnnaam nifẽ.” A yeel-a lame tɩ yẽ la Wẽnnaam yãk t’a na n dog Mesi wã. A Maari sẽn wʋm rẽ wã, sõngame t’a yam gãande, t’a leok yaa: “Mam yaa Zu-soabã tʋmtʋmd poaka. Bɩ yãmb sẽn yeel bũmb ningã yɩ.”—Luk 1:26-38.

Malɛkã sẽn paam n na n wa taas a Zeova koeesã yaa zu-zẽkre. La a pa tags tɩ yẽ yɩɩda a na tɩ gom ne ninsaal sẽn pa zems zãng ye. A sẽn ta wã, a reng n pʋʋsa a Maari. Yam-bʋg la d tõe n dɩk a manesmã pʋgẽ? Wilgdame tɩ d segd n nong n pʋʋsda d taabã la d kengd b raoodo. D sã n pʋʋs d tẽed-n-taag baa yaa koɛɛg-koɛɛga, sõngdame t’a bas a yam tɩ yẽ me yaa a Zeova neda.

A Poll ra mii Aazimineer la Erop tigimsã neb wʋsgo. A lɛta wã pʋgẽ, a sõdga kẽer yʋy n pʋʋs-ba. Wala makre, Rom-dãmb sak 16 pʋgẽ, a toola kiris-neb wʋsg a pʋʋsem. A goma “ba-bi-poak” a Feebe yelle, la a yeel a tẽed-n-taasã yaa: “Reeg-y-yã-a Zu-soabã pʋgẽ, wa sẽn zems nin-sõamyã maanego.  Bũmb sã n wa n beẽ fãa t’a rat yãmb sõngre, bɩ a paam yãmba.” A yeelame tɩ b pʋʋs a Priska ne a Akila, la a paas yaa: “Ka maam m yembr bal n pʋʋsd-b bark ye, buud a taabã wẽnd-dotã fãa me pʋʋsd-b lame.” A pʋʋsa neb meng d sẽn pa mi rũndã-rũndã. Wala makre, a yeelame tɩ b pʋʋs a “zo-nongr a Epayinet,” la b pʋʋs “a Tirfɛn ne a Tɩrfooze, tɩ b yaa pagb sẽn modgd b mens Zu-soabã yĩnga.” D sɩd neeme t’a Poll ra nong n pʋʋsda a saam-biisã la a saam-bi-pogsã.—Rom. 16:1-16.

Woto ra wilgd-b lame t’a Poll tẽra b yelle. Tags-y n ges-y b sũy sẽn yɩ noog to-to. D tõe n yeelame tɩ kɩtame tɩ b maneg n nong a Polle, la b maneg n nong taab me. Kiris-neb a taabã me sẽn wʋm pʋʋsmã, yaa vẽeneg tɩ kenga b raoodo, tɩ bãmb me kell n gãd b tẽebã kãn-kãe. Hakɩɩka, d pʋʋsem sã n wilgdẽ tɩ d tẽed-n-taag yell pak-d lame, la tɩ d pẽgd-a lame, paasda tõnd ne yẽ zoodã, la paasd Wẽnnaam nin-buiidã zems-n-taarã.

A Poll ra wa n debda Rom, n tek n yals Puteoli rasem a wãna. A sẽn wa n lebg n dɩk sorã, kiris-neb n yi Rom n wa seg-a. A sẽn tool n yã-bã, “a pʋʋsa Wẽnnaam bark la a keng a pɛlga.” (Tʋʋ. 28:13-15) Wakat ninga, tõe tɩ d na n yõgemda d noor ne nina, wall d zẽk d nug n pʋʋs-a bala. La baa rẽ meng tõe n kenga ned raoodo. Wala makre, a soab sũur sã n sãamame, wall a yamã n ka a menga.

Wakat n zĩnd tɩ ra yaa tɩlɛ tɩ karen-biig a Zak keoog kiris-nebã ne yell a ye. Kiris-neb kẽer n da lebgd wa nin-yoaadba, bala, b ra basame tɩ bũmb nins sẽn be dũniyã pʋgẽ wã yamleoog kẽed-ba. (Zak 4:4) La ad a Zak sẽn sɩng a lɛtrã to-to:

“Wẽnnaam la Zu-soab a Zeezi Kiris tẽn-tʋmd a Zak n gʋlsd buud piig la yiibã sẽn sãeegã, n pʋʋsd-ba.” (Zak 1:1) A gomdã kɩtame t’a sẽn gʋls-b rãmbã bãng tɩ bãmb ne yẽ fãa yaa bũmb a ye Wẽnnaam nifẽ. Yaa vẽeneg tɩ woto sõng-b lame tɩ b sak a saglgã nana-nana. Hakɩɩka, d pʋʋsem sã n wilgdẽ tɩ d pa zẽkd d menga, tõe n sõngame tɩ d paam n yẽs yel-bedr zug menga.

D pʋʋsem sã n yaa ne pʋ-peelem, n wilgd nonglem hakɩɩka, rẽ la pʋʋsem meng-menga. Baa pʋʋsmã yaa koɛɛg-koɛɛga, la baa wõnd b pa reege. (Mat. 22:39) Irlãnd tẽngẽ wã, saam-bi-poak a ye n ta Rĩungã roogẽ n mik tɩ tigsgã rat n sɩngame, t’a yãgemd n na n tɩ bao zĩiga. Saam-biig a ye n wẽnemd n yõgemd a noor ne-a, la a yeel yaa: “Kibare! M sũur noom m sẽn yã-fã.” La saam-bi-poakã sãag n tɩ zĩndame, n pa leok ye.

Semen a wãn poore, a yeela saam-biigã tɩ zakã yɛl kẽer ra kɩtame tɩ pa nana ne-a ye. A yeela saam-biigã yaa: “Nindaarẽ wã, m sũurã ra sãama wʋsgo. Ra kellẽ-la bilf meng tɩ m pa wa tigsgã ye. M pa le tẽr m sẽn wʋm tigsgã sasa baraarã wʋsg ye. La m ket n tẽra fo pʋʋsmã. Kɩtame tɩ m sɩd yã tɩ m tẽed-n-taasã nong-m lame. Barka.”

Saam-biigã ra pa mi t’a pʋʋsmã kenga saam-bi-poakã raood woto fãa, baa ne sẽn yɩ koɛɛg-koɛɛgã ye. Ad saam-biigã sẽn yeele: “A sẽn togs maam m pʋʋsmã sẽn paas a raood to-to wã, m sũur yɩɩ noog m sẽn maan modgr n pʋʋs-a wã. Kenga ma-me raoodo.”

A Salomo ra yeelame yaa: “Lob f bur koom zugu, bala, wakat sẽn wate, fo na n leb n paam-a lame.” (Koɛ. 11:1) D tẽegd wakat fãa tɩ d sã n pʋʋsd d taabã, sẽn yɩɩd fãa d tẽed-n-taasã, nafd-b lame, la nafd tõnd me. Bɩ d ra tol n tags tɩ pʋʋsem nafa pa waoog ye.