A Roboam ba yɩɩ a Salomo. A Salomo rɩɩ naam yʋʋm 40, Israyɛlle. (1 Rĩm. 11:42) A maana kaalem yʋʋmd 997 sẽn deng a Zeezi rogmã. A kaalmã poore, a Roboam yii Zerizalɛm n kẽng Sikɛm sẽn be soolmã nug-rɩtgã. Be la nebã ra tigim taab n na n kõ-a naamã. (2 Kib. 10:1) Yãmb pa tagsd t’a ra yɛɛsda a pa na n tõog n maan wa a ba a Salomo sẽn da tar yam wʋsgã sɩda? Rẽ yĩnga, a ra miime tɩ pa na n kaoos la yɛl zĩndi, t’a sẽn na n welg-b to-to wã wilg a sã n tõe n welga yel-kɛgems sɩda?

A Roboam tog n da neeme tɩ soolmã neb sũy pa noom ye. Nin-buiidã taoor dãmb wa n kẽnga a nengẽ, n tɩ togs-a bũmb kẽer sẽn da sãamd b sũuri. B yeel-a-la vẽeneg yaa: “Yãmb ba wã rag n namsda tõnd wʋsgo. Dẽ wã, tõnd kot-y lame tɩ y yols tõnd ne namsg ning y ba wã sẽn dag n namsd tõndã. Woto, tõnd na n yɩɩ yãmb tʋmtʋmdba.”—2 Kib. 10:3, 4.

Tõe t’a Roboam ra getame t’a pa tar a sẽn na n maan ye. A sã n sak nin-buiidã sẽn datã, tõe tɩ yẽ ne a zakã rãmb la na-yirã neb a taabã pa na n le paamd teed nins fãa b sẽn da minim n paamdẽ wã ye. Tõe me tɩ yɩ tɩlɛ tɩ b boog b sẽn da minim n kot nin-buiidã bũmb ninsã. La a sã n zãgs nin-buiidã sẽn datã, tõe tɩ b na n tõdga a naamã. Woto wã, a maanda a wãna? A reng n tɩ yãa nin-kẽemb nins sẽn da yɩɩ a ba wã sagendbã n kos saglse. La a basa b sẽn yeelã, n tɩ kos a rog-taasã saglse. A tũu bãmb saglsã, n yãk yam n na n maneg n weoog nin-buiidã. Ad a sẽn yeel nin-buiidã: “M ba rag n namsa yãmba, la mam na n paasa yãmb namsgã tɩ yɩɩg rẽndã, m ba rag n sɩbga yãmb ne kalwaase, la mam na n sɩbga yãmb ne namse.”—2 Kib. 10:6-14.

Yam-bʋg la d tõe n dɩke? Naoor wʋsgo, kãsembã, rat n yeel tɩ kiris-neb nins tẽeb sẽn bɩ wã saglsã kelgr yaa sõma. B sẽn zoe n mi bũmb ninsã kɩtame tɩ b tõe n bãng yam-yãkr kẽer sẽn na n baas to-to, n tik rẽ n kõ-d saglse.—Zoob 12:12.

Nin-buiidã sẽn tõdg a Roboam naamã, a tigma a tãb-biisã n na n tɩ zab ne-ba. La a Zeova kɩtame t’a no-rɛɛs a Semaya yeel-b yaa: “Bɩ y ra kẽng n tɩ zab ne y saam-biisã sẽn yaa Israyɛll nebã ye! Bɩ ned kam fãa lebg n kuil a yiri, bala, yaa maam n kɩt tɩ yellã yɩ a woto.”—1 Rĩm. 12:21-24. *

A pa yã n sɩng zabrã meng ye. Tags-y n ges-y yel-kãnga sẽn nams a Roboam to-to! Nin-buiidã tagsg na n yɩɩ wãn ne rĩmã? Yẽ n yeel t’a na n sɩbga nebã “ne namse,” tɩ pa yã n kaoos t’a wẽneg n sak n bas b kɩɩsgã taale. (Ges-y 2 Kibay 13:7.) Baa ne rẽ, rĩmã ne a tãb-biisã “saka Sẽn-Ka-Saab koɛɛgã n maan wa b sẽn yeelã n lebg n kuili.”

Yam-bʋg la d tõe n dɩke? Yaa sõma tɩ d sak Wẽnnaam, baa sã n tõe n kɩt tɩ nebã tags tɩ d sẽn maandã pa tar neng ye. Wẽnnaam sakr kɩtdame tɩ d paam a lohorem la a barka.—Tõo. 28:2.

La a Roboam sẽn sak a Zeova noorã, baasa wãna? A sẽn sak n pa kẽng zabrã poore, a mee tẽns sẽn tar pãnga, Zida la Bẽnzame soolmẽ wã. Yaa bu-kãensã a yiibã n da ket n yaa yẽ soolem. A kɩtame tɩ tẽn-bãmb “tall pãnga.” (2 Kib. 11:5-12) Sẽn tar yõod n yɩɩda, a ra wa n sakda a Zeova noyã. A Zeroboam n da yaa buud piigã rĩmã. Bãmb sẽn wa n kẽ bõn-naandsã pʋʋsgã, wʋsg zoe n waa Zerizalɛm sẽn na yɩl n kell n tũ a Zeova. Nin-bãmbã wa n ‘paasa a Salomo biig a Roboam raoodo.’ (2 Kib. 11:16, 17) Dẽnd a Roboam sẽn sak a Zeova wã, paasa a soolmã pãnga.

A Roboam naamã sẽn wa n paam pãngã, a maana bũmb ned sẽn da pa tẽede. A basa a Zeova noyã sakre, n kẽ bõn-naands pʋʋsgo. Bõe yĩnga? D pa mi sã n yaa a ma wã sẽn yaa Amo nedã raab la a tũ ye. (1 Rĩm. 14:21) Sẽn yaa a soab fãa, nin-buiidã maana wa yẽ. Rẽ n so t’a Zeova bas tɩ Ezipt rĩm a Sisak rees Zida tẽns wʋsgo, baa ne a Roboam sẽn da me lal-bɛd n gũbgã.—1 Rĩm. 14:22-24; 2 Kib. 12:1-4.

Sẽn maneg n lebg yellã, yaa a Sisak sẽn wa n ta Zerizalɛm sẽn yaa na-tẽngã, n dat n zab n deeg-a wã. Wakat kãng la Wẽnnaam kɩt t’a no-rɛɛs a Semaya na n tɩ taas a Roboam ne Zida nanambsã a koɛɛga. A yeel-b lame yaa: ‘Yãmb basa maam! Woto yĩnga, mam me basda yãmb rĩm a Sisak nugẽ.’ A Roboam sẽn wʋm koɛɛgã, a manesem yɩɩ wãna? A maana bũmb sẽn sek pẽgre. Ad Biiblã sẽn yeele: “Israyɛll nanambsã ne rĩmã sika b mense, la b yeelame: ‘Sẽn-Ka-Saab yaa tɩrlem soaba!’” Rẽ n so t’a Zeova fãag a Roboam ne Zerizalɛm nebã.—2 Kib. 12:5-7, 12.

A Roboam kell n yɩɩ buud a yiibã naaba. Nand t’a maan kaalem, a yãka a bi-ribl a Abiya t’a na n ledg-a, la a kõo a kom-dibli a taabã kũun wʋsgo. Wõnda yaa sẽn na yɩl tɩ b ra wa zab ne a Abiya naamã poorẽ ye. (2 Kib. 11:21-23) Ad a talla yam n yɩɩd a naamã sɩngrẽ wã.

Baa a Roboam sẽn maan bũmb kẽer sẽn sek pẽgrã, a konga Wẽnnaam lohormã. Biiblã goma a yelle, n yeel t’a “maana sẽn yaa wẽnga.” Bõe yĩng tɩ b yeel woto? Bala, “yẽnda ka bao Sẽn-Ka-Saab ne a sũur fãa ye.”—2 Kib. 12:14.

Tags-y n ges-y: A Roboam ra sakda Wẽnnaam wakat ninga. A maana bũmb kẽer n sõng a Zeova nin-buiidã menga. La a pa bao ne a sũur fãa n na n ta a Zeova yam, n paam zood sõma ne-a ye. Kɩtame t’a wa maand sẽn yaa wẽnga, la a kẽ bõn-naands pʋʋsgo. Tõe tɩ y sok y meng yaa: ‘A Roboam sẽn wa n sak a Zeova koɛɛgã, yaa a sẽn da sɩd tek yam n dat ne a sũur fãa n ta a Zeova yam bɩ, bɩ yaa neb a taabã raab bal la a tũ-yã?’ (2 Kib. 11:3, 4; 12:6) A wa n le maanda sẽn yaa wẽnga. A pa rɩk a yaab a Davɩɩd togs-n-taar baa-baa. Yaa sɩd t’a Davɩɩd ra mi n tudgame, la a tũu a Zeova a vɩɩmã tõre, n da nong-a ne a sũur fãa.  A teka yam n kos sugri, yel-wẽn nins a sẽn da maanã yĩnga.—1 Rĩm. 14:8; Yɩɩn. 51:3, 19; 63:2.

D tõe n dɩka yam a Roboam kibarã pʋgẽ. Ned sã n get a zak rãmb yell neere, la a maood n maand bũmb a taab sẽn yaa sõma, seka pẽgre. La d sã n dat n paam Wẽnnaam lohorem, sẽn tar yõod n yɩɩd yaa d sẽn na n tũ-a ne d sũur fãa, n da tol n bas-a ye.

Bũmb sẽn na n sõng-do, yaa d sẽn na n mao tɩ wakat fãa bɩ d nong a Zeova ne d sũur fãa. Wala makre, ned sã n pa rat tɩ bugum ki, yaa tɩlɛ t’a paasd raad wakat fãa. Woto me, d sã n pa rat tɩ d sẽn nong Wẽnnaam to-to wã booge, yaa tɩlɛ tɩ d karemd a gomdã daar fãa, n bʋgsd d sẽn karmã zugu, la d wɩngd ne pʋʋsgo. (Yɩɩn. 1:2; Rom. 12:12) D sẽn nong a Zeova wã, d na n data ne d sũur fãa n maan sẽn tat a yam bũmb fãa pʋgẽ. D sã n wa tudg me, d na n teka yam ne d sũur fãa n kos sugri. D pa na n maan wa a Roboam ye. D na n kell n paa tũudum hakɩɩkã pʋgẽ.—Ziid 20, 21.