MAM sẽn wa n karemd sɛbã, m yãa desẽ-rãmb sẽn kɩt tɩ m tags wʋsgo. Kɩtame tɩ hal m yãadmã wakat bɩ m da tʋll n bãng bũmb nins Biiblã sẽn yetã, wa b sẽn wɛgs seb-kãensã pʋgẽ to-to tɩ be yamleoogã.

Dũni gill zabr a yiib-n-soabã sẽn wa n dat n ta Ẽnd soolmẽ wã, rẽ tɩ yɛlã ra pa nana ne ma-me ye. M doagdbã welga taaba, n wa baas n kao b kãadmã. M da nonga b yiibã fãa wʋsgo, n da pa wʋmd b sẽn pa le be ne taabã võor ye. M sũurã sãama hal wʋsgo. M da getame me tɩ b raaga maam n base. M sẽn da yaa b bi-yendã, ra yaa toog tɩ m paam belsg la sõngr ning m sẽn da rat ne m sũur fãa wã.

Maam ne m ma ra bee Karasi. Daar a ye, nin-kẽem sẽn yaa logtore, t’a yʋʋr boond t’a Fred Hardaker n wa tõnd zakẽ wã. A ra yaa a Zeova Kaset soaba. Misioneer ning sẽn da kõ m doagdbã sɛbã me ra yaa a Zeova Kaset soaba. A Fred Hardaker yeela m ma t’a sã n data, a na n wat n zãmsd-a-la Biiblã. M ma zãgsame, la a yeelame tɩ  tõe tɩ mam datame. Semen ning sẽn pʋglã bala, m sɩnga Biiblã zãmsg ne saam-biig a Hardaker.

Semen a wãn poore, m sɩnga tigissã kẽnde. Ra yaa saam-biig a Hardaker kilinikẽ wã. Na maan a Zeova Kaset rãmb 12 n da tigimd taab be. B fãa yʋʋm ra vẽsgame. B kenga m daoodo, la b ges m yell wa b biiga. M ket n tẽrame tɩ b mi n wa zĩnda ne maam, tɩ d nensã tees taaba, tɩ d sõsd ne taab wa zo-rãmb meng-menga. Wakat kãng tɩ m sɩd ra rata woto.

Pa kaoos la saam-biig a Hardaker yeel-m tɩ m wat n yãagd-a tɩ d moond koɛɛgã ye. A wilg-m-la m sẽn tõe n ning disk fõnograf pʋgẽ to-to, tɩ koɛɛgã mooneg sasa bɩ m ningd sõss sẽn tik Biiblã, tɩ nebã kelgdẽ. B sẽn da yet sõss kẽer pʋgẽ wã ra pa noom neb sãnda ye. Ra yikda b sũy menga. La m sũur da yaa noog wʋsg m sẽn paam n taasd nebã koɛɛgã. M da nonga Biiblã sẽn yetã hal sõma, n da taasd nebã m sẽn bãngã ne yẽesem.

Zapõ sodaasã sẽn wa n segend n na n wa zab ne Ẽndã, tẽngã taoor dãmb sẽn da yaa Gãrãnd Bertayn nebã yikame n maneg n namsd a Zeova Kaset rãmbã. Yʋʋmd 1943 sẽoog kiuugã, namsgã taa ma-me. Tõnd lekollã dɩrɛgtɛɛr riga maam n yiisi. Ra yaa egiliiz ãngilikã wã taoor soab a ye. A yeela m ma tɩ mam sẽn kẽ a Zeova Kaset rãmbã tũudmã, m pa kõt karen-biis a taabã mak-sõng ye. Kẽesa m ma rabeem, t’a pʋd n yeel t’a pa le rat tɩ m kẽng a Zeova Kaset rãmbã nengẽ ye. A wa n kɩtame tɩ m kẽng Pesawaar, m baaba nengẽ. Yaa kilo 1370 ne d sẽn da beẽ wã. M tẽebã wa n boogame, m sẽn da pa le tõe n paam n tigim ne saam-biisã, la m paam siglgã sɛbã yĩnga.

Yʋʋmd 1947 wã, mam leba Karasi n na n tɩ bao tʋʋma. Daar a ye, m kẽnga saam-biig a Hardaker kilinikẽ wã n na n tɩ ges-a. A reega maam neere.

A ra tagsdame tɩ m waa tɩbsgo, n sok-m yaa: “Yaa bõe n tar-fo?”

M leokame yaa: “Pa m yĩnsã n dat tɩbsg ye. Yaa m tẽebã. M datame tɩ y zãms-m Biiblã.”

A soka maam yaa: “Fo ratame tɩ d sɩng dabʋre?”

Tɩ mam leok tɩ: “Sã n tõe bɩ d sɩng mas-masã.”

Baraar zabrã, tõnd zãmsa Biiblã, hal tɩ ra be yamleoogo. Kenga m raood sõma, tɩ m da neẽ tɩ m lebg n waa a Zeova nin-buiidã sʋka. M ma maana a sẽn tõe fãa sẽn na yɩl tɩ m da le kẽng a Zeova Kaset rãmbã nengẽ ye. La so-kãnga wã, m da yãka yam n na n tũ a Zeova. M dɩka m meng n kõ-a, n deeg lisg yʋʋmd 1947 sa-sik kiuug rasem 31 wã. Pa yã n kaoos la m lebg wakat fãa so-pakd ye. Rẽ tɩ m tara yʋʋm 17.

Yaa Kueta la b tʋm maam pipi. Pĩndã, Gãrãnd Bertayn sodaas tãb-sik n da be be. Yʋʋmd 1947 wã, b welga Ẽnd soolmã zĩis a yiibu, tɩ lebg Ẽnd ne Pakistã. * Rẽ kɩtame tɩ nebã tʋm nen-kɛglem tũudmã yʋʋr yĩnga. Yɩɩ sabab meng tɩ neb tus ka tɛk zoe n kẽng tẽns a taaba. A buud sẽn zĩnd pa waoog ye. Na maan neb milyõ 14 n zoe n bas b tẽngã. Moeembã sẽn da be Ẽndã zoe n kẽnga Pakistã, tɩ ẽndu-rãmbã la sik-rãmbã sẽn da be Pakistã wã kẽng Ẽnde. Ra yaa zũnd-zãnd menga. Wakat kanga, m kẽe tẽr n na n yi Karasi n kẽng Kueta. Tẽrã ra pida ne neba, tɩ m kong n pa yɩnga, n sog bũmb n yals so-toakã tõr la bala.

Kueta tẽngẽ wã, m bãnga zall so-pakd yʋʋr sẽn boond t’a George Singh. A ra taa yʋʋm 25. A George kõo maam wed-kʋdre, tɩ m mi n zombd n gilgd tẽngã sẽn da yaa tãmsã, n moond koɛɛgã. M mi n tusdame me. M da wae n moonda m yembre. Kiis a yoob ne a na n ta tɩ m zãmsda neb 17 Biiblã. Kẽer wa n lebga a Zeova Kaset rãmba. B nin-yend n da yɩ sodaas taoor soaba. A yʋʋr la a Sadiq Masih. A sõnga maam ne a George tɩ d lebg siglgã sɛb ne Urdu sẽn yaa Pakistã buud-gomdã. A wa n lebga koe-moond sẽn tar yẽesem.

Mam wa n leba Karasi n tɩ moond be. A Henry Finch ne a Harry Forrest n da yaa m tʋmd-n-taase. Yaa misioneer-dãmb sẽn da yi Gileyaad lekollã n nan wa. B sõnga maam tɩ m paam minim hal sõma! Vugri, m yãaga saam-biig a Finch tɩ d tɩ moon koɛɛgã Pakistã nug-rɩtg babgã. D kẽnga Urdu buudã neb tẽnsẽ, n tɩ sõs ne-ba. Ra yaa tãms  kɩremsẽ. B ra tʋlla ne b sũy fãa n bãng Biiblã sẽn yetã. Yʋʋm a yiib poore, ma-me kẽnga Gileyaad lekollã. Lekollã poore, m lebg n waa Pakistã. B ra mi n kɩtame tɩ m gilg n kaag tigimsã. M da bee misioneer-dãmbã roog sẽn da be Lahore wã ne misioneer-dãmb a tãabo.

Bʋko, misioneer-dãmbã sẽn da be Lahore wã ra pa zemsd taab ye. Rẽ n so tɩ yʋʋmd 1954, Betɛllã kɩt tɩ b na n toeem zĩisi. Yellã pʋgẽ, m pa maan gũusg ye. M yãka ned n sõnge. Kɩtame tɩ m paam kiblg hal sõma. Komsa m raood wʋsgo, tɩ m da getẽ tɩ m ka võor ye. M leba Karasi, la m wa n pʋd n yik n kẽnga Lõndre, Ãngeletɛɛre, n saagdẽ tɩ be m na n maneg n le sɩnga a Zeova tũub sõma.

Lõndr Betɛllã tʋm-tʋmdb wʋsg n da be tõnd tigingẽ wã. A Pryce Hughes sẽn da yaa Betɛllã yel-gɛtã gesa m yelle, n sõng-m hal sõma. Daar a ye, a togsa maam tɩ vugri, saam-biig a Joseph Rutherford sẽn da yaa a Zeova Kaset rãmbã siglgã taoor lʋɩtã goma yẽ, tɩ yẽ bao n na n gom n kõ a meng bʋʋm, t’a zab yẽ. Saam-biig a Hughes sẽn wa n togsd kibarã, a yõgemda a noore, tɩ ling maam. A yeelame tɩ yellã zaba yẽ sɩngrẽ wã, la tɩ yẽ wa n bãngame tɩ saglgã ra zemsame, la tɩ ra yaa a Zeova n wilgd yẽ a nonglem. (Ebre. 12:6) A goamã kẽe maam sõma, hal tɩ m le sɩng a Zeova tũub ne sũ-noogo.

Wakat kãng me la m ma yik n wa Lõndre. A sakame n na n zãms Biiblã ne a John Barr sẽn wa n lebg a Zeova Kaset rãmbã taoor lʋɩtb sull nedã. A wɩnga ne zãmsgã sõma. A reega lisg yʋʋmd 1957. M wa n bãngame tɩ nand tɩ m baaba maan kaalem, a ra zãmsda Biiblã ne a Zeova Kaset rãmbã.

Yʋʋmd 1958, m kẽe kãadem ne a Lene. Yaa Danemark saam-bi-poak sẽn wa n be Lõndre. Vẽk-n-yʋʋmdã, tõnd paama d pipi biiga. A yʋʋr la a Jane. D wa n paama kamb a naas n paase. M paamame me n lebg Fulam tigingã yel-gɛta. La a Lene laafɩ wã ra pa waooge, tɩ ra lebg tɩlɛ tɩ d yik n kẽng zĩig sẽn tʋʋl bilfu. Yʋʋmd 1967 wã, d yik n kẽnga Adelayiid, Ostrali soolmẽ wã.

Adelayiid tẽngẽ wã, kiris-neb sẽn paam vʋʋsem sõngã zaeeb bãmb 12 n da be tõnd tigingẽ wã. B ra lʋɩta taoor koɛɛgã mooneg pʋgẽ, n da tar yẽesem wʋsgo. Tao-tao bal tɩ d le sɩnga a Zeova tũub wa pĩndã.

Yʋʋmd 1979 wã la d nugẽ biigã rog-yã. A yʋʋr la a Daniel. A ra bẽeda bãag b sẽn boond tɩ tirzomi, hal tɩ ra namsd-a wʋsgo, tɩ logtoeembã ra yetẽ t’a pa  na n tõog n vɩɩmd n kaoos ye. Baa ne masã, yɩl n bilg yellã sẽn nams-d to-to wã yaa toogo. D maana d sẽn tõe fãa n na n ges a yell neere. La d ra geta d kamb a taabã me yelle. Võy a yiib n da be a Daniel sũurã pʋgẽ, n kɩt t’a mi n pa tõe n vʋʋs sõma, t’a yĩngã kõbg toeeme. Sã n wa yaa woto, d zoeta ne-a n kẽng logtor yirẽ. Baa a laafɩ wã sẽn da pa waoogã, a ra tara yam wʋsgo, la a nong neba. A ra nonga a Zeova wʋsg me. D sã n wa pʋʋsd n na n dɩ, a nong n sagda a nusã, n gõmsd a zugã, tɩ sã n sa bɩ a yeel ne a sũur fãa tɩ: “Amina!” Rẽ poor masã la a sɩngd rɩɩbo.

A Daniel sẽn wa n tar yʋʋm a naase, bãag sẽn boond tɩ lesemi n yõk-a. Maam ne a Lene yaamsã ra yaa wʋsgo. D naan n komsa raood menga. Kellẽ-la bilf tɩ m sũ-sãangã lebg bãaga. Daar a ye yʋngo, d sũyã ra sãama hal wʋsgo, tɩ d ra pa le tar raood baa bilf ye. Wakat kãng la a Neville Bromwich sẽn da yaa d tigims sull yel-gɛtã wa n na n ges-do. A mobga tõndo, la a yãbda. Baraarã, d fãa naaga taab n yãbe. A talla goam sẽn wilg t’a nong-d lame la a kʋmd d nimbãanega, tɩ bels-d hal tɩ d pa tõe n bãng n bilg ye. Yaa yʋng wakat a ye wã sẽnes la a loog-yã. Rẽ poor bilf la a Daniel maan kaalem. Yell pa be sẽn sãam tõnd sũur n ta a kaalmã ye. La d tõoga toogo, n kɩs sɩd tɩ baa fʋɩ pa tõe n welg a Daniel ne a Zeova nonglmã, baa kũumã menga. (Rom. 8:38, 39) Yaa ne d sũur fãa la d gũud wakat ning a sẽn na n vʋʋg dũni-paalgã pʋgẽ, tɩ d le paam taabã!—Zã 5:28, 29.

Bãag ning b sẽn boond tɩ avese (AVC) wã n yik maam hal naoor a yiibu, tɩ pa yɩ nana ye. Baa ne rẽ, m ket n yaa kãsem-soaba. M sẽn mao ne yɛl ninsã kɩtame tɩ m maneg n lebg ned sẽn kʋmd a taab nimbãanega, n dat n sõng-ba, sẽn yɩɩd fãa sẽn tar-b zu-loeesã. M gũusdame n da wa ning-b taal ye. M pʋd n sokda m meng yaa: ‘B vɩɩmã sẽn yɩ to-to, la b sẽn yã yɛl ninsã kɩtame tɩ b manesem wae n yaa wãn-wãna? Wãn to la m tõe n wilg tɩ b yell pak-m lame? Bõe la m tõe n maan n sõng-b tɩ b tũ a Zeova?’ Tigingã neb yell gesgã nooma maam wʋsgo! M sã n wa belsd m tẽed-n-taasã la m kengd b raoodo, m neeme tɩ wẽneg n belsda mam menga, la kengd m daoodo.

Yɩɩn-gʋlsdã ra yeela gomde, tɩ ma-me tagsd wa yẽ. A ra yeelame yaa: “Yɛl wʋsg sã n wa n be m pʋgẽ n namsd-ma, [a Zeova] sẽn belsd maamã kõt-m-la sũ-noogo.” (Yɩɩn. 94:19) A Zeova sõnga maam zu-loees toor-toor pʋgẽ. Zak pʋgẽ zu-loeese, namsg tũudmã yĩnga, yɛl sẽn pa yɩ wa m sẽn date, la sũ-sãamse. Hakɩɩka, a Zeova yɩɩ m Ba meng-menga!